Matìù 20
20
Èngà̧teme ane bòt ko fàꞋa mbȩ la
1Yesò ghɨ̀ ale, mè nê “Kèfɔ̧̀ Mbɔ̧ɔ̧mà wu mbɨ̀Ꞌɨ̀ ànəa wòt kǒ, tà li ndzəè nga àbȩ a ntɔtetsɔ̌Ꞌ ekɨ bòt bɔ̀ɔ faꞋa a mbȩ zi la. 2Tà ghǎ ale ndàŋkè bɔ̂ bɔfàꞋ bu nê yea ŋa wɔb àkwȩkab yeamɔꞋ ane àliabȩ mbɔ̂ ntsà àwɔb a mbȩ zi.
3“È lɔꞋɔ me wu ane nyèm tebəèꞋa a ntɔtetsɔ̌Ꞌ, tà mè ndzəè ngà àsà̧aã èwen ndzě bòt ko bɔ tɨ̧ɨ̧te ka wua ngɨ̀à àghɨ la, 4shu abua yɔb nê ‘Bɨ̀ ghǎ a mbȩ me faꞋa mɨ̧̂ ko maa ŋa wɨ̧ àghɨa a kuꞋu ane àfàꞋ àyɨ̧ la.’ Mbɨ̀Ꞌɨ̀ tà làꞋ ale la bɔ bê ndɔ̀Ꞌ me ghǎ. 5È tseke tè me wu ane nyèm èghem ntsɔ̀b tebe nè nyèm tetat nèngû̧, tà mè ndzəè ngà ngɨ̀ wuê a èlɨ mbɔŋ. 6È tseke tè mè me wu mbɔŋe ane nyèm tetà̧â̧ àfɨꞋa nyèmtèsi, tà mè ndzəè nga àsà̧aã èwen ndzě bòt ko bɔ̀ bele abot bɔ tɨ̧ɨ̧te la, mbììte awɔb nê ‘Bɨ̀ ghɨa gha àdziꞋ yaa mbɨ̀Ꞌɨ̀ ètsəꞋ e li ntsi la kà ye àghɨa bɨ wua ngɨ̀à la à?’
7“Bɔ bɨ̀ɨ̀lè nê, ‘Wu ndɨ wòt tà kɨa waa eŋa awa àfàꞋ la è ntsě la. Tà tsiꞋi shu abua yɔb nê:
“ ‘Bɨ̀ ghà yɨ̧ a mbȩ me faꞋa mɨ̧̂.’
8“Nyèm tseke te fen, tǎt mbȩ yu tɔ àtsəa bɔfàꞋ yu shu abua tò nê tà tɔ bɔfàꞋ bu ŋà èkab àfàꞋ wɔb. Nê taa me ŋa, tà buꞋu ane bòt bɔ ghɨ̂ nkɨ̀Ꞌɨ̂ akwèn la ngà ndìà ane e bu be ghɨ̂ nkɨ̀Ꞌɨ̂ a mbì la.
9“Ale, tà ghɨ a èlɨ mbɔŋ ŋà àkwȩkab yeamɔꞋ, yeamɔꞋ abua bòt bu bɔ ghɨ̂ mbùꞋu àfàꞋ mbɔŋe ane nyèm tetà̧â̧ àfɨꞋa nyèmtèsi la. 10Bòt bu bɔ ghɨ̂ mbùꞋù àfàꞋ a mbì la e kɨꞋɨ me mɨ̀ɨ̀tè nê bɔɔ ŋa wɔb èkab nyaŋ, me ye bɔ ŋa wɔb wuê àkwȩkab yeamɔꞋ, yeamɔꞋ. 11Bɔ nɨ ale, mbùꞋ me lèmte tǎt mbȩ wu 12shua nê ‘Bòt baa bɔ tsiꞋi nɨa wɔb akwèn la e faꞋa wuê ane kètem àfɨ̀Ꞌ. Bàa wu ba yaã ŋeꞋe àfaꞋ mbùŋè àwa a èten nyèm kèkweelè mbɨ̀Ꞌɨ̀ ètsəꞋ e li ntsi la e bɔ wuê àkwȩkab yeamɔꞋ, yeamɔꞋ mɨ̧̂.’
13“Tǎt mbȩ wu shu abua wòt kǒ wemɔ̀Ꞌ ane yɔb nê ‘Shu̧, ànəa kàbɔ̀ŋ ko mâ ghɨa ane yê la a tsě. Ka ba nè e yaã ndàŋkè nê maa lɔꞋɔ eŋa wê àkwȩkab ane àfaꞋ àliabȩ à? 14È wu ale, nɨ àghɨa è wuê ayê la nɨŋ me ghǎ. E ŋa wòt waa mâ tsiꞋi nɨa tò akwèn la àghɨa mâ ŋa abua yê la ane mènkɔ̀ŋke mɔ̧. 15Tè e mbakà bɔ mètàŋ e nɨ èkab am e ghɨ̀ àghɨa mâ kɔ̀ŋkè la à? Mâ ghaꞋa àbu am abua bòt baa ale, a ghɨ̀ na ka me saa àwê à?’ ”
16Yesò ghɨ̀ ale, ndìà èngà̧ waa nê “Wu wuê a èlɨ mbɔŋ bòt bɔ̀ɔ ndzea wɔb nê bɔ wu a mbì àfɨ̀Ꞌ yaa la àa li tsiꞋi akwèn, èbe bɔ̀ wu akwèn la e tsiꞋi a mbì la.”
Ngò̧ tetat, Yesò làꞋà ànəa èvə li la
(Mk 10:32-34; Lk 18:31-34)
17Mbɨ̀Ꞌɨ̀ Yesò nàa nkɔ̀Ꞌɔ ngà a Jèlusalèm la, tà tɔ bɔkatè bi bu ntsɔ̀b babe la, bɔ səèꞋtè àwɔb tà shu abua yɔb nê 18“Bɨ̀ zə, ba wua nkɔꞋɔ ngà a Jèlusalèm, àdziꞋa bɔ̀ɔ baãaã Waã Wòt, ezǐ atò a tèkitebu bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧te Musì, bɔɔ saꞋa tò e ghɨ̌ bɔɔ bùŋe atò la. 19E bɔ ghɨ̀ ale, e zǐ atò a tèkitebu bòt kà wu Bèjuê, bɔɔ wȩ̀ȩ̀te atò, eshu̧u̧ atò e lɔ̀Ꞌɔ wu̧u̧te atò a mbɨ̧̀ mbasa taa pfə, mbɔ̂ naa me wu ane èlibȩ betat taa yu̧u̧me.”
Nyɨ̌ bɔkatè è bììte àghɨa abua Yesò
(Mk 10:35-45)
20ÀfɨꞋa mbɔŋ nyɨ̌ bɔmbâ̧ Zebèdiì bu babe la kɨꞋɨ abua Yesò, ŋɔꞋne a si a mbì tò nê tà ghɨ̀ àghɨa ko abua zi.
21Yesò bììte nê “À kɨa nê è ngɨ̀ ghàà?” Tà bɨ̀ɨ̀lè nê “Bɨ̧ɨ̧ne nê yea ghɨ̌ bɔbɔ̧ baa babe la aa li tseke bɨ tò ba a èbem kèfɔ̧̀ wê wekǒ àbâ àbualu̧ a yê nè wekǒ àbâ àbuantoŋ ayê.”
22Yesò bɨ̀ɨ̀lè nê “Bɔ̧ bè e bakà ko àghɨa bɔ biità la. Tè betsiꞋa bɨ nu ndɔŋ ngoꞋ yaa maà nu la à?”
Bɔ nê “Baa ko nu.”
23Yesò mè shu nê “Wu nkûŋ nê bɨa li ko enu ndɔŋ yaã, ka e tseke àbâ àbualu̧ am kò a yea ntɔŋ leꞋ è ntse mmɔ̌ màa ghɨ̀ la. ÈdziꞋ baa e wu abua bòt bu Tǎt am taŋkè nê bɔ̀ tseke abot la.”
24ÀfɨꞋa bɔkatè ko bu èghem e zə ànəê yaa la, bɔ taꞋa tsoo ane bɔnyɨ bu babe la. 25Ale, Yesò tɔ awɔb bàgème àdziꞋ yeamɔꞋ shu abua yɔb nê “Bɨ̀ ko nê bèfɔ̧̀ bòt kà ko a Mbɔ̧ɔ̧mà àa ngɨ̀ bɔ me ghɨɨle bòt bɔb, bèkěm bɔb, e mè me tseke àtsəa bòt bɔb. 26À bakà bɔ ndɨ àa wu anè a kètsìà wɨ̧ la, ka wòt me kɨ ewu wɔ̀jûŋ ayɔɔ yɨ̧ tà bɔ ndɨ tàa wu mbɨꞋɨ̀ wafàꞋ abua ebeko la, 27è we tàa nkɨ e wu a mbì ane yɨ̧ la, è bɔ ndɨ tàa wu mbɨꞋɨ̀ àbùꞋ abua ebeko la. 28A bê ngu wuê mbɨ̀Ꞌɨ̀ àa ane Waã Wòt la. Tà lè kaꞋa wua nkɨ̀Ꞌa e ghɨ̌ bòt aa me fàꞋa abua tò. Tà li ngua nkɨ̀Ꞌa e me fàꞋa abua bòt, e lɔ̀Ꞌɔ e ŋà àtsə azi mbɨ̀Ꞌɨ̀ bòt nyaŋ aa peme.”
Yesò bəâ bòt àghɨ àleme ko babe
(Mk 10:46-52; Lk 18:35-43)
29Mbɨ̀Ꞌɨ̀ bɔ dzə a Jèlikò la, taꞋà ènɔ̧̂ bòt e kùŋe a Yesò. 30Bòt àghɨ àleme ko babe bɔ wu a ngèt alu̧ bɔ tseke la, e zə nê Yesò nàà ntsèà mbê mbùꞋ me ŋȩ shua nê “Waã fɔ̧̀ Dàbid, ku tèsȩ ta.”
31Ènɔ̧̂ bòt bu e ŋȩ awɔb nê bɔ̀ buŋ. Ka bɔ paà ŋȩ nê “Waã fɔ̧̀ Dàbid, ku tèsȩ ta.”
32Yesò tɨ̧ ntɔ awɔb nê “Bɨ̀a nkɨa nê è ngɨ gha abua yɨ̧ à?”
33Bɔ shu abua tò nê “Tê, ghɨa àghɨ aya à ghaꞋte.”
34Yesò kù tèsȩ tɔb, mbà̧à̧te àghɨ ayɔb, àghɨ ayɔb a bê ngàꞋte bɔ kùŋe atò.
Currently Selected:
Matìù 20: mnf
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
