Acts 6

Cha Kawachin Cha Pituʼn Leɏakiʼn Lachutukan

1Si hachiʼn timpu ummachu-achu cha bilang cha mamati ot inggew chi lansusubogen cha Gregoʼn Judio kan cha sigud un Judio. Ha lansusubogen cha Gregoʼn Judio ked bilaybyay-ancha cha labyaɏu si ileɏgew un lanwaɏasancha si makan.#6:1 palagwaɏas si makan 2Ot chilagup cha simpuɏu ya chuwaʼn apostoles cha losan un mamati ot kalancha kan chicha, “Ha kawachimi mangibyegbyega ya mantudtuchu si ugud Apudyus, chakampun un manwaɏas si makan. 3Susulud, pumili kayu si pituʼn leɏaki un bibiɏu ugalicha, laidchen si kilabyelin chi Ispiritun Apudyus ya lasilib. Chicha mangipiyeɏan taku un manwaɏas kan cha makan. 4Ked chikami, ipapuutmi un malluwalu ya mangibyegbyega si ugud Apudyus.”

5Las-om cha losan un mamati si imbyegan cha apostoles ot chilutukancha cha Stephen, osaʼn lapigsa pammatila ya laidchen si kilabyelin chi Ispiritun Apudyus. Cha uchum ked cha Philip, Prochorus, Nicanor, Timon, Parmenas ya Nicolaus un osaʼn Gentil un iyAntioch ngim umulu-ulud si ugalin cha Judio. 6Impasangucha chicha kan cha apostoles ot impatay cha apostoles cha imachaʼn langiluwalu kan chicha.

7Hachi ked, lituɏutuɏuy un lanchilongeɏ ugud Apudyus ya ummachu-achu cha bilang cha mamatiʼd Jerusalem. Inggew bo cha achuʼn papachi un tiluttuwacha si Apudyus si lamatiyancha kan Jesus.

Ha Lalokmaancha Kan Stephen

8Amod chi kachegun Apudyus kan Stephen ya illidchela siya si kilabyelin un mangwa si achuʼn lakaskaschaaw ya sinyeɏ si sangwalan cha tagu. 9Ngim silupling cha uchum un tagu si Stephen. Cha Judio un lampeɏpu si grupu un ngadloncha Sinagogan cha Lawayawayaan un Lanmusassu un iCyrene ya iyAlexandria. Ya uchum un Judio un lampeɏpu si probinsiya ud Cilicia ya Asia, chicha lakasongsongbyat kan Stephen. 10Ngim achipuncha kabyeeɏan un sumongbyat kan Stephen ti illidchen chi Ispiritun Apudyus siya si kilasilib un makasillongbyat kan chicha.

11Ot ha kingwacha, pilasuksukancha cha uchum un leɏaki ta pabyasuɏoncha siya, un kalancha, “Chingngeɏmi siya un lan-ugud si lawwing un bumusuɏ si lintog Moses ya si Apudyus.” 12Ot gilagaɏacha pasangaon cha achuʼn tagu, cha pallakayon ya mimistulun chi lintog kan Stephen. Ot ummoycha chilokmaan si Stephen ot illiyoycha impasangu kan cha kukunsiseɏ. 13Oli pun lan-ayegcha bo kan cha latuliʼn tistigu un lantuntulli mipanggop kan siya, un kalancha, “Ha allaʼn tagu pasig man-ugud si bumusuɏ si allaʼn lasantuwan un templo ya lintog Moses. 14Ti chingngeɏmi siya un langibyega un si Jesus un iNazareth ked yam-alola allaʼn templo ya sukatala bo cha ugali un impatawid Moses kan chitaku.” 15Losan cha kukunsiseɏ ya uchum un lachagup udchi intutukkeɏcha si Stephen ot illilacha lupala un isun chi lupan chi anghel.

Currently Selected:

Acts 6: HUA

Highlight

Copy