Matayo 15

Yesu kawabusa Mafarisayo dzuu ya kuuḅa maadha yao

Marko 7:1-13

1Makisa kudza *Mafarisayo na waalimu wa *Sharia kuyawa Yerusalemi wadziyeo kumukorofat̯a Yesu. 2D̯ubva wamuuza wamwamba, “Kut̯i awa wanafund̯iwo ntawakae na kuuḅa adha za wabibi zehu? Wakikaa kuḍyani ntawakae na kunawa kisharia dza ivyonamala!”

3Yesu kawambukuya kawamba, “Kut̯i nanywi munakaa na kuzivunza amuri za Muungu kwa dzambo ḍya kuuḅa maadha yenu? 4Koro Muungu kamba, ‘Muhile babajo na mamajo.’ Na kawii kamba, ‘Yuḍejwonse amutsoleye ise ambu nina ni kuyagwa!’ 5Ela nywinywi mwakuwayongweezani wantu kuwafat̯ula wavyazi wao. Koro munakwamba muntu akimwamba ise ambu nina, ‘Nina kintu cha kukupfonya nacho, ela nikiweka nikiyavye dza nt̯unu kwa Muungu,’ ḅasi nkanamala kuwahendea kiḍechonse kawii. 6Ndookomu kwa dzambo ḍya kuuḅa maadha yenu, mukihendeza hichi chuuwo cha Muungu kitsowa maana. 7E nywinywi mu wambiimbii t̯i! *Nabii Isaya kanena hachi dzuu ya wantu dzanywi, epfot̯aḅiri akyamba,

8‘Hawa wantu hawa wananihila na miyomu t̯u,

ela myojo yao yaa kuye nami.

9Kuniyomba kwao ntaku maana yaḍeyonse,

koro wanayongweeza masharia yatungijweyo ni wanaad̯amu

dza kwamba ndiyo hi Sharia ya Muungu.’ ”

Yesu kayongweeza dzuu ya udheru wa kiruhu

Marko 7:14-23

10Makisa Yesu kaihana hafufi hi t̯ut̯a ya wantu. Wepfokwenda kawamba, “Nipfindiiyani urembo na muimuke nivyokunenani. 11Hikiḍe cha muntu echonangiza kanwani sicho chichonamuhendeza kutsaawa mudheru usoni kwa Muungu. Ela hikiḍe chichonayawa kanwani mwakwe ndicho chichonamuhendeza kutsaawa mudheru.”

12Makisa hawa wanafund̯i wamwendea Yesu na wamuuza wamwamba, “Kumanya kwamba hiviḍe uneneyevyo kwanza viwangiza tsungu hawa Mafarisayo?” 13Ela Yesu kawambukuya kawamba, “Kula muhi usiot̯orwa ni Baba jwangu jwa mbinguni udzakujwa na miziye. 14Nywinywi wayatseni t̯u. Hangu d̯ura ni wayongozi ntumbu matso. Na ntumbu matso akimugija yuroi ntumbu matso mwenziwe, wonse wanagwa simoni.”

15Kisa Pet̯ero kamwamba Yesu, “Ḅwana, hwambie maana ya hiḍi inganyo.” 16Yesu kambukuya kamba, “Koro hat̯a nanywi ntamukuimuka kintu hat̯a? 17Ntamunaona hat̯a kwamba, cha muntu echonaḍya kinanjia humboni makisa kinayawa kwa njia ya kwenda dhaka? 18Ela vyuuwo vizuka vizuka vinayawa mojoni mwa muntu. Na hivi ndivyo vivyonamuhendeza muntu kutsaawa mudheru usoni kwa Muungu. 19Koro kuzimuni mwa mojo wa muntu, ndimo kwimonayawa mat̯aro mazuka mazuka yeyonamungiza muntu kunjia uḅarini, wivini, uyajini, rangani, kunenani nsuwe na kuneneani wangine mazuka. 20Ḅasi, haya haya mambo ndiyo yeyonamuhendeza muntu kutsaawa mudheru usoni kwa Muungu. Ela kuḍya chakuḍya pfasipfo kunawa mikono, ntakumuhendeze muntu kutsaawa mudheru usoni kwa Muungu.”

Faro ya muke asikwaa Muyahud̯i

Marko 7:24-30

21Makisa Yesu kanuka na Galilaya kenda ḍanda za midzi ya Turo na Sidoni. 22D̯ubva Yesu kendejwa ni muke mumodza Mukanaani jwa hukuhukuḍe. Huyu muke kamuyomba Yesu kamwamba, “E Ḅwana, Yesu Mwana jwa D̯aud̯i, nakuyomba unifwiye t̯ei. Koro nina mwanamuke wangu eye na mpepfo nzuka zizokumuhangaishani muno!” 23Ela Yesu kadzinyamaza mya. Nkakumwambukuya chuuwo hat̯a kimodza. Makisa hawa wanafund̯i wenda wamuyomba Yesu amugonzoze huyuḍe muke wakimwamba, “Ḅwana, mwambe agonzowe t̯i! Kakaiya kuhuuḅa-uḅa na nyuma na kuhubigia machara.” 24Yesu kambukuya kamba, “Mimi nihumigwa kwa wantu wa kyeet̯i cha Waisiraeli weo dza mbuzi ziariyezo. Sikuhumigwa kwa wantu wangine.” 25Ela huyuḍe muke kamwendea kamuvunzia nkuhi na kamuyomba kawii kamwamba, “Ḅwana, e ad̯o nigijiija!” 26Yesu kamwamba, “Si hachi kuhwaa chakuḍya cha wana ukifat̯uliye machughe.” 27Ela huyu muke kamwamba, “Gula ndivyo Ḅwana, ela hat̯a machughe nayo yanaḍya hu muharachao wiwonagwa kuyawa mezani kwa maḅwana zao.” 28Ndookomu Yesu kamwamba, “E muke, hachi una faro nkuu muno! D̯ubva navikuhendekeye dza uyombeyevyo.” Na iyo saa mwanamukewe kapfowa.

Yesu kapfonya wantu wenji

29Yesu kanuka na hukuḍe na kauja ḍanda ya ziwa ḍya Galilaya. Kenda kapfaa karimani dzuu na kakaa chihako. 30D̯ubva kendejwa ni t̯ut̯a nkuu na nkuu ya wantu wamupfiikiyeo wantu weokuwa vihewi, ntumbu matso, wantu wahinamfiyeo, maḅuḅwi na wangine weokuwa na majwazi garagara. Wonse wenda wawaweka usoni kwa Yesu, nae kawapfonya wonse. 31Hawa wantu wamaka muno wakidzawakiona kwamba maḅuḅwi yakunenani, wahinamfiyeo wakupfonywani, vihewi wakwenendani, na ntumbu matso wakuonani! Ndookomu wamushad̯a Muungu jwa Isiraeli.

Yesu kaisa t̯ut̯a ya wantu zaid̯i ya elefu nee

Marko 8:1-10

32Makisa Yesu kawahana hawa wanafund̯iwe kawamba, “Nyakuwaoneani t̯ei muno hawa wantu hawa. Koro wesakukaa nami hapfa kwa nsiku ntahu sasa, na ntawa kiḍechonse cha kuḍya. Nami si haḍya ya kuwagonzoza na nzaa zao watsekudzavurika njiani.” 33Hawa wanafund̯i wamwambukuya wamwamba, “Huku huku yuwandani hwendapata ku, chakuḍya cha kuit̯osa hi hii t̯ut̯a yonse ya wantu?” 34Yesu kawauza kawamba, “Munamba anywi muna mikahe myengaa?” Nao wamwambukuya wamwamba, “Huna mikahe mifungahe na nswi kachuchu.” 35D̯ubva Yesu kawamba hawa wantu wakae chihako, 36makisa kaihwaa hi mikahe myofungahe nezi nswi, na kamuyaviza ḍuḍa Muungu. Akisa kavivunza-vunza viḍinku na kaviwapfa hawa wanafund̯iwe, nao wawagawiya hawa wantu.

37Wantu wonse waḍya hat̯a wanjia kuviyowani. Hawa wanafund̯i watsowa-tsowa hivi viḍinku vya mikahe na nswi visaiyevyo. Wadzaza vikapfu vifungahe. 38Hawaḍe waḍiyeo wewa zaid̯i ya wayume elefu nee, pfasipfo kut̯ala wake na wana. 39Makisa Yesu kawagonzoza hawa wantu na kanjia chomboni kenda ḍanda za Magadani.

Currently Selected:

Matayo 15: pkb

Highlight

Copy