John 18

Ha Lalokmaancha Kan Jesus

(Mat. 26:47-56; Mrk. 14:43-50; Luk. 22:47-53)

1Lagamput pun lalluwalu si Jesus, ummoyoncha kan cha disipulusla ot chilemangcha wain ud Kidron. Inggew chi gechin si hachiʼn lugeɏ ot siya ummoyancha.

2Ot si Judas un langiyibit kan Jesus, tilagammula hachiʼn lugeɏ ti udchi pin-an cha Jesus ya cha disipulusla ayan. 3Ot impuyut Judas cha susuɏchachu ya uchum un guwechan chi Templo un imbuun cha papangat cha papachi ya cha Pariseo. Lan-eeɏmascha ya langiyawitcha kan cha pilatud.

4Tilataggammun Jesus cha losan un makwa kan siya, hachi ummoyla langabtan kan chicha ot kalala, “Silu singsingtonyu?”

5Ot summongbyatcha, “Si Jesus un iNasareth.”

Ot kalala kan chicha, “Sakon kabbo.” Si Judas un langiyibit kan siya, illinggew un lakasiked kan chicha. 6Imbyegan ked Jesus kan chichaʼn, “Sakon kabbo,” summaligagongcha ot mampaklobcha.

7Ot kasin Jesus ilimus kan chicha, “Silu singsingtonyu?”

Ot kalancha, “Si Jesus un iNasareth.”

8“Imbyegak kabbo kan chikayu un sakon,” kalan Jesus. “Ked lu sakon chi singsingtonyu, achiyu ipati cha disipulusku.” 9Imbyegala hachi ta matungpeɏ chi kalala, “Ama lappun osà mataɏak kan cha impiyeɏm kan sakon.”

10Oli pun lilukpus Simon Peter pachinla ot liliwasla machuwalan un ingan Malchus, un musassun chi kangatuwan un pachi.

11Ot kalan Jesus kan Peter, “Ibɏoylu pachinlu. Kalampun gey lu achikpun maalusan chi ligat un ingkodchong Ama un makwa kan sakon?”

Ha Lalumeɏyaan Annas Kan Jesus

12Ot cha susuɏchachun cha iRome ya kapitancha ya guwechan chi templo, chilokmaancha si Jesus ot bilaɏudcha imala. 13Illiyoycha kan Annas, un katugangan Caiaphas, un kangatuwan un pachi si hachiʼn tawon. 14Si Caiaphas chi langibyega kan cha uchum un papangat cha Judio un un-ulloy chi ossaan un taguʼn matoy ta mataguwan cha kaachuwan.#18:14 John 11:50

Ha Lamuklitan Peter Kan Jesus

(Mat. 26:69-70; Mrk. 14:66-68; Luk. 22:56-57)

15Oli pun, litun-ud si Simon Peter ya osaʼn disipulus kan Jesus. Gapu ta am-ammun chi kangatuwan un pachi hachiʼn osaʼn disipulus, impalubusla un lakaoy kan Jesus si paway chi byeɏoyla. 16Ngim latelan si Peter ud lasin chi sawang. Ot langulin chi osaʼn disipulus un am-ammun chi kangatuwan un pachi ot kalala si byebyaiʼn mambyebyentay si sawang un pelokolà Peter. 17Ot lilumlok pun, kalan chi byebyai kan Peter, “Chakampun oyya un sika osaʼn disipulus Jesus?”

Ot summongbyat si Peter, kalala, “Lai, chakampun kan sakon.”

18Tummunglin pun, lan-apuy cha bubùulon ya guwechan chi templo si paway ot insisikedchan lan-alichu. Ot ummoy bo si Peter lakasiked lan-alichu.

Ha Lalumeɏyaan Chi Kangatuwan Un Pachi Kan Jesus

(Mat. 26:57-66; Mrk. 14:55-64; Luk. 22:66-71)

19Silumeɏyan chi kangatuwan un pachi si Jesus mipanggop kan cha disipulusla ya mipanggop si cha tudtuchula. 20Ot kalan Jesus, “Pasigak lantudtuchu si sangwalan cha tagu si sinagoga ya templo un maup-uppulan cha losan un Judio. Lappun intudtuchuk un litataɏu. 21Ked puggey un sakon chi mangimusam? Masapuɏʼn man-imuska kan cha lanchochongngeɏ kan sakon, ti ammucha imbyegbyegak.”

22Imbyegan ked Jesus chi hachi, tileɏpakan chi osaʼn guwecha siya ot kalala, “Puggey kamatlat chi mansosongbyatlu si kangatuwan un pachi?”

23Ot kalan Jesus, “Lu awed lawwik si imbyegak, ibyegam u ta maammuwan. Ngim lu ustu, pakaggey tumeɏpak lù?”

24Oli pun imbuun Annas si Jesus un labyabyaɏud cha imala kan Caiphas un kangatuwan un pachi.

Kasin Peter Piluklitan Si Jesus

25Si Peter, sissiyan lakaalichu si paway ot kalan cha uchum kan siya, “Chakampun oyya un sika osaʼn disipulun chi taguʼn halat?”

Ngim kasin Peter piluklitan un kalala, “Lai, chakampun kan sakon.”

26Osa kan cha bubùulon chi kangatuwan un pachi ked agin chi leɏakiʼn liliwas Peter ingala, ilimusla, “Chakampun oyya un intullongku sika un kadwala si gechin?” 27Ngim kasin Peter piluklitan, ot kakma lalullakuk chi kawitan.

Ha Lalumeɏyaan Pilate Kan Jesus

(Mat. 27:1-2, 11-14; Mrk. 15:1-5; Luk. 23:1-5)

28Gilamputcha pun silumeɏya si Jesus ud uwan cha Caiaphas, allaʼn mabigat. Ot illiyoy cha papangat cha Judio siya si byeɏoy Gubillachuɏ Pilate. Ngim achipun cha Judio lilumlok, ti libilangchaʼn lachimokcha lu lumlokcha si byeɏoy chi osaʼn Gentil. Ked achipun makwa un makakancha si Piyastan Lallausan.#18:28 Ha ugalin cha Judio ked lu lumlok cha si byeɏoy chi osaʼn Gentil, maibilangcha un lachimok. 29Ot lummawa si Pilate ot ilimusla kan chicha, “Simma ipabyasuɏyu si taguʼn alla?”

30Ot summongbyatcha, “Achipunmi inggetong siya kan sika lu lappun byasuɏla.”

31Ot kalan Pilate kan chicha, “Mangamung kayu lù. Itallayyu siya ked chilusayu si uwayun lintog.”

Ot summongbyat cha Judio, “Ngim chikamin Judio, achipun mipalubus un kodchonganmi un matoy chi tagu.” 32Lakwa laoy ta matungpeɏ imbyegan Jesus mipanggop si mangkakatoyla.

33Oli pun kasin lilumlok si Pilate si byeɏoyla ot impaayegla si Jesus ot ilimusla, “Ha sika Arin cha Judio?”

34Ot summongbyat si Jesus, “Ha lampeɏpu si somsomoklu chi ilimuslu willu awed langibyega kan sika?”

35Ot kalan Pilate, “Ha kalam pun lu Judiowak? Inchiɏum cha kailiyam un Judio ya cha papangat cha papachi. Simma byasuɏm lù?”

36Summongbyat si Jesus, “Chakampun un utla lubung chi manturayak. Ti lu utla lubung chi man-Ariyak, sigulachuʼn makagubyat cha disipulusku ta achipulak miyawat kan cha turay un Judio. Ngim chakampun si allaʼn lubung chi manturayak.”

37Ot kalan Pilate kan siya, “Lu katlat, Arika bo amin lù?”

Insongbyat Jesus, “Tuttuwa imbyegam. Ha panggopkuʼn ummali utla lubung un miyalak ked ipakaammuk chi katuttuwaan. Ked lu silu mangipotog si katuttuwaan, patiyola ibyegak.”

38Ot kalan Pilate kan siya, “Simma hachiʼn katuttuwaan un ibyegbyegam?”

Laikodchong Un Mapatoy Si Jesus

(Mat. 27:15-31; Mrk. 15:6-20; Luk. 23:13-25)

Gilamput pun Pilate imbyega hachi, kasin lummawa ot kalala kan cha Judio, “Lappun ammuk si byasuɏla. 39Ngim awed chi ugaliyu un lu timpun chi Piyastan Lallausan, gagangay un ibukatku osaʼn byaɏud. Ked pionyu un ibukatku Arin cha Judio.”

40Ot kalanchaʼn langipakuy, “Lai, chakampun kan siya! Si Barrabas chi pionmi!” Ha allaʼn Barrabas ked tulisan.

Currently Selected:

John 18: HUA

Highlight

Copy