Mak 6
6
Bɔ tu̧ èngǎ̧ Yesò a Nazàlet
(Mat 13:53-58; Lk 4:16-30)
1Yesò li ndɔ̀Ꞌ abot ngwènè àlaꞋ azi. Me ghà ale, bɔkatè tò bu e kuŋe atò. 2Tà lɔ̀Ꞌɔ àliapfəèa Bèjuê, ngà me nyɨꞋte a lob Mbɔ̧ɔ̧mà yɔb. A taꞋa tsě bòt bu njùtâ la, tè bɔ tsiꞋa mbììta nê:
“Mbê waa nɨ̀ mèngà̧ maa ègème nèŋàà? Tà nchɨɨme nɨ̀ èwuu èyì waa nèŋàà? Ye èwuu mènəè kà ye fɨ̀Ꞌ kǒ tàa ngɨ̀à la! 3Tè eyaa ntsě kapentà wu tà wù waã Màlià la à? Ka Jimsì bɔ̂ Jòsêb, nè Simùn bɔ̂ Judàs wu bɔnyɨ tò à? Ka bɔnyɨ tò bɔɔ̀zi aà ntsèka ba tò ba à?” Bɔ làꞋ ale, mbɔ̂ ntû̧ èngǎ̧ tò.
4Yesò shu abua yɔb nê, “Bɔɔ nkùkta ndàꞋàtɔŋ adzìꞋ àgème, tè tsìꞋi wuê bòt àlaꞋ atò nè bòt àndǎ̧ tò.” 5Tà li tà kà ghɨ ènəê kà ye fɨ̀Ꞌ abot nyaŋ, tè è bəèa wuê ndɨ tà li nɔ̀ŋè èbu bi àtsəa bòt èghɔ̧ mbɔ̀ŋè basòꞋa leꞋ, mbəè àwɔb la. 6A li ntàꞋa tsě atò ndɨ̀ wu bɔ li bɔ̀ ka zi èntɨ̧ɨ̧ wɔb ane tò la. Ale, Yesò me ghȩ̀ȩ̀ne a èbem èpfəè nyɨ̀Ꞌta bòt èngǎ̧ Mbɔ̧ɔ̧mà.
Yesò tsàà bɔkatè bi bu ntsɔ̀b babe la àbȩ
(Mat 10:5-15; Lk 9:1-6)
7Tà li ntɔ bɔkatè bi bu ntsɔ̀b babe la, ntsàà àwɔb àbȩ babe babe. Me tsà àwɔb ale, ŋa wɔb àtɔŋ bɔɔ me nɨa fəèà fote kàbɔ̀ŋ ane bòt la.
8Mbɔ̂ shu abua yɔb nê, “Bɨa me ghǎ, wòt ka nɨ̀ àghɨa tsa kà wu ambàŋ. Wòt ka nɨ̀ ka wuê èghɨjɨ, kò wuê ambè, kò èkab a ntaꞋà zi leꞋ. 9Wòt kwaã gùb ti, ka tà ka nɨ̌ ndǐmàꞋa tsǎ ka nè yu tà kwaã la.” 10Tà li mè shu abua yɔb nê, “ÀdziꞋ àgème bɔ sèe àwɨ̧ la, bɨ tseke abot tè àlia bɨ̀a me ghà la a kùꞋ.” 11Ka wòt bakà sèe awɨ̧ àdziꞋ, mbakà yute ànəa bɨ shua la, bɨ̀ me ghǎ bɨ yòò àbeb àdziꞋ mbɔŋ ane èka bɨ̧, nɨŋ nyɨ̀Ꞌte nê bɔ ghɨ ànəa kàbɔ̀ŋ ane yɨ̧.
12Bɔkatè Yesò bu e zə ànəa tà shu la, ngà me tsɔ̀te nê bòt è waꞋa mènəè kàbɔ̀ŋ mɔb. 13Bɔ li ntaꞋa fə fote kàbɔ̀ŋ ane bòt, mè ndzɔ̀Ꞌɔ mèwet ane èbeko ngò̧ò̧nà la mbɔ̂ mbəè àwɔb.
Èvə Jɔ̌n ndzìà èdzî
(Mat 14:1-12; Lk 9:7-9)
14È li ngu àfɨꞋa mbɔŋ fɔ̧̀ Elɔ̀d zə èghɨ è le wua ngɨ̀à la nkàà nê èlen Yesò e li ntàꞋa ghȩ̀ȩ̀ne. Bòt ko e li ntsìꞋa shua nê, “Jɔ̌n ndzìà èdzî è yu̧u̧mè! Eyaa wu àghɨa a ghɨ̀ ka tà bɔ mètàŋ me ghɨ̀ tèwuute mènəè maa la.”
15Bòt ko e me shu nê, “Wu Èlȩjà.”
Èbeko e me shu ayɔb nê “Tà wu ndàꞋàtɔŋ Mbɔ̧ɔ̧mà mbɨ̀Ꞌɨ̀ èbe èlia mbì.”
16Mbɨ̀Ꞌɨ̀ Elɔ̀d è zə mènəè maa la tà nê, “Tà wu Jɔ̌n ndzìà èdzî wu e ndi ndo àtsəa tò la tà yu̧u̧me la.”
17Elɔ̀d ko nê ye li ngɨ̀ bɔ baãaã Jɔ̌n nkùùle atò maꞋa fȩ ambo Èlɔdìà, vi wanyɨ tò Filìb tà fâ nɨŋ la. 18Ngu ndɨ Jɔ̌n li shu abua tò nê mbɨ̧ tɔb te bakà bɨ̧̀ɨ̧̀ne nê tà fǎ Èlɔdìà vi wanyɨ vi la. 19Ale, Èlɔdìà baãaã Jɔ̌n a èntɨ̧ɨ̧ vi, me kɨ e ghɨ̌ bɔɔ bùŋe atò, ka tà ka ye èlu̧, 20ngu nê Elɔ̀d li ngua mbɔ̀a a Jɔ̌n, ndɨ̀ wu tà lè ko nê tà wu wòt ntsɔ̧̀, mè ngu wòt Mbɔ̧ɔ̧mà la, ale, tà nɔ̀ŋè atò ntsɔ̧̀. Elɔ̀d li ngua nkɔ̀ŋkà e zə èngǎ̧ Jɔ̌n, ka tà zə a tàꞋa kɨ̀Ꞌne atò.
21A li ngà me lìa, èlu̧ e dzə a si abua Èlɔdìà, àfɨꞋa Elɔ̀d nàa ngùꞋtà àlia bɔ̀ le lɔꞋ mbi atò la bɔ̂ bèkěm nɨ̧ bi, nè bɔɔjuŋ ayɔɔ bèshujà, nè bòt nɨ̧ àlaꞋ a Galìlî. 22Mbɨ̀Ꞌɨ̀ waã Èlɔdìà waàvi nyi a lob mben la, a taꞋa bɔ̌ Elɔ̀d bɔ̂ bègɨ̧̀ bi.
Fɔ̧̀ Elɔ̀d shu abua waàvi wu nê, “Lo̧ àghɨa à kɔ̀ŋkè la, ko maa ŋa abua yê.” 23Elɔ̀d zì nkà̧ abua tò nê, “À bììta wuê ghà leꞋ, ko maa ŋa, ka è màà ngu wuê àbâ àlaꞋ am.”
24Waàvi wu dzəè ngà àbȩ mbììte a nyɨ̌ vi nê yè lo̧ ghà leꞋ?
Nyɨ̌ tò wu nê, “Lo̧ àtsəa Jɔ̌n ndzìà èdzî.”
25Waàvi wu bê ndùùlà ngwènè abua fɔ̧̀ shu abua tò nê “Ŋa àtsəa Jɔ̌n ndzìà èdzî abua am àfɨ̀Ꞌ yaa a èbem ankì.”
26Fɔ̧̀ zə ale, a taꞋa saa tò, ka ndɨ̀ wu tà ghɨ̂ ngɨ̀ tè ndzì nkà̧ a mbì bègɨ̧̀ bi la, tà kà wua nkɨ e bəꞋə èngǎ̧ vi. 27Ale, tà tsaa shujà kǒ ane èbu bèa mbààba atò la nê tà gha nɨ̀ àtsəa Jɔ̌n nkɨ̀Ꞌɨ̂. Shujà wu gha a lob tèfȩ yu, ndòò àtsəa Jɔ̌n, 28ndzi a èbem ankì nkɨ̀Ꞌɨ̂ ŋǎ abua waàvi wu, tà ghà ŋa abua nyɨ̌ vi Èlɔdìà. 29ÀfɨꞋa bɔkatè Jɔ̌n e zə ànəê yaa la, bɔ kɨꞋɨ̀ mpàa àkènkwèn yu nɨŋ ngà ntuê a èbem èsî.
Yesò jɨ̌ bòt bètɔsì batà̧â̧
(Mat 14:13-21; Lk 9:10-17; Jn 6:1-14)
30Bɔntu̧ Yesò bu e li nkua a lèghȩ̀ȩ̀nè wu nkwene ane tò, shua tò àghɨ àgème bɔ ghɨ̂ mè nyɨ̀Ꞌte la. 31Bòt e li ntàꞋa wua nkɨ̀Ꞌa ndzèa Yesò mè ngà, tè bɔ̂ bɔntu̧ bi è ka lem ntsi mbɔ àfɨ̀Ꞌ ejɨ èghɨjɨ bɔb. Ale, tà shu abua yɔb nê, “Bɨ̀ ghɨa ba nɨ̧̀ ba è gha àdziꞋa kà ye bòt bɨ̀ nyaꞋ ndzètè.”
32Ale, bɔ lɔꞋɔ abot nyi a èbem ànkànuꞋ, ngà àdziꞋa ko bɔ̀ɔ ndziꞋne. 33Ka bòt nyaŋ e ye awɔb ngà la, nko awɔb, ndzəa èpfəè ègème nduula èka ngà a mbì nyi àdziꞋa ngaa ka Yesò bɔ̂ bɔkatè bi bu e kɨꞋɨ̀. 34Mbɨ̀Ꞌɨ̀ Yesò dzəâ a èbem ànkànuꞋ yu la, tà ye taꞋà ènɔ̧̂ bòt, tèsȩ tɔb te kua tò, nkàà nê bɔ li ngu mbɨ̀Ꞌɨ̀ njɨ̀tsə kà yea mbaabà. Ale, tà bùꞋ me nyɨꞋte awɔb mènəè nyaŋ nyaŋ.
35È tseke tè ngu àfɨꞋa nyèmtèsi, bɔkatè tò e kɨꞋɨ̀ shu abua tò nê, “Eyaa wu àdziꞋa kà ye bòt, àfɨ̀Ꞌ a mè ngà, 36è wu ale à ghɨ̀ bòt baa e taate nga a èbem èpfəè njù̧ù̧te èghɨjɨ bɔb.”
37Yesò bɨ̀ɨ̀lè nê “Bɨ̀a mbɔŋ bɨ̀ ŋa àghɨ bɔ̀ jɨ.”
Bɔ biite atò nê, “À shua nê bà nɨ bèdìnalì #6:37 Dìnalì li ngu èkab àfàꞋ kaleyà ane àliabȩ. ènkɨ̀ yebe njù̧a bled ŋa bɔ̀ jɨ?” 38Yesò mè mbììte awɔb nê, “Bɨ bɔ tètaãaãte bled tesòꞋa? Bɨ̀ lɨŋka bà ye.”
Bɔ ghà ndȩ̀ nkɨ̀Ꞌɨ̂ shu abua tò nê, “Tètaãaãte bled tetà̧â̧ nè basə babe.”
39Yesò shu abua bɔkatè bi nê bɔ̀ fete bòt bu ane ndzɔ̀ŋtsə ngɨ̀ bɔ̀ tseke a ègwet mèfəèꞋ. 40Ale, bɔ tseke a si ane ènkɨ̀ ènkɨ̀ nè èghem yetà̧â̧ yetà̧â̧ ane ndzɔ̀ŋ. 41Yesò nɨ̀ tètaãaãte bled tu tetà̧â̧ la nè basə bu babe la, ndɔ̀kè a vi ndɨ̀ŋkè ègwet ŋà mènkɔ̀ŋke abua Mbɔ̧ɔ̧mà, mbɔ̂ mbòꞋte bèbled bu ŋa abua bɔkatè bi nê bɔ ghàbte abua bòt bu. 42Wòt ègème jɨ ndzet. 43Bɔkatè bu e fetè bèbled nè basə be bəèꞋəè la be lu̧ bankì ntsɔ̀b babe. 44Mbâ̧tsə te li njɨ la li ngu bètɔsì batà̧â̧.
Yesò ghȩ̀ȩ̀nè a ègwet mèleb
(Mat 14:22-33; Jn 6:15-21)
45ÀfɨꞋa mbɔŋ Yesò ghɨ̀ bɔkatè bu e nyi a èbem ànkànuꞋ nga a mbì tò agua èlemè àko zia, a Bèsedà, tà tsìꞋi ngɨ̀ ènɔ̧̂ bòt bu e taatè. 46ÀfɨꞋa tà làꞋnè àwɔb la, tà gha a ègwet ekù̧ù̧nè ko etsàꞋte Mbɔ̧ɔ̧mà.
47Nyèm me fene, ànkànuꞋ yu a wu a kètsìà èlemè wu, Yesò bɔ ngu aguŋ zìa ndziꞋne. 48Tà ye ndɨ bɔkatè tò bu e yea ngoꞋ ŋwèèlà ànkànuꞋ yu, ndɨ̀ wu àfeme aa nkɨ̀Ꞌa àbâ yu bɔ ghà la. ÈtsəꞋ e me tsi, Yesò me ghȩ̀ȩ̀ne a ègwet *èdzî nkɨ̀Ꞌa ekwene ane yɔb. Tà kɨꞋɨ tê tà tsiꞋa nkɨ epààtè wɔb, 49bɔ ye atò mbènte ŋȩ nê “Wu mpfəà!” 50Ngu ndɨ bɔ ye atò ale ntaꞋa bɔa la.
Yesò shu abua yɔb kwàꞋ àfɨꞋa mbɔŋ nê “Bɨ̀ baãaã mèntɨ̧ɨ̧ mɨ̧! Wu mmɔ̌, bɨ̀ ka mbɔ̀a.” 51Tà nyi a èbem ànkànuꞋ yu, àfeme yu a loà, 52nkàà nê èyì wɔb e li e ka ziꞋ ndzàà bɔɔ ko àghɨa Yesò li me nɨ tètaãaãte bled ejɨɨ bòt ale, ngua nɨ̀a nyɨ̀Ꞌta la. Mèntɨ̧ɨ̧ mɔb li è kà ko mbà̧aã àyea mbɔŋ.
Yesò bəâ bòt àghɔ̧ a Gènesalèt
(Mat 14:34-36)
53Mbɨ̀Ꞌɨ̀ bɔ ntû̧ èlemè la, bɔ kwene a si Gènesalèt, sèlè ànkànuꞋ yu abot. 54Mbɨ̀Ꞌɨ̀ bɔ dzə a èbem ànkànuꞋ la, bòt e bê ndȩ̀ a Yesò. 55Ale, bɔ lùùlà ngà àdziꞋ àgème ŋèꞋte bòt àghɔ̧ a ègwet bèmatà bɔb nkùŋè atò àdziꞋ àgème bɔ zə nê tà wu abot la. 56ÀdziꞋ àgème Yesò ghà la, a èpfəè techɨɨle nè èbe nɨ̧ kò mbȩtsə leꞋ, bòt e nɨ bòt èghɔ̧ nga èsà̧aã tèwentsə nɔ̀ŋè. Mbɔ̂ shù̧ù̧te atò nê tà tsiꞋ bèngɔ̧̀ bu è lem mbà̧à̧ta ka wuê ntseit ndǐ tò. Ngɨ̀ ale, wòt ègème tà mbà̧à̧te àtsəa ndǐ tò la, pem.
Currently Selected:
Mak 6: mnf
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
Mak 6
6
Bɔ tu̧ èngǎ̧ Yesò a Nazàlet
(Mat 13:53-58; Lk 4:16-30)
1Yesò li ndɔ̀Ꞌ abot ngwènè àlaꞋ azi. Me ghà ale, bɔkatè tò bu e kuŋe atò. 2Tà lɔ̀Ꞌɔ àliapfəèa Bèjuê, ngà me nyɨꞋte a lob Mbɔ̧ɔ̧mà yɔb. A taꞋa tsě bòt bu njùtâ la, tè bɔ tsiꞋa mbììta nê:
“Mbê waa nɨ̀ mèngà̧ maa ègème nèŋàà? Tà nchɨɨme nɨ̀ èwuu èyì waa nèŋàà? Ye èwuu mènəè kà ye fɨ̀Ꞌ kǒ tàa ngɨ̀à la! 3Tè eyaa ntsě kapentà wu tà wù waã Màlià la à? Ka Jimsì bɔ̂ Jòsêb, nè Simùn bɔ̂ Judàs wu bɔnyɨ tò à? Ka bɔnyɨ tò bɔɔ̀zi aà ntsèka ba tò ba à?” Bɔ làꞋ ale, mbɔ̂ ntû̧ èngǎ̧ tò.
4Yesò shu abua yɔb nê, “Bɔɔ nkùkta ndàꞋàtɔŋ adzìꞋ àgème, tè tsìꞋi wuê bòt àlaꞋ atò nè bòt àndǎ̧ tò.” 5Tà li tà kà ghɨ ènəê kà ye fɨ̀Ꞌ abot nyaŋ, tè è bəèa wuê ndɨ tà li nɔ̀ŋè èbu bi àtsəa bòt èghɔ̧ mbɔ̀ŋè basòꞋa leꞋ, mbəè àwɔb la. 6A li ntàꞋa tsě atò ndɨ̀ wu bɔ li bɔ̀ ka zi èntɨ̧ɨ̧ wɔb ane tò la. Ale, Yesò me ghȩ̀ȩ̀ne a èbem èpfəè nyɨ̀Ꞌta bòt èngǎ̧ Mbɔ̧ɔ̧mà.
Yesò tsàà bɔkatè bi bu ntsɔ̀b babe la àbȩ
(Mat 10:5-15; Lk 9:1-6)
7Tà li ntɔ bɔkatè bi bu ntsɔ̀b babe la, ntsàà àwɔb àbȩ babe babe. Me tsà àwɔb ale, ŋa wɔb àtɔŋ bɔɔ me nɨa fəèà fote kàbɔ̀ŋ ane bòt la.
8Mbɔ̂ shu abua yɔb nê, “Bɨa me ghǎ, wòt ka nɨ̀ àghɨa tsa kà wu ambàŋ. Wòt ka nɨ̀ ka wuê èghɨjɨ, kò wuê ambè, kò èkab a ntaꞋà zi leꞋ. 9Wòt kwaã gùb ti, ka tà ka nɨ̌ ndǐmàꞋa tsǎ ka nè yu tà kwaã la.” 10Tà li mè shu abua yɔb nê, “ÀdziꞋ àgème bɔ sèe àwɨ̧ la, bɨ tseke abot tè àlia bɨ̀a me ghà la a kùꞋ.” 11Ka wòt bakà sèe awɨ̧ àdziꞋ, mbakà yute ànəa bɨ shua la, bɨ̀ me ghǎ bɨ yòò àbeb àdziꞋ mbɔŋ ane èka bɨ̧, nɨŋ nyɨ̀Ꞌte nê bɔ ghɨ ànəa kàbɔ̀ŋ ane yɨ̧.
12Bɔkatè Yesò bu e zə ànəa tà shu la, ngà me tsɔ̀te nê bòt è waꞋa mènəè kàbɔ̀ŋ mɔb. 13Bɔ li ntaꞋa fə fote kàbɔ̀ŋ ane bòt, mè ndzɔ̀Ꞌɔ mèwet ane èbeko ngò̧ò̧nà la mbɔ̂ mbəè àwɔb.
Èvə Jɔ̌n ndzìà èdzî
(Mat 14:1-12; Lk 9:7-9)
14È li ngu àfɨꞋa mbɔŋ fɔ̧̀ Elɔ̀d zə èghɨ è le wua ngɨ̀à la nkàà nê èlen Yesò e li ntàꞋa ghȩ̀ȩ̀ne. Bòt ko e li ntsìꞋa shua nê, “Jɔ̌n ndzìà èdzî è yu̧u̧mè! Eyaa wu àghɨa a ghɨ̀ ka tà bɔ mètàŋ me ghɨ̀ tèwuute mènəè maa la.”
15Bòt ko e me shu nê, “Wu Èlȩjà.”
Èbeko e me shu ayɔb nê “Tà wu ndàꞋàtɔŋ Mbɔ̧ɔ̧mà mbɨ̀Ꞌɨ̀ èbe èlia mbì.”
16Mbɨ̀Ꞌɨ̀ Elɔ̀d è zə mènəè maa la tà nê, “Tà wu Jɔ̌n ndzìà èdzî wu e ndi ndo àtsəa tò la tà yu̧u̧me la.”
17Elɔ̀d ko nê ye li ngɨ̀ bɔ baãaã Jɔ̌n nkùùle atò maꞋa fȩ ambo Èlɔdìà, vi wanyɨ tò Filìb tà fâ nɨŋ la. 18Ngu ndɨ Jɔ̌n li shu abua tò nê mbɨ̧ tɔb te bakà bɨ̧̀ɨ̧̀ne nê tà fǎ Èlɔdìà vi wanyɨ vi la. 19Ale, Èlɔdìà baãaã Jɔ̌n a èntɨ̧ɨ̧ vi, me kɨ e ghɨ̌ bɔɔ bùŋe atò, ka tà ka ye èlu̧, 20ngu nê Elɔ̀d li ngua mbɔ̀a a Jɔ̌n, ndɨ̀ wu tà lè ko nê tà wu wòt ntsɔ̧̀, mè ngu wòt Mbɔ̧ɔ̧mà la, ale, tà nɔ̀ŋè atò ntsɔ̧̀. Elɔ̀d li ngua nkɔ̀ŋkà e zə èngǎ̧ Jɔ̌n, ka tà zə a tàꞋa kɨ̀Ꞌne atò.
21A li ngà me lìa, èlu̧ e dzə a si abua Èlɔdìà, àfɨꞋa Elɔ̀d nàa ngùꞋtà àlia bɔ̀ le lɔꞋ mbi atò la bɔ̂ bèkěm nɨ̧ bi, nè bɔɔjuŋ ayɔɔ bèshujà, nè bòt nɨ̧ àlaꞋ a Galìlî. 22Mbɨ̀Ꞌɨ̀ waã Èlɔdìà waàvi nyi a lob mben la, a taꞋa bɔ̌ Elɔ̀d bɔ̂ bègɨ̧̀ bi.
Fɔ̧̀ Elɔ̀d shu abua waàvi wu nê, “Lo̧ àghɨa à kɔ̀ŋkè la, ko maa ŋa abua yê.” 23Elɔ̀d zì nkà̧ abua tò nê, “À bììta wuê ghà leꞋ, ko maa ŋa, ka è màà ngu wuê àbâ àlaꞋ am.”
24Waàvi wu dzəè ngà àbȩ mbììte a nyɨ̌ vi nê yè lo̧ ghà leꞋ?
Nyɨ̌ tò wu nê, “Lo̧ àtsəa Jɔ̌n ndzìà èdzî.”
25Waàvi wu bê ndùùlà ngwènè abua fɔ̧̀ shu abua tò nê “Ŋa àtsəa Jɔ̌n ndzìà èdzî abua am àfɨ̀Ꞌ yaa a èbem ankì.”
26Fɔ̧̀ zə ale, a taꞋa saa tò, ka ndɨ̀ wu tà ghɨ̂ ngɨ̀ tè ndzì nkà̧ a mbì bègɨ̧̀ bi la, tà kà wua nkɨ e bəꞋə èngǎ̧ vi. 27Ale, tà tsaa shujà kǒ ane èbu bèa mbààba atò la nê tà gha nɨ̀ àtsəa Jɔ̌n nkɨ̀Ꞌɨ̂. Shujà wu gha a lob tèfȩ yu, ndòò àtsəa Jɔ̌n, 28ndzi a èbem ankì nkɨ̀Ꞌɨ̂ ŋǎ abua waàvi wu, tà ghà ŋa abua nyɨ̌ vi Èlɔdìà. 29ÀfɨꞋa bɔkatè Jɔ̌n e zə ànəê yaa la, bɔ kɨꞋɨ̀ mpàa àkènkwèn yu nɨŋ ngà ntuê a èbem èsî.
Yesò jɨ̌ bòt bètɔsì batà̧â̧
(Mat 14:13-21; Lk 9:10-17; Jn 6:1-14)
30Bɔntu̧ Yesò bu e li nkua a lèghȩ̀ȩ̀nè wu nkwene ane tò, shua tò àghɨ àgème bɔ ghɨ̂ mè nyɨ̀Ꞌte la. 31Bòt e li ntàꞋa wua nkɨ̀Ꞌa ndzèa Yesò mè ngà, tè bɔ̂ bɔntu̧ bi è ka lem ntsi mbɔ àfɨ̀Ꞌ ejɨ èghɨjɨ bɔb. Ale, tà shu abua yɔb nê, “Bɨ̀ ghɨa ba nɨ̧̀ ba è gha àdziꞋa kà ye bòt bɨ̀ nyaꞋ ndzètè.”
32Ale, bɔ lɔꞋɔ abot nyi a èbem ànkànuꞋ, ngà àdziꞋa ko bɔ̀ɔ ndziꞋne. 33Ka bòt nyaŋ e ye awɔb ngà la, nko awɔb, ndzəa èpfəè ègème nduula èka ngà a mbì nyi àdziꞋa ngaa ka Yesò bɔ̂ bɔkatè bi bu e kɨꞋɨ̀. 34Mbɨ̀Ꞌɨ̀ Yesò dzəâ a èbem ànkànuꞋ yu la, tà ye taꞋà ènɔ̧̂ bòt, tèsȩ tɔb te kua tò, nkàà nê bɔ li ngu mbɨ̀Ꞌɨ̀ njɨ̀tsə kà yea mbaabà. Ale, tà bùꞋ me nyɨꞋte awɔb mènəè nyaŋ nyaŋ.
35È tseke tè ngu àfɨꞋa nyèmtèsi, bɔkatè tò e kɨꞋɨ̀ shu abua tò nê, “Eyaa wu àdziꞋa kà ye bòt, àfɨ̀Ꞌ a mè ngà, 36è wu ale à ghɨ̀ bòt baa e taate nga a èbem èpfəè njù̧ù̧te èghɨjɨ bɔb.”
37Yesò bɨ̀ɨ̀lè nê “Bɨ̀a mbɔŋ bɨ̀ ŋa àghɨ bɔ̀ jɨ.”
Bɔ biite atò nê, “À shua nê bà nɨ bèdìnalì #6:37 Dìnalì li ngu èkab àfàꞋ kaleyà ane àliabȩ. ènkɨ̀ yebe njù̧a bled ŋa bɔ̀ jɨ?” 38Yesò mè mbììte awɔb nê, “Bɨ bɔ tètaãaãte bled tesòꞋa? Bɨ̀ lɨŋka bà ye.”
Bɔ ghà ndȩ̀ nkɨ̀Ꞌɨ̂ shu abua tò nê, “Tètaãaãte bled tetà̧â̧ nè basə babe.”
39Yesò shu abua bɔkatè bi nê bɔ̀ fete bòt bu ane ndzɔ̀ŋtsə ngɨ̀ bɔ̀ tseke a ègwet mèfəèꞋ. 40Ale, bɔ tseke a si ane ènkɨ̀ ènkɨ̀ nè èghem yetà̧â̧ yetà̧â̧ ane ndzɔ̀ŋ. 41Yesò nɨ̀ tètaãaãte bled tu tetà̧â̧ la nè basə bu babe la, ndɔ̀kè a vi ndɨ̀ŋkè ègwet ŋà mènkɔ̀ŋke abua Mbɔ̧ɔ̧mà, mbɔ̂ mbòꞋte bèbled bu ŋa abua bɔkatè bi nê bɔ ghàbte abua bòt bu. 42Wòt ègème jɨ ndzet. 43Bɔkatè bu e fetè bèbled nè basə be bəèꞋəè la be lu̧ bankì ntsɔ̀b babe. 44Mbâ̧tsə te li njɨ la li ngu bètɔsì batà̧â̧.
Yesò ghȩ̀ȩ̀nè a ègwet mèleb
(Mat 14:22-33; Jn 6:15-21)
45ÀfɨꞋa mbɔŋ Yesò ghɨ̀ bɔkatè bu e nyi a èbem ànkànuꞋ nga a mbì tò agua èlemè àko zia, a Bèsedà, tà tsìꞋi ngɨ̀ ènɔ̧̂ bòt bu e taatè. 46ÀfɨꞋa tà làꞋnè àwɔb la, tà gha a ègwet ekù̧ù̧nè ko etsàꞋte Mbɔ̧ɔ̧mà.
47Nyèm me fene, ànkànuꞋ yu a wu a kètsìà èlemè wu, Yesò bɔ ngu aguŋ zìa ndziꞋne. 48Tà ye ndɨ bɔkatè tò bu e yea ngoꞋ ŋwèèlà ànkànuꞋ yu, ndɨ̀ wu àfeme aa nkɨ̀Ꞌa àbâ yu bɔ ghà la. ÈtsəꞋ e me tsi, Yesò me ghȩ̀ȩ̀ne a ègwet *èdzî nkɨ̀Ꞌa ekwene ane yɔb. Tà kɨꞋɨ tê tà tsiꞋa nkɨ epààtè wɔb, 49bɔ ye atò mbènte ŋȩ nê “Wu mpfəà!” 50Ngu ndɨ bɔ ye atò ale ntaꞋa bɔa la.
Yesò shu abua yɔb kwàꞋ àfɨꞋa mbɔŋ nê “Bɨ̀ baãaã mèntɨ̧ɨ̧ mɨ̧! Wu mmɔ̌, bɨ̀ ka mbɔ̀a.” 51Tà nyi a èbem ànkànuꞋ yu, àfeme yu a loà, 52nkàà nê èyì wɔb e li e ka ziꞋ ndzàà bɔɔ ko àghɨa Yesò li me nɨ tètaãaãte bled ejɨɨ bòt ale, ngua nɨ̀a nyɨ̀Ꞌta la. Mèntɨ̧ɨ̧ mɔb li è kà ko mbà̧aã àyea mbɔŋ.
Yesò bəâ bòt àghɔ̧ a Gènesalèt
(Mat 14:34-36)
53Mbɨ̀Ꞌɨ̀ bɔ ntû̧ èlemè la, bɔ kwene a si Gènesalèt, sèlè ànkànuꞋ yu abot. 54Mbɨ̀Ꞌɨ̀ bɔ dzə a èbem ànkànuꞋ la, bòt e bê ndȩ̀ a Yesò. 55Ale, bɔ lùùlà ngà àdziꞋ àgème ŋèꞋte bòt àghɔ̧ a ègwet bèmatà bɔb nkùŋè atò àdziꞋ àgème bɔ zə nê tà wu abot la. 56ÀdziꞋ àgème Yesò ghà la, a èpfəè techɨɨle nè èbe nɨ̧ kò mbȩtsə leꞋ, bòt e nɨ bòt èghɔ̧ nga èsà̧aã tèwentsə nɔ̀ŋè. Mbɔ̂ shù̧ù̧te atò nê tà tsiꞋ bèngɔ̧̀ bu è lem mbà̧à̧ta ka wuê ntseit ndǐ tò. Ngɨ̀ ale, wòt ègème tà mbà̧à̧te àtsəa ndǐ tò la, pem.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy