Matìù 28

Yesò yù̧ù̧me

(Mk 16:1-10; Lk 24:1-12; Jn 20:1-10)

1Àliapfəèa Bèjuê yu a li ntsè, è sàꞋà me wu a ntɔtetsɔ̌Ꞌ ane àlia mbì ane nkàb, Màlià Màdàlin bɔ̂ Màlià kǒ wu e ghǎ eye àtsəasì yu.

2KwàꞋ àfɨꞋa mbɔŋ sitsǎꞋ nyìꞋnè ànyaꞋne. Wantu̧ Mbɔ̧ɔ̧mà chu a ègwet mpàà èti lu, mbɔ̂ ntsèke a ègwet. 3Tà li ngua nkàꞋtà mbɨ̀Ꞌɨ̀ nyèm, ndìte tò te mè me fəə mbɨꞋɨ̀ èŋu. 4Bòt bu bɔ wua mbààba àtsəasì yu la e bɔa kwàꞋ ànyaꞋne tè ntsìꞋi mbɨ̀Ꞌɨ̀ bòt bɔ pfəꞋte la.

5Wantu̧ Mbɔ̧ɔ̧mà wu shu abua bèzi bu nê, “Bɨ̀ ka mbɔ̀a, mâ ko nê bɨ wua nkɨà Yesò wu bɔ li ngù̧ù̧te atò a mbɨ̧̀ mbasa la. 6Tà ntsě adzìꞋ yaa, tà yu̧u̧me mbɨ̀Ꞌɨ̀ tà li shu la. Bɨ̀ kɨꞋɨ ndze àdziꞋ yu bɔ li nɔ̀ŋè àpfəꞋte atò la. 7Bɨ̀ bê ngà kwàla àfɨ̀Ꞌ yaa shu bɔkatè tò nê, ‘Tà yu̧u̧mè, tè ngu a mbì lɔb àfɨ̀Ꞌ yaa ngà a Galìlî. Bɨa ye atò abàꞋ və!’ Bɨ̀ ku̧u̧te ànəa mâ shu awɨ̧ la.”

8Ale, bɔ lɔ̀Ꞌ àtsəasì yu me lùùla ngà e shu bɔkatè Yesò, ngà ale mbɔ̀â, ka mbɔ̂ me wùꞋtè àwɔb kwàꞋ ànyaꞋne ane àghɨa a ghɨ̀ la. 9KwàꞋ àfɨꞋa mbɔŋ Yesò kwene ane yɔb nê, “Àlàŋkè à wu nè nɨ̧̀.” Bɔ kɔꞋ ngà mbà̧ àka atò ngùꞋtè atò. 10Yesò shu abua yɔb nê “Bɨ̀ ka mbɔ̀â, bɨ̀ ghǎ shu bɔnyɨ bɔ̧ nê bɔ̀ ghǎ a Galìlî ko bɔɔ ye am abàꞋ və.”

Ànəa Bèmbaabà àtsəasì yu e li nkɨ̀Ꞌɨ̂ shuê la

11Mbɨ̀Ꞌɨ̀ bèzi bu àa ngà la, àbəèꞋ ako ane bèshujà bu bɔ wua mbààba àtsəasì yu la e gha a èbem àpfəa nɨ̧ yu è shuê bètǎt bèntsìà mèpɨ̧̀ Mbɔ̧ɔ̧mà àghɨa àgème a ghɨ̀ la. 12Bètǎt bèntsìàs mèpɨ̧̀ Mbɔ̧ɔ̧mà nè bɔɔjuŋ Bèjuê e bù̧ù̧tè ndàŋkè, mbɔ̂ ŋà èkab e nɨ zi ètsəê bèshujà bu, 13mbɔ̂ shu abua yɔb nê, “Bɨ̀ shu bòt nê, ‘Baa nɔ̀ŋke a si ètsəꞋ me li bɔkatè Yesò e kɨꞋɨ tsɔ àpfəꞋta tò nɨŋ ngà.’ 14Gɔvanɔ̀, zəa ànəê yaa mbììte awɨ̧ ànəê, ko baa ko ndɨ bàa làꞋà tê tsì àwɨ̧ a èbem ngoꞋ la.” 15Ale, bèshujà bu e nɨ èkab wu, ngɨ̀ mbɨ̀Ꞌɨ̀ bɔ shu awɔb la. E bùꞋu ane àlia mbɔŋ kɨꞋɨ ŋa laane waa, mèfà̧ maa bèla ngȩ̀ȩ̀nà wuê a kètsìà Bèjuê.

Yesò sàꞋa a mbì bɔkatè bi

(Mk 16:14-18; Lk 24:36-49; Jn 20:19-23; Àf 1:6-8)

16ÀfɨꞋa mbɔŋ bɔkatè Yesò bu èghem ntsɔ̀b wemɔ̀Ꞌ la e gha a Galìlî nkɔꞋ nga a ègwet èbȩ lu Yesò li ntsɔ̀tè la. 17Mbɨ̀Ꞌɨ̀ bɔ ye atò la, bɔ wùꞋtè atò, ka èbeko e ka lâ bɨ̧ɨ̧ne nê wu tòà. 18Yesò kɨ̀Ꞌɨ̂ a ngèt yɔb shu abua yɔb nê, “Mbɔ̧ɔ̧mà ŋa mètàŋ nàa ègwet nè sitsǎꞋ la ègème abua am. 19È wu ale, bɨ̀ ghǎ ngɨ̀ bòt èlaꞋ ègème è tsiꞋi bɔkatè bɔ̧, ngɨ̀ bɔ zì àwɔb a èdzî ane èlen Mbɔ̧ɔ̧mà, nè èlen Waã, nè èlen Fo Kèfə, 20mbɔ̂ nyɨ̀Ꞌte awɔb nê bɔ̀ me ghɨ̌ àghɨ àgème e ndi shu awɨ̧ la, nko nê maa wu nè nɨ̧̀ tê ghǎ dzəâ àfɨꞋa ngɔ̀ŋ nàa li lìà la.”

Currently Selected:

Matìù 28: mnf

Highlight

Copy