Luka 18

Okusabwa kwo mutumba

1Nababwira ecijekekanyo kutyo kube:ire okusabwaga kusiku kuigwa uri. 2Na:ika ati, Ariga:rio muramusi mu musi gumwi, unu ato:bayaga Nyamuanga, amwi atabaraga mu:nu. 3Ariga:rio mutumba mu musi ugwo. Namu:jagako na:ika ati, Ndamura no musoko wani. 4Natangata okurema, nawe ejire e:ya na:ika munda yae ati, Nakabee nitaku:baya Nyamuanga amwi nitakubara mu:nu, 5nawe omutumba unu ka:nya:sya, nje nimuramure, kuguma nantamirisya okunyege:rera kusiku. 6Ratabugenyi na:ika ati, Mungwe omuramusi uyo atari murengeresi kutyo ka:ika. 7?Mbe na Nyamuanga atariramura abasorwa bae banu abamuririra mu mwisi na mu ngeta, nabe:gumirisisya? 8Enibabwira ati, aribaramura bwangu. ?Nawe Omwana wo mu:nu ariba:ja, arisanga okwikirisya ku ca:ro?

Omufarisayo no mutobesya

9Bariga bario abandi banu be:ganirisyaga ati, ciri barenge:resi, nibagaya abandi bo:ne. Abo nababwira ecijekekanyo cinu ati, 10Ba:nu babiri barinyire mu yekaru baje okusabwa. Oumwi ariga Mufarisayo, no undi mutobesya. 11Omufarisayo ne:mereguru nasabwa omwene emisango jinu ati, Nyamuanga, enikusi:ma okuba anye nitari rwa ba:nu abandi, abasa:kusi, abajimya, abaromesi, nakabee ari rwo mutobesya unu. 12Anye enisara:rira kwiya kabiri mu bwoyo. Enigwata omugabo gwa rikumi ku bi:nu byone binu enibona. 13Nawe omutobesya nemereguru kura, narema no kwesya ame:so gae ku rwire, nawe ne:buma mu cifuba, na:ika ati, Nyamuanga nfwira ecigongo anye owe bibi:bi. 14Enibabwira ati, Omu:nu uyo e:kire okusuba mu nyumba yae abariywe oburengeresi kukira wuriya, okuba omu:nu wo:ne unu ke:kusya arikeibwa, na unu ke:keya arikusibwa.

Yesu nayana aba:na abato:to ribando

(Mt. 19:13-15; Mk. 10:17-31)

15Mbe nibamure:tako na ba:na abato:to, abakunieko, nawe abe:igisibwa bae wejire barora nibabagonya. 16Nawe Yesu nababirikira na:ika ati, Musige aba:na bato:to ba:je kwanye, mutabaganya, okuba abe:ja:bo abo obukama bwa Nyamuanga ni bwebwe. 17Ni cimari enibabwira ati, Unu wo:ne araremaga okwikirisya obukama bwa Nyamuanga rwo mwana omuto:to, oyo ataringiramo kata.

Omumura omuni:bi (Mt. 19:16-26; Mk. 10:17-31)

18Omu:nu mukuru umwi namubu:sya ati, Awe omwiigisya wo bwana, ?nikore kutiki korereki nirye omwandu gwo buanga bwa kajanende? 19Yesu namubu:sya ati, ?Ountogera ki owo bwana? Atario wa bwana tari umwi, niwe Nyamuanga. 20Ebiragiro ubimenyere ati, Utaromeraga, Ute:taga, Ute:baga, Utabeeresyaga, Ubarega esomwana na nyokomwana. 21Na:ika ati, Ejo jo:ne ndajigwatire kuso:ka buto:to bwani. 22Yesu ejire ongwa, namubwira ati, Ucagerukiyweko musango gumwi. Ka:na binu uri nabyo byone, ubigabire abataka, mbe niwo uriba no buni:bi mu rwire. Mbe niwo nu:ja nu:ndu:ba. 23Nawe wejire ongwa ejo nasurumbara muno, okuba ariga:ri muni:bi muno.

24Mbe Yesu wejire amurora na:ika ati, One kutakome:e abani:bi okwingira mu bukama bwa Nyamuanga! 25Okuba ni cangu ingamira okufurumita mwiundu rya isinga kukira omuni:bi okwingira mu bukama bwa Nyamuanga. 26Banu bonguywe niba:ika ati, ?Kambe niga katura okukira? 27Omwene na:ika ati, Binu ebitamya aba:nu, Nyamuanga kabitura. 28Petero na:ika ati, Rora, eswe casigire ebyeswe nicikuru:ba. 29Nababwira ati, Ni cimari enibabwira ati, Atario mu:nu unu asigire inyumba, amwi mugasi, amwi bamura ba:bo, amwi be:busi, amwi ba:na, kurwo bukama bwa Nyamuanga, 30nawe kabona kwiya ka:fu woryanu mu siku jinu, na mu siku jinu eji:ja kabona obuanga bunu butakuwao.

Yesu naraga ejo kufwa no kusu:ka kwae

(Mt. 20:17-19; Mk. 10:32-34)

31Nagega abo rikumi na babiri, nababwira ati, Rora, ecigenda Yerusalemi, na jinu jo:ne jandikirwe abaragi jiriku:mira ku Mwana wo mu:nu. 32Okuba aritu:rwa ku Ba:maanga, najimibwa, nibamwimaturira, nibamufuburira amafwefu, 33barimusanya jisanyu nibamwita, na ku rusiku rwa kasatu arisu:ruka. 34Abe:ne batasombo:keywe ejo na gumwi. Omusango ogwo gwariga gubabisiywe, nibarema okwite:ge:resya jinu a:ikire.

Omuofu naosibwa

(Mt. 20:29-34; Mk. 10:46-52)

35Mbe anu ariga ajo:fugera okukinga Yeriko, omuofu ariga enyanjire ku njira nasabirisya. 36Ejire ongwa ecise niciitiŋana, nabu:sya ati, ?Eco niki? 37Nibamubwira ati, Yesu Omunajareti niwe kaitiŋana. 38Na:ikirira inguru ati, Yesu, awe mwana wa Daudi, ufnwire ecigongo. 39Banu bariga batangatire nibamugonya ajibire. Nawe omwene neyongesya muno okwanikirisisya inguru ati, Awe Omwana wa Daudi, unfwire ecigongo. 40Yesu nemereguru, naragirira okumure:ta anu ariga:ri. Mbe wejire afugera yei, namubu:sya ati, 41?Owenda nikukorere kutiki? Na:ika ati, Ratabugenyi, enenda okurora. 42Yesu namubwira ati, Wayanwa okurora kwao. Okwikirisya kwao kwakuosya. 43Aonao narora, namuru:ba nakusya Nyamuanga. Aba:nu bo:ne wejire barora, nibakuya Nyamuanga.

Currently Selected:

Luka 18: KIJ1960

Highlight

Copy