Wakolosai 3
3
Ishini maisha ya Kikirist̯o
1Kwa kwamba mupfegwa maisha mapfya dza vya *Kirist̯o afufukiyevyo na akiwa na maisha mapfya, jwaniani kudzapata haya mema yeyo mbinguni, hukuḍe kwa Kirist̯o akaiyeko mukono kuyume wa Muungu.#3:1 Kiyahud̯i muntu akikaa chihako mukono kuyume wa muntu ni muntu jwa hila. 2Namutsekaiya t̯amaa za mambo ya huju lumwengu, ela jwaniani kupata mema ya mbinguni. 3Hiviḍe mwivyomukiishi d̯ura visakusiya, na sasa haya maisha yenu mapfya yaa kuzimuni mwa Kirist̯o eye pfamodza na Muungu. 4Na jeje Kirist̯o, ahupfiye haya maisha mapfya, adzepfokudza lumwenguni, hwonse hudzawa pfamodza nae na hudzawa na marembo dzae.
5D̯ubva yatsani t̯amaa zenu na mahendo yenu mazuka mazuka mwiyokuwa nayo. Yatsani mambo ya uḅari, mambo machafu machafu, na t̯amaa nzuka nzuka zonse za kimwii na muyatse kumiiya mahe vya wantu. Koro kuwa muntu jwa kumiiya mahe vya wantu ni sawa na kuwa muntu jwa kuyomba miungu ya nsuwe. 6Wantu weonahenda mambo dza haya, Muungu kadzawahukumu vyumuni. 7Hat̯a nywinywi wenye, d̯ura mwikit̯awaligwa ni hizi hizi t̯amaa nzuka nzuka. 8Ela sasa, yatsani kula aina ya ngoro, yatsani kuhendeana mambo mazuka mazuka, yatsani vitsolo na vyuuwo vichafu vichafu. 9-10Kwa kwamba muyayatsa haya maisha yenu ya kae na mwakuishini maisha mapfya, namutsekaa mukyambiana nsuwe. Muungu kamumpa haya haya maisha mapfya na kakumuhendezani mugije kuwa dzae, ili mupate kumumanya jeje urembo zaid̯i.#3:9-10 Ambu: chima mwichokumumanyani jeje zaid̯i na zaid̯i. 11Haya haya maisha mapfya ntaya cha kwamba muntu ni Muyahud̯i ambu hat̯a, ambu muntu kahinywa ambu hat̯a. Ntaya cha kwamba muntu kasoma ambu hat̯a. Ntaya cha kwamba anahwajwa dza baud̯a ambu hat̯a, na wala ntaya cha kwamba muntu ni muhumwa ambu hat̯a. Cha mud̯a ni kwamba Kirist̯o ka dzuu ya wonse, na anaishi kuzimuni mwa wantu wonse wamuhikiziyeo.
12Kwa kwamba Muungu kamutsana muwe wantuwe watsakwa, weo wadheru, ni had̯i muwe wantu wat̯ei na muwe na myojo myema kwa wangine. Wani wantu wa kutsadzihwaa, wani wampowe, na muwe wantu wa kuit̯isa. 13Namutsedhimwa kuit̯isia wenzenu. Wani wantu wa kuyatsiana dza vya Ḅwana amuyatsiiyevyo nywinywi. 14Na dzuu ya vyonse hivi, tsakanani nywinywi na nywinywi. Koro matsako ndiyo yeyonahuweka hwonse kuwa dza kintu kimodza kaḅisa!
15Kula mumodza jwenu ni dza kiiriiri cha hu mwii wa Kirist̯o, na Muungu kamutsana muwe wantuwe na mupate kukaiyana na naghea. D̯ubva hi myojo yenu nait̯awaligwe ni hi naghea ya Kirist̯o amumpiyeyo, na meshi muwe wantu wa kumuyaviza ḍuḍa Muungu. 16Hichi chuuwo cha Kirist̯o nachikae myojoni mwenu meshi. Yongweezanani na kufundana na mvidhyo. Ikaani mukimuyaviza ḍuḍa Muungu kwa kumukwimbia meya ya zaburi na meya yangine ya kumushad̯a. 17Na kula mwichonanena na mwichonahenda, kihendeni kwa sari ḍya Ḅwana jwehu Yesu, huku mukimuyaviza ḍuḍa Muungu Baba jwehu kuchiiya na kwa Kirist̯o.
Namuna ya kukaiyana dza Wakirist̯o madzumbani
18Nywinywi wake, kula mumodza jwenu ni kudziweka nsii ya muumewe, koro ndivyo vya wake wa Kikirist̯o wevyonamala kuhenda. 19Nywinywi wayume nanywi, watsakeni wakazenu na mutseewa wakali kwao.
20Nywinywi wana, meshi wat̯iini wavyazi wenu, koro hivi ndivyo vivyonamutsakiza Ḅwana. 21Nywinywi wavyazi nanywi, namutsewabaukia-baukia wana wenu kut̯wa mutsekudzawayaga mojo.
22Nywinywi wahumwa, wat̯iini kwa kula njia hawa maḅwana wenu wa hapfa hapfa lumwenguni. Namutsehenda kazi mupate kuonekana t̯u ambu mupate kudzitsakiza kwao ḅasi, ela hendani kazi na mojo mumodza kwa dzambo ḍya Ḅwana Yesu. 23Kula kazi mwiyonahenda, ihendeni na mojo wonse dza kwamba ntamukwaakumuhumikiani mwanaad̯amu, ela ihendeni dza kwamba mwakumuhumikiani Ḅwana mwenye. 24Kumbukani kwamba Ḅwana kadzamumpa hiḍi t̯ubvo aḍiwaahid̯iyeḍyo wantuwe. Koro mukwakuwahumikiani maḅwana wenu dza hivi, munawa kwamba mwakumuhumikiani Kirist̯o mwenye. 25Ela kula muntu eyenahenda mazuka, Muungu anamuhukumu kwa haya mazukaye ahendeyeyo. Koro Muungu nkahukumu wantu na upend̯eleo.
Currently Selected:
Wakolosai 3: pkb
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy