MATHAYO 20

Ngerekano ya aruti ngûgî mûndaani

1Yiesû eera arutwa baake, “Ûnene bwa îgûrû bûkari ta mwene mûciî ûra aaraûkire kuuma rûkîîrî mûno, aathi aacûa antû ba kûmûrutîra ngûgî mûndaani wake wa ncabiibû. 2Akûboona na baagwatanîra akaabarîa îrîi rîa gîîntugû, aboonia mûnda.

3“Aacooka aumagarûka kaîrî ta thaa ithatû. Aathi thokooni oona antû barûngi woogu mana gûtarî bu bakûrûtha. 4Abeera, ‘Kinya biû îthiini bûndutîre ngûgî mûndaani nkabûrîa bûra kwagîrîte.’ 5Beetîgîîria baathi.

“Aacooka kaîrî ta thaa thiita na ta thaa kenda aacûa bangî. 6Ta thaa kûmi na îmwe aumagarûka kaîrî eethîra bangî barûngi. Abaûria, ‘N'ata n'ûntû bwatinda bûrûngi aaga mûthenya unthe gûtarî bu bûkûrûtha?’

7“Antû babu bamwîra, ‘Tûtiroona muntû wa gûtwaa ngûgî.’

“Muntû ûyu abeera, ‘Wana biû tûthiini bûkaandutîre ngûgî ya mûnda.’

8“Ûgoro bûgûkinya mwene mûnda eera mûrûngamîîri wa ngûgî yake, ‘Îta aruti ngûgî ûbee mbia ciao, na wanjîîrie na bara baaya rîa mûthia ûrigie na bara baayire rûkîîrî.’

9“Bara baayire thaa kûmi na îmwe baaya baarîwa wakîra muntû îrîi rîa ntugû yûyûri. 10Bara baayire rûkîîrî bakwona ûgu beerîgîîra bakaarîwa mbia inyingî nkûrûki yao. Îndî wana bo baarîirwe îrîi rîa ntugû. 11Bakwona mbia ira beewa baanjîîria kûnung'unîra mwene mûnda 12bakîmwîraga, ‘N'ata ûûmba gûtûrîa bûmwe na antû barutîîte ngûgî îthaa rîmwe na tûtindîîte kûthithina mûthenya unthe tûkîrûngûraga i riûa!’

13“Mwene mûnda aacookeria ûmwe wao amwîra, ‘Bai, ntikûbûbîtîria. Tûtigwatanîîre nkaabûrîa îrîi rîa ntugû? 14Thûkia bira birî biaku ûthi. I kwenda gwakwa ndatûmîra kûrîa bara baaya rîa îrigia bûmwe naabi. 15Ga ntaûmba kûrûtha bûra nkeenda na mbia ciakwa? Kana i rûriitho bûkûbeegua n'ûntû bwa kûbua gwakwa?’ ”

16Yiesû eera arutwa baake, “Bara barî mbere bagaatuîka ba mûthia, bara barî ba mûthia batuîke ba mbere.”

Yiesû akîarîîria rîa mathatû kûûragwa gwake

(Mko. 10:32-34; Ruka 18:31-34)

17Yiesû bathiîte Njerusaremu, eeta arutwa bara baake îkûmi na baîrî gataaria. Abeera, 18“Îîndî tûthiîte Njerusaremu na Mwana wa Muntû agaakunyanîrwa anenkanîrwe kîrî *athînjîri bara banene ba Ngai na aarimû ba watho bamûtuîre kûûragwa. 19Na bakamûnenkanîra kîrî antû batarî Ayaundi bamûnyûrûnte, bamûringe ibooko, bamwambe. Îndî akaariûka ntugû ya ithatû.”

Bûra mwekûrû wa Cabendi eendaga

(Mko. 10:35-45)

20Mwekûrû wa Cabendi aathi kîrî Yiesû arî na aana baake baîrî. Aaturîria Yiesû maru akîenda amûrûthîra ûntû. 21Yiesû amûûria, “N'ata ûkwenda?”

Mwekûrû ûyu amwîra, “Ndîenda uuga aana baba baakwa bagaakara amwe naawe ûneneeni bwaku, ûmwe rûteere rwaku rwa ûrîo na ûyû ûngî rwa ûmotho.”

22Yiesû eera aana babu, “Biû bûtikûmenya kîra bûkûromba. Bûkaûmba kûnyua gîkombe kîra nkaanyua gîa kûnyamaarua?”

Bamûcookeria bamwîra, “Yîî, tûkaûmba.”

23Yiesû abeera, “Gîkombe kîra nkaanyua bûgakînyua, îndî ti niû mbagîrîtwe nthuura mbuga i ngania agaakara rûteere rwakwa rwa ûrîo kana rwa ûmotho. Naagu kûthuuranîrîtwe gûkarwa i bara Baaba ataarîîte.”

24Arutwa bara bangî îkûmi bakwîgua bûra Njakubu na Njoana beendaga babathûûra. 25Yiesû abeeta baayanga akubî n'we. Abeera, “Bara barî anene ba nthîgûrû îno beendaga kwonia antû i bo anene, atongoria ba nthîgûrû beekumagia kwonia antû i bo atongoria, wata bûra bwiyî. 26Îndî biû bûtibatîîrue bwîgua bûkari ûgu. Ûra wacienu akwenda gûtuîka mûnene natûmîkîre bara bangî. 27Ûra akwenda gûtuîka wa mbere natûmîkîre bonthe, 28ta bûra Mwana wa Muntû ataaya gûtûmîkîrwa. Aayire gûtûmîkîra antû na kûruta mwoyo wake wonokia antû baingî.”

Yiesû ooria ntûngi ciîrî

(Mko. 10:46-52; Ruka 18:35-43)

29Yiesû na arutwa baake baumîîte bwa taûni ya Njeeriko, antû baingî mûno bamûthingata. 30Ikwarî na antû baîrî ntûngi baakari rûteere rwa njîra. Bakwîgua i Yiesû aakûrûkîîte baanjîîria kûmwîta na inya bakiugaga, “Mwathani, Mwana wa mûciî wa Ndaundi, twîgue kîao!” 31Antû baingî baanjîîria kûbakaania bakîbeeraga bakire, îndî bataakira. Baûkîîria tûyû na inya nkûrûki bakiugaga, “Mwathani, Mwana wa mûciî wa Ndaundi, twîgue kîao!”

32Yiesû aarûngama abeeta. Abaûria, “N'ata bûkwenda mbûrûthîra?”

33Ntûngi inu ciamwîra, “Mwathani, itûkwenda tûtua kwona.” 34Yiesû abeegua kîao. Aatambûrûkia njara yake abatonga meetho. Nthûti îmwe baatua kwona bamûthingata.

Currently Selected:

MATHAYO 20: thk

Highlight

Copy