Luka 4

Yesu nasakwa na Syetani

(Mt. 4:12-17; Mk. 1:12-13)

1Mbe Yesu ariga e:juye Omwoyo Mweru, nasuba rindi okuso:ka ku Yorodani, Omwoyo namusira mwibara. 2Namarayo siku makumi gana, nasakwa Syetani. Amwi ataryaga ci:nu mu siku ijo. Jejire jawa, omweko nigumuruma. 3Syetani namubwira ati, Araba uri Mwana wa Nyamuanga, bwira ribui rinu ribe biryo. 4Yesu namuindura ati, gwandikirwe ati, Omu:nu atakuba muanga kurwe biryo era.

5Syetani namurinya inguru, namweresya obutungi bwone obwa mu ca:ro kasinjeke. Syetani namubwira ati, Enikuyana awe obutungi bunu bwone, na rikusyo ryendemo, okuba anye nayabirwe, ka enigabira unu enenda. 7Mbe awe ukandamya anye, binu byone ebiba byao. 8Yesu naindura namubwira ati, Gwandikirwe ati, Ramyaga Ratabugenyi Nyamuanga wao, niwe urakoreraga:ra.

9Namusira Yerusalemi, namutu:ra ku cisonge ca iyekaru, namubwira ati, Araba uri Mwana wa Nyamuanga, Iyesa a:si kuso:ka anu. 10Okuba gwandikirwe ati, Arikuragiririra bamaraika bae bakurinde. 11Na kandi ati, Barikuyagata mu maboko gebwe utaja kwiku:jura cigere cao kwibui. 12Yesu namuindura ati, Gwandikirwe ati, Utasakaga Ratabugenyi Nyamuanga wao. 13Syetani wejire amara okumusaka jo:ne, namusigao kasinjeke.

14Mbe Yesu nasuba Galilaya mu managa go Mwoyo. Orukuma rwae niruswira mu ca:ro co:ne cinu cariga cisije:ne. 15Ne:igisisyaga mu mekofyanyisyo gebwe, nakusibwa na ba:nu bo:ne.

Yesu nibamurema mu musi gwabo

(Mt. 13:53-58; Mk. 6:1-6)

16Naja Najareti enu akuriye. Ku rusiku rwa isabato nengira mu rikofyanyisyo rwa kutyo jintungwa jae jariga jiri. Ne:mereguru okusoma. 17Nibamuyana ecitabo co muragi Isaya. Nafundukura ecitabo, narora anu ariga andikire ati,

18Omwoyo wa Ratabugenyi ari kwanye,

Okuba anyitiriye amafuta korereki nisimurire abataka Ebigambo byo bwana

Antumire okubwira jingwatwa ejo kuta:tirwa, no kwigura ame:so ga baofu,

No kuta:tira banu bafwonyoe.

19Antumire okurasya omwaka gwa Ratabugenyi gunu gwekirisibwe. 20Nafundikira ecitabo, nacisubisya omukosi, ne:nyanja. Aba:nu bo:ne banu bariga mu rikofyanyisyo nibamurore:rera nekeneke. 21Namba okubabwira ati, Rero binu byandikirwe nibyo byaku:mi-rira mu matwi gemwe. 22Bo:ne nibamwaika, nibarugu:ra kurwe misango je cigongo jinu jaso:ka mu kanwa kae. Niba:ika ati, ?Unu tari niwe Omwana wa Yusufu? 23Nababwira ati, Mutakutasya kumbwira orugani runu ati, Muganga iganga omwene. Jo:ne jinu conguywe nijikorerwa Kaperinaumu, nujikore anu one mu ca:ro canyu.

24Nababwira ati, Ni cimari enibabwira ati, Atario muragi unu ke:kirisibwa mu ca:ro ca:bo. 25Nawe ni cimari enibabwira ati, bariga bario abatumba ba:fu mu Israeli mu siku ja Eliya, anu orwire rwegaywe myaka esatu na me:si gata:nu na kumwi, na njara nyafu ni:gwa mu:si yone. 26Nawe Eliya atatumirwe ku umwi kwabo, tari atumirwe Sarepeta, mu:si ya Sidoni, ku mugasi omutumba. 27Ka bariga bario abagenge ba:fu mu Israeli mu siku jo muragi Elisya, nawe ataosibwe na umwi kwabo, tari Naamani enyere Omusyami. 28Wejire bongwa emisango ejo, nibe:jura risungu bo:ne banu bariga bari mu rikofyanyisyo. 29Nibe:muka, nibamuurusya ku mwira gwo musi, nibamusira ku bwenenero bwe ci:ma cinu bariga bombakireko omusi gwebwe, korereki bamwese a:si. 30Nawe omwene nabaturamo aagati, nagenda.

Yesu nabaonya ba:fu mu Kaperinaumu

(Mt. 8:14-17; Mk. 1:21-39)

31Natebera Kaperinaumu, nigwo omusi gwa Galilaya. Nabe:igisyaga ku sabato. 32Nibarugu:ra kurwo kwiigisya kwae, okuba omusango gwae gwariga guri na managa. 33Mbe mu rikofyanyisyo ariga:rimo omu:nu unu ariga no musambwa omubibi, narira na buraka bunene, 34na:ika ati, Ahee! ?ecifuno niki eswe na:we, Yesu owende Najareti? ?Wama:ja okusimagisya? Nikumenyere awe, uri Mweru wa Nyamuanga. 35Yesu nagugonya na:ika ati, Jibira, umuso:keko. Omusambwa wejire gwamwesa aagati, nigumuso:kako, gutamukorere kubi:bi. 36Okutaŋaŋara nikubagwata bo:ne, nibabu:syanya abene era, niba:ika ati, ?Ni musango ki gunu? Okuba karagirira emisambwa emijabi no buinga na managa, nijiso:kao. 37Orukuma rwae nirukumuka wo:ne wo:ne mu:si inu yariga isije:ne.

Nyabuko Petero naosibwa

(Mt. 8:14-17; Mk. 1:29-34)

38Ne:muka naso:ka mu rikofyanyisyo, nengira mu nyumba ya Simoni. Mbe nyabuko Simoni ariga agwatirwe ebiri rya managa, nibamuremberesisya. 39Nemereguru anu ariga:ri, nagonya ribiri, naora. Aonao ne:muka nabafurubendera. 40Mbe risu:ba ryejire ryagwa, bo:ne banu bariga na barwae ndwara jindi na jindi, nibabamure:tera. Nabatako amaboko ku buri umwi kwabo, nabaosya. 41Ne misambwa nijibaso:ka-gako ba:fu nijirira, nija:ika ati, Na:we Omwana wa Nyamuanga. Najigonya, ariga atakwenda ja:ike, okuba ja:menyere ati, niwe Kristo. 42Wejire bwaca, naso:kayo nagenda anu ba:nu bariga hatari. Ebise nibimuyenja nibamuja:ko, nibenda okumuingirira areme okubaso:kako. 43Omwene nababwira ati, Kunyiire okurasya Ebigambo byo bwana ebyo bukama bwa Nyamuanga na mu misi jindi, okuba eco nico natumiywe. 44Mbe nasimura mu mekofyanyisyo ga Galilaya.

Currently Selected:

Luka 4: KIJ1960

Highlight

Copy