Matthew 5

Ha Intudtuchun Jesus Ya Cha Bilinla

(Luk. 6:20-26)

1Intullong pun Jesus cha amod un tagu, lalagecha si bilig#5:1 Ha piolaʼn ibyega si Greek achipun mantaklang un bilig ngim kabibbiligen. ot ummamuy. Ot ummacheli cha disipulusla kan siya. 2Ot illugilaʼn lantudtuchu kan chicha un kalala,

3“Pian cha taguʼn ammucha un lappun kabyeeɏancha si sangwalan Apudyus, ti mipaticha si Mampangatan Apudyus.

4“Pian cha taguʼn mallachingit gapu si byasuɏ, ti liwliwaon Apudyus chicha.

5“Pian cha taguʼn mangipakumbyabya si long-egcha, ti chicha malawid si pita.

6“Pian cha taguʼn pipioncha un koon cha ipakwan Apudyus, ti maplokcha.

7“Pian cha taguʼn malagchegu kan cha asintatagucha, ti kacheguwan Apudyus chicha.

8“Pian cha taguʼn mampeɏkas cha somsomokcha, ti mailacha si Apudyus lu sumin eɏgew.

9“Pian cha taguʼn pin-a mangwa si lumin-awaan cha tagu, ti ibilang Apudyus chichaʼn aalakla.

10“Pian cha taguʼn mapalpaligatan gapu si mangwaancha si pion Apudyus, ti lipaticha si Mampangatan Apudyus.

11“Pian kayu lu mangig-iggaan chikayu ya palpaligatan chikayu ya pepewingon chikayu gapu kan sakon. 12Ulay lu katchi pin-acha koon kan chikayu, matetteɏok kayu, ti chakeɏ gunggulayuʼd langit. Ti kamatchi bo killingwan cha taguʼn lamampaligat kan cha propetan ummun-ula lu chikayu.”

Ha Pangngalig Chi Asin Ya Silaw

(Mrk. 9:50; Luk. 14:34-35; Mrk. 4:21-25; Luk. 8:16-18)

13Ot intuɏuy Jesus un lantudtuchu, kalala, “Isuyu asin kan cha losan un tagu si allaʼn lubung. Ngim lu makaan chi simsimla, lappun in-ilolaʼn mangiyulin si kilaasinla. Lappun puutlà akit, mibyellu ked byebyechokon cha tagu.

14“Ya isuyu silaw un mansilaw si somsomok cha tagu si lubung. Isuyu iliʼn inggew si osaʼn bilig un mampatak ya achipun makwaʼn maseilan. 15Ked lappun tagu si tonggela silaw ked lilakkobyela si chungchung. Ngim ipatayla si ustuʼn papattayan ta silawala cha losan un inggew ud chaɏom chi byeɏoy. 16Kamatchi bo un kasapuɏan un silawanyu cha tagu ta mailacha bibiɏuʼn ugaliyu ked siya mangichayawancha kan Apudyus un Amayuʼd langit.”

Ha Tudtuchu Mipanggop Si Lintog

17Kalan Jesus, “Achiyu kalan un ummaliyak ta inyak kaalon chi lintog un inggilin Moses ya cha tudtuchun cha propeta, ngim ummaliyak ta matungpeɏ cha losan un liigili.#5:17 Chuwa piolaʼn uguchon: ummaliyak ta ipakaammuk chi ustuʼn piolaʼn ibyega ya ummaliyak ta matungpeɏ imbyegacha. 18Tuttuwa ibyegak kan chikayu, maumas chi langit ya pita ngim cha lintog Apudyus ked sissiya, ulay simpattok achipun mataɏak inggalad matungpeɏ cha losan un panggop Apudyus. 19Ked ha taguʼn achipun tumuttuwa si ulay kapaatan un lintog Apudyus ya siya bo itudtuchula kan cha uchum, miibilang un siya kabyabyaan si Mampangatan Apudyus. Ngim lu silu tumuttuwa si lintog Apudyus ya siya bo itudtuchula kan cha uchum, siya mibilang un kangatuwan si Mampangatan Apudyus. 20Ti ibyegak kan chikayu, un achipun kayu mipati si Mampangatan Apudyus lu achipun kayu lalinlintog lu cha Pariseo ya cha mimistulun chi lintog.”

Ha Tudtuchu Mipanggop Si Sanga

21“Chingngeɏyu un liibilin kan cha tagu si awi un kalala, ‘Achi kayu pumatoy, ked lu silu pumatoy, michiɏum ked machusa.’ 22Ngim ibyegak kan chikayu, lu silu sumanga si biɏunla makuis ked lu silu mangig-iggaala biɏunla, michiɏum kan cha kukunsiseɏ ked lu silu mangibyega si biɏunla un, ‘Oggog! Lappun puutlu!’ lobbonglaʼn mibyellu si apuy ud impiyeɏlu. 23Ked lu awed ingka ichatun kan Apudyus si altar ya laslasmokluʼn awed lawingon chi biɏunlu kan sika, 24telam chi chatunlu si sangwalan chi altar ked ingka umula mampakawan si biɏunlu asika ot mangulin ya manchatunka kan Apudyus.

25“Lu awed lamabyasuɏ kan sika ya mangichiɏum kan sika, kakmam umoy makaaliglu sakbyey un gumatongka si korti. Ta achila ipuɏang sika si kuis ked achipun chi kuis sika ipuɏang kan cha pulis ta achipun cha pulis sika ibyaɏud. 26Tuttuwa ibyegak kan sika, lu mibyaɏudka achipunka mibukat inggalaʼd byayachem losan un muɏtam.”

Ha Tudtuchu Mipanggop Si Chegchegas

27“Chingngeɏyu un liibilin kan cha tagu si awi un kalala, ‘Achi kayu makachegchegas.’ 28Ngim ibyegak kan chikayu, lu silu mangitullong si byebyai ya piolaʼn eɏan siya ked lakabyasuɏ si chegchegas si somsomokla. 29Lu siya makabyasuɏam cha itullong chi machuwalan un atam, ukaom ked ibyellum! Un-ulloy chi makuɏangan chi long-eglu lu wechewed chi long-eglu ked mibyelluʼd impiyeɏlu. 30Lu siya makabyasuɏam chi kokòon chi machuwalan un imam, lampogem ked ibyellum! Un-ulloy chi magugungsuɏan chi osaʼn imam lu wechewed chi long-eglu ked mibyelluʼd impiyeɏlu.”

Ha Tudtuchu Mipanggop Si Ichang

(Mrk. 10:11-12; Luk. 16:18)

31“Chingngeɏyu un liibilin un kalala, ‘Lu ichangan chi leɏaki asawala, masapuɏʼn mangwa si kasuɏatan chi man-ichangancha.’ 32Ngim ibyegak kan chikayu, lu ichangan chi leɏaki asawala, makabyasuɏ, malaksig lu lakachegchegas chi byebyai, un siya gapun chi mamabyasuɏala kan siya. Ya lu silu mangasawa si laichangan un byebyai makabyasuɏ si chegchegas.”

Ha Tudtuchu Mipanggop Si Sapata

(Jas. 5:12)

33“Chingngeɏyu un liibilin kan cha tagu si awi un kalala, ‘Achim yam-alon chi insapatam, ngim masapuɏʼn koom chi insapatam kan Apudyus.’ 34Ngim si sala ibyegak kan chikayu un achi kayu mansapata ya achiyu isapataʼd langit, ti siya mantutuggewan Apudyus un manturay. 35Willu achiyu isapata allaʼn pita, ti siya lipatayan chi ikila. Ked isula bo un achiyu isapata ud Jerusalem, ti siya siudad chi kangatuwan un Ari. 36Ya achim isapata chi uɏum, ti achipunka makakopya si ossaan un mamputilak willu mangngitit un buuk. 37Un-ulloy chi kalanyuʼn ‘O’ lu tuttuwa, willu ‘Lai’ lu achipun, achiyu chog-an si sapata, ti losan un ichogayu lampeɏpu kan Satalas.”

Ha Tudtuchu Mipanggop Si Byaɏos

(Luk. 6:27-36)

38“Chingngeɏyu un liibilin kan chikayu un kalala, ‘Lu silu mamussok si atan chi asintatagula, masapuɏʼn mabussok bo atala. Ked lu silu mamugbug si ngipon chi asintatagula, masapuɏʼn mabugbug bo ngiponla.’#5:38 Deuteronomy 19:21 39Ngim ibyegak kan chikayu, achiyu ibyaɏos cha lawwing un kingwan chi asintataguyu kan chikayu. Lu awed malipak si machuwalan un apinglu, itayam bo machuwigin apinglu. 40Ked lu awed mangichiɏum kan sika ta eɏala siluplu, idchom bo chakitlu. 41Ked lu awed tagù ipatutla ipabukud kan sika keɏgala si sinkilamitru, bukuchom ulay chuwaʼn kilamitru. 42Lu awed mangkochew kan sika, idchem. Lu awed bumulud kan sika, pabuluchem bo.”

Tudtuchu Mipanggop Si Ayat Kan Cha Kabusuɏ

(Luk. 6:27-28, 32-36)

43“Chingngeɏyu un liibilin kan chikayu un kalala, ‘Masapuɏʼn ayatonyu cha bubuɏunyu, ngim sangaonyu cha kabusuɏyu.’ 44Ngim ibyegak kan chikayu, masapuɏʼn ayatonyu cha kabusuɏyu ya iluwaluwanyu cha mamampaligat kan chikayu. 45Ta mibilang kayu un aalak Apudyus un Ama takuʼd langit. Ti man-iisun ipalubusla umilitan chi ilit kan cha bibiɏuʼn tagu ya cha lawwing un tagu. Isula boʼn mangatod si uchen kan cha lalintog ya cha mangwa si lawwing. 46Kalanyu lin un lu siyad ay-ayatonyu cha mangay-ayat kan chikayu, gunggulaan Apudyus chikayu? Lai, ti ulay bo cha manchachagup si bugis katchi bo kokòoncha. 47Ked lu abus cha bubuɏunyu si makaug-ugguchenyu ya lilaksigyu cha uchum, simma puutla ti ulay cha achipun mamati, kamatchi bo kokòoncha. 48Ked masapuɏʼn lappun mangkuɏanganyu, un isun chi Amayuʼd langit un lappun mangkuɏangala.”

Currently Selected:

Matthew 5: HUA

Highlight

Copy