Lukà 1
1
Ènu kè ŋuti wo ŋlɔ̀ xoma kèa ɖoa
1Ekè àmè fuu sɔ ɛ̀ ɖo èdɔ be yèwoa ŋlɔ̀ ènu kèwo jɔ̀ lè mia dòmèa, 2sìgbè àlekè àmè kèwo kpɔ woa tèpe so gɔ̃mèjèje a, sɔ wo do àsi na mia nènea, 3e sɔ̀gbè lè nyè cã àpe ŋùmè, ekè mù ŋɔjè ènu kèawo keŋu mè ɖɔɖɔ so ejitɔtɔa, be ma ŋlɔ̀ wo ɖoɖa wò, ɖèka ɖèkaa, àmègã Teofilò, 4ne wòa nya ènu kèwo wo fiɔ wòa be àdodoe nyinyi.
Wo do Yòhanɛ̀s Mawusilènamètɔa be jìji be àŋɛ̀
5Wàlɛbɛ kè Herod lè ɖùfìɔ lè Yudeà a, mawunɔ ɖe lè funu ekè wo yɔna be Zakarìa. Eye e lè mawunɔ Abìa be èha mè. Èsrɔ̃a tɔ̀ Elizabɛt, eye be so * mawunɔ gã Arɔ̀n be jìjimè mè. 6Wo àmè èvèawo kpata nyi àmè jɔ̀jɔɛ lè Mawu be ŋùmè eye wo wɔ̀nà ɖo yebe èsewo ku yebe ɖoɖowo ji, eye àmè ɖe mu kpɔ ènu ɖe gblɔ̃nà so woa ŋuti ò. 7Vɔ̀a, wo mu jì èvi ò, ɖo Elizabɛt nyi èkònɔ̀. Wo àmè èvèawo cã sĩ vɔ̀.
8Gbè ɖèkaa, kè Zakarìa lè wɔ̀ mawunɔ be èdɔ lè Mawu be ŋùmè, wàlɛbɛ kè èdɔa jè 9èha kè mè be lèa jia, wo dà àkɔ̀ sɔ zɔ̃ ɖo mawunɔwo be èkɔ̀nua ji, eye be jè Zakarìa ji ne bèa tɔ èzò lifiawo lè Tɔhonɔ̀ be kɔ̀kɔ̀ɛpea mè. 10Àmèha a kpata bɔ̀ lè xixenu lè fãkue wàlɛbɛ kè Zakarìa lè tɔ èzò lifia. 11Eye Tɔhonɔ̀ Mawu be àtikplɔtɔ ɖe to ɖo Zakarìa ji, tɔtè ɖo vɔsakpe kè ji wo tɔna èzò lifiawo lèa be ɖùsimè. 12Ekè Zakarìa kpɔ ɛ̀a, yebe àyè gbãdo eye vɔ̃vɔ̃ ɖo è. 13Vɔ̀a Mawu be àtikplɔtɔa gblɔ̃ na ɛ̀ be: “Mù gbà vɔ̃ ò, Zakarìa, Mawu ɖo èto àpo kuefã; èsrɔ̃ wò, Elizabɛt la jì ŋusùvi ɖèka na wò, eye wò la ɖo nyikɔ na ɛ̀ be Yòhanɛ̀s. 14E la vivi na wò eye wò la jɔ̀jì. Àmè sùgbɔ la kpɔ jìjɔɛ ɖo yebe jìji ŋuti. 15Đo e la nyi àmè gãa ɖèka le Tɔhonɔ̀ be ŋùmè. Mu la nù vɛ̃, àlo àhà sɛ̃sɛ̃ ɖe ò. So ènɔa be àdɔ̀mè kea, e la ɖɔ ku Gbɔ̃gbɔ̃ Kɔ̀kɔ̀ɛ. 16E la na Izràɛlvi sùgbɔ la trɔva Tɔhonɔ̀, woabe Mawu gbɔ. 17E la zɔ̃ lè ŋùkɔ̀ na Mawu, lè Èli be gbɔ̃gbɔ̃ be ŋusɛ̃ mè, ne bèa trɔ ètɔwo be èjì va èviwo gbɔ, ku ètotrìtɔwo va àmè jɔ̀jɔɛwo be ènunya mè, ne bèa jrà dùkɔ̃ kèwo lè àlɔ̀ jia ɖo ɖɛ na Tɔhonɔ̀.” 18Vɔ̀a, Zakarìa biɔ àtikplɔtɔa be: “Nukɛ ye la ɖè è fiɔ mù be ènu kèa la jɔ̀ ò? Đo mù ku àmègã vɔ̀, eye èsrɔ̃ nyè cã ku nyagã vɔ̀.” 19Tɔhonɔ̀ be àtikplɔtɔa ɖo e ŋuti na ɛ̀ be: “Ènyè ye nyi Gabrìɛl, àmè kè nɔ̀nà ètè lè Mawu be ŋùkɔ̀a; e ye dɔ̃ mù ɖoɖa, ne ma pò nupo na wò, ne ma gblɔ̃ jìjɔɛ be ènyà kèa na wò. 20Ènyà kèwo mù to na wòa, la va jɔ̀ lè woabe hùenu. Vɔ̀a, kè wò mu xɔ̀ ènyà nyèa ji sè òa, wò la trɔ zũ àmumui, la nɔ̀ ènu mà pò kaka sɔna gbè kè gbè ènu kèawo la jɔ̀ a.”
21Wàlɛbɛ kè ènu ŋuawo lè jɔ̀ a, àmèha a le nɔ̀tè kpɔ Zakarìa, eye àlekè be nɔ̀ kɔ̀kɔ̀ɛpea mè dìdì ɖe a kpaca wo. 22Kè be va toa, mu gbà teŋu pò nupo na wo ò. Àlɔ̀ kpò be le wɔ̀ na wo, eye wo ŋɔjè e mè be àvìmènu ɖe ye be kpɔ lè mawuxɔa mè.
23E yomè a, kè àzã nenè kè bè sɔ wɔ̀ èdɔ lè kɔ̀kɔ̀ɛpea mèa va yì vɔ̀a, e jo yì àxomè. 24Ekèa yomè a, èsrɔ̃a Elizabɛt fɔ èfu, eye e wla yeɖokoe wètri àtɔ̃. E gblɔ̃ be: 25“Tɔhonɔ̀ be ènuwɔ̀wɔ ye nyi ekèa: e ɖè ŋùkuvi kpɔ mù, ɖè ŋùkpɛ̃ na mù lè àgbètɔwo dòmè.”
Wo do Yesù be jìji be àŋɛ̀
26Lè wètri àdɛ̃gɔ̃ a mèa, Mawu dɔ̃ àtikplɔtɔ Gabrìɛl ɖoɖa Galilea be èdù ɖe kè wo yɔna be Nazarɛta mè, 27ɖoɖa tùgbɛ̀jɛ ɖe, ekè wo sɔ àgɔ̀ na ŋusù kè be nyikɔ nyi Yozɛ̀f-a gbɔ. Ŋusù kèa so David be àxomè; eye wo yɔna tùgbɛ̀jɛa be Maria. 28Eye àtikplɔtɔa ze ɖo e ji, gblɔ̃ be: “Kpɔ jìjɔɛ, èwò kè kpɔ màje lè Mawu gbɔa! Tɔhonɔ̀ lè ku wò!” 29Kè Maria sè ènyà kèawoa, yebe àyè gbãdo, eye be biɔ ye ɖokoe sè be ègbèdodo kèa gɔ̃mè ɖe. 30Vɔ̀a, àtikplɔtɔa gblɔ̃ na ɛ̀ be: “Maria, mù gbà vɔ̃ ò, wò kpɔ màje lè Mawu gbɔ. 31Eye wò la fɔ èfu, wò la jì ŋusùvi ɖèka eye wò la ɖo nyikɔ na ɛ̀ be Yesù. 32E la nyi àmègã, eye wo la yɔ ɛ̀ be Mawu èji hũitɔa be èvi. Tɔhonɔ̀ Mawu la sɔ ɛ̀ ɖo tɔgbea David be èfìɔzìkpe ji. 33E la ɖùfìɔ lè Yakɔb be àxuea nu kaka yì; yebe èfìɔɖùɖua mu la vɔ̀ gbèɖe ò.” 34Eye Maria gblɔ̃ na ɛ̀ be: “Àleke ekèa la teŋu jɔ̀, ekè nyè mu nya ŋusù òa?” 35Mawu be àtikplɔtɔa ɖo e ŋuti na ɛ̀ be: “Gbɔ̃gbɔ̃ Kɔ̀kɔ̀ɛ la va ji wò, eye Mawu kè lè èji hũia be ŋusɛ̃ la cɔ̃ ji wò ku yebe vɔ̃vɔ̃lì, ye ŋutia, èvi kè wò la jìa, la nyi àmè kɔ̀kɔ̀ɛ, eye wo la yɔ ɛ̀ be Mawu be èvi. 36Eye kpɔɖa, àpo xòmètɔ Elizabɛt, àmè kè wo yɔna be èkònɔ̀a cã fɔ èfu, eye e la jì ŋusùvi lè yebe nyagãkuku mè; ekèa ye le nyi yebe wètri àdɛ̃gɔ̃ a; 37ɖo ènu ɖe mu glo Mawu ò.” 38Eye Maria gblɔ̃ be: “Tɔhonɔ̀ be sumɔ̃vi-nyɔ̃nù ye mù nyi. Ènu kè wò gblɔ̃a ne va e mè na mù.” E yomè a, Tɔhonɔ̀ be àtikplɔtɔa jo lè e gbɔ.
Maria yì ji Elizabɛt kpɔ
39Lè àzã ŋuawo jia, Maria so jè èmɔ, ɖèbla yì èto-nyigbã be èdù ɖe kè lè Yudeà a mè. 40E ɖo Zakarìa be àxomè, do egbè na Elizabɛt. 41Kè Elizabɛt sè Maria be ègbèdodoa, èvi kè lè yebe àdɔ̀mè a hùã, eye Gbɔ̃gbɔ̃ Kɔ̀kɔ̀ɛ ɖɔ Elizabɛt. 42E kɔ ègbè yì jì gblɔ̃ na Maria be: “Tɔhonɔ̀ tu sì na wò wu nyɔ̃nùwo kpata, eye be tu sì na èvi kè lè àdɔ̀mè na wòa cã. 43Fikɛ ye ekèa so na mù be Tɔhonɔ̀ nyè ŋutɔ be ènɔ̀ va ji mù kpɔ ò? 44Đo kpɔɖa, ekè àpo ègbèdodoa ɖì ɖo àpe èto mè kpòa, ɖèvia hùã lè àdɔ̀mè na mù ku jìjɔɛ. 45Sìtu ɖèɖe ye be nyi na àmè kè xɔ̀sèa, ɖo ènu kè wo gblɔ̃ na ɛ̀ so Tɔhonɔ̀ gbɔa, la ɖì.”
Maria be kafu-hà
46Eye Maria gblɔ̃ be:
“Àmèti blibo nyè na gogo Tɔhonɔ̀.
47Eye mù jɔ̀jì ɖo Mawu hlùɛ̃tɔ nyèa ŋuti,
48ɖo e ɖè ŋùkuvi kpɔ ènyè, yebe sumɔ̃vi-nyɔ̃nù kè mu nyi ènu ɖe òa.
Sɔ so egbèa, jìjimèwo keŋu la nɔ̀ yɔ mù be sìtume.
49Đo ènu gã kèwo Ŋusɛ̃kpatatɔa wɔ̀ na mùa ŋuti,
àɖèsã ye be nyi.
50Yebe àdɔ̀mènyuɛ̃ nɔ̀nà àmè kèwo vɔ̃na ɛ̀a ji so jìjimè yì jìjimè.
51E zã hɔ̃hlɔ̃ kè lè e sia sɔ wɔ̀ ŋusɛ̃dɔwo.
E gbã gòyitɔwo do,
52e ɖiɖi èfìɔwo lè woabe èfìɔzìkpewo ji, kɔ àmè bɔ̀bɔɛwo yì èji.
53E na ènu sùgbɔ àmè kèwo àdɔ̀ wùawo. E nyà àdɔ̀kùnɔ̀wo
ɖoɖa, àsi gba àlɔ̀ gba.
54Ekè e ɖoŋù yebe
àdɔ̀mènyuɛ̃a, e do àlɔ̀ Izràɛl yebe sumɔ̃via
55sìgbè àlekè e gblɔ̃ na mia tɔwo be, yè la ku ŋuzĩzĩ na
Abràham ku yebe jìjimèviwo kaka sɔ yìa nène.”
56Maria nɔ̀ Elizabɛt gbɔ sì wètri ètɔ̃ nène keŋu gbɔ̀xue trɔyì àxue.
Yòhanɛ̀s Mawusilènamètɔa be jìji
57Fifìa, Elizabɛt be àzã sù ne bèa jì èvi, eye e jì ŋusùvi ɖèka. 58Yebe àxuekɔ̀tɔwo ku yebe xòmètɔwo sè be Tɔhonɔ̀ wɔ̀ àdɔ̀mènyuɛ̃ na ɛ̀, eye wo va jɔ̀jì ku ì. 59Lè ŋùkèkè ènyigɔ̃a gbèa, wo va la sò èvo na ɖèvia, eye wo ji la ɖo nyikɔ na ɛ̀, be Zakarìa sìgbè ètɔa nène. 60Vɔ̀a, ɖèvia be ènɔ̀ gblɔ̃ be: “Yòhanɛ̀s ye wo la yɔ ɛ̀.” 61Wo ɖo e ŋuti na ɛ̀ be: “Àmè ɖe mu tɔ̀ nène lè kɔ̀taa mè kpɔ ò!” 62Eye, wo wɔ̀ àlɔ̀ na ètɔa, biɔ ɛ̀ sè be leke be ji be woa yɔ ɖèvia ò. 63Đèvi a be ètɔ biɔ ènuŋlɔ̀kpe, eye e ŋlɔ̀ ɖo e ji be: “Yebe nyikɔ ye nyi Yòhanɛ̀s.” Eye e wɔ̀ ŋùdã na àmèwo kpata. 64Troloa, Zakarìa be àɖe tukà, eye be gbà tɔ ènupo pòpo, le kafu Mawu. 65Vɔ̃vɔ̃ ɖo woabe àxuekɔ̀tɔwo kpata. Àmè sia àmè lè gblɔ̃ ènu kèwo jɔ̀ ŋuawo be ènyà lè èdù kèwo lè Yudeà be ètowo jiawo mè. 66Vɔ̀a, àmè kèwo keŋu sè a, bùnà ètamè so e ŋuti, gblɔ̃nà lè woa ɖokoewo mè be: “Ènu kɛ ye ɖèvi kèa la va nyi ò?” Ɖo Tɔhonɔ̀ be ŋusɛ̃ lè ku ì.
Zakarìa ji èhà kafu Mawu
67Zakarìa, ètɔa ɖɔ ku Gbɔ̃gbɔ̃ Kɔ̀kɔ̀ɛ, eye be gblɔ̃ ènyà kèawo ɖɛ be:
68“Mi kafu Tɔhonɔ̀, Izràɛl be Mawu a,
ɖo e va ji yebe dùkɔ̃a kpɔ, eye be hlùɛ̃ ɛ̀ gã.
69E na hlùɛ̃tɔ ŋusɛ̃tɔ ɖe jɔ̀ lè yebe sumɔ̃vi, èfìɔ
David be xòmè mè na mi.
70Ènu kè bè gblɔ̃ ɖɛ xoxo to yebe gblɔ̃ɖɛtɔ kɔ̀kɔ̀ɛwo jia yeŋu.
71E fìã àjɔ̀gbè na mi be yè la hlùɛ̃ mi gã jo lè miabe
kɛ̃tɔwo ku àmè kèwo kpata crìnà miawo si,
72be yè la ɖè yèbe àdɔ̀mè nyuɛ̃ fiɔ mia tɔgbewo, la ɖoŋù
yèbe *zòɖùɖu kɔ̀kɔ̀ɛa ji.
73E kã àtãŋu na mia tɔgbe Abràham be
74yè la hlùɛ̃ mi lè miabe
kɛ̃tɔwo si, eye mi la teŋu sumɔ yè fàa,
75ne mia nyi àɖèsãwo, àmè jɔ̀jɔɛwo lè ye ŋutɔ be ŋùmè,
lè miabe àgbè ŋùkèkèwo keŋu mè.
76Eye èwò, èvi, wo la yɔ wò be Mawu èji hũitɔa be gblɔ̃ɖɛtɔ,
ɖo wò la jè ŋùkɔ̀ na Tɔhonɔ̀, la jrà yebe èmɔwo ɖo,
77la sɔ ɖè fiɔ yebe dùkɔ̃a be,
Tɔhonɔ̀ la sɔ woabe vuɛ̃wo kè wo, la hlùɛ̃ wo gã.
78Ekèa nyi miabe Mawu be àmènuveve be: ɖo e ŋuti ye
kɔ̀kɔ̀ɛa ɖì so èji va ji mi kpɔ ɖo.
79Ne bèa na kɔ̀kɔ̀ɛ àmè kèwo lè èku be vìvìti be vɔ̃vɔ̃lì mèawo,
ne bèa jɔ̀ miabe àfɔ̀wo lè fàfa be èmɔa ji.”
80Đèvi a le sĩ eye yebe gbɔ̃gbɔ̃ cã le kpɔ ŋusɛ̃. E va ci zògbè ji kaka va na gà kè mè e va ɖè ye ɖokoe fiɔ Izràɛl be dùkɔ̃a.
Currently Selected:
Lukà 1: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
