Ebikorwa 10
10
Omweruro nigukinga ku bamaanga Maraika na:ja ku Korinelio
1Mu Kaisaria ariga:rio mu:nu, risi:na ryae Korinelio, Omukuru we cise ca basirikare egana, cinu catogwaga ca Italia. 2Ariga:ri mu:nu murengeresi, unu o:bayire Nyamuanga aamwi na ba mu nyumba yae bo:ne. Agabiraga aba:nu ebiyanwa byafu, nasabwaga Nyamuanga kusiku. 3Omwene mu saa eta:nu ne:na ja mu mwisi, narora abweru mu ciroro, narora maraika wa Nyamuanga namu:jako, namubwira ati, Korinelio. 4Omwene namurore:rera nekeneke, no:baya, na:ika ati, Niki, Ratabugenyi? Namubwira ati, Okusabwa kwao ne biyanwa byao byakingire inguru bi:cukwe imbere ya Nyamuanga. 5Mbe tuma aba:nu baje Yopa, bajire Simoni unu katogwa Petero. 6Omwene asumbiye ewa Simoni omuyasi wa jinjai unu ari na inyumba yae ku mwaro. 7Maraika unu a:ikire nage ejire agenda, Korinelio nabirikiramo babiri mu barerwa bae no musirikare unu o:bayaga Nyamuanga, mu banu bamukoreraga kusiku. 8Nabasombo:rera byone nabatuma Yopa.
Eciroro ca Petero
9Mwejo, anu bariga bacaribata, mbareberera ku musi, mbe Petero narinya ku nyumba inguru okujo:kusabwa mu saa eta:nu na imwi. 10Narumwa omweko, nenda okurya. Nawe anu bariga bacate:ka, ne:fura nayutuka, 11Narora orwire rwigukire, nicimwikira eci:nu cinu cisusene no mwenda omugutu gugwatirwe ku sonde ena, nigwisibwa a:si. 12Jariga jirimo jintyanyi ja nyami jo:ne eja maguru gana, na binu ebi:kurura, na jinyonyi ja mu rutumba. 13Oburaka nibumubwira ati, Imuka, Petero, ukomere urye. 14Nawe Petero na:ika ati, Uri, Ratabugenyi, okuba nicariga kurya cinu cibi:bi nakabee ciri cijabi. 15Oburaka nibumubwira rindi rwa kabiri ati, Nyamuanga binu e:sisye wasiga kubitoga bijabi. 16Omusango gunu gwakorerwe kutyo kwiya kasatu. Mbe niwo eci:nu eco nicisirwa mu rwire. 17Mbe, Petero anu ariga ace:tima:ta mu mutima gwae obugajuro bwe biroro ebyo arorere kutyo buri, mbe abamura banu batumirwe na Korinelio, wejire bamara okubu:sya inyumba ya Simoni, nibe:mereguru ku muryango. 18Nibabirikira, nibabu:sya ati, ?Simoni, unu katogwa Petero asumbiye munu? 19Anu Petero ariga ace:ganirisya eciroro, Mwoyo namubwira ati, Rora, bamura basatu abakuyenja. 20Nawe imuka, wike, ugende nabo utaja kwitima:ta, okuba nanye nabatuma. 21Petero ne:ka ku bamura abo na:ika ati, Rora, anye nanye unu omuyenja. ?Cinu cabare:ta niki? 22Niba:ika ati, Korinelio, Omukuru wa basirikare rigana, niwe omurenge:resi unu ko:baya Nyamuanga, unu ari ne cibaro mwiyanga ryone rya Bayaudi, akomeresibwe na maraika omweru akubirikire oku:ja mu nyumba yae korereki ongwe binu uramubwira. 23Mbe nabengisya nabakuma. Mwejo Petero ne:muka nagenda nabo, na bairi abandi abende Yopa nibagenda nage.
Petero mu Kaisaria
24Mbe ejorirya nibengira mu Kaisaria. Korinelio ariga nabarindirira akofifye abo ruganda rwae, na basa:ni bae. 25Petero ejire ayenja okwingira, Korinelio namuramira, nagwa mu maguru gae namuramya. 26Nawe Petero namwimusya, na:ika ati, Imereguru, okuba anye one ndi mu:nu era. 27Anu ariga aca:ika nage, nengira nasanga ba:nu ba:fu be:kofyanyisye. 28Nababwira ati, Mumenyere ati Omuyaudi aganyibwe okusasikana no wa riyanga erindi, amwi kumuja:ko uri. Nawe Nyamuanga amanyeresya ati nisigega kutoga tnu:nu wo:ne wo:ne mujabi, amwi ate:rere. 29Kwonamakora nini:ja, nitamarema anu namabirikirwa. Kwenikora nimbu:sya ati, ?Mwamambirikiriraki? 30Korinelio na:ika ati, Rero ni rusiku rwa kana kuso:kerera anu nambire okusara:rira kukinga mu saa inu. Mu saa eta:nu ne:na rusiku orwo nariga ninsabirwa mu nyumba yani. Mbe omu:nu ne:mereguru imbere yani afwae bifwaro binu ebirabangirya. 31Na:ika ati, Korinelio, okusabwa kwao kwongwibwa, ne biyanwa byao ebi:cukwa imbere ya Nyamuanga. 32Mbe tuma aba:nu Yopa, baji:re Simoni unu katogwa Petero, oyo asumbiye mu nyumba ya Simoni omwasi wa jinjai unu e:kae yei ku mwaro. 33Aonao ninkutumira aba:nu, na:we wakondya oku:ja. Mbe wori, cirio anu bo:ne imbere ya Nyamuanga, korereki cungwe byone binu Nyamuanga akuragiriye.
Okusimura kwa Petero mu nyumba ya Korinelio
34Mbe Petero nata:nya omunwa gwae, na:ika ati, Ni cimari wori namenya ati, Nyamuanga atakusoro:ra mu ba:nu, 35Nawe mwiyanga ryone, unu kamu:baya, no kukora ebyo burenge:resi, oyo ke:kirisibwa nage. 36Omusango gunu atumire ku ba:na ba Israeli, nasimura omurembe gunu oguboneka ku Yesu Kristo, niwe Esebugenyi wa bo:ne. 37Omusango ogwo mugumenyere, gunu gwakumukire mu Buyaudi yo:ne, kwambira Galilaya, kuso:ka mu kubatija kunu Yoana asimuye. 38Rwa kutyo Nyamuanga e:tiriye Mwoyo Mweru na managa ku Yesu wende Najareti, unu e:singasingaga nakoraga ebye kisi, naosyaga bo:ne banu banyasibwaga na Syetani, okuba Nyamuanga ariga:ri, a:mwi nage. 39Neswe ciri bo kwimako emisango jo:ne ejo akoraga mu ca:ro ca Buyaudi, na mu Yerusalemi. Oyo nibamwita mbamuyanika kwiti. 40Omwene Nyamuanga namusu:rura ku rusiku rwa kasatu, namubu:risya abweru, 41Tari mu ba:nu bo:ne, nawe mu banu abamwimako banu Nyamuanga asorere kara, niwe eswe banu caryaga no kunywa nage, wejire amara okusu:ka mu bafu:ye. 42Naciragirira okubasimurira aba:nu no kumwimako ati, Oyo niwe Nyamuanga ateeo okuba muramusi wa baanga na bafu:ye. 43Oyo abaragi bo:ne abamwimako ati, Kwisi:na ryae mu:nu wo:ne unu kamwikirisya, ke:swaririrwa ebibi:bi.
Aba:maanga nibayanwa Mwoyo Mweru
44Anu Petero ariga aca:ika ebigambo ebyo, Mwoyo Mweru nabagwako bo:ne banu bonguywe omusango. 45Na batende banu be:kirisisye nibataŋaŋara, bo:ne banu bejire na Petero, okuba aba:maanga one be:tirirwa eciyanwa co Mwoyo Mweru. 46Okuba babonguywe niba:ika na jindimi no kukusya Nyamuanga. Mbe Petero naindura ati, 47?Omu:nu katura okuremera amanji, banu basige kubatijibwa, banu bayabwa Mwoyo Mweru rweswe? 48Naragirira babatijibwe mwisi:na rya Yesu Kristo. Mbe niwo nibamuremberesya ako:reo siku nyafuo.
Currently Selected:
Ebikorwa 10: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
