MATHAYO 9

Yiesû ooria kîonje

(Mko. 2:1-12; Ruka 5:17-26)

1Yiesû aatwa îtarûûni aaringanîria rûgongo rûra rûngî, aakinya taûni îra aakaraga. 2Antû bamwe baaya bakamatîîte kîonje na mamaamîro ma kîo bakînintîîte kîrî we. Yiesû akwona wîtîgio bwao eera kîonje gîku, “Aba, ûtikaamake. Ûkûrekerwa meeyia maaku.”

3Aarimû bamwe ba watho baanjîîria kûthûgaania, “Muntû ûyû nakwîthûkia taka arî Ngai!”

4Yiesû akûmenya bûra baathûgaanagia, abaûria, “I mbi n'ûntû bûkûthûgaania mathûgaania maathûûku ûgu nkorooni cienu? 5I bûrîkû bûrî na inya? I kuuga, ‘Ûkûrekerwa meeyia maaku,’ kana i kuuga, ‘Ûkîîra ûthi?’ ” 6Yiesû abeera, “Kaingo bûmenya Mwana wa Muntû arî na watho bwa kûrekera antû meeyia gûkû nthîgûrû, inkûbwonia.” Yiesû eera kîonje gîku, “Ûkîîra ûkamate mamaamîro maaku wînûke.” 7Kîonje gîaûkîîra kîenûka.

8Antû bakwona ûgu baaguaya mûno. Baakumia Ngai ûra eete antû inya ta înu.

Mathayo eetwa i Yiesû

(Mko. 2:13-17; Ruka 5:27-32)

9Yiesû athiîte woogu oona muntû eetagwa Mathayo akari nthî ara aakaraga akîrûngithagia ûgooti. Yiesû amwîra, “Nthingata!” Mathayo aûkîîra amûthingata.

10Yiesû akari mûciî kwa Mathayo akîrîyaga irio, arûngithia ûgooti baingî na eeyia baaya baanjîîria kûrîyanîra n'we amwe na arutwa baake. 11*Abarisai bakwona ûgu baûria arutwa ba Yiesû, “I kî gîgûtûma mwarimû wenu arîyanîra na arûngithia ûgooti na eeyia?”

12Yiesû akwîgua bakîûria ûgu, abacookeria abeera, “Tika antû batarî baayie beendaga kûragûrîrwa i ndagitaarî, bara baayie i bo beendaga kûragûrîrwa. 13Îthiini bûkeerutane mîgambo îno îriuga ata, ara ntheto ya Ngai yugîîte, ‘Kîra nkwenda n'antû beeganagua kîao, ntirî bata na kîgongwana.’#Osea 6:6 Ntaaya gwîta bara baagîru, ndaayire n'ûntû bwa eeyia.”

Gûtîîrîra kûrîa irio n'ûntû bwa maromba

(Mko. 2:18-22; Ruka 5:33-39)

14Kagiita kamwe athingati ba Njoana Mûbaatithania baathiire kîrî Yiesû bamûûria, “I kî n'ûntû tiû na *Abarisai tûtîîragîra kûrîa irio n'ûntû bwa maromba, îndî arutwa baaku bo batitîîragîra?” 15Yiesû abaûria, “Bwaûmba kwîrîgîîra antû bara beete wikiini barega kûrîa rîra mûgûrani arî oogo? Îndî kûrî kagiita gagaakinya mûgûrani arutarutwe kîrî bo. Rîru nwa barege kûrîa irio.

16“Gûtirî muntû eekagîra nguo kîraka na gîtaame gîtarî gîkûrû ataambîîte gûkîbûûra n'ûntû nguo înu yabûûrwa gîtaame gîku igîkaamîkuuyia îgendeerie. 17Na kaîrî, gûtirî we eekagîra ûkî bwa kûrugwa warîru nceemaani înkûrû n'ûntû nceema nîgaatûûmûka yûûre mana na ûkî bwene. Ûkî bwa kûrugwa warîru bwîkagîrwa nceemaani îtarî nkûrû kaingo gûtarî kîo kîûra.”

Yiesû ooria kaarî ka Njairû na mûka aaruaga nthakame

(Mko. 5:21-43; Ruka 8:40-56)

18Yiesû akîaragia woogu, mûtongoria ûmwe wa *sinagoogi akûmwona aaya kîrî we. Aaturia maru mbere yake, amwereka mûno amwîra, “Kaarî gaakwa i weendî gaakua. Itû ncû tûthi ûkaigîîre njara kariûke.” 19Yiesû na arutwa baake baûka bamûthingata.

20Bathiîte mûka ûmwe aaya. Mûka ûyu naanyamaarîîtue mûno i ndwari ya kûrua nthakame bantû a mîanka îkûmi na îîrî. Aaya bwa nyuma ya Yiesû, aatongithia mûthia wa nguo yake 21akîbîîraga na nkoro, “Ngatonga nwa nguo yake yonka nkaabua.”

22Yiesû aûndûka nyuma amwîra, “Ûtikaamake, mwarî wakwa. Wîtîgio bwaku bûgûtûma woora.” Na nthûti weenu mûka ûyu oora.

23Yiesû bagûkinya kwa mûtongoria ûyu, aathûngîra nyomba. Eethîra augia ba mbeebe#9:23 Kûringana na kîîwîthîre kîa Ayaundi, bara baiyî kuugia mbeebe bwega mûno beetagwa mûciî wa Mûyaundi, ûra ûkuîtwe muntû, bakaugia mbeebe kwonania kûrî na kîîthikîîro mûciî ûyu. na kîrîndî kiingî mûno gûku ndeni gîkîyogaga. 24Abeera, “Umaani. Kaarî gaka ti gakuû ikamaami.” Yiesû akuuga ûgu boona ta gûtarî bu augaga. 25Antû bakûrutwa nja Yiesû aathûngîra kûra kaarî gaku kaarî, akagwata njara agaûkîîria. 26Nkuma înu yatambua gûntû gûku kunthe.

Yiesû ooria ntûngi ciîrî

27Yiesû akuuma agu athiîte, ntûngi ciîrî ciamûthingata ikiugagîîria na inya, “Mwana wa Ndaundi, twîgue kîao!”

28Akûthûngîra nyomba, ntûngi inu ciîrî ciaya kîrî we. Aciûria, “Ibûgwîtîgia ndaûmba kûbworia?”

Ntûngi inu ciamwîra, “Yîî, waûmba, Mwathani.”

29Yiesû aatambûrûkia njara abatonga meetho. Abeera, “Kûrookara ûgu bwîtîgîîtie.” 30Baatua kwona. Yiesû aacooka abakaania mûno abeera, “Bûtikeere muntû mantû mama.” 31Antû bakuumagarûka baariûnga na ntûûra bagîtambagia nkuma ya Yiesû gûntû gûku kunthe.

Yiesû ooria maamu

32Warîra Yiesû bakiumagarûka nyomba aareeterwa maamu aarî na kîrundu kîîthûûku. 33Kîrundu gîku gîkwîngatua muntû ûyu aanjîîria kwaria. Kîrîndî kîarigara kîauga, “Aba, gûtooneka ûntû ta bûbû kaîrî Isiraeri!”

34*Abarisai bauga, “I mûnene wa irundu biithûûku eeyaga muntû ûyû inya îra eengatagia n'yo irundu biithûûku.”

Yiesû eegua kîrîndî kîao

35Yiesû aariûnga taûni na ntûûra cionthe akîrutanaga antû *masinagoogiini maao na agîtûmagîîria ntheto îmbega ya ûnene bwa îgûrû, na akîoragia antû mbayua cia mîthemba yonthe. 36Eegua antû kîao akwona bûra baanyamaarîîte bûgana banyageere ta ng'ondu itarî na mûrîîthi. 37Yiesû eera arutwa baake, “Maketha i maingî, îndî akethi i baakai. 38Kwoogu rombaani Mwathani wa maketha atûme akethi îkethaani rîake.”

Currently Selected:

MATHAYO 9: thk

Highlight

Copy