Matthew 13

Ha Pangngalig Chi Opat Un Kalasin Chi Pita

(Mrk. 4:1-9; Luk. 8:4-8)

1Si hachiʼn eɏgew, tilelan Jesus chi hachiʼn byeɏoy ot ummoy ummamuy si teɏanteg chi byeybyey ta mantudtuchu. 2Amo-amod cha taguʼn lauppun kan siya ot ummoy ummamuy si byangka ked summiked cha tagu si teɏanteg. 3Ot achu intudtuchula kan chicha un pangngalig. Kalala, “Inggew chi osaʼn taguʼn ummoy lanwagaweg si bukeɏ. 4Si lanwagawagelad chi bukeɏ si umala, liweɏsi cha uchum si chaɏan ot ummoy cha sissiwit tiluktukan. 5Cha uchum un bukeɏ liweɏsicha si kabyetbyetuwan un akit chi pitala. Ot lasalimitcha ti manyapit chi pitala. 6Ngim ummilit pun, lakɏawcha ot leɏangucha ti achipun lachaɏom chi lamutcha. 7Cha uchum un bukeɏ, liweɏsicha si lassi-lassi ot tummubucha. Ngim lasyungcha si lasi. 8Ngim liwagaweg cha uchum un bukeɏ si mallogway un pita ot tummubucha. Ot lamungacha losan un ustu. Singgagasut chi bungan cha uchum, sin-oolompuɏu uchum ya sintutlumpuɏu uchum.” 9Ot inyalungus Jesus imbyega, “Chongɏonyu ya somsomkonyu pion chi inyaligku un uguchon!”

Ha Pion Chi Pangngalig Un Uguchon

(Mrk. 4:10-12; Luk. 8:9-10)

10Oli pun ummoy cha disipulusla kan siya ot lakaimuscha, “Puggey useɏon cha pangngalig lu mantudtuchuka kan cha tagu?”

11Ot summongbyat si Jesus, “Ti chikayu langidchen Apudyus si wayayuʼn mangagammu si palimod chi mampangatan ud langit. Ngim achipunla impakaammu kan cha uchum un tagu. 12Ti ha taguʼn mamati ya maawatala tudtuchuk, machogchog-an chi palag-awatla inggala umachu man-aawatla. Ngim ha taguʼn achipun mamati, machellagus makaan chi ulay akit un laawatala. 13Ha panggopkuʼn pin-a manguseɏ si pangngalig un mantudtuchu kan chicha, ti ulay lu itutullongcha, achipuncha mailasin, ya ulay lu chochongɏoncha, achipuncha maawatan. 14Chicha chi katungpaɏan chi inggilin Isaiah un propeta un kalala, ‘Ulay lu patungedcha chochongɏon, achipuncha maawatan. Ked ulay lu itutullongcha, achipuncha mailasin. 15Ti tummangsit cha somsomokcha, lantuytuyɏongcha ya langkuykuyɏapcha. Ha chadchawat lu makatullongcha, makadngeɏcha ya makaawatcha ked mansagungcha kan sakon ta palin-awaok chicha.’ ”#13:15 Isaiah 6:9-10

16Ot intuɏuy Jesus un kalala, “Ngim chikayu, pian kayu ti makailasin kayu kan cha mitullongyu ya makaawat kayu kan cha chongɏonyu. 17Tuttuwa ibyegak kan chikayu, achu cha propeta kan cha tagun Apudyus un pionchaʼn itullong cha intutullongyu, ngim achipuncha mitullong. Ngim pionchaʼn chongɏon cha chochongɏonyu, ngim achipuncha makadngeɏ.”

Impakaawat Jesus Chi Pion Chi Pangngalig Un Uguchon

(Mrk. 4:13-20; Luk. 8:11-15)

18Ot kalala, “Chongɏonyu ta maawatanyu pion chi pangngalig chi lanwagaweg un uguchon. 19Ha bukeɏ un liweɏsi si chaɏan, chicha cha taguʼn langngeɏ mipanggop si Mampangatan Apudyus, ngim achipuncha maawatan. Ot ummoy Satalas kilaan chi chingngeɏcha un ugud si somsomokcha. 20Ha bukeɏ un liweɏsi si kabyetbyetuwan, chicha cha taguʼn lagalas un umawat si ugud Apudyus lu chochongɏoncha. 21Ngim achipun lummamut chi ugud Apudyus si somsomokcha. Ked lu gumatong cha ligat willu pilaligatancha chicha gapu si lamatiyancha si ugud Apudyus, kakmacha iyagey. 22Ha bukeɏ un liweɏsi si lassi-lassi, chicha cha taguʼn langngeɏ si ugud Apudyus. Ngim machanchalagencha mipanggop si allaʼn biyeg ya pipionchaʼn bumaklang, ked hachi mangaɏung si ugud ked achipuncha mamunga. 23Ked ha bukeɏ un liwagaweg si mallogway un pita, isun cha taguʼn langngeɏ si ugud Apudyus ot laawatancha ot lamungacha si achu. Cha uchum mamungacha si singgagasut, cha uchum sin-oolompuɏu, ya cha uchum sintutlumpuɏu.”

Ha Pangngalig Mipanggop Si Sabsabug

24Kasin bo si Jesus lan-alig kan chicha un kalala, “Miyalig chi Mampangatan Apudyus si osaʼn taguʼn lan-osok si bibiɏuʼn pagoy si payawla. 25Ngim si osaʼn labi un lasusuyop cha losan, ummoy chi kabusuɏla ot gilap-uɏala si sabsabug chi pagoy ot ummoyon. 26Ot tummubu pu pagoy ya lamusbus, lichisan bo cha sabsabug lummoswa. 27Ot ummoy cha bubùulon chi singkuwa si payaw ot kalancha, ‘Apu, chakampun kamman si bibiɏu inyosoklu si payawlu? Mugga leɏpuwan cha sabsabug?’

28“Kalala, ‘Killingwan chi kabusuɏ lait.’

“Ot ilimus cha bubùulola, ‘Ha piom un ingkami sagamsaman?’

29“Ngim kalala, ‘Lai, ta achi mibyagut cha insok. 30Intalu ta michisancha chumakeɏ inggalà man-aali. Asik ibyega kan cha man-ali un un-ulaoncha sagamsaman cha sabsabug ya postoncha asicha ot umoy soggon. Asicha ot aliyon chi pagoy ked imponponcha si aɏangku.’ ”

Pangngalig Mipanggop Si Bukeɏʼn Mustasa

(Mrk. 4:30-32; Luk. 13:18-19)

31Ot kasin si Jesus lan-alig un kalala, “Miyalig chi Mampangatan Apudyus si osaʼn bukeɏn chi mustasa, un illaɏan chi osaʼn tagu ot immuɏala si umala. 32Ha allaʼn bukeɏ siya kapaatan kan cha losan un bukeɏ. Ngim lu chumakeɏ, siya kachakɏan kan cha losan un muɏa ked mambyalin kayu un umoy cha sissiwit malukbutan chi pangala.”#13:32 Ha kalasin chi mustasa un limuɏa si ilin cha Judio ked chakchakeɏ lu ha limuɏa utla Philippines. Ha kataklangla ked umoy un 12 feet.

Pangngalig Mipanggop Si Yeast

(Luk. 13:20-21)

33Ot kasin bo si Jesus lan-alig kan chicha un kalala, “Miyalig chi Mampangatan Apudyus si yeast un mampaboteɏ, un illaɏan chi byebyai akit ot ingkamosla si achuʼn arina inggala bumteɏ losan un likamsala.”

Panggop Jesus Un Mangiyuseɏ Si Pangngalig

(Mrk. 4:33-34)

34Pasig Jesus useɏon chi pangngalig lu mantudtuchu kan cha amod un tagu. Lappun lantudtuchuwala kan chicha un achipunla iluseɏ pangngalig. 35Katchi in-ilolaʼn lantudtuchu ta matungpeɏ chi imbyegan chi propeta si awi un kalala,

“Siyà useɏok chi pangngalig lu awed ibyegak kan chicha. Ibyegak kan chicha

cha byaleg un achipun lipatigammu malipud si lakwaan chi lubung.”#13:35 Psalm 78:2

Impakaawat Jesus Chi Pangngalig Chi Sabsabug

36Oli pun, tilelan Jesus cha amod un tagu ot lilumlok si byeɏoy ot ummoy cha disipulusla kan siya. Ot kalancha kan Jesus, “Ipakaawatlu u kan chikami pion chi pangngalig chi sabsabug un uguchon.”

37Ot kalan Jesus, “Ha taguʼn langiyosok si bibiɏuʼn pagoy ked Sakon un Alak chi Tagu. 38Ked ha payaw siya utla lubung. Ked ha bibiɏuʼn pagoy, chicha cha tagu un mipati si Mampangatan Apudyus. Ngim cha sabsabug, chicha cha tagun Satalas. 39Ked ha kabusuɏ un langigap-uɏ si sabsabug, siya si Satalas. Ha man-aali ked alungus chi lubung. Ked cha man-ali, chicha cha angheles Apudyus. 40Ked ha makwa si sabsabug un lalapsot ked masgob katchi bo makwa si alungus chi lubung. 41Ti Sakon un Alak chi Tagu, ibuunku cha anghelesku un umoy malagup kan cha losan un taguʼn mangmangwa si makabyasuɏan cha uchum un tagu ya cha mangmangwa si lawwing ta achipuncha mipati si Mampangatan Apudyus. 42Ked mibyellucha si guminggillaub un apuy un achipun maksop. Ked sin-iibincha ya singngingillot cha ngiponcha. 43Ngim cha tagun Apudyus, lumilalilangcha un isun chi ilit si Mampangatan Amacha un Apudyus. Lu laingaan kayu, ammanyu chongɏon.”

Ha Pangngalig Chi Kilaɏuub

44Intuɏuy Jesus un kalala, “Miyalig chi Mampangatan Apudyus si likaɏuub, un inchesan chi osaʼn tagu si uma. Gapu si teɏokla, tilap-ulala kasin ot ummoyla illipɏak cha losan un kukkuwala ot langulin ta ngin-ala hachiʼn pita.

45“Miyalig chi Mampangatan Apudyus si osaʼn taguʼn mansingisingit si ngin-alà lapopotog un perlas. 46Inggew ka osaʼn inchesala un amod chi potogla, ummoyon ot illipɏakla losan un kukkuwala ot ngin-ala hachiʼn perlas.”

Ha Pangngalig Mipanggop Si Tabukuɏ

47Ot intuɏuy Jesus un kalala, “Miyalig chi Mampangatan Apudyus si tabukuɏ un ingkop-eɏn cha malabukuɏ si byeybyey ked lakalakalasi lamos un latabukuɏan. 48Laplu ked chi tabukuɏ, giluyguycha si teɏanteg. Ot ummamuycha ot lampilicha si mangkabyaɏu ot illiggacha si iiggaancha. Ngim cha mangkaɏawing un lamos, lan-ibyellucha kan chicha. 49Katchi makwa si alungus chi lubung. Umali cha angheles ked isilacha cha mangkaɏawing un tagu kan cha bibiɏu un tagu. 50Ked ibyellucha si guminggillaub un apuy cha mangkaɏawing un tagu. Ked sin-iibincha ya singngingillot cha ngiponcha.”

Mipanggop Si Tudtuchun Jesus Ya Chachaan Un Tudtuchu

51Oli pun ilimus Jesus kan chicha, “Ha laawatanyu cha laoy losan?”

Ot summongbyatcha, “O, laawatanmi.”

52Ot kalala bo kan chicha, “Kacha mistulun chi lintog un mamati si itudtuchuk mipanggop si Mampangatan Apudyus, ked miyalig si simbyeɏoy un ammulaʼn mangitokweɏ ya manguseɏ si kukkuwala un baru ya chachaan si langichulilala.”

Achipun Cha Kailiyan Jesus Impotog Siya

(Mrk. 6:1-6; Luk. 4:16-30)

53Gilamput ked Jesus intudtuchu cha hachiʼn pangngalig, ummoyon. 54Ot langulin ud ilila, ot ummoy lantudtuchu si sinagoga. Laschaaw cha lanchongeɏ kan siya ot kalancha, “Himma langean chi taguʼn alla si kilalaingla ya pallakabyelinla un mangwa si lakaskaschaaw? 55Ha chakampun kamman un siya alak chi kalupinteɏ? Chakampun kamman un si Mary ilala ya susuludla cha James, Joseph, Simon ya si Judah? 56Ya awed bo utla kan chitaku cha susuludlaʼn byebyai? Ked himma langeala losan kan cha laoy lù?” 57Patungedcha lasaktan kan siya ot achipuncha lamati. Ot kalan Jesus kan chicha, “Mapotgen chi propeta si uchum un ili, ngim achipun mapotgen si mismun ilila ya mismun kabyeɏoyla.” 58Ot akit laing chi killingwalaʼn lakaskaschaaw udchi ti achipuncha mamati kan siya.

Currently Selected:

Matthew 13: HUA

Highlight

Copy