Mak 10

Èngǎ̧ Yesò adù̧ ànəa wòt màntu̧a vi vi

(Mat 19:1-12)

1Yesò lɔ̀Ꞌ àdziꞋa mbɔŋ nga àbâ àlaꞋ a Jùdià, ntû̧ èdzî Jodàn ngà aguŋ. Ènɔ̧̂ bòt e mè nkɨ̀Ꞌɨ̂ a mbì tò tà me nyɨꞋte awɔb mbɨ̀Ꞌɨ̀ tàa ndzìà ngɨ̀à la.

2Bèfalèsiì ko e kɨꞋɨ me kɨ enyɔ̀Ꞌte a Yesò, mbììte atò nê “Tè mbɨ̧ ta te bɨ̧ɨ̧nè nê, wòt tû̧ vi vi?”

3Yesò tsɔꞋɔ èngǎ̧ wɔb nê, “Musì li ŋǎ kǎ mbɨ̧tsə abua yɨ̧ à?”

4Bɔ nê, “Musì li nê, wòt me kɨ etu̧u̧ vi vi, tà ŋǎ atò kèba àkatè enɨ nyɨꞋte nê ye tu̧u̧ atò, ka mbɔ̂ fə atò tà me ghǎ.”

5Yesò mè shu abua yɔb nê, “Musì li me shɨ mbɨ̧ yàa abua yɨ̧ ale, ngu ndɨ̀ wu mèntɨ̧ɨ̧ mɨ̧ e taꞋa wua nkwèèla la. 6Mbɔ̂ ngɔ̀ŋ li me bùꞋu ‘Mbɔ̧ɔ̧mà ghɨ̀ mbâ̧ nè àvi.’ 7Mbɔ̂ nê ‘Mbâ̧ bɔ ndɨ tàa sa tǎt vi, bɔ̂ nyɨ̌ vi, bɔ̂ vi vi aa fɔte e tsiꞋi àghɨ yeamɔꞋ la. 8Bɔ̂ tò aa tsiꞋi àghɨ yeamɔꞋ.’ Ale, bɔ te ntsě bòt babe, bɔ tsiꞋi àghɨ yeamɔꞋ. 9È wu ale, àghɨa Mbɔ̧ɔ̧mà tsəꞋne la, wɔ̀bȩ̂ ka sàbtè.”

10ÀfɨꞋa bɔ wène a lob la, bɔkatè Yesò e mè mbììte atò ànəa ngaa. 11Tà shu abua yɔb nê, “Mbâ̧ tù̧a vi vi mè nɨ̌ we tsǎ, tà ko nê ye jɨa àbȩ. 12Àvi tà tu̧u̧ lu̧ vi mè ndzɔ̀Ꞌɔ we tsǎ la, tà ko nê ye jɨa àbȩ mɨ̧̂.”

Yesò fà̧à̧te bɔtechɨɨle

(Mat 19:13-15; Lk 18:15-17)

13Bòt ko e li nɨ bɔtechɨɨle nkɨ̀Ꞌɨ̂ Yesò naa nɔ̀ŋè èbu bi adù̧ yɔb, bɔkatè tò e ŋȩte awɔb. 14Yesò è ye ndɨ bɔ ghɨ̀à la, a saa tò tà shu abua bɔkatè bi bu nê, “Bɨ tsiꞋ bɔ̧ bu è kɨꞋɨ abua am; bɨ̀ ka nkàlè àwɔb nkàà nê, kèfɔ̧̀ Mbɔ̧ɔ̧mà wu abua bòt mbɨ̀Ꞌɨ̀ bɔ̀ɔ̀ba wàà. 15TsiꞋ è shu awɨ̧ ane nkûŋ nê, wòt bakà bɨ̧ɨ̧ne a Kèfɔ̧̀ Mbɔ̧ɔ̧mà mbɨ̀Ꞌɨ̀ watèchɨɨle, ŋut li tà kà nyi a èbem wùà.” 16Tà làꞋ ale, ngàꞋa èbu bi ntàꞋa bɔtechɨɨle bu, nɔ̀ŋè èbu bi a ètsə bɔb, ndɔ̀ɔ̀lè àwɔb.

Wakèsà èkab kǒ

(Mat 19:16-30; Lk 18:18-30)

17Yesò li ndɔ̀Ꞌ me ghǎ, wòt kǒ lùùlà nkɨ̀Ꞌɨ̂ ntèm tènjûŋ ti a mbì tò mbììte nê, “NyɨꞋtà Ntsɔ̧̀, betsiꞋa e ngɨ̀ nǎ tè mbɔ̀ mèmpème kàlìà à?”

18Yesò bììte atò nê, “À ghɨ̀ na ka me tɔ am ane wòt ntsɔ̧̀ à? Wòt kǒ tsa ntsě tà wu wòt ntsɔ̧̀ ka nè Mbɔ̧ɔ̧mà la. 19À ko mbɨ̧te Musì: ‘À ka mbùŋè wɔ̀bȩ̂, à ka njɨ̀ àbȩ, à ka ntsɔŋ, à ka mbɨ̧̀ɨ̧̀ne ànəa àfɨte àtsəa wòt, à ka nɨ̀ àghɨa kà wu ayê, me zəa tǎt wè bɔ̂ nyɨ̌ wè.’ ”

20Tà mè shu nê, “NyɨꞋtà,” mâ nɔ̀ŋe mbɨ̧ tàa à shua la tègème tè àfɨꞋa e ndi ngu watèchɨɨle la.

21Yesò tsìte àghɨ azi ane tò ane èkɔŋ, mbɔ̂ shu abua tò nê, “È tsiꞋi àghɨ yeamɔꞋ àa ghɨ̀ la. Ghǎ fɨ̧̀ɨ̧̀nè èghɨ bê ègème, ŋà èkab èghɨ mbɔŋ abua bòt mbuŋ, ko aa li jandèlè a ègwet. À ghɨ̀ ale, à kɨ̀Ꞌɨ̂ nkùŋè am.”

22Mbɨ̀Ꞌɨ̀ tà zə èngà̧ waa la, èsi tò e fen. Tà lɔ̀Ꞌ me ghǎ ne tèsȩ, nkàà nê tà li ntàꞋa bɔ èghɨ nyaŋ.

23Yesò ghèble avi ndɨ̀ŋkè bɔkatè bi mbɔ̂ shu abua yɔb nê, “Aa li taꞋa kweele abua bòt èkab a mànyia Kèfɔ̧̀ Mbɔ̧ɔ̧mà.”

24Bɔkatè Yesò e zə èngà̧ waa, a bê ntsè àwɔb. Yesò bɔ̂ mè nê “Bɔ̧ bɔ̧, a taꞋa wua nkwèèlâ a mànyia Kèfɔ̧̀ Mbɔ̧ɔ̧mà. 25Aà njùa anyà̧ mbɨ̀Ꞌɨ̀ loà naa tɔɔ a èbem èləꞋə sàꞋa, tè ntsè ndɨ wòt èkab nàa nyi a kèfɔ̧̀ Mbɔ̧ɔ̧mà la.”

26Bɔkatè Yesò è zə èngà̧ waa, a taꞋa tsè àwɔb, bɔ tsiꞋi biite nê, “Tè a wu anè, ko betsiꞋa wàa bɔ mèmpème à?”

27Yesò bê ndɔ̀kè àvi ndze àwɔb shu nê, “Aà nkwèèla abua bɔbȩ, ka è wu ne Mbɔ̧ɔ̧mà, ko àghɨa àgème aà njùa.”

28Pità bɨ̀ɨ̀le nê, “Ye ndɨ baa sa èghɨ ègème nkùŋe àwê la.”

29Yesò nê, “Ane nkûŋ, tsiꞋ è shu awɨ̧ nê, wòt ègème tà waꞋa lob ti, nè bɔnyɨ bi, (mbâ̧ nè àvi), nè tǎt vi, nè nyɨ̌ vi, nè bɔ̧ bi kò tèbaꞋ ti ambo yaã nè Ntu̧ Ntsɔ̧̀ la, 30nàà nga taꞋa ebɔ èghɨ ko tsa àfɨ̀Ꞌ yaa. Tàa bɔ èghɨ ngaa èdziꞋ ènkɨ̀, te tsě ndɨ e li nguê la, lobtsə, bɔnyɨ (mbâ̧ nè àvi), bènyɨ̌, bɔ̧, mbȩtsə, fɔ̀ɔ̀lè ne ndɨ bòt àa me kɨ àtsəa tò enɨ la. Tà bɔ̂ ngu e ghɨ̀ ale, e li bɔ mèmpème kàlìà mɨ̧̂ ane ngɔ̀ŋ yu nga ekɨꞋɨ la. 31Ka bòt nyaŋ, bɔ̀ wua mbì àfɨ̀Ꞌ yaa la, bɔɔ li tsiꞋa akwèn, èbe bɔ̀ wua akwèn la e tsiꞋa a mbì.”

Ngò̧ tetat Yesò làꞋà ànəa èvə li la

(Mat 20:17-19; Lk 18:31-34)

32Yesò bɔ̂ bɔkatè bi e li ngu alu̧ nkɔ̀Ꞌɔ ngà a Jèlusalèm. Yesò wu a mbì bɔkatè bi bu ngà, ànəa lèghȩ̀ȩ̀nè mbɔŋ a tsè àwɔb, bòt bu bɔ tsě akwen yɔb la e me ghȩ̀ȩ̀na mbɔ̀â. Yesò mè nɨ bɔkatè bi bu ngà a ntsèm shu awɔb mènəè è bèle yaŋe ghɨ̌ ane zi la. 33“Bɨ̀ zə, ba wua nkɔ̀Ꞌɔ ngà a Jèlusalèm, àdziꞋa bɔ̀ɔ baãaã Waã Wòt, ezǐ atò a tèkitebu bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧te Musì, bɔɔ saꞋa tò e ghɨ̌ bɔɔ bùŋe atò la. 34Bèŋût aa wȩ̀ȩ̀te atò, ntsəètè mattsə ane tò, shù̧u̧ atò, e bɔ̂ bùŋe atò. Ka naa me wu ane èlibȩ betat, taa yu̧u̧me.”

Bɔkatè e biitè àghɨ abua Yesò

(Mat 20:20-28)

35Jimsì bɔ̂ Jɔ̌n, bɔ̧ Zebèdiì e li ngà shu abua Yesò nê, “NyɨꞋtà, àghɨa ko aà və bàa nkɨà nê ghɨ̌ abua ya la.”

36Yesò bììte awɔb nê, “Àghɨa mbɔŋ wu ghàà?”

37Bɔ nê, “Aa li à tseke a ègwet àtɨ̧ Kèfɔ̧̀ a èbem ndaŋe Kèfɔ̧̀ wê, à ghɨ̀ ba tseke a ngèt yê. Wòt wemɔ̀Ꞌ àbâ àbualu̧ ayê, nè wekǒ àbâ àbuantoŋ ayê.”

38Yesò shu abua yɔb nê, “Bɨ bakà ko àghɨa bɨ biità la. BetsiꞋa bɨ ko nu ndɔŋ ngoꞋ yu màa nu la à? BetsiꞋa bɔ zì àwɨ̧ a èdzî a èlɨ̀ wu bɔ̀ɔ zì am la à?”

39Bɔ nê “Baa ko nu.”

Yesò mè shu abua yɔb nê, “Wu nkûŋ nê bɨa li ko enu ndɔŋ yaã, bɔ mè ngu zì àwɨ̧ a èdzî wuê èlɨ̀ wu bɔ̀ɔ zì am la. 40Ka e tseke àbâ àbualu̧ am kò a yea ntɔŋ leꞋ, è ntsě mmɔ̌ maa ghɨ̀ la. ÈdziꞋ baa e wu abua bòt bu Tǎt am taŋkè nê bɔɔ tseke abot la.”

41Bɔkatè Yesò ko bu èghem la e zə ànəa ngaa, ntàꞋa tsoo ane Jimsì bɔ̂ Jɔ̌n. 42Ale, Yesò tɔ awɔb bàgème àdziꞋ yeamɔꞋ shu abua yɔb nê “Bɨ ko nê bòt bu bɔ̀ɔ nɨ̀a awɔb mbɨ̀Ꞌɨ̀ bèfɔ̧̀ bòt kà ko a Mbɔ̧ɔ̧mà la àa ngɨ̀ bɔ me ghɨɨle bòt bɔb, bèkěm bɔb, e mè me tseke àtsəa bòt bɔb. 43À bakà bɔ ndɨ aà wu anè a kètsìà wɨ̧ la, ka wòt me kɨ ewu wɔ̀jûŋ ayɔɔ yɨ̧ tà bɔ ndɨ tàa wu mbɨꞋɨ̀ wafàꞋ abua ebeko la. 44Wòt me kɨ e wu a mbì ane yɨ̧, tà bɔ ndɨ tàa wu mbɨꞋɨ̀ àbùꞋ abua ebeko la. 45Ka wuê Waã Wòt lè kaꞋa wua nkɨ̀Ꞌa e ghɨ̌ bòt aa me fàꞋa abua atò. Tà li ngua nkɨ̀Ꞌa e me fàꞋa abua bòt e lɔ̀Ꞌɔ e ŋà àtsəa zi mbɨ̀Ꞌɨ̀ bòt nyaŋ aa peme.”

Yesò bəâ Bàtìmeyù wòt àghɨ àleme kǒ

(Mat 20:29-34; Lk 18:35-43)

46Bɔ kɨꞋɨ̀ a Jèlikò; mbɨ̀Ꞌɨ̀ Yesò bɔ̂ bɔkatè bi nè taꞋà ènɔ̧̂ bòt àa ndzə a Jèlikò la, wòt àghɨ àleme kǒ èlen tò wu Bàtìmeyù, waã Tìmayù la, tseke a ngèt alu̧ me lo̧ èkab. 47ÀfɨꞋa tà zə nê wòt wu ntsèà la wu Yesò wòt Nazàlet la, tà bùꞋ me ŋȩ shua nê, “Yesò Waã Fɔ̧̀ Dàbid, ku tèsȩ taã!”

48Bòt nyaŋ e ŋȩte atò nê tà kabte ètsəê vi. Ka tà me ŋȩ wuê ŋȩ shuà nê, “Waã fɔ̧̀ Dàbid, ku tèsȩ taã.”

49Yesò tɨ̧ shu nê, “Bɨ̀ tɔ tò.”

Ale, bɔ tɔ wòt àghɨ àleme wu nê, “WùꞋtè àwê; kȩ ndɔ̀Ꞌ a si, Yesò nàa ntɔ awê!” 50Tà màꞋà èmǎ̧ vi a si nkȩ ndɔ̀Ꞌ a si nga a mbì Yesò.

51Yesò bììte atò nê, “Àa nkɨà nê è ngɨ ghà abua yê à?” Wòt àghɨ àleme wu nê, “NyɨꞋtà, maà nkɨà e me ye èdziꞋ.”

52Yesò shu abua tò nê, “Dù me gha wê, èntɨ̧ɨ̧ wê wu à zi ane yaã la, e ghɨ̂ à pem.” KwàꞋ àfɨꞋa mbɔŋ, àghɨ atò a ghaꞋtè tà me kuŋe a Yesò a alu̧ və.

Currently Selected:

Mak 10: mnf

Highlight

Copy