Lukà 10
10
Yesù dɔ̃ àmè èkà takpo ci woèvè
1Lè ènu kèawo yomè a, Tɔhonɔ̀ ɖè àmè èkà takpo ciwoèvè#10.1 Mawunya xoma xoxo bu ɖewo cã gblɔ̃ be: àmè èkà takpo ci èwo. buwo, eye e dɔ̃ wo èvè èvè, jèŋùkɔ̀ na ye ɖokoe, ɖoɖa èdù ku kɔpe kèwo kpata mè ye ŋutɔ la va toawo. 2E gblɔ̃ na wo be: “Ènuku yàyaa sùgbɔ, vɔ̀ èdɔwɔ̀tɔwo mu sùgbɔ ò. Ye ŋutia, mì ɖè kuku na Àpetɔa ne bèa ɖo ènukuyàtɔwo ɖoɖa yebe àgblèa mè. 3Mì yì! Mù le dɔ̃ mì sìgbè àlɛ̃viwo nène ɖoɖa gbètewo dòmè. 4Mì mu gbà hɛ̃ ègàkòtòkũ loo, àlo àkpɛtɛ, àlo àfɔ̀kpa ò, eye mì mu gbà do ègbè na àmè ɖekpe lè èmɔ ji ò. 5Ne mì ɖo àxue ɖe mèa, mì gblɔ̃ cucugbãa be: 'Fàfa ne nɔ̀ àxue kèa ji.' 6Ne fàfame ɖe lè àxuea mèa, mìabe fàfa la nɔ̀ e ji. Vɔ̀ ne ɖekpe mu lè òa, mìabe fàfa la gbìgbɔ̀ va na mì. 7Mì nɔ̀ àxue ŋua kpò mè. Mì ɖù ènu kè wo la na mìa, eye mì nù ènu kè wo la na mìa. Đo èdɔwɔ̀tɔ jè na yebe fɛ̃tu. Mì mu gbà jo lè àxue ɖe mè yì àxue bu mè ò. 8Èdù ɖekpekpe èdù kè mè mì la yì eye wo la xɔ̀ mìa, mì ɖù ènu kè wo la na mìa, 9eye mì dà èdɔ̀ na èdɔ̀nɔ̀ kèwo lè èdùamèawo. Mì do àŋɛ̀ na wo be: 'Mawu be èfìɔɖùɖua lili mì.' 10Vɔ̀a, ne mì yì èdù ɖe mè, eye èdùa mè tɔwo mu xɔ̀ mì òa, mì to jè èdùa be àgbonu, ne mìa gblɔ̃ na wo be: 11'Mi hũhũ mìabe èdùa be èkɔ kè tɛ ɖo àfɔ̀ ŋuti na mia cã a, ɖɛ na mì: gãkea, mìa nya ɛ̀ be Mawu be èfìɔɖùɖua va ɖo.' 12Mù le to na mì be e la kã ɖo e mè na Sodɔ̀m lè kòjoɖoɖo èzã gbè wu àlekè be la nyi na èdù kèa.
Èdù kèwo mètɔwo mu xɔ̀sè òawo
(Màt 11.20-24)
13“Bàbà na mì, Korazìn tɔwo! Bàbà na mì, Bɛtsaida tɔwo! Đo ne Tirò ku Sidɔ̀n be èdùwo mè ye mù wɔ̀ ŋùdãnu kèwo jɔ̀ lè mìa dòmè lèa, wo kè tà kòtòku, la sì àfi, xoxo vɔ̀, la sɔ fiɔ be yèwo ɖɔ̀lì èdɛ̃. 14Vɔ̀a e la kã ɖo e mè na Tirò ku Sidɔ̀n be èdùwo lè Mawu be kòjoɖoɖoa mè wu lekè be la nɔ̀ na mìa. 15Fifìa mìa, Kapɛrnaum tɔwo, mì bùnà be wo la kɔ mì yì jiŋùkusi ye à? Kaka èkuwode ke, wo la ɖiɖi mì ɖo!” 16Yesù gblɔ̃ na yebe nukplaviwo be: “Àmè kè ɖo èto mìa, ènyè ye be ɖo èto, eye àmè kè gbe mìa, ènyè ye be gbe. Vɔ̀ àmè kè gbe mùa, àmè kè dɔ̃ mù ɖoɖaa ye be gbe.”
Àmè èkà takpo ci woèvèawo trɔ gbɔ̀
17Àmè èkà takpo ci woèvèawo trɔ gbɔ̀ va kudo jìjɔɛ gã ɖe, eye wo gblɔ̃ be: “Tɔhonɔ̀, gbɔ̃gbɔ̃ vuɛ̃wo ŋutɔ cã jo ètaa, kè mi yɔ nyikɔ wòa.” 18Yesù ɖo e ŋuti na wo be: “Mù kpɔ Satana sìgbè èjikèzò nène, be gɛ̃ so jiŋùkusi. 19Vɔ̀ mù na mì ŋusɛ̃ ne mìa ɖo àfɔ̀ èdã ku àkekle kudo kɛ̃tɔa be ŋusɛ̃ ɖe sia ɖe ji, eye ènuveve ɖekpe mu la wɔ̀ mì ò. 20Gãkea mì mu gbà kpɔ jìjɔɛ be gbɔ̃gbɔ̃ vuɛ̃wo jo èta na mì ò. Vɔ̀ bòhũa, mì kpɔ jìjɔɛ be wo ŋlɔ̀ mìabe nyikɔwo ɖo jiŋùkusi.”
Yesù kpɔ jìjɔɛ
(Màt 11.25-27; 13.16-17)
21Lè gàpòpo ŋua mèa, Gbɔ̃gbɔ̃ Kɔ̀kɔ̀ɛ na Yesù kpɔ jìjɔɛ ŋutɔ, eye e gblɔ̃ be: “Àta, jiŋùkusi ku ànyigbã be Tɔhonɔ̀, mù do àkpe na wò be wò ɖè ènu kèwo wò wla do ènunyatɔwo kudo àmè ŋɔjè ènu mè woa fiɔ ɖèvi viwo. Ɛ̃ɛ, Àta, ɖo nènea ye e jè ŋùmè na wòa yeŋu.”
22“Ètɔ nyè sɔ ènuwo keŋu do àsi na mù. Àmè ɖekpe mu jèsi àmè kè nyi èvia, ne mu nyi Àta ɖèka kpò ò, eye àmè ɖekpe mu jèsi àmè kè nyi Àta, ne mu nyi èvia kudo àmè kè èvia jro be yèa ɖè è fiɔa kpò ò.”
23Fifìa, Yesù trɔ ɖoɖa yebe nukplaviwo gbɔ, gblɔ̃ na woawo ɖèɖe be: “Sìtu ɖèɖe ye be nyi na mì be mì kpɔ ènu kèawo tèpe. 24Mù le to na mì be Mawu be gblɔ̃ɖɛtɔwo kudo èfìɔ fuu jro be yèwoa kpɔ ènu kè mì le kpɔa, gãke wo mu kpɔ ɛ̀ ò. Wo jro be yèwoa sè ènu kè mì le sè a, gãke wo mu sè è ò.”
Èlododo so Sàmarìatɔ nyuɛ̃a ŋuti
25Èsefiɔtɔ ɖe sitè, jro be yèa le Yesù lè ènyà gbɔ̃gblɔ̃ mè. E biɔ Yesù be: “Ènufiɔtɔ, nukɛ mù la wɔ̀ ne àgbè màvɔa bèa sù àsi nyè ò?” 26Yesù ɖo e ŋuti be: “Nukɛ èsea gblɔ̃, eye àleke wò sè e gɔ̃mè ɖo ò?” 27Ŋusùa ɖo e ŋuti be: “'Wò la lɔ̃ Tɔhonɔ̀ Mawu wò ku àpo èjì keŋu, kudo àpo èkla keŋu, kudo àpo ŋusɛ̃ keŋu, gbàkudo àpo susu keŋu', eye: 'Wò la lɔ̃ èha wòvi, sìgbè lekè wò lɔ̃ wò ŋutɔ ɖokoe wòa nène.'” 28Yesù gblɔ̃ na ɛ̀ be: “Wò ɖo e ŋuti tututu. Wɔ̀ ènu kèawo, eŋuã wò la nɔ̀ àgbè.” 29Vɔ̀, kè èsefiɔtɔa jro be yèa fiɔ be, yèbe ènyà biɔ sè a sɔ̀gbèa, e biɔ Yesù be: “Àmè kɛ ye nyi èhavi nyè ò?” 30Yesù gblɔ̃ na ɛ̀ be: “Gbè ɖèkaa, ŋusù ɖe ɖì so Yèruzàlɛm le yì Yerikò, eye e jè fĩãfìtɔwo si mè. Wo ɖè yebe àwùwo lè e ŋuti, pò è, be ku fã-ku-fã eye wo jo, gble è ɖɛ. 31E va jɔ̀ be mawunɔ ɖe ɖì àbù to èmɔ ŋua ke ji va le yì. Ekè e kpɔ ŋusùa, e zɛ̃ to àkpa bu jo. 32Nène a ke àmè kèwo kpena ɖo mawunɔwo ŋutiawo dòmètɔ ɖe cã va to funua. Ekè e kpɔ ŋusùa, ye cã zɛ̃ to àkpa bu va yì. 33Vɔ̀ Sàmarìatɔ ɖe, kè le zɔ̃ èmɔa, va kè ɖo àmèa ŋuti lè èmɔa ji. Ekè e kpɔ ɛ̀a, yebe ènu wɔ̀ ŋuzĩzĩ na ɛ̀. 34E tètè gogo è, kɔ̀ àmì kudo vɛ̃ ɖo yebe àbìawo mè, bla wo na ɛ̀. E yomè a, e kɔ àmèa ɖo ye ŋutɔ be èlã kè be lè do a ji, yì àmèjro zɛ̃pe ɖe, eye e kpɔ ɛ̀ ji. 35Ekè èŋù kèa, Samarìatɔa sɔ klòsalò-ga èvè na àmèjrozɛ̃pea ji kpɔtɔa, gblɔ̃ na ɛ̀ be: 'Kpɔ àmèa ji, eye ne wò zã wu ekèa, mù la tu ì na wò ne mù trɔ gbɔ̀a.'”
36Yesù wu e nu, biɔ èsefiɔtɔa be: “Àmè kɛ ye lè àmè ètɔ̃ kèawo dòmè kè wò susu be e nyi àmè kè jè fĩãfìtɔwo si mèa be èhavi ò?” 37Èsefiɔtɔa gblɔ̃ be: “Àmè kè ku ŋuzĩzĩ na ɛ̀a ye.” Yesù gblɔ̃ na ɛ̀ be: “Wò cã, yì ne wòa wɔ̀ nènea ke.”
Yesù yì Martà ku Maria gbɔ
38Kè Yesù kudo yebe nukplaviwo le zɔ̃ èmɔ, gbè ɖèkaa, wo va ɖo kɔpe ɖe mè. Nyɔ̃nù ɖe kè wo yɔna be Martà-a, xɔ̀ wo ɖo àxomè. 39Nɔ̀vi nyɔ̃nù ɖe nɔ̀ Martà si kè tɔ̀ Maria. Nyɔ̃nù kèa nɔ̀ ànyi lè Tɔhonɔ̀a be àfɔ̀ nu, le sè yebe ènyàwo. 40Martà yaa ciji ɖo àmèjroawo xɔ̀xɔ ŋuti; ekèa ŋutia, e va gblɔ̃ na Yesù be: “Tɔhonɔ̀, kpɔ àlekè nɔ̀vi nyèa tàsi èdɔa ɖo nyè ɖèka ji nyè ɖa! To na ɛ̀ be ne va do mù àlɔ̀.” 41Vɔ̀a Tɔhonɔ̀ ɖo e ŋuti na ɛ̀ be: “Ào, Martà; wò ciji, le gbãta ɖo ènu sùgbɔ ŋuti; 42ènu ɖèka kpò ye hiã. Maria cã àkpa nyuɛ̃ kè àmè ɖekpe mu la xɔ̀ lè e si òa.”
Currently Selected:
Lukà 10: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
