Mak 11

Yesò nyi a Jèlusalèm mbɨ̀Ꞌɨ̀ fɔ̧̀ nɨ̧

(Mat 21:1-11; Lk 19:28-40; Jn 12:12-19)

1È li ngu àfɨꞋa Yesò bɔ̂ bɔkatè bi e kɨꞋɨ tê ngua a ngèt Jèlusalèm, a ngèt èpfəè Befagè bɔ̂ Betanì la, bɔ ghà a ègwet èbȩ Olìf, tà tsɔ̀Ꞌɔ bɔkatè bi ko babe 2shu abua yɔb nê “Bɨ̀ gha àpfəè zia a mbì lɨ̧ la ko bɨa bê ye a jàkâ kǒ bɔ sèlè, wòt bakà li mè kɔꞋɔ a ègwet tò la. Bɨ̀ yaa nɨŋ nkɨ̀Ꞌɨ̂ a si ŋàa. 3Wòt bììta awɨ̧ àghɨa bɨ yaa nɨ gha ghɨ̀ la, bɨ nê ‘Tǎt wu nàa nkɨà wùà’, mbɔ̂ mbê ngu paa evəâ wùà.”

4Ale, bɔ ghà ndzè wajàkâ àbȩ bɔ selè a ngèt ètsələèꞋ la, me yàa, 5bòt ko bɔ tɨ̧ɨ̧te abot la e biite a wɔb nê, “Bɨ̀ yàà wajàkâ waa e ghɨ̌ ghàà?” 6Bɔ bɨ̀ɨ̀lè wuê mbɨ̀Ꞌɨ̀ Yesò ghɨ̂ shu awɔb la. Bòt bu e sà wɔb bɔ nɨŋ ngà. 7Bɔ̀ nɨ wajàkâ wu bɔ̀ kɨꞋɨ abua Yesò, bɔ nɨ ndǐ tɔb ndzèènè kɔ̧̀ tò, Yesò kɔ̀Ꞌɔ a ègwet. 8Bòt nyaŋ e sàŋkè ndǐ tɔb a alu̧, èbeko e loote ètsə èyɨt nɨŋ sàŋkè alu̧. 9Bòt bu nga a mbì tò la nè è bu akwèn la e bùꞋ me ŋȩa shua nê,

“MèngùꞋte wu abua Mbɔ̧ɔ̧mà;

TsiꞋ Mbɔ̧ɔ̧mà lɔ̀ɔ̀le wòt wu

nkɨ̀Ꞌa ane èlen tò la!

10Mbɔ̧ɔ̧mà lɔ̀ɔ̀le wòt wu

nga me ebaãaã kèfɔ̧̀ tǎt wa Dàbid la.

MèngùꞋte wu abua Mbɔ̧ɔ̧mà a ègwet.”

11Yesò nyi a Jèlusalèm nga a èbem lob nɨ̧ Mbɔ̧ɔ̧mà, ngȩ̀ȩ̀nè ndɨ̀ŋkè èghɨ ègème. Ka ndɨ̀ wu nyèm tsiꞋa fèna fene la, tà ghà a Betanì bɔ̂ bɔkatè bi.

Yesò tsɔ̧̀ àyɨt a fik

(Mat 21:18-19)

12ÈtsəꞋ e li ntsi, bɔ me kua a Betanì, ndzìtsə te baãaã a Yesò. 13Tà tɨ̧ɨ̧ a endɨ̌ ndzè àyɨt a fik nè tèfəꞋtsə a ègwet. Tà ghà abot eye nê tètaãaãtsə tea a ègwet leꞋ. Ngà ale ndze wuê tèfəꞋtsə a ègwet nkàà nê àfɨꞋa àyɨt a mbɔŋ àa nkɔ̀ɔ̀la la a li à ka kuꞋ. 14Yesò tsɔ̧̀ àyɨt yu nê, “Wòt ka lɔ̀Ꞌ àlia emě jɨ kètaã a ègwet lè a.” Bɔkatè tò e li ndzəâ ndɨ tà làꞋà la.

Yesò ghà a lob nɨ̧ Mbɔ̧ɔ̧mà

(Mat 21:12-17; Lk 19:45-48; Jn 2:13-22)

15Mbɨ̀Ꞌɨ̀ bɔ nyi a Jèlusalèm la, Yesò ghà a lob nɨ̧ Mbɔ̧ɔ̧mà fəè bòt bu bàgème fɨ̧̀ɨ̧̀nà mè nju̧a èghɨ a èbèm la. Mè mpààtè mèkɔꞋ bòt bu bɔ wua nkùbta mèkab nkɨà àbȩ̀ la, nè batɨ̧ bòt bu bɔ wua fɨ̧̀ɨ̧̀nà banɨ̧̌ ndɨk la. 16Tà li tà ka bê sà wòt kǒ tà nɨ̀ èghɨ èwen ntsè àsà̧aã lob nɨ̧ Mbɔ̧ɔ̧mà yu. 17Tà ghɨ̀ ale, tà bɔ me nyɨꞋte bòt shua nê, “Àkatè a Mbɔ̧ɔ̧mà a laꞋnê,

‘Lob yaã wu lob bɔ̀ɔ me tsàꞋtè am a èbèm la’,

ka bɨ nɨŋ ngɨ̀ è tsìꞋi

àdziꞋa bètsɔŋ aa nkɨ̀Ꞌa ndɔ̧̀ɔ̧̀tà la.”

18Bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧te Musì e zə ànəê yaa, mbùꞋ me kɨ èlu̧ bɔ̀ɔ bùŋè atò la, ka me bɔa atò nkàà nê mèngǎ̧ tò li ntàꞋa wua mbɔ̀ ènɔ̧̂ bòt bu.

19È lɔ̀Ꞌ ngu àfɨꞋa nyèmtèsi, Yesò bɔ̂ bɔkatè bi e sà àpfəa nɨ̧ yu me ghà wɔb.

Nkɨ̌a ane àyɨt a fik

(Mat 21:20-22)

20Bɔ li saꞋa ntɔtetsɔ̌Ꞌ me ghȩ̀ȩ̀ne alu̧, ndzè àyɨt a fik yu a yu̧ àgème tè ngà ndzə ane tèghaŋtsə la. 21Pità ku̧u̧te àghɨa aà ghɨ̀ la, shu abua Yesò nê, “NyɨꞋtà, ye ndɨ àyɨt yu àà tsɔ̧̀ la a yu̧ la.”

22Yesò bɨ̀ɨ̀lè nê, “Bɨ̀ zi èntɨ̧ɨ̧ wɨ̧ ane Mbɔ̧ɔ̧mà. 23Ane nkûŋ, mâ shu awɨ̧ nê wòt shu abua èbȩ la nê, ‘Kȩ ngà nkwene a èbem *èdzî’, mbɔ̂ ntɨ̀ nê ànəa ye shua la aa wu ale, mbakà màkè, ko Mbɔ̧ɔ̧mà naa ghɨ̌ abua tò. 24È wu ale, mâ shua wɨ̧ nê, wòt me tsàꞋte a Mbɔ̧ɔ̧mà ndò̧o̧ àghɨ, mbɔ̌ ntɨ̀ nê ye bɔ àghɨa ngaa tè ndɔ̀Ꞌ, ko taa bɔ àghɨ àgème tà lo̧o̧ la. 25À tɨ̧ me tsàꞋte a Mbɔ̧ɔ̧mà, à waꞋa kàbɔ̀ŋ bòt e ghɨ ane yê la, mbɨ̀Ꞌɨ̀ Tǎt wè wu a ègwet la naa waꞋa kàbɔ̀ŋ wê mɨ̧̂. [ 26Ka à bakà waꞋa kàbɔ̀ŋ bòt, ko Tǎt wè wu a ègwet la ka waꞋa kàbɔ̀ŋ wê à.]”

ÀfɨꞋa bɔ li mbììte àdziꞋa mètàŋ Yesò dzəâ abot la

(Mat 21:23-27; Lk 20:1-8)

27Bɔ mè nkua nyi a Jèlusalèm. Mbɨ̀Ꞌɨ̀ Yesò nàa ngȩ̀ȩ̀na a èbem lob nɨ̧ Mbɔ̧ɔ̧mà la, bètǎt bèntsìà mèpɨ̧̀ Mbɔ̧ɔ̧mà nè bɔɔjuŋ Bèjuê e kɨ̀Ꞌɨ̂ 28mbììte atò nê “Àa nɨa àtɔŋ nè ŋa ka ngɨ̀à èghɨ ba à? Waa ka tà ŋa awê àtɔŋ ngaa la à?”

29Yesò tsɔꞋɔ èngǎ̧ wɔb nê, “Maa biite awɨ̧ wuê èngà̧ wemɔꞋ. Bɨ tsɔꞋɔ èwùà, ko maa shua wɨ̧ àtɔŋ yu màa nɨa ngɨ̀à èghɨ bàa la. 30Bɨ̀ shu am, wàa ka tà li ntsà a Jɔ̌n nê tà me zǐ bòt a èdzî la à? È li ngu Mbɔ̧ɔ̧mà kò wuê bɔbȩ à?”

31Bɔ bùꞋ me kààne a kètsìà wɔb shua nê “Bàa laꞋnê ghàà? Ba wu anè nê ‘Mbɔ̧ɔ̧mà’ ko taa biite awa nê, ‘À wu ale ghǎ ghɨ̀ ka bà ka bɨ̧ɨ̧ne èngǎ̧ tò à?’ 32Ka bà nê ‘abua bɔbȩ’.” (Bɔ li ngua mbɔ̀a ènɔ̧̂ bòt bu nkàà nê bɔ li mbɨ̧̀ɨ̧̀ne bàgème nê Jɔ̌n li ngu ndàꞋàtɔŋ Mbɔ̧ɔ̧mà). 33Ale, bɔ tsɔꞋɔ èngǎ̧ Yesò nê “Baa bakà ko.”

Tà shu abua yɔb nê “Ale betsiꞋa è nka shu awɨ̧ àdziꞋa mâ nɨ àtɔŋ ka me ghɨ̌ èghɨ bàa la.”

Currently Selected:

Mak 11: mnf

Highlight

Copy