Matayo 28

Kufufuka kwa Yesu

Marko 16:1-10; Luka 24:1-12; Yohana 20:1-10

1Nsiku ya *Sabato ipfochia, na ipfofika magura ya nsiku ya d̯ura ya hi ḍyuma, Maria Magid̯alena pfamodza na huyuḍe Maria yungine warooka magura yusiku wenda wakaiyowe hi mbeera ya Yesu. 2Ḅwikira, kugunga muhehemo mukuu wa nsi, koro malaika jwa Ḅwana kasuka kuyawa mbinguni, kadza kaḍiperuya-peruya hiḍi iwe ḍifinikizijweḍyo hapfaḍe mbeerani na kaḍikaiya chihako. 3Huyu malaika ekiyangaa dza muyanga wa yupfepfe na haya mavwaziye yewa meupe pee. 4Hawa asikari washooga na wahehema mumpaka wafwa nene na wakaa dza wantu wafwiyeo.

5Huyu malaika kawamba hawaḍe wake, “Namutseshooga, koro nimanya kwamba mwakumulachani huyu Yesu apfatsikijwe. 6Ela hapfa nkapfo. Kesakufufuka kuyawa kwa wafu dza viviḍe aneneevyo. Nzoni muyowe hapfa epfot̯ambaarwa, 7makisa mwende haraka mukawambie hawa wanafund̯iwe kwamba Yesu kesakufufuka kuyawa kwa wafu na kesakuyongowa kwenda Galilaya, mudzekokwendamuona nyonse. Na manyani mutsekwaarerwa koro nimavimwambia.”

8D̯ubva hawa wake wanjijwa ni oga na tsekea nyinji. Wayawa na humuḍe mbeerani waḍabva kud̯arama kwenda wakawambiye hawa wanafund̯i wa Yesu. 9Wepfowakyenda, Yesu kawat̯upukia na kawamba, “Mwaa naghea?” Na hawa wake wamwendea na wepfomufika, wamugija maguu na wamuvunzia nkuhi. 10Makisa Yesu kawamba, “Namutseshooga. Endani mukawambe hawa wandugu zangu wende Galilaya koro wendaniona huko huko.”

Maagu ya hawa asikari wayaviyeyo

11Hawa wake wepfowakyenda, huku nyuma hawa asikari wangine weowakyamia hi mbeera ya Yesu, wenda humuḍe mudzini na wawasumwiiya hawa wakohani wakuu hiviḍe vyonse vichiiyevyo-chiiyevyo. 12D̯ubva hawa wakohani wakuu na wazee wa gasa wakaa chihako waḍiyowezanya hiḍi dzambo. Na wahuna kwamba ni had̯i wawahonge hawa asikari ili wanene nsuwe. Ndookomu wawahonga chima chikuu cha fwedha 13na wawamba, “Wantu wakimuuza wambeni kwamba hawa wanafund̯i wa Yesu wadza nasiku, saa mwiyomukiyaa na waukwiwa hu mwii wa Yesu. 14Na ikiwa kwamba huyu liwali kavisikia, swiswi hunakwenda hunamuhehea na ntamuhendegwe kiḍechonse.” 15D̯ubva hawa asikari wazihwaa hizi fwedha wazipfegejwezo na wahenda dza viviḍe wambiijwevyo. Na hi hii nsuwe ndiyo id̯achaiyeyo kahi ya hawa Wayahud̯i hat̯a hiḍi hiḍi yeo.

Yesu kawaḍama wanafund̯iwe

Marko 16:14-18; Luka 24:36-49; Yohana 20:19-23; Mahendo 1:6-8

16D̯ubva dza viviḍe vya Yesu evyowaḍama, hawa wanafund̯i kumi na mumodza wanuka wenda Galilaya. Wenda pfapfaḍe pfa hu murima awaḍamiyeo kwamba wende. 17Nao wepfomuona wamuvunzia nkuhi wamuyomba, ela wangine wao wewa na kajela.

18Yesu kawendea hafufi na kawamba, “Mamulaka yonse ya mbinguni na lumwenguni niyapfegwa mimi. 19D̯ubva endani kwa wantu wa vyeet̯i vyonse mukawahendeze kuwa wanafund̯i wangu, mukiwat̯opya kwa sari ḍya Baba na Mwana na Ruhu Mudheru. 20Na pia muwayongweeze kuvigija hiviḍe vyonse nimuamuriyevyo nywinywi. Na hachi nyakumwambiani, mimi nya pfamodza nanywi nsiku zonse mumpaka mwiso wa lumwengu.”

Currently Selected:

Matayo 28: pkb

Highlight

Copy