Yoana 20

Okusu:ka kwa Yesu

(Mt. 28:1-10; Mk. 16:1-8; Lk. 24:1-12)

1Mbe ku rusiku rwo kwamba#Nirwo rweswe rwo bwoyo orwene. orwo bwoyo, Maryamu Magadalene ne:ra:ba oku:ja ku:fwa, kucari kwera, narora ribui riso:sisyeko ku:fwa. 2Mbe nabirima, na:ja ku Simoni Petero na ku mwiigisibwa oundi wuriya Yesu unu ariga endere, nababwira ati, Baso:sisyemo Ratabugenyi mu:fwa, citakumenya enu bamuta.

3Mbe Petero nauruka, no mwiigisibwa oundi, nibagenda ku:fwa. 4Nibabirima aamwi ku bubiri. Omwiigisibwa oyo oundi nasiga Petero, natangata okukinga ku:fwa. 5Ne:nama nasunguriramo, narora emyenda ja bafuta jiri ao, nawe atengiyemo. 6Mbe na Simoni Petero na:ja namuru:ba nengira mu:fwa, narora emyenda ja bafuta jiri ao. 7Ne citambara cinu cariga ku mutwe gwae citari aamwi ne myenda ja bafuta, nawe cariga cisingire ciri cenyere ku mbari. 8Mbe niwo omwiigisibwa oundi oyo atangatire oku:ja ku:fwa nengira, narora ne:kirisya. 9Okuba bariga bacari kumenya cinu candikirwe ati, kumwiire okusu:ka mu bafu:ye. 10Mbe abe:igisibwa nibasuba ike:webwe rindi.

Yesu nasoromokera Maryamu Magadalene

(Lk. 16:9-14; Lk. 24:13-46)

11Nawe Maryamu ariga e:mereguyu abweru ku:fwa na:rira. Anu ariga acarira, ne:nama nasungurira mu:fwa. 12Narora bamaraika babiri bafwae emyenda myeru, benyanjire, oumwi emutwe oundi ku maguru, anu cariga citeywe ecitundu ca Yesu. 13Abo nibamubu:sya ati, Omugasi awe, ouririra ki ?Nababwira ati, Okuba baso:sisyemo Ratabugenyi, nitakumenya enu bamuta. 14Wejire amara okwaika kutyo, nacu:ka inyuma narora Yesu e:mereguyu, nawe ariga atamenyere ati niwe Yesu. 15Yesu namubu:sya ati, Mugasi awe, ?ouririra ki? ?Ouyenja ga? Omwene neganirisya ati niwe omuri:si we cibanja, namubwira ati, Ratabugenyi, araba na:we wamusirire aandi, mbwira enu wamuta, nije nimuso:sye eyo. 16Yesu namubwira ati, Maryamu. Nacu:ka namubwira mu Cieburania ati, Raboni, kwo kwaika ati, Omwiigisya. 17Yesu namubwira ati, Utangwatako okuba nicari kurinya mu rwire ku Rata. Nawe genda ku ba:na ba:su, ubabwire ati, Enirinya mu rwire ku Rata na Kwisomwana, na ku Nyamuanga wani na ku Nyamuanga wemwe. 18Maryamu Magadalene nabwira abe:igisibwa ati, narorere Ratabugenyi, na kutyo amubwira emisango ejo.

Yesu nasoromokera abe:igisibwa Tomaso atario

(Lk. 24:36-49)

19Mbe wejire kwaba kegoro ku rusiku orworwo rwo kwamba rwo bwoyo, jinyigi jariga ji:gae munu abe:igisibwa bariga bari kurwo ku:baya Abayaudi, Yesu na:ja nabe:merefurumo, nababwira ati, Omurembe gube nemwe. 20Mbe wejire amara okwaika kutyo, nabe:resya jingaro jae no rubafu rwae. Abe:igisibwa bae bejire barora Esebugenyi nibakonderwa. 21Mbe Yesu nasuba okubabwira ati, Omurembe gube nemwe. Rwa kutyo Rata antumire anye, nanye one enibatuma emwe. 22Wejire amara okwaika kutyo nabe:sisya omwika, nababwira ati, Muramire Omwoyo Mweru. 23Unu wo:ne muriso:syako ebibi:bi, ariso:sibwako, na unu wo:ne muriboyera ebibi:bi byae, arabaga aboyeyweko.

Yesu nasuba okubasoromokera na Tomaso ario

24Nawe Tomaso, oumwi kwikumi na babiri, unu atogwaga Barongo, ariga atari nabo runu Yesu ejire. 25Mbe abe:igisibwa abandi, nibamubwira ati, Cabwene Ratabugenyi. Omwene nababwira ati, Ariba nitarorere jiŋofu je misumari mu biganja byae, nintako eca:ra cani mu ŋofu je misumari, ninta no kuboko kwani mu rubafu rwae, nitari:kirisya na katyari. 26Jaturao siku ita:nu ne:satu, abe:igisibwa bae bariga bari mu nyumba rindi, na Tomaso ariga:ri nabo, Yesu na:ja, jinjigi ji:gae, nabe:meregurumo, na:ika ati, Omurembe gube nemwe. 27Mbe namubwira Tomaso ati, Re:ta:nu eca:ra cao urore ebiganja byani. Ure:te no kuboko kwao, ukute mu rubafu rwani. Usige kuba unu atakwikirisya, nawe unu ke:kirisya. 28Tomaso naindura namubwira ati, Ratabugenyi na Nyamuanga wani! 29Yesu namubu:sya ati, ?Okuba wandora nikwo wakora we:kirisya? Bana ribando banu abe:kirisya batarorere.

Yoana cinu cakorere nandika ecitabo

30Birio ebibarikisyo byafu binu Yesu akorere imbere ya be:igisibwa bae binu bitandikirwe mu citabo cinu. 31Nawe binu byandikirwe korereki mwikirisye ati, Yesu niwe Kristo, Omwana wa Nyamuanga, na kurwo kwikirisya mube no buanga mwisi:na ryae.

Currently Selected:

Yoana 20: KIJ1960

Highlight

Copy