Lukà 23

Wo kplɔ̀ Yesù yì Pilatò be ŋùkɔ̀

(Màt 27.1-2, 11-14; Mrk 15.1-5; Yòh 18.28-38)

1Eye ànyinɔ̀pea keŋu sitè, kplɔ̀ Yesù yì Pilatò be ŋùkɔ̀. 2Lè funua, wo le dohùɛ do è be: “Mi kpɔ àmè kèa le gble èto na miabe dùkɔ̃a. E gbe be wo mu gbà tu Romà-fìɔgã be ètaci ò. E gbà gblɔ̃nà be èyè ye nyi Mɛ̀sia, èfìɔa.” 3Pilatò biɔ Yesù be: “Èwò ye nyi Yudàviwo be èfìɔa?” Eye, Yesù ɖo e ŋuti na ɛ̀ be: “Èwò ye le gblɔ̃ ɛ̀.” 4Pilatò gblɔ̃ na * mawunɔ gãwo ku àmèha a be: “Nyè mu kpɔ be ŋusù kèa dà lè *èse ɖe ji ò.” 5Vɔ̀a, woawo ya tɛ ègbè ɖo e ji be: “Ènu kèwo be le fìɔ àmèwoa, le do èzĩ tɔ̀tɔ Yudeà nyigbãa kpata ji, so Galilea kaka va fikèa.”

Wo kplɔ̀ Yesù yì Herod be ŋùkɔ̀

6Kè Pilatò sè wo pò nupo so Galilea ŋutia, e biɔ be: “Galileatɔ ye àmè kèa nyia?” 7Kè be kpɔ be àgo kè ji Herod kpàcɛ̀ lèa ji ye Yesù soa, e ɖo è ɖoɖa Herod gbɔ, ɖo, e cã lè Yèruzàlɛm gà ŋua mè. 8Kè Herod kpɔ Yesùa, èjì jɔ̀ ɛ̀ ŋutɔ, ɖo e le ji la kpɔ ɛ̀ fifìa, e dìdì, ɖo ènu kèwo be sè so e ŋutiawo ŋuti. E le kpɔ èmɔ be Yesù la wɔ̀ ŋùdãdɔ ɖe ne yèa kpɔ. 9E biɔ ɛ̀ ènyà sùgbɔ, vɔ̀a, Yesù mu ɖo ènyà ɖekpe ŋuti na ɛ̀ ò. 10* Mawunɔ gãwo ku ènuŋlɔ̀tɔwo lè funu, le dohùɛ do è ku tùkaɖa. 11Herod kudo yebe gbãdãgbãwo ɖè àlɔmè lè Yesù ŋuti. Wo kò è, sɔ àwù biɖibiɖi ɖe do na ɛ̀, ɖo è ɖoɖa Pilatò. 12Gbè ŋua gbè ye Herod ku Pilatò zũ èxlɔ̃, ɖo wo nɔ̀ èkɛ̃ mè ku woa nɔ̀nɔwo sãa.

Wo gblehùɛ do Yesù

(Màt 27.15-26; Mrk 15.6-15; Yòh 18.39—19.16)

13Pilatò yɔ mawunɔ gãwo kudo èdùmèmègãwo gbàkudo dùkɔ̃a bɔ̀. 14E gblɔ̃ na wo be: “Mì kplɔ̀ ŋusù kèa va na mù be e le gble èto na dùkɔ̃a; vɔ̀a kè mù biɔ ɛ̀ ènyà lè mìa kpata mìa be ŋùmè a; nyè mu kpɔ àgɔ̀ ɖe lè e ŋuti, sɔ kù ɖo ènu kèwo ŋuti mì le dohùɛ do èa ɖo ò. 15Herod cã mu kpɔ àgɔ̀ kè be jè a ò. Ye ŋuti ye e gbìgbɔ̀ trɔ ɛ̀ ɖoɖa mi. Mì mu kpɔ fifì be ŋusù kèa mu wɔ̀ ènu ɖe kè jè na èku òa? 16Ye ŋutia, mù la na wo la pò è; eye, e yomè a, mù la tàsi ì.” [ 17Lè *Toŋutivayì be àzã ɖùɖu hùenua, Pilatò ɖènà gàmènɔ̀tɔ ɖèka to na wo.] 18Eye, àmèha a kpata tɔ àpa dodo le gblɔ̃ be: “Wù ŋusù kèa, ne wòa ɖègà Barabas na mi!” 19— Àmè kè wo le do-gà ɖo èzĩ tɔ̀tɔ kudo àmè wùwu ŋutia. — 20Pilatò gbà pò nupo na wo, le jro la tàsi Yesù. 21Vɔ̀a, wo do àpa gblɔ̃ be: “Ka ɛ̀ ɖo àtisòga ŋuti! Ka ɛ̀ ɖo àtisòga ŋuti!” 22Vɔ̀a, e gbà gblɔ̃ na wo, zè ètɔ̃gɔ̃a be: “Àgɔ̀ kɛ ye be jè ò? Nyè mu kpɔ be e wɔ̀ ènu ɖe kè jè na èkua ò. Ye ŋutia, ne mù pò è vɔ̀a, mù la tàsi ì.” 23Vɔ̀a, wo zĩ e ji kudo ègbè lelele, le biɔ be, wo ne ka ɛ̀ ɖo àtisòga ŋuti, eye woabe àpaa, le yì eji. 24Eye, e sò ènyàa ɖo woa tɔ̀ ji. 25E ɖègà àmè kè wo jro a na wo; àmè kè wo le ɖo ègà, ɖo e hɛ̃ èzĩ tɔ̀tɔ va èdùa mè, eye be gbà wù àmè ŋutia. Vɔ̀a, e sɔ Yesù do àsi na wo ne woa wɔ̀ ènu kè wo jro a kudo è.

Lè Kalvaria-mɔ ji

(Màt 27.32-44; Mrk 15.21-32; Yòh 19.17-27)

26Ekè wo kplɔ̀ Yesù le yìa, wo dogò Kirenè ŋusù ɖe. Wo yɔna ɛ̀ be Simɔ̀n. E so àgblè va le yì àxomè, eye wo dro àtisògaa na ɛ̀, be ne sɔ ɛ̀ jè Yesù yomè. 27Àmè sùgbɔ jè Yesù yomè; nyɔ̃nù ɖewo lè woa dòmè le fã àvi, le na àle. 28Yesù ɖèkɔ̀ kpɔ wo, gblɔ̃ na wo be: “Yèruzàlɛm nyɔ̃nùwo, mì mu gbà fã àvi ɖo èta nyè ò; mi fã àvi bòhũ ɖo mìa ɖokoewo, kudo mìabe èviwo ta. 29Đo, kpɔɖa ŋùkèkèwo gbãnà eye wo la gblɔ̃ be: 'Sìtu ɖèɖe ye e nyi na nyɔ̃nù èkònɔ̀wo ku nyɔ̃nù kèwo be àdɔ̀ mu jì kpɔ, kudo kèwo mu na ànɔ èvi kpɔ òa.' 30Wàlɛbɛ ŋua, àmèwo la tɔ gbɔ̃gblɔ̃ na ètowo be: 'Mì mù jè mia ji.' Wo la gblɔ̃ na èkpowo be: 'Mì cɔ̃ mia ji!' 31Đo ne wo le wɔ̀ ekèa kudo àti mumua, àleke e la va nyi na àti pupu ɖo ò?”

32Wo gbà kplɔ̀ ènubàɖàwɔ̀tɔ èvè ɖewo bɔ̀ ɖo Yesù ŋuti ne woa yì wù woawo cã. 33Kè wo va ɖo tèpe kè wo yɔna be: “Àmèta tèpea”, wo ka Yesù ɖo àtisòga ŋuti lè funu. Wo ka ènuvuɛ̃wɔ̀tɔ èvèawo cã. Wo ka àmè ɖèka ɖo yebe ɖùsi mè, èvègɔ̃a ɖo yebe èmìɔ̃ mè. 34Vɔ̀a, Yesù gblɔ̃ be: “Àta, sɔ kè wo, ɖo wo mu nya ènu kè wo le wɔ̀ ò.” Wo dà àkɔ̀ ɖo yebe àwùwo ŋuti, ma wo lè woa nɔ̀nɔwo dòmè. 35Dùkɔ̃a tɔtè lè àzɔ̀ge, le kpɔ ènu, wàlɛbɛ kè èdùmèmègãwo le ɖè àlɔmè lè Yesù ŋutia. Wo le gblɔ̃ be: “E hlùɛ̃ àmèwo gã; ne e ye nyi Mɛ̀sia, àmè kè Mawu cã a nyàwo a, ne hlùɛ̃ ye ɖokoe gã.” 36Gbãdãgbãwo cã le ɖè àlɔmè lè e ŋuti, le kò è. Wo tètè gogo è, sɔ vɛ̃ gbegble na ɛ̀ be ne nù. 37Wo gblɔ̃ na ɛ̀ be: “Ne Yudàviwo be èfìɔ ye wò nyi nyàwo a, hlùɛ̃ ɖokoe wò gã.” 38Wo ŋlɔ̀ ènyà kèa cã ɖo yebe èta gbe be: “Àmè kèa ye nyi Yudàviwo be èfìɔ.”

39Ènubàɖàwɔ̀tɔ kèwo wo ka ɖo àtisòga ŋuti bɔ̀ ɖo Yesù ŋutiawo dòmètɔ ɖèka cã lè zũ ì be: “Mu nyi èwò ye nyi Mɛ̀sia òa? Hlùɛ̃ ɖokoe wò gã ne wòa hlùɛ̃ miawo cã gã.” 40Vɔ̀a èvuɛ̃wɔ̀tɔ èvègɔ̃a gbe na ɛ̀ be: “Èwò kè le xɔ̀ èto dɔ̃dɔ̃ ɖèka ŋùkumè kudo èa, wò mu vɔ̃na Mawu òa? 41Miawo ya, ènu kè mi wɔ̀a be èfɛ̃tu ye mi le xɔ̀, vɔ̀a, e ya mu wɔ̀ ènu dàda ɖe ò.” 42E gbà gblɔ̃ be: “Yesù, wàlɛbɛ kè wò la va ɖùfìɔ lè xixe kèa mèa, mù gbà ŋlɔ̀be mù ò.” 43Yesù ɖo e ŋuti na ɛ̀ be: “Nyàwo mù le to na wò, egbèa ke, wò la nɔ̀ Mawu gbɔ kudo mù.”

Yesù ku

(Màt 27.45-56; Mrk 15.33-41; Yòh 19.28-30)

44Eye, sìgbè gà woèvè mè nènea, vìvìti do ɖo ànyigbãa kpata ji, kaka va na wètrɔ gà ètɔ̃ mè. 45Èwè be kɛ̃klɛ̃ bu, eye xɔ̀mèsòvɔ kè lè kɔ̀kɔ̀ɛpea mèa, zɛ̃ ɖo èvè. 46Eye Yesù do àpa sɛ̃sɛ̃ ɖe be: “Àta, mù sɔ gbɔ̃gbɔ̃ nyèa do àsi na wò.” E yomè a, e miɔ̃ ènu. 47Kè àhùagaa kpɔ ènu kè jɔ̀ a, e na gogo Mawu gblɔ̃ be: “Ŋusù kèa, àmè jɔ̀jɔɛ ye be nyi nyàwo.” 48Kè àmè kèwo zɔ̃ hòo va kpɔ ènu kèa tèpeawo kpɔ ènu kèwo jɔ̀ a, woa kpata wo tɔ àkɔta pòpo, trɔ yì àxomè. 49Yesù be èxlɔ̃wo ku nyɔ̃nù kèwo kpàsà ɛ̀ do so Galileaa, wo nɔ̀tè lè àzɔ̀ge, le kpɔ ènu kèwo le jɔ̀ a.

Wo ɖì Yesù

(Màt 27.57-61; Mrk 15.42-47; Yòh 19.38-42)

50Ŋusù ɖe lè Yudàviwo be àɖàŋùɖèhaa mè. Wo yɔna ɛ̀ be Yozɛ̀f. Ŋusù kèa nyi àmè nyuɛ̃, ànùkuame. 51Mu lɔ̃ ɖo ènu kèwo àmè kpɔ̀tɛawo gblɔ̃a, ku ènu kèwo wo wɔ̀a ji ò. Yudeà be èdù kè wo yɔna be Arimatea mè ye be so, eye e le nɔ̀tè kpɔ Mawu be fìɔɖùɖua. 52Ŋusù kèa yì kpɔ Pilatò, biɔ ɛ̀ Yesù be àmètia. 53E ɖè Yesù jo lè àtisògaa ŋuti, xasa kploba xɔ̀asì ɖe ɖo e ŋuti. E sɔ ɛ̀ mlɔ̃ èyɔ̀do ɖe kè wo kù ɖo àkpã mèa mè. Wo mu ɖì àmè ɖe ɖo èyɔ̀do ŋua mè kpɔ ò. 54Jàjràɖo be àzã ye e nyi, eye jɛ̃gbɔ̃zãa gogo. 55Nyɔ̃nù kèwo kpàsà Yesù do so Galileaa, zɔ̃ ku Yozɛ̀f yì kpɔ èyɔ̀doa, kpɔ àlekè wo sɔ Yesù mlɔ̃ e mè ɖoa. 56E yomè a, wo trɔ yì àxomè, jrà àmì sìsì huɛ̃ titiwo ɖo ɖɛ. Wo gbɔ̃jɛ̃ lè jɛ̃gbɔ̃zã gbè sìgbè àlekè èsea biɔa nène.

Currently Selected:

Lukà 23: GEN

Highlight

Copy