MAARIKO 2

Yiesû ooria muntû aarî kîonje

(Math. 9:1-8; Ruka 5:17-26)

1Nyuma ya ntugû inkai, Yiesû aacooka Kaperinaumu kaîrî. Antû bakûmenya naarî gûku, 2beethîrana kwa wingî mûno mûrangooni wa nyomba înu Yiesû aarî kwaga kinya webero. Yiesû akîbatûmagîîria kiugo, 3antû bana baaya bakamatîîte muntû aarî kîonje bamûnintîîte kîrî Yiesû. 4N'ûntû bwa antû kwingîa, bataûmba gûkinyithia kîonje gîku ara Yiesû aarî. Baatwa baaromora rûûgûrû rwa nyomba înu batarithîîrîîtie ara Yiesû aarî. Bakûromora, beendamîîria kîonje gîku oogo wakîrî mamaamîrooni. 5Yiesû akwona bûra antû babu beetîgîîtie bûgana, eera kîonje gîku, “Ûkûrekerwa meeyia maaku, aba.”

6Aarimû bamwe ba watho baakari agu bakwîgua ûgu, baatua kûthûgaania na nkoro beebûûria, 7“N'ata muntû ûyû akwenda kwonania? Nakwîthûkia taka arî Ngai? Anga ti Ngai wenka aûmba kûrekera muntû meeyia?”

8Yiesû aamenya bûra baathûgaanagia. Abaûria, “I mbi n'ûntû bûkûthûgaania ûgu? 9I bûrîkû bûûthû? I kwîra kîonje gîkî, ‘Ûkûrekerwa meeyia maaku,’ kana i gûkîîra ‘Ûkîîra ûkamate mamaamîro maaku ûthi’? 10Kaingo bûmenya Mwana wa Muntû arî na watho bwa kûrekera antû meeyia maao gûkû nthîgûrû, inkûbwonia.” Yiesû eera kîonje gîku, 11“Ûkîîra ûkamate mamaamîro maaku wînûke.”

12Nthûti weenu kîonje gîku gîaûkîîra bacûûbîîte, gîakamata mamaamîro kîenûka. Antû bakwona ûgu baarigara mûno. Baakumia Ngai bakiugaga, “Tûtoona ûûgû kaîrî!”

Raawî eetwa i Yiesû

(Math. 9:9-13; Ruka 5:27-32)

13Yiesû aacooka rûteere rwa îria rîa Gariiri kaîrî. Kîrîndî gîa antû kîathi kîrî we, Yiesû abarutana. 14Akuuma agu, Yiesû oona muntû eetagwa Raawî akîrûngithagia ûgooti, akari nthî ara aakaraga. Îthe eetagwa Arubayo. Yiesû amwîra, “Nthingata!” Raawî aûkîîra amûthingata.

15Nyumaani Raawî eeta Yiesû na arutwa baake gwake. Arûngithia ûgooti baingî na eeyia baaya bathingatîîte Yiesû, baanjîîria kûrîyanîra n'we. 16*Abarisai bamwe baarî aarimû ba watho bakwona Yiesû akîrûtha ûgu, baûria arutwa baake, “I kî gîgûtûma arîyanîra na arûngithia ûgooti na eeyia?”

17Yiesû akwîgua aarimû babu ba watho bakîûria ûgu, abacookeria abeera, “Tika antû batarî baayie beendaga ndagitaarî. Bara baayie i bo beendaga kûragûrîrwa. Ntaaya gwîta bara baagîru, ndaayire gwîta bara eeyia kaingo beerira.”

Gûtîîrîra kûrîa irio n'ûntû bwa maromba

(Math. 9:14-17; Ruka 5:33-39)

18Kagiita kamwe athingati ba Njoana Mûbaatithania na ba *Abarisai ibaatîîrîrîte kûrîa irio. Antû bamwe baathi kîrî Yiesû bamûûria, “I kî n'ûntû arutwa ba Njoana Mûbaatithania na ba Abarisai bo batîîragîra kûrîa irio n'ûntû bwa maromba, îndî baaku batitîîragîra?”

19Yiesû abaûria, “Bwaûmba kwîrîgîîra antû bara beete wikiini barega kûrîa ntugû îra mûgûrani arî na wiki? Batitîîrîra kûrîa ntugû înu mûgûrani arî na wiki. 20Îndî rîra kagiita gagaakinya mûgûrani arutwe kîrî bo, rîru i rîo baûmba gûtîîrîra.

21“Gûtirî muntû eekagîra nguo înkûrû kîraka na gîtaame gîtarî gîkûrû ataambîîte gûkîbûûra, n'ûntû nguo yabûûrwa gîtaame gîku igîkaamîkuuyia îgendeerie. 22Na kaîrî, gûtirî we eekagîra ûkî bwa kûrugwa warîru nceemaani înkûrû, n'ûntû ibûgaatûûmûra nceema înu bûûre mana na nceema mbene. Ûkî bwa kûrugwa warîru bwîkagîrwa nceemaani îtarî nkûrû.”

Yiesû Mwathi wa Sabatû

(Math. 12:1-8; Ruka 6:1-5)

23Ntugû îmwe ya *Sabatû Yiesû na arutwa baake ibaakûrûkîîrîîte mîndaani. Bathiîte woogû, arutwa baake baanjîîria kûûrûûra ngano barîa. 24*Abarisai bakwona bakîrûtha ûgu, beera Yiesû, “I mbi n'ûntû bakûrûtha bûra bûtabuîrîîte kûrûthwa ntugû ya Sabatû?”

25Yiesû abeera, “Ka bûtaathooma bûra Ndaundi aarûthire akwîgua yûûra barî na bara baarî na bo? 26Aathiire nyomba ya Ngai kagiita kara Abiatharû aarî mûthînjîri wa Ngai ûra mûnene, aarîa mîgaate îra mîtheru na aarûmia bara baarî na bo, na ibwiyî mîgaate înu itikîrûmwa i muntû ûngî tatiga athînjîri ba Ngai.” 27Yiesû abeera, “Ntugû ya Sabatû îrî oogo n'ûntû bwa muntû, îndî muntû atirî oogo n'ûntû bwa ntugû ya Sabatû. 28Kwoogu Mwana wa Muntû n'we Mwathi wa Sabatû.”

Currently Selected:

MAARIKO 2: thk

Highlight

Copy