Mak 12

Èngà̧teme ane bèlentà mbȩ

(Mat 21:33-46; Lk 20:9-19)

1Yesò bùꞋ me làꞋa abua bòt bu ane mèngà̧teme nê, “Wòt ko li ndɔ̀Ꞌ ndìꞋi èyɨt vȩn a mbȩ zi, nkùùlè àkaã nɨŋ ngààle mbȩ yu, ntu àdziꞋa màngɨa mèlùꞋ mi, mbɔ̧ àdziꞋa bɔ̀ɔ me tɨ̧ɨ̧ a ègwet mbààba èbaꞋ lu la, ŋǎ abua bòt bɔ̀ɔ me fàꞋa la, mbɔ̂ ndzəè ngà àvi àlaꞋ a ko tsa. 2ÀfɨꞋa màfuꞋa èghɨ bu a tseke tê nkùꞋ, tà tsà àbùꞋ àzi nê tà ghǎ nɨ̀ èbi ne èghɨ abua bòt bu fàꞋa a èbem mbȩ yu la. 3Bòt bu e baãaã atò nden, mbɔ̂ nkɨŋe atò, tà wènè èbu fə. 4Tǎt èbàꞋ lu mè ntsà àbùꞋ a tsa. Bòt bu e mè ndène atò, shù̧u̧ atò ndzì fɨŋ àtsəa tò mbɔ̂ nèètè ngɨ̧̀ɨ̧̀nè atò. 5Tǎt èbàꞋ lu mè ntsà àyea ko nè àbùꞋ, bòt bu e baãaã tò mbùŋè, ndɔ̀Ꞌ ngɔ̀ɔ bòt ko nyaŋ a èlɨ̀ mbɔŋ, ndène èbeko, mbùŋè èbeko.

6“NdàꞋ wòt mbê wu li ngu tsiꞋi tsà la le wu waã èkɔŋ tò. A me lìa tà tsà waã vi abua yɔb nê, ‘A ghɨ̀ nà leꞋ ko bɔɔ baãaãte ngule waã am ntsɔ̧̀’.

7“Ka bòt bu e làꞋ a kètsìà wɔb nê, ‘Eyaa wu waã tǎt èbàꞋ lu. Bɨ̀ kɨꞋɨ bà bùŋe atò mbɨ̀Ꞌɨ̀ jɨ èbàꞋ mbɔŋ.’ 8Ale, bɔ baãaã waã wu mbùŋè, màꞋà àpfəꞋte tò akwene mbȩ yu.”

9Yesò bììte bòt bu nê, “Bɨ mɨɨtè nê tǎt èbàꞋ lu nàa ghɨ̀ na à? Tàà kɨꞋɨ bùŋe bɔfàꞋ bu ebɔ ŋa èbàꞋ lu abua bòt tsa. 10Tè bɨ bakà li me tɔ èngà̧ waa a èbem àkata Mbɔ̧ɔ̧mà ezə?

‘Èti lu bèmbɔ̧ɔ̧ lob e li ngwaꞋ nê wu èti kàbɔ̀ŋ la,

wu lùà ka e tsiꞋi ngule èti tɔ̀Ꞌɔ̀ lob la. #12:10 Èti tɔ̀Ꞌɔ̀ lob wu mbɨ̀Ꞌɨ̀ lu̧lob wu è li ngua mbà̧aã lob àfɨꞋa mbì la.

11Eyaa wu àghɨa Mbɔ̧ɔ̧mà ghɨ̀ la,

a ghe àa mbɔ̀ la!’ ”

12Bèkěm Bèjuê e lɔ̀Ꞌ abot me kɨ baãaã Yesò ngu nê bɔ ko nê tà tèma èngà̧ waa ŋǎ abua yɔb. Ka ngɨ̀ ale me bɔa ènɔ̧̂ bòt bu, ntsiꞋi sǎ tò abot me ghà wɔb.

Ànəa èkab taksì

(Mat 22:15-22; Lk 20:20-26)

13Bɔ li ntsà Bèfalèsiì ko nè bòt ko bɔ̀ɔ nkuŋa Elɔ̀d la nê bɔ̀ ghǎ ntà̧à̧te a Yesò ane mèngǎ̧ tò. 14Bɔ kɨꞋɨ mbììte atò nê, “NyɨꞋtà, baa ko nê àà ndàꞋà wuê nkûŋ, à kà wua njùta ànəa bòt àa ndàꞋà la. Nkàà nê àà kà nɨ àghɨa wòt wu yùà la mbɨ̀Ꞌɨ̀ àghɨa ko. Àà ndâ nyɨ̀Ꞌta ndɨ Mbɔ̧ɔ̧mà nàa nkɨà nê bòt e wu me kùŋè àvi la. Tè mbɨ̧ ta tê bɨ̧ɨ̧nè nê bà me ŋa èkab taksì abua Sisà kò wu nê bà ka ŋa à? Àa mɨ̀ɨ̀tà nàà?”

15Ka Yesò tuꞋa yuŋ wɔb ntsɔ̀Ꞌɔ èngǎ̧ wu nê, “Bɨ ghɨ̀ na ka me taãaãte am à? Bɨ̀ nyɨꞋte am àkwȩkab è ndze.” 16Bɔ nɨ àkwȩkab nkɨ̀Ꞌɨ̂ ŋǎ abua tò. Tà bììte awɔb nê “Àtsə yàa nè èlen làa adù̧ la wu ayea wàà?”

Bɔ bɨ̀ɨ̀lè nê “Àtsəa Sisà.”

17Ale, Yesò shu abua yɔb nê “Bɨ̀ ŋa àghɨa è wu àyea Sisà la abua tò, ŋà àghɨa è wù àyea Mbɔ̧ɔ̧mà la abua Mbɔ̧ɔ̧mà.”

Ànəa Yesò a bê ntsè àwɔb.

Èngà̧ ane ànəa mànju̧u̧ma

(Mat 22:23-33; Lk 20:27-40)

18Bèsadùsiì, bòt bu bɔ̀ɔ shua nê betsiꞋa wòt kà pfə mè njù̧ù̧me la, e kɨꞋɨ ndze a Yesò mbììte atò nê, 19“NyɨꞋtà, Musì li shu nê, ‘Wòt pfəa kà bi bɔ̧, wanyɨ tò bɔ ndɨ tàa nɨ nempfə tò mbɨ̀Ꞌɨ̀ ebi bɔ̧ abua wanyɨ vi wu tà pfə la.’ 20Bòt ko basà̧à̧mbe e li ngu bɔ̧ wòt wemɔ̀Ꞌ. We mbì yɔ̀Ꞌɔ̀ vi vi mpfəè ka bi bɔ̧, ngwàꞋa àvi wu abua wanyɨ vi, 21we kwèn wu nɨ àvi wu, mè mpfəè àzi mɨ̧̂ wuê a èlɨ̀. Wòt kwen we mbɔŋ mè nɨŋ àvi wu, a mè ntsè wuê a èlɨ̀. 22A li ngà me lìa, bɔnyɨ bu basà̧à̧mbe la e yɔꞋɔ àvi wu bɔ̀ɔgème mpfəèꞋte kà bi waã nè tò. Àvi mbɔŋ tsekè tè mpfəè àzi mɨ̧̂. 23Naa li ngu ane àli bèmpfəà be yu̧u̧me la, àvi mbɔŋ wu vi wa ane yɔb wu basà̧à̧mbe la à? Bɔ̀ɔgème e li ndzɔ̀Ꞌɔ atò.”

24Yesò bɨ̀ɨ̀lè èngǎ̧ wɔb nê, “Bɨ fà̧, nkàà ndɨ̀ wu bɨ̀ bakà ko èngǎ̧ Mbɔ̧ɔ̧mà nè mètàŋ tò la. 25Naa li ngu àfɨꞋa bèmpfəà be yu̧u̧me la, bɔ tsiꞋi mbɨ̀Ꞌɨ̀ bɔntu̧ Mbɔ̧ɔ̧mà, mbâ̧ nè àvi ka tsi ngua ndzɔ̀Ꞌa. 26È me wu ànəa mànju̧u̧ma, ko bɨ bakà li mè tɔ a èbem àkatè Musì ànəa abàꞋ wu è li ngua nkòòla la à? Bɔ shɨ a èbèm nê Mbɔ̧ɔ̧mà li shu abua Musì nê, ‘E ngu Mbɔ̧ɔ̧mà Abàlàghâm, ngu Mbɔ̧ɔ̧mà Asàk, mè ngu Mbɔ̧ɔ̧mà Jàkɔ̂b’. 27Tà wu Mbɔ̧ɔ̧mà bòt yu̧, tà ntsě Mbɔ̧ɔ̧mà bèmpfəà. Bɨ lâ fà̧.”

Mbɨ̧ mbì

(Mat 22:34-40; Lk 10:25-28)

28NyɨꞋtà mbɨ̧te Musì kǒ le wu abot ndzəèa mènəè bɔ làꞋà la. Tà li ndzəâ ndɨ Yesò tsɔꞋɔ èngǎ̧ Bèsadùsiì ntsɔ̧̀ la, ale nkɨ̀Ꞌɨ̂ mbììte atò nê, “Ane mbɨ̧ tègème, ye ŋa wu ye mbì à?”

29Yesò nê, mbɨ̧ mbì wu yaa, “Bòt Izəèlȩê, bɨ̀ zə! Tǎt wa Mbɔ̧ɔ̧mà wu ndàꞋà Mbɔ̧ɔ̧mà. 30‘Me kɔ̀ŋke Tǎt wè Mbɔ̧ɔ̧mà nè èntɨ̧ɨ̧ wê ègème, ŋà wê nènkèm abua tò, mè me mɨ̀ɨ̀tè wuê atò fɔ̀ɔ̀la nè mètàŋ mè ègème.’ 31Mbɨ̧ kèkweelè è kɨꞋɨ akwèn la nàà mbɨ̀Ꞌɨ̀ yùà, ‘Me kɔ̀ŋkè wanyɨ wè mbɨ̀Ꞌɨ̀ àwɔ̀ mbɔŋ. Mbɨ̧ kǒ è meè ngu a mbì taa tebe la ntsě.’ ”

32NyɨꞋtà mbɨ̧te Musì wu me zə tê shu abua Yesò nê, “NyɨꞋtà, à làꞋa ntsɔ̧̀. À shua nkûŋ nê Mbɔ̧ɔ̧mà Lefɨ̀Ꞌ wu ndàꞋà Mbɔ̧ɔ̧mà tè we tsǎ ka wu ka nè tòà. 33Wòt bɔ ndɨ tàa kɔ̀ŋke a Mbɔ̧ɔ̧mà nè èntɨ̧ɨ̧ vi ègème, e mě me mɨ̀ɨ̀tè wuê atò, nè mètàŋ mi ègème, e mě me kɔ̀ŋkè wanyɨ vi mbɨ̀Ꞌɨ̀ zìambɔŋ la. Wòt me nɔ̀ŋe mbɨ̧ tàa, a bɔ̀ŋ tè ntsè ndɨ tàa me tò̧ banyà̧ nè èghɨ ko tsa ŋǎ abua Mbɔ̧ɔ̧mà la.”

34Yesò ye nê mbê wu tsɔꞋɔ èngà̧ wu nè èyì, è shu abua tò nê, “À ntsě a endɨ̌ ane kèfɔ̧̀ Mbɔ̧ɔ̧mà.”

E bùꞋu àfɨꞋa mbɔŋ, wòt ka bê tsi ngàꞋa ètsəê vi ebiite a Yesò ànəê.

Fɔ̧̀ wu Mbɔ̧ɔ̧mà yɔꞋ ntsà la

(Mat 22:41-46; Lk 20:41-44)

35Mbɨ̀Ꞌɨ̀ Yesò nàa nyɨ̀Ꞌta a èbem lob nɨ̧ Mbɔ̧ɔ̧mà la, tà shu nê, “Ghǎ ghɨ̂ ka bènyɨꞋtà mbɨ̧tsə e me tɔ a Fɔ̧̀ wu Mbɔ̧ɔ̧mà li ndzɔꞋ etsàà la nê wu waã fɔ̧̀ Dàbid à? 36Fo Kèfə li ngɨ̀ Dàbid zìambɔŋ nê,

‘Mbɔ̧ɔ̧mà Lefɨ̀Ꞌ li shu abua Lefɨ̀Ꞌ am nê,

Tseke àbâ àbualu̧ am tè è ŋà èlu̧

à tsite èka bê a ègwet bɔmbù̧ bê.’

37Fɔ̧̀ Dàbid wu tɔ̀ atò ane tǎt vi, tà ghɨ̀ na ka ntsiꞋi waã Dàbid à?”

Yesò làꞋ ànəa bènyɨꞋtà mbɨ̧te Musì

(Mat 23:1-36; Lk 20:45-47)

TaꞋà ènɔ̧̂ bòt e li ngua njùtâ èngǎ̧ Yesò nè mèngùꞋte.

38Yesò me làꞋa èngǎ̧ vi shua abua bòt bu nê, “Bɨ̀ nɨ àfɨ̀Ꞌ ane bènyɨꞋtà mbɨ̧te Musì. Bɔ taꞋa wua nkɔ̀ŋkà e me ghȩ̀ȩ̀nè nê mèmà̧ seè mè me kɔ̀ŋkè nê bòt è me tsàꞋtè àwɔb mbɨ̀Ꞌɨ̀ bɔɔjuŋ a èsà̧aã tèwen. 39Bɔ̀ɔ ngɨ̀ bɔ̀ ghà a èdzìꞋi mèpà̧ bɔ̂ lobte Mbɔ̧ɔ̧mà, bɔ me kɨ wu ètɨ̧ ntsɔ̧̀ ka tseke a ègwet. 40Wu bɔ̀ɔ̀ba wàa bɔ̀ɔ̀ ngɨ̀ɨ̀la bènempfə fàà èghɨ bɔb, mbɔ̂ bɔ chu a màntsaꞋta Mbɔ̧ɔ̧mà, bɔ là̧à̧nè èngà̧ mbɨ̀Ꞌɨ̀ enɨ vəèəèlè àghɨ a bòt la. Mbɔ̧ɔ̧mà naa li ŋa wɔb ngoꞋ è tsě ye bòt ko la.”

Nempfə kǒ ŋǎ àghɨ abua Mbɔ̧ɔ̧mà

(Lk 21:1-4)

41Mbɨ̀Ꞌɨ̀ Yesò è tsekè a lob nɨ̧ Mbɔ̧ɔ̧mà a ngèt akɔ̂b èkab me ye ndɨ bòt e màꞋà èkab a èbèm la, bɔ̧ èkab nyaŋ e taꞋa màꞋà mèkab. 42Nempfə kǒ kà ye azi, kɨ̀Ꞌɨ̂ ndzì bakwȩkab babe kà lem nkùꞋ a kapà a èbèm.

43Yesò tɔ bɔkatè bi àdzìꞋ yeamɔꞋ nê, “KwàꞋ ane nkûŋ, nempfə wàà è zi èkab a èbem tè ntsè bòt bàgème. 44Nkàà nê bòt ko bìa e ŋa wuê àdzìꞋ ane èghɨ bu nyaŋ bɔ̂ bɔ la, ka tò waa kà bɔ azi la, è ŋa àghɨ àgème tà bɔ la. Tà ŋa tê àghɨ à ka tsi nguê tàa nɨ eyu̧ èghɨjɨ bi la.”

Currently Selected:

Mak 12: mnf

Highlight

Copy