Genèse 38

Juuda nì u-coopu Taamaar bɔti

1Ŋyunti gbantee, Juuda yíkì u-nabiyaamu cee ki búntì Adulaam tiŋkin kijapaai kiba cee, bi yíì-u yii Yiira. 2Niin ní Juuda ká ukanaanja Suuwa bisal ki cáá ní u nì u kpáfì. 3Unimpuee cáá dipool ki màl̄ kibininjabiki, ní Juuda pú-kì diyindi yii Eer. 4Ní u gíti cáá dipool ki màl̄ kibininjabiki ní ki pú-kì diyindi yii Oonan. 5Ní u fātìi tí cáá dipool ki màl̄ kibininjabiki ní ki pú-kì diyindi yii Seera. Juuda nìn bí Keesiib tiŋkin ní u-nimpuu màl̄ kibiki gbanti.

6Juuda jipɔŋkpiliu Eer wíiǹee ní u cáá unimpu ki tīī-u. Bi yíì unimpuee yii Taamaar#38.6 Taamaar : kpèè Maat 1.3.. 7Juuda jipɔŋkpiliu Eer nìn sá unikpiti ti-Dindaan nimbiin, an puee ní ti-Dindaan yāntì u kpíì. 8Ní Juuda bí Oonan yii: «Fōō a-maan nimpuu ukpiipu kii mara nín pée sá puee, kí màal̀ kí téeǹ u-yil u-dicaŋku ń taa kúntí#38.8 Kpèè Ditee 25.5-6..» 9Ama Oonan nín nyí yii u-maan nimpuu biyaamu mun u làá màal̀ee kaa dāa sá u-biyaamuee, ní ŋyunti ŋun u yaa bíi dɔ̀ nì unimpuee ní u nyāntí ki féeń kitiŋ kaa là kí màal̀ kí téeǹ u-maan yil. 10An bɔtee kaa nìn mɔ́ɔkiǹ ti-Dindaan, ní u yāntì u mun kpíì. 11Ní Juuda bí u-coopu Taamaar yii: «Cù a-baabi cee kí nīn kā dikpiipool ki cí ŋyunti ŋun m-jipɔɔn Seera mun làá dāá wíiǹee.» Di sá u nìn lī u-neen yii: «Seera mun ń taa kpú kii u-mambee.» Ní Taamaar nín kùǹ u-baabi.

12An dāa bàn̄ ŋyunti ŋubɔee ní Juuda nimpuu Suuwa bisal kpíì. Juuda kāl̀ dikpool jítèe ní u nì u-bɔɔ Yiira uadulaanja búntì Tiimina tiŋkin, bin bíi cēē u-piii kutee cee. 13Ní bi tùkū Taamaar yii: «A-cooja cá Tiimina kí cā u-piii kuti.» 14Niinee ní u pēetì dikpiipool wanti tin u pēēyee ní ki dū ŋŋaabu ki bīiǹ u-nimbiin ki kpáaǹ u-wunti, ní ki cūtìi kāl̀ Eeniyayiim tiŋki sampuyakatii, laakin bi dì ki cá Tiimina tiŋkinee. Di sá u dáań ki ká yii Seera wíiǹ ní baa dɔ́miń ki yōoǹ-u ki tīī-u.

15Juuda ká Taamaar kā nsampuyakatee ní u dākafì yii an sá kinimpulaakpaai, kun puee u nìn bīī tiwan u-nimbiin. 16U ká-u nsanni niinee ní ki sútì ki pìl̄-u ní ki bí-u yii: «M làá dòon̄ nì si!» Waa nìn béè yii an sá u-coopu. Ní unimpuee bālifì-u yii: «Ba ní a làá tīī-mi ní kí nín dòon̄ nì mi?» 17Ní Juuda kíí-u yii: «M làá lēeń m-ŋɔcaŋkpuŋku poon diŋɔbil diba kí tīiń-si.» Ní unimpuee bí-u yii: «See á tīī-mi tiba ḿ yóoń m-cee toolima. A yaa láa tīiń-mi diŋɔbilee, á fōō a-wanti.» 18Ní Juuda bālifì-u yii: «Ba ní a là ḿ tīī-si á yóoń a-cee toolima?» Ní unimpuee bí-u yii: «Tīī-mi a-jaliiki kin a cáa nyìitēe nì ki-ŋmiiŋu nì ŋkpandɔ ŋun a ŋúb́ee». Ní Juuda tīī-u an wanti gbanti kɔkɔ ní ki dōoǹ nì u ní dipool kɔ́. 19Ní unimpuee fātìi nín kùǹ u-dumpu ní ki lēē ŋŋaabu ŋun u nìn dūu bīiǹee ní ki gíiǹ dikpiipool wanti ki pēeǹ.

20Ní Juuda dū diŋɔbil ki tú u-bɔɔ uadulaanja ú cáá tīī unimpuee kí fōoń u-wanti tin u dūu yóoǹ u-cee toolimee. U-bɔɔ bàn̄ee ní kaa ká unimpuee. 21Ní u bālifì binib bin bí niinee yii: «Kinimpulaakpaai kin kàal̀ Eeniyayiim tiŋkin doo, nsan caŋinee bí la?» Ní bi kíí-u yii: «Kinimpulaakpaai kiba pée kpá doo.» 22Ní Juuda bɔɔ gítì ki tùkū-u yii: «Maa ká-u, ní niin yab mun bí-mi yii: <Kinimpulaakpaai kiba pée kpá doo.>» 23Ní Juuda bí u-bɔɔ yii: «Yàntī ú nīn cáa cá. Tí taa dī tiwan gbanti boon icoo ń dāá cúú-ti. Kéè man tīī-si diŋɔbil á cáá tīī-u ní a cūnnì kaa ká-ueeee!»

24Iŋmal ita boonee ní bi dɔ́miń ki tùkū Juuda yii: «A-coopu Taamaar ŋá tilaakpaal ki cáá dipool.» Ní Juuda bí yii: «Bí nyāntí-u kí cáá-u kí wà ŋŋmi.»

25Ŋyunti ŋun bi nyántì-u ki cáǹ kí wà ŋŋmee ní u tú bí tùkù u-cooja yii: «Tiwan tin m ŋúb́ nee, uninja un tīī-mi dipoolee di yì tiwan gbanti. M gbāam̀-si, kpèè kijalii kin bi cáa nyìitī tiwanee nì ki-ŋmiiŋu nì ŋkpandɔ nee, a nyí un yì tiwan gbanteeee?» 26Juuda béè tiwanee ní ki bí yii: «U cáá ibaamɔn ki jítiǹ man. An bàà sá ḿ dū-u kí tīī m-jipɔɔn Seera, ní maa ŋá míǹ». Ní Juuda kaa ti pée gbēē-u.

27Daliŋkin u làá màal̀ee ní bi béè yii jaasib pool ní u cáá. 28Ŋyunti ŋun u bíi màal̀ee ní jaasibee kansikin ubɔ nyántìń u-ŋal, ní umatimmaanli dū gulfaman ki kúĺ, ní ki bí yii: «Un bí nee di péé ki nyáń.» 29Ní kibikee fātìi gíiǹ ki-ŋal ki kɔ́ǹ, ní ki-nabiki nyánní, ní umatimmaanli bí yii: «A ŋá mpɔn ki tùl̄ ki nyánnáa!» Ní bi pú-kì diyindi yii Peereesi, taapu di sá yii: <U tùl̄ ki nyáń.> 30Boonee ní u-nabiki kin ŋal bi bàà dū gulfaman ki kúĺee mun nyánní. Ní bi pú-kì diyindi yii Seera, taapu di sá yii: <Un jìl̀ee.>

Currently Selected:

Genèse 38: BASSARDC

Highlight

Copy