Exode 17

Maasa nì Meeriiba nyim bɔti

(Kpèè Dikà 20.2-13)

1Isirayeel yab kɔkɔ yíkì Siini teekunee ní ki búntì, kii ti-Dindaan u-ba nín nìn bɔ́ntì bi-saŋkindi bí còom̀ puee. Bi bàn̄ Reefiidiimee ní ki kāl̀ niin, ama nnyim nìn kpá bí nyɔ̀. 2Niinee ní bi bíi nyàab̀ Mooyiisi kujaau ki lì-u yii: «Tīī-ti nnyim tí nyɔ̀!» Ní Mooyiisi bí-bi yii: «Ba pu ní ni nyàab̀-mi kujaau? Ba pu ní ni cɔ́ŋkí ti-Dindaan?» 3Nnyinnyoo nìn gbìl̄ Isirayeel yab ní bi bíi wòoǹ Mooyiisi yii: «Ba pu ní a yōoǹní-ti Eejipiti tiŋkin ní? A là nnyinnyoo ń kpɔ̀ ti nì ti-biyaamu nì ti-waŋkuti níii?» 4Ní Mooyiisi kúuǹ ki yíiń ti-Dindaan ki lī yii: «M làá nín ŋá dinibul nee mana dee? An kíǹ fiii bí yāŋkì-mi ataŋkpee kí kpɔ̀.» 5Ní ti-Dindaan bí Mooyiisi yii: «Lēē Isirayeel yab kpilib biba, kí yòon̄ a-kpandɔŋu ŋun a nìn dūu fáá dimɔɔlee kí lìntī samaa nyɔkɔpu ní nīn cá. 6Man làá cùú yūĺ a-nyɔkɔpu Ooreeb jool pu ditaŋkpal pu. Á fáá ditaŋkpalee ní nnyim ń nyā samaa ń nyɔ̀.» Ní Mooyiisi ŋá min ti-Dindaan tùkū-uee Isirayeel yab kpilib nimbiin.

7Ní bi pú niin diyindi yii Maasa nì Meeriiba, an taapu di sá <Icɔŋki> nì <Kujaau>. Di sá yii Isirayeel yab nìn nyàab̄ Mooyiisi kujaau ní ki cɔ́ŋkì ti-Dindaan mun ki lī yii: <Ti-Dindaan kalin bí ti-kansikinaaa, waa bí ní?>

Isirayeel yab jáń ki pɔ́ɔkiǹ Amaleeki yab

8Amaleeki yab dɔ́miń Reefiidiim kí jáǹ Isirayeel yab. 9Ní Mooyiisi bí Joosuwa yii: «Lútí bininjab kansikin biba si nì bi ń cùú jáǹ Amaleeki yab. Foolee man làá fu jɔ̄m̀ kí nīn yú kigbantaŋ pu kí nīn ŋúb́ Unimbɔti kpandɔŋu m-ŋaan.» 10Niinee Joosuwa búntì kí cùú jáǹ Amaleeki yab kii Mooyiisi nín bí yii ú ŋá puee. Ní Mooyiisi nì Aarɔn nì Uur jɔ́m̀ kigbantaŋ yilpu. 11Ŋyunti ŋun ní Mooyiisi yaa yōoǹ u-ŋal yilpuee, Isirayeel yab pɔ̄ɔ̄ ní, ama u-ŋal yaa sīntèe ní Amaleeki yab ń pɔ̄ɔkì. 12Mooyiisi ŋalii dāa gīīyee ní Aarɔn nì Uur nyàab̄ ditaŋkpal ki bíl̀ ní u kāl̀. Aarɔn nì Uur nìn ŋúb́ u-ŋalii yilpu, ubɔ nìn bí dijandi diba ní un kíǹee bí dijandi din kíǹee. Míǹ ní Mooyiisi ŋalii nìn bí yilpu áli ŋwìiń dāa dūu jéetì. 13Joosuwa nìn dū ntàataajimu ki jáń ki pɔ́ɔkiǹ Amaleeki yab.

14Ti-Dindaan bí Mooyiisi yii: «Ŋmà tibɔti nee kugbɔŋu poon án nīn bí bí nīn téetí. Tùkù Joosuwa yii m làá kpɔ̀ kí céetí Amaleeki yab, án nín làá ŋá pu báà ubɔ ń taa ti téetí bi-puee#17.14 Kpèè Ditee 25.17-19, 1 Sami 15.2-9..» 15Niinee Mooyiisi máń nsaraafan niin ki pú-ŋu diyindi yii: <Ti-Dindaan di sá man jajil daaŋku>. 16Ní ki lī yii: «An nín ŋá pu Amaleeki yab yíkìi jáń nì ti-Dindaan beejalee, ti-Dindaan mun làá nīn pée jáà nì bi ní baabadal.»

Currently Selected:

Exode 17: BASSARDC

Highlight

Copy

Compare