Marko 1

Yohana kaelekanya njia ya Kirist̯o

Matayo 3:1-12; Luka 3:1-18; Yohana 1:19-28

1Haya ni *Maagu Mema dzuu ya Yesu *Kirist̯o, Mwana jwa Muungu. 2Haya Maagu yaḍabva dza viviḍe vyorejwevyo chuoni mwa *nabii Isaya. Muungu kamba,

“T̯ayowa, namuhuma *ntumi jwangu usoni yako,

adzeielekanya njiayo.

3Ni muntu eyekulalabvani yuwandani akyamba,

‘Ielekanyeni njia ya Ḅwana,

na muyarongaarye machiyoye.’ ”

4Na huyu ntumi ewa ni Yohana Mut̯opya. Kat̯upuka yuwandani akisumwiiya wantu kwamba, wapfyehuze mama na wat̯opyegwe ili Muungu apate kuwayatsia nabvise zao. 5Wantu wenji wa kuyawa Yerusalemi na ḍanda zingine zonse za ḍyimbo ḍya Yud̯aya, wekyenda na kumusikiiya. Nao wepfoziungama nabvise zao, Yohana kawat̯opya tsana ya Yorod̯ani. 6Yohana ekivwaa vwazi ḍya nsinga za ngamia,#1:6 Vwazi ḍiḍyoḍikielekanywa na nsinga za ngamia, ḍiweza kukaa muḍa muyeya zaid̯i pfasipfo kuḅaika, na ḍiiwa ndiḍyo dzema ḍya kukaiya maisha ya yuwandani. na ekidzifunga mulao wa nchingo chunoni mwakwe. Chakuḍyache kiiwa ni maghere#1:6 Maghere ni aina ya mpanzi. na uchi. 7Jeje ekisumwiiya akyamba, “Kwakudzani muntu nyuma yangu mwenye uwezo mukuu kunichia mimi. Sinamala hat̯a kwinama nifunguye milao ya viyahuvye.#1:7 Kazi ya kufunguya milao ya viyahu iwa nza wahumwa. Ndookomu Yohana kamba nkanamala hat̯a kuwa muhumwa jwa huyu awee kudzani. 8Mimi nyakumut̯opyani na madzi, ela jeje kadzamut̯opya na Ruhu Mudheru.”

Kut̯opyegwa kwa Yesu

Matayo 3:13-17; Luka 3:21-22

9Hayahayaḍe masiku, Yesu kanuka na mudzi wa Nazareti wiwo ḍyimbo ḍya Galilaya na kenda kat̯opyegwa ni Yohana tsana ya Yorod̯ani. 10Yesu epfoakiyawa na humuḍe madzini, ḅwikira kaziona hizi mbingu zipfenuka na kamuona huyu Ruhu jwa Muungu akwakumusukiani dza ndiwa. 11Makisa kusikika idzwi kuyawa yuwinguni ḍikyamba, “Wewe u Mwanangu mutsakwa, nitsakizwa nawe muno.”

Yesu kaḍemegwa ni Shaat̯ani

Matayo 4:1-11; Luka 4:1-13

12Makisa iyo saa, Ruhu Mudheru kamupfiika Yesu yuwandani kuye. 13Kakaa hukuḍe yuwandani kwa nsiku miyongo mine, akiḍemegwa ni Shaat̯ani. Ewa kahi ya waḍondo wa bad̯ani ela malaika wekimuhumikia.

Yesu kaḍabva kusumwiiya

Matayo 4:12-17; Luka 4:14-15

14Nyumae, ḅaad̯a ya Yohana Mut̯opya kungizwa gerenzani, Yesu kenda ḍyimbo ḍya Galilaya na kasumwiiya Maagu Mema ya Muungu. 15Kamba, “Ngera imat̯imia. Uhaju wa Muungu umaawa hafufi. Pfyehuzani mama na muyahikize haya Maagu Mema.”

Yesu kawahana wanafund̯iwe wane wa d̯ura

Matayo 4:18-22; Luka 5:1-11

16Nsiku modza, Yesu epfoakichia na geri ya ziwa ḍya Galilaya, kamuona Simioni na ndugujwe eyeakihanwa And̯erea. Wowii wekilowa na nyavu koro wewa wantu wa kulowa. 17Yesu kawahana kawamba, “Niuḅani, nami namuhendeza kuwa walowa wa wantu.” 18Na pfapfo waziyatsa hizi nyavu zao wamuuḅa.

19Yesu epfokwenda usoni kachuchu, kamuona Yakobo na Yohana, wana wa Zebed̯ayo. Wewa chomboni mwao wakisona nyavu zao. 20Epfowaona t̯u, kawahana, nao wamuyatsa baba jwao Zebed̯ayo humuḍe chomboni pfamodza na hawaḍe viḅaruwa, na wamuuḅa Yesu.

Nguvu na mamulaka ya Yesu

Luka 4:31-37

21Yesu na wanafund̯iwe wagija njia wenda hat̯a mudzi wa Kaperinaumi. Na ipfofika nsiku ya *Sabato t̯u, Yesu kanjia *sunagogini na kaḍabva kuwayongweeza wantu. 22Na wonse weowakimusikiiya wamaka muno kwa namuna ayongweezeyevyo. Koro nkakuyongweeza dza hiviḍe vya hawa waalimu wao wa *Sharia wevyowakiyongweeza. Jeje kayongweeza dza muntu mwenye mamulaka.

23Humuḍe sunagogini kwiwa muntu eyekuwa na mpepfo nzuka. Ḅwikira kabiga idzwi kamba, 24“Unaswini, Yesu jwa Nazareti? Dze, kumakudzia kuhunanga? Nikumanya tswee kwamba u ga! Wewe u Mutsanwa jwa Muungu.” 25Ela Yesu kaibusa hiḍe mpepfo nzuka kayamba, “Nyamaa mya na umuyawe huyu muntu!”

26Hi mpepfo nzuka imuhehemesa na nguvu huyu muntu, kisa ibiga idzwi kuu na imuyawa. 27Wantu wonse wamaka muno hat̯a waḍabva kuuzana wao na wao wakyamba, “Haya haya nayo ni mambo ga? Munamba ni mayongweezo mapfya? Huyu huyu muntu ana mamulaka yeyodze, ya kwamba hat̯a akiamuru mpepfo nzuka zimuyawe muntu nazo zinamut̯ii?” 28Ndookomu sifa zakwe zivuma kula pfantu kuzimuni mwa ḍyimbo ḍya Galilaya.

Yesu kapfonya wajwazi wenji

Matayo 8:14-17; Luka 4:38-41

29Yesu na wanafund̯iwe wepfoyawa na humuḍe sunagogini, Simioni na And̯erea wamuhwaa Yesu, Yakobo na Yohana wenda nao nyumbani kwao. 30Wepfonjia humuḍe nyumbani, wamut̯onga mukwanguwe muke Simioni karomokwa ni kanat̯a na kat̯ambaara. Yesu kahoḍejwa hi hali yakwe. 31Nae kamwendea hapfaḍe t̯at̯ani, kamugija mukono kamunuya wima. Na iyo saa hi kanat̯a imuyatsa, nae kaḍabva kuwawekea chakuḍya.

32Mioroye, dzuwa ḍipfotswa,#1:32 Nsiku ya Sabato Wayahud̯i ntawaruhusijwe kuhenda kazi, kutsukuya kiḍechonse ambu kusafiri. Sabato na nsiku zingine zonse, kwa Muyahud̯i zinasia saa kumi na mbii za mioro. Ndiyo maana wekiwapfiika wajwazi kwa Yesu ḅaad̯a ya kwamba dzuwa ḍimaatswa na Sabato imasiya. wantu wamuyehea Yesu wajwazi wonse, na hat̯a weokuwa na mpepfo nzuka. 33Mudzi muzima uundukizika hapfaḍe muḍyangoni! 34Nae Yesu kapfoza wajwazi wenji weokuwa na nd̯wari garagara. Kayavya wantu mpepfo nzuka nyinji, na wala nkakuzipfa namfasi zinene kiḍechonse, koro ziimumanya kwamba jeje ni ga.

Yesu kasumwiiya Galilaya nzima

Luka 4:42-44

35Chamukoche magura yusiku, Yesu kayamuka kenda pfantu chit̯u kendakanjia kuyombani. 36Kapfachu, Simioni na wenziwe wanjia kumulachani. 37Na wepfomuona wamwamba, “Wantu wonse wakukulachani wewe.” 38Ela Yesu kawamba, “Hwendeni na vidzidzi vingine vivyo hafufi ili nako pia nikasumwiiye, koro ndiḍyo nidziiyeḍyo.” 39Ndookomu kazinga ḍyimbo ḍyonse ḍya Galilaya, akyenda na kusumwiiya *masunagogini na kuyavya wantu mpfepfo nzuka.

Yesu kapfonya mujwazi jwa kwanga

Matayo 8:1-4; Luka 5:12-16

40Nsiku modza, Yesu kendejwa ni muntu eyekuwa na ujwazi wa kwanga. Huyu muntu kamuvunzia nkuhi na kamuriria kamwamba, “Ḅwana, amaa ukitsaka nkwanipfoza?”#1:40 Haya matsoro ya Kiyunani yahadza kudheresa. Wayahud̯i wewa na sharia ya kwamba muntu jwa kwanga nkekiruhusijwa kunjiiyana na yuḍejwonse kwa njia iḍeyonse, asidzatangazwa ni mukohani kwamba kadhereswa. 41Yesu kamufwiya t̯ei na kamunyopezea mukono kamuhora na kamwamba, “Nakupfoza.” Makisa kamwamba, “Pfowa!” 42Na pfapfo huyuḍe muntu kapfowa. Hi kwanga yaara tswee. 43-44Kisa Yesu kamuseresa muno kamwamba, “Manya utsemwambia muntu yuḍejwonse dzuu ya hiḍi hiḍi dzambo. Ishinu enda kwa huyu mukohani ukadziyanganye kwakwe kwamba kupfowa na uyavye mvuugiya dza vya Sharia ya Musa ivyonakumala kuhenda, dza ushaahiḍi kwamba kudhereswa.” Kisa kamugonzoza kwenda nyumbani na yayo maguu. 45Ae huyuḍe muntu akidzaakinuka, kaḍabva kuḍisumwiiya hiḍi dzambo kula pfantu. Ndookomu maagu dzuu ya hiḍi dzambo yad̯achaa, hat̯a Yesu nkakuweza kunjia mudzi uḍewonse wazi wazi kawii. Ishinu kakaa kuntu chit̯u. Ela hat̯a vivyo wantu wamut̯it̯irikia kuyawa kula ḍanda.

Currently Selected:

Marko 1: pkb

Highlight

Copy