Luka 7
7
Omugaya wo musirikare naosibwa
(Mt. 8:5-13)
1Mbe wejire amara okwaika emisango jae jo:ne mu matwi ga ba:nu, nengira Kaperinaumu. 2Mbe ariga:rio Omukuru wa basirikare egana unu ano mugaya wae unu endaga muno, ariga arwae ajo:kufwa. 3Oyo ejire ongwa emisango ja Yesu, namutumira abakaruka ba Bayaudi namusabwa oku:ja okuosya mugaya wae. 4Abene wejire bakinga ku Yesu, nibamuremberesya muno, niba:ika ati, E:ire awe umukorere eco. 5Okuba endere riyanga ryeswe, ka acumbakiye rikofyanyisyo ryeswe. 6Mbe Yesu nagenda nabo. Anu ariga acari kura na inyumba, Omukuru uyo natuma abasa:ni bae, namubwira ati, Ratabugenyi, ute:nya:sya, okuba anye nite:ire awe wingire emwaro yo ruswi rwani. 7Kwonakora nindora ati, nite:ire kuja kwawe. Nawe yaika omusango era no mukosi wani kaora. 8Okuba anye one ndi mu:nu ntungirwe, ka ndi na basirikare banu nitungire. Nikabwira oumwi ati, Genda, kagenda, no undi ati, I:ja, na:ja, no mugaya wani nkamubwira ati, Kora gunu, kakora. 9Yesu ejire ongwa ejo namurugu:ra naindukira ebise binu byamuru:baga, na:ika ati, Enibabwira ati, Nicariga kurora kwikirisya kunene rwa kunu, nakabee mu Israeli. 10Mbe banu batumirwe wejire basuba ika, nibasanga omugaya unu ariga arwae, aorere.
Omwana wo mutumba nasubo:rora
11Wejire gwaturao mwanya muto:to, nagenda mu musi gunu ogutogwa Naini. Abe:igisibwa bae nibagenda nage aamwi ne cise cinene. 12Wejire afugera kwirango ryo musi, rora, omufu:ye naurusibwa ku mwira, ari mwana ariga enyere:ra ku nyira, ke:nu ari mutumba, na ba:nu ba:fu aba mu musi ugwo bariga nage. 13Ratabugenyi wejire amurora, namufwira ecigongo, namubwira ati, Siga kurira. 14Nafugera kwiraro nariku:niako. Banu bariga bari:twikire nibe:me-reguru. Na:ika ati, Mumura, enikubwira ati, imuka. 15Omufu:ye oyo nenyanja namba okwaika. Namuyana nyiramwene. 16Obu:ba nibubagwata bo:ne, nibakusya Nyamuanga, niba:ika ati, Omuragi Omukuru a:me:muka mwiswe, na rindi ati, Nyamuanga abe:jiye aba:nu bae. 17No rukuma rwae niruswira mu Buyaudi yo:ne na mu:si yo:ne inu yariga isije:ne.
Yesu na:ika eja Yoana Omubatija
(Mt. 11:1-19)
18Mbe abe:igisibwa ba Yoana nibamubwira emisango ejo jo:ne. 19Yoana nabirikira abe:igisibwa bae babiri nabatuma ku Yesu, na:ika ati, ?Na:we unu ka:ja, tere amwi cirindirire undi? 20Mbe aba:nu abo wejire bakinga anu ariga:ri, niba:ika ati, Yoana Omubatija niwe acitumire kwawe, nabu:sya ati, ?Na:we unu ka:ja, tere amwi cirindirire undi? 21Mbe mu mwanya ogwo naosya ba:fu jindwara no kunya:ka, ne misambwa emibi:bi, na baofu ba:fu nabayana okurora. 22Yesu naindura na:ika ati, Mugende, Mubwire Yoana ebyo mwarora, nebyo mwongwa. Abaofu abarora, abarema abaribata, abagenge abaosibwa, abe:gare ba matwi abongwa, abafu:ye abasu:ka, abataka ababwirwa Ebigambo byo bwana. 23Na ka ana ribando unu atakunyiku:jurako.
24Jintumwa ja Yoana wejire bagenda, namba okwaika ne bise ku bya Yoana ati, ?Niki cinu mwajiraga mwibara okurora? ?Risa:ru rinu ryasingisibwaga omuyaga? 25?Nawe niki cinu mwajaga okurora? ?Omu:nu unu ariga afwae ebifwaro bye cire:re? Rora, banu abafwara ebye cire:re, na banu abarya ebiryo byo bwana, nibo be:kae mu nyumba ja bakama. 26?Nawe si niki cinu mwajaga okurora? ?Omuragi? Nimwo enibabwira ati, akirire muno omuragi. 27Oyo niwe andikiywe ati, Rora, anye enituma intumwa yani imbere yao, unu aricuma injira yao. 28Enibabwira ati, Mwabo abe:burwa abagasi, atarimo unu kakira Yoana obukuru. Nawe omuto:to mu bukama bwa Nyamuanga kamukira oyo. 29Na ba:nu bo:ne na baosya wejire bongwa, nibe:kirisya ati, Nyamuanga ni murenge:resi, nibo banu babatijibwe okubatija kwa Yoana. 30Nawe Abafarisayo na be:igisya be biragiro, nibarema ecirwaji ca Nyamuanga okuba batabatijibwe nage.
31Ratabugenyi na:ika ati, ?Mbe aba:nu ba riimbo rinu, nje nibasusanye na ki? ?Ka bari atiki? 32Bari rwa ba:na banu abenyanja mu sokoni, nibabirikirana niba:ika ati, Cababumira jikuri nimurema okubina. Nicirira jimamu, nimurema okurira. 33Okuba Yoana Omubatija ejire atarya biryo amwi atanywa manji ga mijabibu, nimwaika ati, Arina musambwa. 34Omwana wo mu:nu ejire narya no kunywa, nimwaika ati, Rora, omuru:ru unu no mukorwa, ni musa:ni wa batobesya na be bibi:bi. 35Obwenge obubona oburenge:resi kurwa ba:na babwo bo:ne.
Yesu mu nyumba ya Simoni Omufarisayo
36Mbe Omufarisayo umwi namubirikira okurya ebiryo nage. Nengira mu nyumba yo Mufarisayo oyo, neyanja ku biryo. 37Mbe omugasi unu ariga:ri mu musi umwo, unu ariga:ri mubibi. Oyo ejire amenya ati enyanjire ku biryo mu nyumba yo Mufarisayo, nare:ta kayabya ka mafuta amarange. 38Ne:mereguru enu arambirisisye, ku bigere byae narira, namba okumutonyisisya amasiga ku bigere byae, nabyeera jifwiri ja ku mutwe gwae, nanyunya ebigere byae nabibambaga amafuta ago. 39Mbe Omufarisayo oyo amubirikiye wejire arora, na:ika munda yae ati, Omu:nu unu kumba ariri muragi, akamenyere omugasi unu kamugwatako, ati ni we bibi:bi.
40Yesu na:ika ati, Simoni, ndina gunu enenda okukubwira. Na:ika ati, Omwiigisya, yaika. 41Ariga:rio mu:nu nari:sya amasi:ri, ariga na banu atongaga babiri. Oumwi namutonga jisiringi magana gata:nu, no undi makumi gata:nu. 42Mbe wejire baburwa eco kumuriya, nabe:swaririra bo:ne babiri. ?Mbe kwabo niga unu kamwenda muno? 43Simoni naindura na:ika ati, Eni:ganirisya nu:yo e:swaririywe jinyafu. Namubwira ati, Wabarira. 44Naindukira omugasi uyo, nabu:sya Simoni ati, ?Warora omugasi unu? Nengie mu nyumba yao, utananire manji go kwosya ebigere byani, nawe unu katonyisisya amasiga ku bigere byani nabyeera jifwiri jae. 45Awe utanyunyire, nawe unu anu nikengiriye acari kusiga kunyunya ebigere byani. 46Utambambagire mafuta ku mutwe gwani, nawe unu ambambaga amafuta amarange ku bigere byani. 47Kwenikora ninkubwira ati, E:swaririrwa ebibi:bi byae ebyafu, okuba okwenda kwae ni kwafu. Unu ke:swaririrwa bito:to, okwenda kwae one ni kuto:to. 48Namubwira omugasi uyo ati, We:swaririrwa ebibi:bi byao. 49Mbe banu bariga benyanjire nage ku biryo nibamba okwaika abe:ne:ra ati, ?Unu niga ke:swaririra ebibi:bi? 50Nabwira omugasi uyo ati, Okwikirisya kwao kwakuonya. Genda no murembe.
Currently Selected:
Luka 7: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
