Mak 9

1Yesò li mè shu abua bɔkatè bi nê, “Ane nkûŋ, bòt aà àdzìꞋ yaa, betsiꞋa bɔ̀ ka pfə kà ye ndɨ kèfɔ̧̀ Mbɔ̧ɔ̧mà è kɨ̀Ꞌa nè mètàŋ la.”

Èsi Yesò e kubtè

(Mat 17:1-13; Lk 9:28-36)

2Èlibȩ è tsè bentùa, Yesò nɨa Pità bɔ̂ Jimsì nè Jɔ̌n bɔ kɔꞋ ngà a ègwet èbȩ èseè ko ntsèke bɔ̀ɔ ndziꞋne. Bɔ me ye, èsi Yesò e kubtè 3ndìte tò te tsiꞋa fəèa nyɨ̀ɨ̀mnà nyɨ̀ɨ̀mne. Mbê ndâ fəèəète tè ntsè ndɨ betsiꞋa wɔ̀bȩ̂ shùù tè te wu la. 4ÀfɨꞋa mbɔŋ, bɔ me ye Èlȩjà bɔ̂ Musì, e pùùlà a mbì lɔb, me làꞋà bɔ̂ Yesò ba.

5Pità shu abua Yesò nê, “NyɨꞋtà, a bɔ̂ŋ nê ba wu a si ŋàa. À bɨ̧̀ɨ̧̀na, ko maa vəèəè bayò batat adzìꞋ yaa, wemɔ̀Ꞌ abua yê, wemɔ̀Ꞌ abua Musì, nè wekǒ abua Èlȩjà.” 6Pità bɔ̂ bòt ko bu e li mbɔ̀a tè bɔ̀ ka tsi nko ànəa bɔ̀ɔ shu la.

7ÀfɨꞋa mbɔŋ, mbàꞋ kèfə kǒ kɨꞋɨ̀ nkàbte awɔb, bɔ me zə àtɔŋ ko a tse a èbem mbàꞋ yu nê, “Eyaa wu waã èkɔŋ am, bɨ̀ yute èngǎ̧ tò!”

8Àfɨ̀Ꞌ a bakà wù̧ù̧nè, bɔ̀ ka tsi ndzě wòt, bɔ tsiꞋi eye wua Yesò zia ndziꞋne.

9Bɔ̀ lɔ̀Ꞌɔ a ègwet èbȩ lu bɔ̀ me chu, Yesò səèŋkè ètû̧ bɔb nê, “Ko mbɨ̀Ꞌɨ̀ wòt wɨ̧ shu wòt àghɨa bɨ ye la tè Waã Wòt ghɨ̀ mpfə mè njù̧ù̧me.” 10Bɔ zə ànəa tà shu la, mbɔ̂ ntsìꞋi me làꞋa a kètsìà wɔb shua nê, “Tàa shuà nê yea li yu̧u̧me ale ngua shua nê ghà à?”

11Bɔ biite a Yesò nê, “Ghǎ ghɨ̂ ka bènyɨꞋtà mbɨ̧te Musì e me shu nê Èlȩjà naa bɨ̌ kɨꞋɨ à?”

12Yesò bɨ̀ɨ̀lè nè, “Wu nkûŋ nê Èlȩjà naa kɨꞋɨ a mbì mbɨ̀Ꞌɨ̀ e ghɨ èghɨ ègème aa wu mbɨ̀Ꞌɨ̀ e ghɨ̂ ngu ewu la. Ghǎ ghɨ̂ ka bɔ shɨŋ nê Waã Wòt bɔ ndɨ tàa ye ngoꞋ, bɔɔ tsǐ atò ayɔɔ la à? 13Ka tsiꞋ è shu awɨ̧ nê, Èlȩjà kɨꞋɨ tê ndɔ̀Ꞌ, bòt e bɔ ngɨ̧̀ɨ̧̀nè atò mbɨ̀Ꞌɨ̀ bɔ kɔ̀ŋkè la, mbɨ̀Ꞌɨ̀ bɔ shɨŋ a èbem Àkata Mbɔ̧ɔ̧mà ane tò la.”

Yesò bəâ waã kǒ fo kàbɔ̀ŋ nàa ane tò la

(Mat 17:14-21; Lk 9:37-43a)

14Bɔ kua akwèn nkɨ̀Ꞌɨ̂ nkwene ane àbəꞋa bɔkatè ko bu, ndzè taꞋà ènɔ̧̂ bòt abot və. BènyɨꞋtà mbɨ̧te Musì ko be wua abot nkàànà mènəè bɔ̂ tò ba. 15Mbɨ̀Ꞌɨ̀ bòt bu e yea Yesò la, bɔ lùùlà ngà ntsàꞋte atò.

16Yesò bììte bɔkatè bi nê, “Bɨ bòt baa è kààna ka ànəa à?”

17Wòt kǒ tsè a èbem ènɔ̧̂ bòt bu ŋȩ nê, “NyɨꞋtà, mâ ghɨ̂ nɨ̀ wambâ̧ am nkɨ̀Ꞌɨ̂ abua yê, ngu nê fo kàbɔ̀ŋ è ghɨ̂ tà kà wua ndàꞋà. 18Fo mbɔŋ nàa ngɨ̀ è ghɨ̀ tà kwene a si, àlejuu a me dzəèa ètsəê tò, tà me kwele àsɔŋ zi, ènyit tò e kweelà. Mâ yaãaã nɨ atò ngà abua bɔkatè bê, ka bɔ̀ ka ko mbə atò.”

19Yesò bɨ̀ɨ̀lè nê, “Bɨ̀a waa bɨ wu àndǎ̧ kà koa Mbɔ̧ɔ̧mà. Màa tseka ba nɨ̧̀ ba te e ghǎ wu a ka àfɨ̀Ꞌ à? Màa kuule èntɨ̧ɨ̧ am ane yɨ̧ te e ghǎ wu a ka àfɨ̀Ꞌ à? Bɨ nɨ waã mbɔŋ nkɨ̀Ꞌɨ̂ àdzìꞋ yaa ŋǎ abua am!”

20Bɔ nɨŋ waã wu nkɨ̀Ꞌɨ̂ abua Yesò. Mbɨ̀Ꞌɨ̀ fo kàbɔ̀ŋ yu è ye a Yesò la, àtsəadzə a lɔꞋɔ ane waã wu è màꞋà tò a si, ngɨ̀ àlejuu a me dzəâ a ètsəê tò.

21Yesò bììte a tǎt waã wu nê, “Àghɨ yaa a le bùꞋ ane tò a ka àfɨ̀Ꞌ à?”

Tǎt waã wu tsɔꞋ nê, “Te àfɨꞋa tà lè bele watèchɨɨle la. 22A màꞋà atò a èbem èwet nè mèleb a ngo̧ a ngò̧ nê ye kɨ ebùŋe atò. Ku tèsȩ ta, ntɨ̀ŋe awa na à wu ko etɨŋe la.”

23Yesò bɨ̀ɨ̀lè nê, “À wu bɨ̧ɨ̧ne! Ko àghɨa ko à ntsě àa tsě wòt tà zǐ èntɨ̧ɨ̧ vi ane Mbɔ̧ɔ̧mà la.”

24Tǎt waã wu bê ŋȩ nê, “Mâ zi èntɨ̧ɨ̧ am ane Mbɔ̧ɔ̧mà ka è nka paà. Tɨŋe am è ndzì tê mpàa!”

25Yesò me ko ènɔ̧̂ bòt e me lùùla nkɨ̀Ꞌa a mbɨ̧̀ tò. Tà ŋȩ fo kàbɔ̀ŋ yu nê “Àwɔ̀, fo kàbɔ̀ŋ yaa àa ngɨ̀à bòt e kwena mbuꞋtsə la, mâ laꞋnê sà waã wàa, tè à ka ndi me pfə mè mbà̧à̧te atò!”

26Fo kàbɔ̀ŋ yu ŋȩ, àtsəadzə àkekweelè a lɔꞋɔ ane waã wu, fo kàbɔ̀ŋ yu bɔ̂ sa atò. Waã wu tsiꞋi nɔ̀ŋke a si mbɨ̀Ꞌɨ̀ mpfəà tè bòt e me shu nê tà pfə. 27Yesò baãaã waã wu ntɨ̀ŋe atò tà lɔ̀Ꞌ ntɨ̧ɨ̧ àtatsi.

28ÀfɨꞋa Yesò lɔ̀Ꞌɔ tê nyi a lob la, bɔkatè tò bu e biite atò nê, “Ghǎ a yaãaã ngɨ̀ ka bà ka ko fəè fo kàbɔ̀ŋ yu à?”

29Tà tsɔꞋɔ èngǎ̧ wɔb nê, “Wu màntsaꞋta Mbɔ̧ɔ̧mà ka nàa fəè èwuu yaa nè fo kàbɔ̀ŋ la. Àghɨa ko tsa a ntsě.”

Yesò mè ndàꞋà ànəa èvə li

(Mat 17:22-23; Lk 9:43b-45)

30Yesò bɔ̂ bɔkatè bi e li ndɔ̀Ꞌ ntsè a Galìlî ngà nè mbì. Yesò lè kaꞋa wua nkɨà nê bòt èko àdziꞋa yè wu abot la, 31nkàà nê tà li ngua nyɨ̀Ꞌta bɔkatè bi shua nê, “Bɔɔ baãaã Waã Wòt ezǐ a tèkitebu bɔbȩ bɔɔ bùŋe atò, ka naa me wu ane èlibȩ betat, taa yu̧u̧me.” 32Bɔkatè bu è le kaꞋ ko àghɨa èngà̧ waa e nyɨꞋtà la, ka me bɔa ebiite atò.

Wòt tà tsě bòt bàgème la wu wàà?

(Mat 18:1-5; Lk 9:46-48)

33Bɔ li nga a Kàpenàwuêm, nyi a lob. Yesò bììte bɔkatè bi nê, “Bɨ ghɨ̀ ngua nkàànà ka ànəê alu̧ à?” 34Ka bɔ tu̧ tsɔꞋɔ èngǎ̧ tò ndɨ̀ wu bɔ wua nkàànà ànəa wòt tà tsě bòt bàgème a kèfɔ̧̀ Mbɔ̧ɔ̧mà la.

35Yesò tseke a si, ntɔ bɔkatè bu ntsɔ̀b babe la, shu abua yɔb nê, “Waa waa tàa nkɨ wu a mbì la, tà bɔ ndɨ tàa lìa akwèn, etsiꞋi wafàꞋ bòt bàgème la.”

36Ale, tà tɔ watèchɨɨle kǒ ntsia a mbì lɔb, mbà̧aã tò, mbɔ̂ shu abua yɔb nê, 37“Wòt sèè watèchɨɨle kǒ mbɨ̀Ꞌɨ̀ waa ane èlen laã, tà ko nê ye wua sèè am. Wòt tà mee sèè am la, ko nê ye sèè wòt wu tà tsàà am la.”

Wòt bakà wu wɔ̀mbù̧ wê, tà wu wòt èkɔŋ wê

(Lk 9:49-50)

38Jɔ̌n li shu abua tò nê, “NyɨꞋtà, ba li ndzě wòt kǒ nɨa èlen lê fəèà fote kàbɔ̀ŋ la, shu abua ŋut nê, tà ka tsi ngɨ̀, nkàà nê ba tò ba aà ka ghȩȩne àka yeamɔꞋ.”

39Yesò shu abua yɔb nê, “Bɨ̀ ka nkèle atò. BetsiꞋa wòt ka nɨ èlen laã ngɨ̀ ànəa kà ye fɨ̀Ꞌ, adzìꞋ me wù̧ù̧nè tà bùꞋ ntsiꞋi me làꞋa mènəè kàbɔ̀ŋ ane yaã. 40Wòt bakà wu wɔ̀mbù̧ wê, ko tà wu wòt èkɔŋ wê. 41TsiꞋ è shu a wɨ̧ ane nkûŋ nê, wòt tà ŋa ndɔŋ mèleb à nu nkàà nê à wu wòt Yesò la, ŋut naa li bɔ àbȩ̀ àzi.”

Èghɨ àa ntsìà wɔ̀bȩ̂ ane Mbɔ̧ɔ̧mà la

(Mat 18:6-9; Lk 17:1-2)

42“Wòt ŋwèèlè waã kǒ ane bɔ̧ bàa bɔ zì mèntɨ̧ɨ̧ mɔb ane yaã la ngɨ̀ tà fà̧à̧ ànəê, a bɔ̂ŋ nê bɔ̀ sèlè taꞋà èti àmî a ŋut, maꞋa tò a èbem *èdzî. 43Ale, àbu ayê à ghɨ̀ à tsì èntɨ̧ɨ̧ wê ane Mbɔ̧ɔ̧mà, a lo ngwaꞋ. A bɔ̂ŋ nê à bɔ àbu yeamɔꞋ mbɔ̀ mèmpème kàlìà, tè ntsè ndɨ àa bɔ èbu bebe bɔɔ màꞋà wê a èbem èwet Satàn wu kà wu li lema la. 44[Abot, tègwèt tɔb teà kà li mpfəèꞋte, bɔ̀ ka meè ngua ndìa ndììma èwet wu.] 45Àka yê a mè ngɨ̀ à ghɨa kàbɔ̀ŋ, à lo ngwaꞋ. A bɔ̂ŋ nê à bɔ mèmpème nè àka yeamɔꞋ tè ntsè ndɨ bɔ̀ɔ màꞋà wê a èbem èwet Satàn nè èka bê bebe la. 46[Abot, tègwèt tɔb teà kà li mpfəèꞋte, bɔ̀ ka meè ngua ndìa ndììma èwet wu.] 47Èghɨ lê e ghɨ̂ à ghɨa kàbɔ̀ŋ, à tsɔꞋ ngwaꞋ. A bɔ̂ŋ nê à nyi a kèfɔ̧̀ Mbɔ̧ɔ̧mà nè èghɨ lemɔꞋ, tè ntsè ndɨ àa bɔ àghɨ yeabe enyi a èwet Satàn la. 48Abot,

‘Tègwèt tɔb teà kà li mpfəèꞋte,

bɔ̀ ka meè ngua ndia ndììma èwet wu’.

49Bɔɔ li zǐ èwet ane wòt ègème wuê mbɨ̀Ꞌɨ̀ bɔ̀ɔ ndzìà angwaŋ ane èghɨjɨ la.

50“Angwaŋ nàà mbɔ̀, ka angwaŋ bakà wua ntsia ndɨ̧̀à, ko bɔ̀ɔ ghɨ̀ na tè naa mě me lɨ̧̌ à? Bɨ̀ wu mbɨ̀Ꞌɨ̀ angwaŋ nàa ndɨ̧̀à la ayɔa bɔbȩ, mè me tseke ntsɔ̧̀ nè bòt.”

Currently Selected:

Mak 9: mnf

Highlight

Copy