Exode 9

Nnaabuŋmooŋmooti: tiwaŋkuti kúm

1Ti-Dindaan bí Mooyiisi yii: «Cù Faaroo cee kí tùkù-u yii: <Ti-Dindaan Eebru yab Nimbɔtiu bí-si yii á yàntī u-nibul ń nyā kí cùú jāam̀-u. 2A yaa tí yíì kaa yāntì bi cūtì ki gbíntìi ŋúb́-bee, 3ti-Dindaan làá yàntī bìlbil kúm ń jēetí a-waŋkuti tin bí a-satinee pu. Bìlbil kúm min pɔ̄ɔ̄yee làá jēetí a-taamui nì a-gutaamui nì a-mammu nì a-naai nì a-piii nì a-ŋoobui pu. 4Ti-Dindaan làá yàntī digàntil ń dòon̄ Isirayeel yab waŋkuti nì Eejipiti yab waŋkuti kansikin. Isirayeel yab waŋkuluku báà kubɔbɔ kaa làá kpú.»

5Ti-Dindaan yóoǹ ŋyunti ki bí yii: «Fool ní m làá fu yàntī an bɔti ń jītí Eejipiti tiŋki pu.» 6Kutaa wúntèe ní ti-Dindaan ŋá min u bí yii u làá ŋée. Eejipiti yab waŋkuti kɔkɔ kpíì, ama Isirayeel yab waŋkuluku báà kubɔbɔ kaa kpíì. 7Faaroo tú binib cūtìi kpēē ní ki ká yii Isirayeel yab waŋkuluku báà kubɔ kaa kpíì. Nì míǹ kɔkɔee, u pɔ́ɔkì u-pɔbil kaa yāntì Isirayeel yab nyáń.

Nnaabululuuti: anal

8Ti-Dindaan bí Mooyiisi nì Aarɔn yii: «Jáfímaan dibubul poon ŋfantam aŋaŋkul ali kí nīn ŋúb́, ni yaa bàn̄ Faaroo ceeyee, Mooyiisi ń dūú yàaǹ kutaa pu Faaroo nimbiin. 9Án làá kpántí kukpɔŋkpɔŋu ní kí bìin̄ Eejipiti tiŋki kɔkɔ pu, ní án yàntī anal ń tɔ̄ binib nì tiwaŋkuti wunti pu kí kpántí ibuun Eejipiti tiŋki kɔkɔn.»

10Mooyiisi nì Aarɔn jáfì ŋfantam ki bàn̄ ki ká Faaroo, ní Mooyiisi dū ŋfantamee ki yāaǹ kutaa pu Faaroo nimbiin, ní an yāntì anal tɔ́ binib nì tiwaŋkuti wunti pu ki kpántì ibuun. 11Ibuun gbanti puee, Eejipiti yab kpaŋkpantiibi kaa ŋúń ki yúl̀ Mooyiisi nimbiin, kun puee ibuun nìn píń bi mun wunti pu kii an nín nìn píń Eejipiti yab kɔkɔ wunti pu puee ní. 12Ama ti-Dindaan nìn pɔ́ɔkì Faaroo pɔbil ní waa pílifiǹ Mooyiisi nì Aarɔn, kii ti-Dindaan nín nìn pée tùkū Mooyiisi puee.

Nnaabululuúti: ataanyiŋkumbil

13Ti-Dindaan bí Mooyiisi yii: «Fool kutaafaau pɔ̀lpɔlee, á fu cù Faaroo cee kí tùkù-u yii ti-Dindaan Eebru yab Nimbɔtiu bí-u yii: <Á yàntī m-nibul ń nyā kí cùú jāam̀-mi. 14Di sá kɔŋkɔnnee, m làá dū nnaabu nín bí pu ŋu-ba ŋu-bee kɔkɔ kí tɔ̄ si nì a-kpambaliŋ nì a-tiŋki nib kɔkɔ pu, ní á béé yii ubɔ kaa bí kitiŋ nee pu kí dū u-ba kí ŋmàntīǹ man. 15M bàà dūmaan bìlbil kúm ki kúntì sii nì a-tiŋki nib dooooyee kí dàkà m-pɔŋŋu. Naŋkɔnampu nee, ni bàà kpíì ki céetì kitiŋ pu pílpil. 16Ama m yāntì á nīn bí kí ŋmā kí dàkà-si m-pɔŋŋu ní m-yindi ń gbìtī ilaan kɔkɔ#9.16 Kpèè Room 9.17.. 17Nì míǹ kɔkɔee, aa pú m-nibul nsan bí nyā. 18An puee fool naŋkɔnampuee, m làá fu yàntī utaaja ń nì ataanyiŋkumbikpaan ń lítí. Doooo Eejipiti tiŋki nín kíĺ ki bí ki dāa sāā ŋyunti nee, an taauee kaa láá nìn̄ ataanyiŋkumbikpaan lítí míǹ ki ká. 19Míǹ puee yàntī bí kóoǹní a-waŋkuti nì tin kɔkɔ a cáá an bí tisatinee kí cáań mmɔŋki. Kun puee utaaja làá fu nì, ní ataanyiŋkumbikpaan ń fu lítí kí kpɔ̀ binib nì tiwaŋkuti tin bí tisatin kaa kūnní mmɔŋkee.>»

20Faaroo kpambaliŋ bin nìn fāŋkì ti-Dindaanee nìn yāntì bi-tɔntɔnliibi kpáaǹ tiwaŋkuti ki kūnnì mmɔŋki. 21Ama ní bin kaa nìn fāŋkì ti-Dindaanee kaa nìn dū tibɔtee ki túń ditundi, ní ki yāntì bi-tɔntɔnliibi nì bi-waŋkuti bí tisatin.

22Ti-Dindaan bí Mooyiisi yii: «Yòon̄ a-ŋal kí túĺ kutagbɔŋu utaaja ń nì ataanyiŋkumbikpaan ń lítí binib nì tiwaŋkuti nì tikpaajin tin kɔkɔ bí Eejipiti tiŋkinee pu.» 23Ní Mooyiisi yōoǹ u-kpandɔŋu ki túĺ kutaa, ní ti-Dindaan yāntì itaatantati kíĺ, ní utaaja nìn̄, ní ataanyiŋkumbikpaan lítì, ní utaa tɔ́ kitiŋ kɔkɔ. Ti-Dindaan nìn yāntì utaaja nìn̄ ataanyiŋkumbikpaan lítì Eejipiti tiŋki pu. 24Utaaja nìn̄ ataanyiŋkumbikpaan lítì nì itaaŋmɔŋmɔ tikpil. U nìn nìn̄ mpɔn mpɔn tikpil. Doooo Eejipiti tiŋki nín kíĺ ki bí ki dāa sāā an yuntiŋuee, an taajau juti kaa láá nìn̄ míǹ ki ká#9.24 Kpèè Dilee 8.7, 16.21.. 25Ataanyiŋkumbikpaan nìn lítì Eejipiti tiŋki kɔkɔ, ki kūū kūū binib nì tiwaŋkuti tin bí tisatinee. Ŋi nìn bíil̀ tikpaajin kɔkɔ ki kɔ́fì isufi in yú tisatinee kɔkɔ. 26See Gooseen#9.26 Gooseen : kpèè Diny 45.10 nì tin bi ŋmàn̄ kugbɔŋu faaku taapuee. tiŋki laakin Isirayeel yab kóòyee baba ní utaaja nì ataanyiŋkumbikpaanee kaa gbēē. 27Niinee Faaroo yíiń Mooyiisi nì Aarɔn ní ki bí-bi yii: «Min bí nee, m béè yii m yīntì. Ni-Dindaan di sá deedeedaan ní man nì m-nibul fōō dibɔkpil. 28Mèèmaan ni-Dindaan, utaaja nì ataanyiŋkumbikpaan nì itaatantati ń gbèen̄. M làá yàntī ní nyā, maa làá ti tàan̄-ni.» 29Ní Mooyiisi bí-u yii: «M yaa nyáń kitiŋ poonee, m làá yòon̄ m-ŋalii kí túĺ ti-Dindaan watil pú kí mèè-u, ataanyiŋkumbikpaan nì itaatantati kɔkɔ làá ŋmīĺ ní á béé yii ti-Dindaan di yì kitiŋ kɔkɔ. 30Ama m nyí yii nì míǹ kɔkɔee, sii nì a-kpambaliŋ kaa làá tí fàŋkì ti-Dindaan Unimbɔti.»

31Utaajee nìn nìn̄ ki bíil̀ gulfa nì tijimpin tin bi yíì ɔɔjee, kun puee ɔɔji nìn bíi búù, ní gulfa bíi púkuḿ. 32Ama tijimpin tin bi yíì bilee nì seegilee#9.32 Seegil náań nì bilee ní bi cáa ŋáań kpɔnɔ. tíǹ kaa lòoǹ malaa, an pu ní utaajee kaa nìn bíil̀ tíǹ..

33Mooyiisi yíkì Faaroo cee ki nyáń kitiŋinee ní ki yōoǹ u-ŋalii ki túĺ ti-Dindaan watil pú ki mēē, ní utaaja nì ataanyiŋkumbikpaan nì itaatantati gbēeǹ. 34Faaroo ká yii utaaja nì ataanyiŋkumbikpaan nì itaatantati gbēeǹee, ní u nìkī ikpiti diŋál ní u nì u-kpambaliŋ fātìi pɔ́ɔkì bi-pɔbiliŋ. 35Faaroo pɔbil nìn pɔ́ɔkì ní u yíì kaa yāntì Isirayeel yab nyáń, kii ti-Dindaan nín nìn dī Mooyiisi pu ki sòon̄ puee.

Currently Selected:

Exode 9: BASSARDC

Highlight

Copy

Compare