Exode 13

Dilákatil jiŋaaliu marab biba mun

1Ti-Dindaan sòon̄ nì Mooyiisi ki bí-u yii: 2«Á dū Isirayeel yab biseebiyaamu bininjab kɔkɔ kí sú-mi. Di sá yii unimpu kamaa biseebiki kininjabiki nì kuwaŋkuluu kamaa bipeepeekaaki kijaka sá ki tīī man ní#13.2 Kpèè Dikà 3.13, Luuki 2.23..» 3Mooyiisi bí Isirayeel nibul yii: «Ní nīn téetímaan ŋwiin nee pu, ti-Dindaan nín dū u-ŋampɔŋŋu ki nyántì-ni kuyuŋun Eejipiti tiŋkin puee. Yaadalee ní taa ŋmɔ́ kpɔnɔb bin poon bi ŋá ŋkpɔnɔnyɔkɔee. 4Ni bíi nyēē Eejipiti tiŋki poon díǹ Ifin ŋmaliu un bi yíì Abiibee wiiŋŋu ŋubɔ dee#13.4 Abiibi: Uŋmal gbanti kífí utuntuŋŋmal kansikin, ní kí tin kúntí umaŋgumantiŋmal poon.. 5Ti-Dindaan yaa cáá-ni ki kɔ́ǹ Kanaan yab nì Eeti yab nì Amɔɔr yab nì Eefi yab nì Jeebusi yab timmunee, ní dāá nīn ŋáań akoobil nee dibindi kamaa uŋmal nee poon ki tìì ti-Dindaan tinyool. Kitiŋ gbanti ní ti-Dindaan nìn pōoǹ ni-naanjab yii u làá dūú tīī-nee. Kitiŋ gbanti poon ní nnaabiim nì tisiil còol̀. 6Ní dū iwiin iluli kí ŋmɔ́ kpɔnɔb bin kaa cáá ŋkpɔnɔnyɔkɔee. Ŋwinluluúti dalee, ní jī jiŋaal kí tīī ti-Dindaan tinyool. 7Iwiin iluli gbanti poonee, ní taa ŋmɔ́ kpɔnɔb bin poon bi ŋá ŋkpɔnɔnyɔkɔee. Ni-tiŋki kɔkɔ poonee, bí taa ká ni-cee kpɔnɔ un poon bi ŋá ŋkpɔnɔnyɔkɔee àá ŋkpɔnɔnyɔkɔ ŋu-ba. 8Jiŋaal gbanti poonee, ní dāá māafì ni-biyaamu yii: <Ti ŋáań míǹ ti-Dindaan nín nìn ŋá min ki tīī-ti ti nín nìn nyáń Eejipiti tiŋkin puee ní.» 9Jiŋaal gbanti ń dāá nīn sá-ni diteetil, kí dāá nīn sá-ni kudaaŋŋu ni-ŋalii nì ni-yigbeeŋi pu, ní kí nīn téetí-ni yii ni máaǹ kí nìn sòoǹ ti-Dindaan marau pu, kun puee an sá nì u-ŋampɔŋŋu ní u nyántì-ni Eejipiti tiŋkin. 10Dibintil kamaa jiŋaal nee wiiŋŋu yaa bāańee, ní ŋá min mara nee bí yii ní ŋée.

11Ti-Dindaan làá cáá-ni kí kɔ́ǹ Kanaan tiŋkin kii u nín nìn pūtì ki pōoǹ ni nì ni-naanjab yii u làá dū-kì kí tīī-ni puee. 12Niinee ní dāá dū ni-biseebiyaamu nninjabiyaamu kí sú ti-Dindaan. Ni-waŋkuti bipeepeekaamu njamu mun sá ti-Dindaan wanti ní. 13Ní dū upii àá uŋoobu kí kpántí kimaŋ bipeepeekaaki kijaka. Ni yaa kaa kpántèe, ní nyīī kí gíí ki-sil kí kpú. Ama ni-nibul poon biseebiyaamu nninjabiyaamuee, ní pà mu-pu#13.13 Kimaŋ nìn sá kuwaŋkuluu kun kòóyee ní, an dàkà yii baa nìn ŋūǹ kí dū-kì kí ŋá saraa kí tīī Unimbɔti. - Bí pà mbiseebiyaamu nninjabiyaamupu bɔtee, kpèè Dikà 18.16..

14Boonee ni-biyaamu yaa láa bíi bàlifī-ni yii ba pu ní ni ŋáań mimmee, ní dāá kíí-bi yii: <Kun pu ti ŋáań mimmee di sá yii ti-Dindaan nìn dū u-ŋampɔŋŋu ní ki nyántì-ti kuyuŋu poon Eejipiti tiŋkin. 15Faaroo nìn yíì kpataaa yii u kpá kí líí-ti tí búntí. Niinee ti-Dindaan yāntì Eejipiti yab biseebiyaamu nninjabiyaamu nì bi-waŋkuti bipeepeekaamu njamu kpíì kɔkɔ. An pu ní ti cáá ti-waŋkuti bipeepeekaamu njamu ki ŋáań saraa ki tìì ti-Dindaan, ní ki pà ti-biseebiyaamu nninjabiyaamu pu.> 16Míǹ puee tin ti bíi ŋáań nee ń nīn sá-ni kudaaŋŋu ni-ŋalii nì ni-yigbeeŋi pu, kí nīn téetí-ni yii ti-Dindaan nìn dū u-ŋampɔŋŋu ní ki nyántì-ti Eejipiti tiŋkin.

Unimbɔti līī u-nibul nyɔkɔpu

17Faaroo nín nìn yāntì Isirayeel yab nyáń u-tiŋkinee, Unimbɔti kaa nìn yāntì bi dī Fiiliistii yab tiŋki saŋŋu, niin mun di kaa bàà dátì#13.17 Fiiliistii yab tiŋki saŋŋu gbanti nìn kpàkaǹ Meediiteeranee tiŋkuu ní, ní Eejipiti yab janjaliibi di nìn cí-ŋu.. Unimbɔti nìn lī u-ban yii: «Binib nee yaa ká kujaau nsanni, bi-pɔbil làá yīkì ní bí bí yii bi làá fàtīí gítí Eejipiti tiŋkin.» 18An pu ní Unimbɔti nìn yāntì bi dūu dī kuteeu pú ki pɔ́tì ki tin nyáń Tikati mɔɔl pu. Isirayeel yab nìn nyáń Eejipiti tiŋkin ki nóó tɔb akiti akiti kii bijanjaliibee.

19Mooyiisi nìn kpáaǹ Jooseefi kpabiŋ, kun puee Jooseefi nìn bí u-nabiyaamu yii: «Unimbɔti làá jòoń-ni ní nyā kitiŋ nee poon. Ní pùtī yii ni làá dāá kpáaǹ m-kpabiŋ#13.19 Kpèè Diny 50.25, Joos 24.32..»

20Isirayeel yab nìn yíkì Sukooti tiŋki ní ki cūtìi gāā bi-tantib Eetaam tiŋki, kuteeu kúntilaŋki. 21Ti-Dindaan u-ba di nìn līī bi-nyɔkɔpu. Ŋwiimpuee, u nìn bí ditagbancancaal poon ní ki dàkà-bi nsan, ní kunyeeuee ditagbancancaalee ń kpántí ŋŋmi ki ŋmíntí-bi. An pu ní bi nìn ŋūǹ ki còom̄ ŋwiimpu nì kunyeeu. 22Ditagbancancaalee kaa sútí kí wàatī dinibul ŋwiimpu ní ditagbancancaal din sá ŋŋmee mun kaa sútí kí wàatī-bi kunyeeu.

Currently Selected:

Exode 13: BASSARDC

Highlight

Copy

Compare