Ebikorwa 5
5
Orurimi rwa Anania na Safira
1Nawe omu:nu risi:na ryae Anania, agusisye risambu, aamwi no mugasi wae Safira, 2Nabisako ejindi ku jinu jaso:keremo, omugasi wae ariga amenyere, nare:tako ejindi era, najitu:ra mu maguru ga jintumwa. 3Nawe Petero na:ika ati, Anania, ?Syetani e:jusisyaki omutima gwao okubebeya Omwoyo Mweru, nubisako ku jinu ja:ma:so:kamo mwisambu? 4?Anu ryariga ritende:gurwa, ryariga ritari ryao? ?Ka:nu ryaka:nirwe ritabee mu managa gao? ?Niki cinu warwajira mu mutima gwao okukora kutya ?Utabebeya ba:nu tari wabebeya Nyamuanga. 5Anania ejire ongwa emisango ejo, nagwa nafwa. Obu:ba bwafu nibubagwata banu bonguywe ebyo. 6Abamura nibe:muka nibamusinga mu ngubo, nibamuurusya anja nibamusi:ka. 7Mbe wejire jaturao saa esatu, omugasi wae nengira atamenyere binu byagwao. 8Petero namubu:sya ati, Nuumbwire, ?mwaka:niremo risambu, nibyo binu byone? Na:ika ati, Yee nibyebyo. 9Mbe Petero namubu:sya ati, ?Mwamaragana atiki okusaka Mwoyo wa Ratabugenyi? Rora, amaguru gebwe banu basi:ka omurume wao gari ku rwigi, abajo:kukugega na:we one. 10Aonao nagwa mu maguru gae nafwa. Wejire abamura bengira nibamusanga afu:ye nibamugega nibamuurusya anja nibamusi:ka aamwi no murume wae. 11Obuba nibubagwata aba mu kanisa bo:ne, na bo:ne banu bonguywe ebyo.
Obuinga bwa ikanisa inyeru
12Ebibarikisyo ne birugu:ro byafu nibikorwaga mu ba:nu na maboko ga jintumwa. Bo:ne bariga aamwi mu cisunya ca Sulemani na mwoyo gumwi. 13Nawe mu bandi, ariga atario mu:nu wa kuya:ra kugwatana nabo. Nawe aba:nu nibabaku:ya. 14Nawe banu be:kirisisye nibeyongesya oku:ja ku Ratabugenyi, ba:fu abarume na bagasi. 15Ndijei nibare:taga abarwae ku njira, nibabataga ku bise:ro#ecise:ro ni rwai kuma:mira omurwae wa siku nyafu. na ku mariri, araba Petero aka:ja, rirengesi ryae ribaswikire abandi. 16Ke bise nibiso:ka mu misi jinu jisingiye Yerusalemi, nibe:kofyanya nibare:ta abarwae, na banu banya:sibwaga emisambwa emijabi. Mbaosibwa bo:ne.
Okunya:sibwa kwa kabiri
17Mbe ne:muka omugabisi Omukuru aamwi na banu bo:ne bariga nage, nibo banu be:kirisisye ebya Basadukayo, nibajira rifuwa ryafu. 18Nibagwata jintumwa, nibabatura mu nyumba yo buboywa. 19Nawe maraika wa Ratabugenyi ne:gura jinjigi ja inyumba yo buboywa, nabaurusya, na:ika ati, 20Mugende, mwimereguru mu yekaru, mubabwire aba:nu emisango jo:ne ejo buanga bunu. 21Bejire bongwa binu, nibengira mu yekaru mu ruguru, nibe:igisya. Nawe omugabisi Omukuru na:ja aamwi na banu bariga nage, nibababirikira abe ci:na na bakaruka bo:ne aba Ba:na ba Israeli, nibatuma aba:nu ku nyumba yo buboywa, korereki babare:te. 22Nawe abarugaruga bejire bakinga batabasangiremo mu nyumba yo buboywa, nibasuba niba:ika ati, 23Inyumba yo buboywa casanga i:gaywe kisikisi, na bari:si bemereguyu ku muryango. Nawe cajo:kwigurao, citasangamo mu:nu. 24Bejire bongwa emisango ejo, Omukuru wa mu yekaru na bagabisi abakuru nibabe:tima:tira ati, Binu jebibe kutiki? 25Na:ja omu:nu nababwira ati, Aba:nu banu mwamatu:ra mu nyumba yo buboywa, mbe rora, bemereguyu mu yekaru abe:igisya aba:nu. 26Mbe Omukuru na barugaruga nibagenda, nibabaji:ra nawe batakorere managa, okuba bariga nibo:baya aba:nu, bataja kubarasira na mabui. 27Bejire babare:ta nibabatura mu ci:na. Omugabisi Omukuru nababu:sya, 28Na:ika ati, ?Angu citabaganyisye ati, musige kwiigisya mwisi:na eryo? Mbe mwejusisye Yerusalemi okwiigisya kwemwe, omwenda okure:ta amanyinga go mu:nu uyo kwiswe.
Risubyo rya jintumwa mu ci:na
29Nawe Petero na jintumwa nibaindura niba:ika ati, Kuci:ire okungwa Nyamuanga kukira ba:nu. 30Nyamuanga wa basaja asu:ruye Yesu, unu emwe mwasungire kwiti no kumwita. 31Oyo Nyamuanga amuku:isisye ku kuboko kwae okwe buryo, abe Mukuru no Mukisya, ayane Israeli okuta no kwiswaririrwa kwe bibi:bi. 32Eswe neswe abo kwimako ku misango jinu aamwi no Mwoyo Mweru unu Nyamuanga abayae banu abamungwa. 33Nawe abene bejire bongwa, nibarumwa muno mu mitima jebwe, nibaroma eci:na co kube:ta.
Obwenge bwa Gamalieli
34Nawe omu:nu nemereguru mu ci:na, niwe Omufarisayo risi:na ryae Gamalieli, omwiigisya we biragiro we cibaro mu ba:nu bo:ne, naragirira okuurusya jintumwa anja mwanya muto:to. 35Nababwira ati, Emwe abamura ba Israeli, mwikenge mwijo omwenda okubakorera aba:nu banu. 36Okuba mu siku ja karao, e:mukire Teuda unu e:ku:isye ati, nanye Omukuru. Na ba:nu abo bamuru:baga be:ire uti magana gana. Oyo ejire e:twa, bo:ne abo be:kirisisye byae nibanyaragana, nibawao. 37Ejire afwa oyo, ne:mukao Yuda Omugalilaya, mu siku jo kwandikwa rigoti, nakongya ba:nu ba:fu nibamuru:ba. Oyo one nasimagira, nabo be:kirisisye byae nibanyaragana. 38Mbe woryanu enibabwira emwe ati, Mwaukane na aba:nu banu mubasige. Okuba omusango gunu amwi omurimu gunu araba guso:kere mu ba:nu gurifwa. 39Nawe araba guso:kere ku Nyamuanga mutakutura kugwita, mwasiga kuba uti omurwana na Nyamuanga.
Okubumwa no kukonderwa kwa jintumwa
40Nibamungwa. Nibabirikira jintumwa nibababuma nibabaraganya bata:ikaga mwisi:na rya Yesu, nibabata:tira. 41Mbe nibaso:ka imbere ye ci:na, bakondeywe okuba babarirwe ati be:ire okuswasibwaga kubwa Risi:na rya Yesu. 42Mbe bato:saga okwiigisya kusiku:siku mu yekaru na mu misi no kusimura ati Yesu niwe Kristo.
Currently Selected:
Ebikorwa 5: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
