Acts 9

Ha Lamatiyan Saul Kan Jesus

(Act. 22:6-16; 26:12-18)

1Si hachiʼn timpu, intuɏuy Saul un man-og-ogyat un mamatoy kan cha mamati kan Apu Jesus. Ot ummoy si kangatuwan un pachi 2ot lampakwa si suɏat kan cha papangat cha sinagogan cha Judio ud Damascus, taplu mapalubusan un manchokma si ulay siluʼn maochesala un mamati kan Jesus, leɏaki man willu byebyai ked iyoyla chicha ibyaɏud ud Jerusalem. 3Si inggewala si chaɏan un ummachaliʼd Damascus, kakma lalising si lapigsan silaw un lampeɏpuʼd langit. 4Ot laodcheg siya ot chingngeɏla ginga un kalala, “Saul, Saul, puggey palpaligatan sakon?”

5Ilimus Saul, “Siluka, Apu?”

Summongbyat, “Sakon si Jesus un palpaligatam. 6Lumibbyatka ta ingka si siudad ked awed chi mangibyega kan sika lu simma masapuɏʼn koom.”

7Summisiked cha kadwan Saul un lappun makaginga, ti chingngeɏcha hachiʼn ginga ngim lappun intullongcha si tagu. 8Ot lummibbyat si Saul ngim manchiyat pun, achipun makatullong. Ot kiliwidcha kadwala ot ipuyutcha siyaʼd Damascus. 9Tiɏuʼn eɏgewla un achipun makatullong ya achipun langan ya ummilum.

10Udchi Damascus, inggew chi osaʼn disipulus Apudyus un mangngachen Ananias. Lampaila si Apu Jesus kan siya si in-ilopla ot kalala, “Ananias!”

Kalala, “Ma ibyegam, Apu?”

11Kalan Apu Jesus kan siya, “Lumibbyatka ya ingka si kesa un ngadloncha mallintog ked imusom chi byeɏoy Judas lu awed si Saul un iTarsus udchi. Awed un malluwaluwalu si sala. 12Ot impailan Apudyus kan siya si in-ilop chi osaʼn leɏakiʼn mangngachen Ananias un lilumlok si inggewala ot impatayla imala kan siya ta makatullong kasin.”

13Ngim kalan Ananias, “Apu, achu cha chingchingngek mipanggop si allaʼn tagu ya cha lawwing un killingwala kan cha tagum ud Jerusalem. 14Ked ummali utla un alla kalobbongala un lampeɏpu kan cha ap-apun cha papachi un manchokma kan cha losan un manchaychayaw kan sika.”

15Ngim kalan Apu Jesus kan siya, “Ingka, ti siya chilutukak un mansimbi kan sakon ta ipatigammula sakon kan cha Gentil ya cha Ari ya cha taguʼd Israel. 16Ya ipailak kan siya cha losan un mapaligatala gapu kan sakon.”

17Ot ummoy si Ananias ot lilumlok si byeɏoy un inggewan Saul. Impatayla imala kan siya ot kalala, “Suludkuʼn Saul, si Apu Jesus un lampaila kan sika si kesa, ked siya langibuun kan sakon utla ta makatullongka kasin ya maidchenka si kilabyelin chi Ispiritun Apudyus.” 18Ot kakma laodcheg chi isun chi sipsip un leɏpu si atala ot makatullong kasin. Lummibbyat ot lampabunyeg. 19Lagamput pun, langan ot kummoscheɏ. Illinggew si Saul kan cha mamatiʼd Damascus si pigan eɏgew.

Ha Lambyegbyegaan Saul Ud Damascus

20Ot kakma ummoy si cha sinagoga ot illugilaʼn langibyegbyega un Alak Apudyus si Jesus. 21Laschaaw losan cha langngeɏ kan siya ot kalancha, “Chakampun kamman un ha allaʼn tagu ked siya lampalpaligat kan cha mamati kan Jesus ud Jerusalem. Ti siya ummaliyala utla ta chokmaala cha mamati ya iyoyla chicha un lakabyaɏud kan cha ap-apun cha papachi.” 22Ngim pummigpigsa chi kilabyelin Saul un langibyegbyega ot impapatila un langipaloklok un si Jesus chi Kristu. Ked achipun lakasongbyat cha Judio un inggew ud Damascus.

23Lummaus pu achuʼn eɏgew, lantutuɏeg cha Judio un patoyon si Saul. 24Ngim laammuwan Saul chi planucha. Ot ileɏgew kan lilabin tatamchagencha sawang chi siudadcha ta patoyoncha siya. 25Ngim si osaʼn labi, ummoy cha uchum un mamati illaɏa siya ot inyinchayuncha si chakeɏʼn aɏat ot impacheɏacha siya si chingching un aɏed chi siudad.

Ha Langulilan Si Saul Ud Jerusalem

26Gummatong pun si Saul ud Jerusalem, pilachaslaʼn mitipug kan cha mamati.#9:26 Cha disipulus Jesus chi ibyegbyegala si allaʼn bersikulu ked si uchum un bersikulu simma killingwan cha apostoles. Chakampun abus cha lasawaɏan si chuwa ngim losan un mamati kan Jesus. Ngadloncha susulud, ti losan cha lipati si paminyan Apudyus. Ngim ummogyatcha losan kan siya ti achipuncha patiyon un osa siya un mamati. 27Ngim intallay Barnabas siya ot illiyoyla kan cha apostoles. Ot imbyegala kan chicha in-ilon Saul un langitullong kan Apu Jesus si kesa un umoy ud Damascus ya in-ilon Apu Jesus un lakaug-uggud kan siya. Ya kilateɏod Saul un langibyegbyega mipanggop kan Jesus ud Damascus. 28Ot illinggew si Saul kan chicha ud Jerusalem ya lateɏod un langibyegbyega mipanggop kan Apu Jesus. 29Lakaug-uggud ya lakasongsongbyat kan cha Judio un Grego ugudcha, ngim pilachaschaʼn patoyon siya. 30Latagammuwan pun cha susulud un mamati, ummoycha illiyoy si Saul ud Caesarea ot imbuuncha siyaʼd Tarsus.

31Si hachiʼn timpu, mallin-awa cha mamati kan Jesus si achuʼn iliʼd Judea, Galilee ya Samaria. Gapu si tuɏung chi Ispiritun Apudyus, kummoscheɏ pammaticha ya ummachu-achu cha mamati ya ummogyatcha kan Apudyus.

Ha Ummoyan Peter Ud Lidda Ya Jopa

32Ot si Peter, ummoy kan cha ili-ili langgaggakay kan cha mamati. Gummatong pun ud Lydda, 33inchesala osaʼn leɏakiʼn mangngachen Aeneas un illuumbog si waɏun tawon, ti lapalalais siya. 34Kalan Peter kan siya, “Aeneas, palin-awaon Jesu Kristu sika! Bumangonka ya lukutom chi oboklu!” Ot labyalangon si Aeneas. 35Ot intullong losan cha taguʼn inggew ud Lydda ya Sharon siya, ot lamaticha kan Apu Jesus.

36Ud Joppa inggew chi byebyaiʼn mamati un mangngachen Tabitha. (Lingachencha siya Dorcas si Grego un ugud, piolaʼn uguchon ugsa.) Bibiɏu pasigla killingwa kan cha tagu ya tiluɏungala cha kakapus. 37Si inggewan Peter ud Lydda, lasakit si Tabitha ot latoy. Ilomoscha lechegla ot ummoycha imbyelat si ngatun kuwetu. 38Chingngeɏn pun cha mamatiʼn awed si Peter ud Lydda un achaliʼd Joppa, lambuuncha si chuwaʼn leɏakiʼn umoy mangayeg kan Peter un kalancha, “Kewam, chesam ta intakuʼd Joppa.” 39Lummibbyat ot litun-ud kan chicha. Gummatongcha pun, impuyutcha si Peter si langingngatun kuwetu un inggewan chi latoy. Sin-iibin cha labyaɏun inggew udchi ilalibungbungancha siya ya impailacha silup ya pokos un killingwan Dorcas si katattagula.

40Ngim impalawan Peter chicha losan si kuwetu. Ot lampalintuming un lalluwalu kan Apudyus. Oli pun lansagung si lecheg ot kalala, “Tabitha, bumangonka!” Ot kakma lanchiyat ot intullongla pun si Peter, ummamuy. 41Iloglen Peter imala ot pasikachola. Oli pun ilayagela cha mamati ya cha labyaɏu, ot impailala kan chicha si Dorcas un latagu kasin. 42Lanchilameg chi allaʼn lakwa si losan un ili ud Joppa ot achu cha lamati kan Apu Jesus. 43Illinggew si Peter ud Joppa si achuʼn eɏgew ud byeɏoy Simon un manchachait si lalat.

Currently Selected:

Acts 9: HUA

Highlight

Copy