Exode 11

Bi sòon̄ nnaabujoolkaa pu

1Ti-Dindaan bí Mooyiisi yii: «M làá tɔ̄ń nnaabujoolkaa Faaroo nì Eejipiti yab pu. Míǹ boonee ní ú dāá nín yàntī ní nyā. U làá dāá jà-ni ní nyā doo talku. 2Míǹ puee á sòoǹ nì Isirayeel yab, bininjab nì binimpoobi, báà ŋma ń mèè u-kɔŋkɔnnaatɔ sindaariya nì animbil kúti wanti.» 3Ti-Dindaan nìn yāntì Isirayeel yab ká diyimɔɔl Eejipiti yab cee. Míǹ ní Faaroo kpambaliŋ nì Eejipiti yab kɔkɔ nìn tɔ́ Mooyiisi u-ba tiŋan Eejipiti tiŋkin.

4Mooyiisi nìn bí Faaroo yii: «Pīlifì, ti-Dindaan nín lī puee sèé: <M làá jītí Eejipiti tiŋki poon kunyataasiiu búmbum. 5Eejipiti tiŋki biseebiyaamu nninjabiyaamu kɔkɔ làá kpú, kí kíĺ sii Faaroo un kā dibeejal pu nee jipɔŋkpiliu kí tin cáá sāā uyumbunimpu un nà idee jipɔŋkpiliu, nì tiwaŋkuti kɔkɔ bipeepeekaamu. 6Ikuŋkuunti làá dāá nīn tùm̀ Eejipiti tiŋki kɔkɔ poon ní dàii. Doooo nee, baa láá pée gbìl̄ míǹ ki ká jaanjaan, ki kpá kí gíti ká míǹ mun jaanjaan. 7Ama Isirayeel yab kansikinee, baa làá gbìl̄ kibɔkɔ gbóol̀ unil àá kuwaŋkuluu gba. Niinee ni làá béé yii man ni-Dindaan ŋá digàntil Isirayeel yab nì Eejipiti yab kansikin.> 8Niin ní a-kpambaliŋ bin kā nee làá dāan̄ m-cee kí gbàan̄ m-nimbiin ní kí bí-mi yii: <Sii nì a-nibul, nín̄ cámaan.> Míǹ boonee ní ḿ búntí.» Nì diŋuul ní Mooyiisi nìn nyáń Faaroo cee.

9Ní ti-Dindaan gíti bi Mooyiisi yii: «Faaroo yaa kaa bíi pílifíǹ-nee, an sá ḿ ŋmā kí bùtī m-maamaaci tuŋkpaaŋŋi u-tiŋki poon ní.» 10Mooyiisi nì Aarɔn nìn ŋá maamaaci tuŋkpaaŋŋi kupaau Faaroo nimbiin, ama ní ti-Dindaan pɔ́ɔkì u-pɔbil, ní waa yāntì Isirayeel yab nyáń u-tiŋkin ki búntì.

Currently Selected:

Exode 11: BASSARDC

Highlight

Copy

Compare