Yoana 18

Yuda nakinga na rise:mu:ta okumugwata Yesu

(Mt. 26:47-56; Mk. 14:43-52; Lk. 22:47-53)

1Mbe Yesu wejire amara okwaika ebyo, nauruka aamwi na be:igisibwa bae, nibambuka akasima ka Kederoni, enu cariga ciri ecira:bo. Nagenda omwo omwene na be:igisibwa bae. 2Ka na Yuda, unu amuromee iniku, ariga amenyere eyo, okuba Yesu ajagayo kwiya ka:fu na be:igisibwa bae. 3Mbe abagabisi abakuru na Bafarisayo wejire bamara okuyana Yuda rise:mu:ta rya basirikare na bakuru bebwe, naja:yo ari na jitara na ji:muri na macumu. 4Mbe Yesu okuba amenyere byone binu biramwijira, naso:romoka nababu:sya ati, ?Omuyenjaga? 5Nibamuindura ati, Yesu Omunajareti. Yesu nababwira ati, Na:nye. Na Yuda one, unu amuromee iniku, ariga e:mereguyu nabo. 6Mbe wejire ababwira ati, Nanye, nibasuba inyuma nibagwa a: si.

7Nasuba okubabu:sya orwa kabiri ati, ?Omuyenjaga? Niba:ika ati, Yesu Omunajareti. 8Yesu nabaindura ati, Nababwiriye ati na:nye. Mbe araba omunyenja anye, musige banu bagende. 9Omusango gunu a:ikire korereki guku:misibwe ati, Ku banu wananire, nitabusisyeko na umwi. 10Mbe Simoni Petero unu ariga ne cinyambutu nacisoora natema omugaya wo mugabisi Omukuru, namutemako okutwi kwe buryo. Na risi:na ryo mugaya oyo ryariga Maruko. 11Mbe Yesu namubwira Petero ati, Subyamo ecinyambutu cao mu ru:bu rwaco. ?Ecikombe cinu Rata anae nireme okucinywa?

Yesu mu ci:na co mugabisi omukuru

(Mt. 26:57-68; Mk. 14:53-65; Lk. 22:66-71)

12Mbe rise:mu:ta rya basirikare, no mukuru webwe na bakosi ba Bayaudi, nibagwata Yesu nibamuboya. 13Nibatangata okumusira ku Anasi okuba ariga esebuko Kayafa, unu ariga:ri mugabisi Omukuru mu mwaka ogwo. 14Kayafa oyo niwe abayae Abayaudi obwenge ati, Kwiire Omu:nu oumwi okufwira aba:nu.

Petero namwiga:na Yesu

(Mt. 26:69-75; Mk. 14:66-72; Lk. 22:54-62)

15Mbe Simoni Petero no mwiigisibwa oundi nibaru:ba Yesu. Mbe omwiigisibwa wuriya ariga amenyerwe omugabisi Omukuru, nengira aamwi na Yesu mu rugo rwo mugabisi Omukuru. 16Nawe Petero ariga e:mereguyu anja ku rwigi. Mbe omwiigisibwa oyo oundi unu ariga amenyerwe omugabisi Omukuru, nauruka na:ikana no muyara omwigasi wo rwigi, nengisya Petero. 17Mbe omuyara oyo mwigasi wo rwigi nabu:sya Petero ati, ?Awe one uri wa mu be:igisibwa bo mu:nu unu? Omwene na:ika ati, Anye uri. 18Abagaya na bakosi bariga bemereguyu ao, bakongesisye omuriro gwa makara, okuba yariga mbeo, nibabira omuriro, na Petero one ariga:ri nabo, e:mereguyu nabira omuriro.

Yesu imbere yo mugabisi Omukuru

19Mbe omugabisi Omukuru nabu:sya Yesu ebya be:igisibwa bae, nebyo kwiigisya kwae. 20Yesu namuindura ati, anye nasimuriraga aba:nu abweru. Neigisyaga kusiku mu mekofyanyisyo na mu yekaru, munu abe:kofyanyisyaga Abayaudi bo:ne. Nita:ikaga bumbise musango na gumwi. 21?Oumbu:sisyaki? Bu:sya banu banyungwaga binu nababwiraga, Mba:bo bamenyere binu na:ikire. 22Wejire a:ika ebyo, oumwi ku bakosi unu ariga amwimereguyuko yei, nasasa Yesu orui, na:ika ati, ?Nikwo kutyo ouindura omugabisi omukuru? 23Yesu namuindura ati, Araba na:ika kubi:bi, komeresya ecibi:bi eco naika. ?Nawe araba na:ika kisi oumbumira ki?

24Mbe Anasi namusira aboerwe ku Kayafa omugabisi Omukuru. 25Na Simoni Petero ariga e:mereguyu nabira omuriro. Mbe nibamubu:sya ati, ?Na:we one uri wa mu be:igisibwa bae? Omwene ne:ga:na, na:ika ati, Anye uri. 26Ariga:rio oumwi ku bagaya bo mugabisi Omukuru, unu ariga:ri wo ruganda rwoyo Petero atemereko okutwi, na:ika ati, ?Anye nita:kurora munage mu cira:bo murya? 27Petero ne:ga:na rindi. Aonao iŋoko nikokoroma.

Yesu mu ci:na ca Pilato

(Mt. 27:1-2, 11-26; Mk. 15:1-5; Lk. 23:1-15)

28Nibaso:sya Yesu ku Kayafa, nibamusira mwiromero, nibuca katondo. Abene nibarema okwingira mwiromero basiga kwirabura, nawe barye ipasaka. 29Pilato kwakorere nauruka nabaja:ko, na:ika ati, ?Ni ntambara ki inu yendera omu:nu unu? 30Nibaindura nibamubwira ati, Omu:nu unu kumba aja:takorere kubi:bi citakamure:tere kwawe. 31Mbe Pilato nababwira ati, Mbe nimumugege emwe mujo:kumutemera eci:na rwe biragiro byemwe kutyo biri. Abayaudi nibamubwira ati, Eswe cite:kirisibwe okwita omu:nu. 32Omusango gwa Yesu guku:misibwe gunu a:ikire ne:resya okufwa kunu ariga najo:kufwa kutyo kuri. 33Mbe Pilato nasuba okwingira mwiromero nabirikira Yesu namubu:sya ati, ?Na:we Omukama wa Bayaudi? 34Yesu naindura ati, ?Cinu wa:ika kubwao mwene, tere amwi abandi nibo bakubwira emisango jani? 35Pilato naindura ati, ?Anye ndi Muyaudi? Aba riyanga ryanyu na bagabisi abakuru nibo baku-nde:tera. ?Wama:kora ki? 36Yesu naindura ati, Obukama bwani butari bwa mu ca:ro. Obukama bwani bwakabae bwa mu ca:ro, aba:nu bani bakandwaniye, nitakate:ywe mu maboko ga Bayaudi. Nawe woryanu obukama bwani butari bwenda:nu. 37Mbe Pilato namubu:sya ati, ?Mbe awe uri mukama? Yesu naindura ati, Wabarira, okuba anye ndi mukama. Eco nico ne:buriywe, ne:co nico cande:tere mu ca:ro, na:ike ebye cimari. Owe cimari wo:ne kongwa oburaka bwani. 38Pilato namubu:sya ati, ?Cimari ni ci:nu ki? Wejire amara okwaika ebyo, nasuba okuuruka ku Bayaudi aanja, nababwira ati, Nitakumubonako cikayo.

Yesu tere Baraba

(Mt. 27:15-26; Mk. 15:6-15; Lk. 23:17-25)

39Nawe muri na ntungwa, anye okubata:tiriraga oumwi ku Pasaka. ?Mbe omwenda nibata:tirire Omukama wa Bayaudi? 40Mbe nibasuba okumwaya niba:ika ati, Unu uri, nawe Baraba! Mbe Baraba ariga:ri musa:kusi.

Currently Selected:

Yoana 18: KIJ1960

Highlight

Copy