Genèse 29

Jaakɔb bàn̄ u-wee Laaban cee

1Ní Jaakɔb yíkì ki nìkī u-saŋŋu ki túĺ ntimu mun bí ŋwìiń nyalaŋki púee. 2U kpēēyee, lɔkɔ ubɔ dɔ̄ akpaanni tipicaŋkpun tita dɔ̄ ki kɔ́ĺ. Niin ní bipikpaaliibi nìn lúù nnyim ki nyùntī ipii. Ditaŋkpakpaandi diba nìn pīī lɔkɔee nyɔkɔpu. 3Míǹ puee bi nìn cīití ipii kɔkɔ yaa kpáfì ki dóòyee ní bí nín bíntí ditaŋkpalee lɔkɔ nyɔkɔ ní kí nyùntī i-kɔkɔ. I yaa nyùn̄ ki dóòyee ní bí fàtīí bíntí ditaŋkpalee kí pìin̄ lɔkɔee nyɔkɔ. 4Ní Jaakɔb bālifì bipikpaaliibee yii: «M-nabiyaamu, ni sá la ní?» Ní bi kíí-u yii: «Ti sá Kaaran yab ní.» 5Ní u bālifì-bi yii: «Ni nyí Laaban, Naakɔɔr naantiiuaaa?» Ni bi kíí-u yii: «Iiin, ti nyí-u.» 6Ní u bālifì-bi yii: «U pɔ̄ɔ̄ tiŋanaaa?» Ní bi kíí-u yii: «Alaafiya bí-u. Kpèè, u-bisal Raseel di dòoń nì ipii nee.» 7Ni u bí-bi yii: «Ŋwìiń dáá bí, an kaa láá ŋmāntì ŋyunti ŋun bi kpáfí ipiiyee. Míǹ puee ní lúń nnyim kí nyùntī-i, ni yaa nyūntì-iee ní gíiǹ-i kupikpaaun.» 8Ní bi kíí-u yii: «Taa ŋūǹ ki ŋá míǹ, asee ipii kɔkɔ yaa bāań ki kpáfì. Niinee ní tí nín cúú ditaŋkpal kí bíntí ní kí nyùntī-i.»

9Bi yú ki sòoǹ míǹ ní Raseel dūu bāań nì u-baa piii, di sá Raseel nìn sá upikpaal ní. 10Jaakɔb nín ká u-wee Laaban bisal Raseel péetiń u-baa piiiyee, ní u dɔ́miń ki cúú ditaŋkpalee ki bíntì ní ki nyūntì-i. 11Ní Jaakɔb kpàl̄ Raseel ní ki bíi sūǹ nì dipɔɔpindi. 12Ní ki bí Raseel yii: «M sá a-baa niisal Reebeeka jipɔɔn ní.» Ní Raseel sáǹ ki cūtì ki tùkū u-baa. 13Laaban nín gbìl̄ yii u-niisal jipɔɔn bāańee, ní u sáǹ ki túŋkì-u. U bàn̄ee, ní ki kpàl̄-u ki nákáǹ u-ba, ní ki cáá-u ki cūnnì mmɔŋki. Ní Jaakɔb máafì-u tin jítèe kɔkɔ. 14Ní Laaban bí Jaakɔb yii: «Tiŋman, a baasii sá m-niliu ní kiŋkiŋ.» Jaakɔb nìn kāl̀ Laaban cee ki sāā uŋmal ubɔ.

Jaakɔb cáá Leeya nì Raseel

15Dalbee ní Laaban bí Jaakɔb yii: «A nín sá m-niliuee puee, á nīn tūǹ ditundi míǹ faalaa ki tìì-maaa? An puee tùkù-mi kun a là ḿ dāá pà-see.»

16Laaban nìn cáá bisapɔmbi bili, bi yíì ukpil yii Leeya ní ki yíì uwaal yii Raseel. 17Leeya kaa nìn cáá kunyaaŋŋu, ama ní Raseel úǹ nìn bí gbàlgbal ki ŋān̄ tikpil. 18Jaakɔb nìn néeń Raseel, ní ki bí u-wee yii: «M làá tɔ̄ ditundi kí tīī-si abin aluli á dū a-bisal uwaal Raseel kí tīī-mi.» 19Ní Laaban bí-u yii: «An mɔ̄ǹ-mi ḿ dū m-bisal kí tīī sii ki jítiǹ ḿ dū-u kí tīī uniyaŋyan. Nín̄ kā m-cee.»

20Ní Jaakɔb túń ditundi abin aluli Raseel pu ní an kaa kpáàa súŋkì u-cee, kun puee u nìn néeń-u tikpil. 21Niinee ní Jaakɔb bí Laaban yii: «M túń ditundi ki sāā m-yuntiŋu, an puee dū m-nimpuu ki tīī-mi ḿ cáá.»

22Ní Laaban kóoǹ niin yab kɔkɔ ki kpáfì ní bi jíń tinimpucan jiŋaaliu. 23Kunyeeuee ní Laaban yōoǹ u-biseebiki Leeya ki cáa kɔ́ǹ Jaakɔb cee ní u nì Jaakɔb kpáfì. 24Ní Laaban dū u-yumbusapɔɔŋwu Siilpa ki tīī u-bisal Leeya ú nīn bí u-cee ki tūǹ ditundi ki tìì-u. 25Kutaa wúntèe, Jaakɔb kpēēyee Leeya dee, ní an ŋá-u bitii. Ní u bālifì u-wee Laaban yii: «Ba ŋá ní a ŋá-mi mimmee? An kaa sá Raseel pu ní m kāl̀ a-cee ki túń ditundi ki tīī-saaa? Ba pu ní a kíil̀-mi ki dū Leeya ki tīī-mi?» 26Ní Laaban kíí-u yii: «Timbi cee dooyee, an sá-ti dikoobil ní, uwaal kaa pēentí ukpil kí mɔ̄ǹ. 27Míǹ puee púntí sii nì un bí nee nimpucanti kinyɔŋ nee, kin dāa bíńee, ḿ dū Raseel mun kí tīī-si, á tí kàl̄ abin aluli kí tɔ̄ ditundi kí tīī-mi.» 28Ní Jaakɔb lafun ŋá míǹ. U púntì Leeya nimpucanti kinyɔŋ gbantee, ní Laaban dū u-bisal uwaal Raseel ki kútì-u. 29U nìn dū u-yumbusapɔɔŋwu Biila ki tīī Raseel ú nīn bí u-cee ki tūǹ ditundi ki tìì-u. 30Ní Jaakɔb nì Raseel mun kpáfì. Jaakɔb nìn néeń Raseel ki jítiǹ Leeya, ní ki nìn gíti kāl̀ abin aluli ki túń ditundi ki tīī Laaban.

Jaakɔb biyaamu bɔti

31Ti-Dindaan nín ká yii Jaakɔb kaa néeń Leeyayee, ní u pú-u mmaal, ní Raseel úǹ sá uŋmaŋŋmanti. 32Leeya nìn dūu cáá dipool ki màl̄ kibininjabiki, ní ki pú-kì diyindi yii Rubeen. Di sá yii un nìn lī yii: «Ti-Dindaan ká m-falaau, kɔŋkɔnnee m-cal làá nīn kíǹ ki néeń-mi.»

33Ní u gíti cáá dipool ki màl̄ kibininjabiki, ní ki bí yii: «Ti-Dindaan nín ká yii m-cal kaa néeń-mee ní u gíti pú-mi kibininjabiki kiba.» Ní u pú-kì diyindi yii Simeeyɔn, taapu di sá yii: <Ti-Dindaan gbìl̄.>

34Ní u fātìi tí cáá dipool ki màl̄ kibininjabiki, ní ki bí yii: «Kɔŋkɔnnee m-cal làá dū u-ba kí nákáǹ-mi, kun puee m màl̄-u bininjab bita.» An pu ní u pú-kì diyindi yii Leefii, taapu di sá yii: <M-cal làá dāá dū u-ba kí nákáǹ-mi.>

35Ní u fātìi tí cáá dipool ki màl̄ kibininjabiki, ní ki bí yii: «Kɔŋkɔnnee m làá nyɔ̄ŋkì ti-Dindaan ní.» An pu ní u pú-kì diyindi yii Juuda, taapu di sá yii: <M làá nyɔ̄ŋkì m-Dindaan.>

Niinee ní u gbēeǹ mmaal.

Currently Selected:

Genèse 29: BASSARDC

Highlight

Copy