Matayo 17
17
Yesu nainduka orususo
(Mk. 9:2-13; Lk. 9:28-36)
1Jejire jaturao siku ita:nu na rumwi, Yesu nagega Petero na Yakobo na Yoana owabo, nabasira ku ci:ma ecire:ra benyere. 2Nainduka orususo rwae imbere yebwe, obusu bwae nibuse:kana rwa risu:ba ebifwaro byae nibyera rwo mumwi. 3Mbe Musa na Eliya nibababonekera niba:ikana nage. 4Petero naindura nabwira Yesu ati, Ratabugenyi, Ni kwa bwana eswe okuba anu. Ukenda nije numbake anu ebiuna bisatu, ecimwi cao, ecindi ca Musa, ecindi ca Eliya. 5Anu ariga aca:ika eri:re ryo bweru niribasiri:gisya. Mbe oburaka nibuso:ka mu rwire nibwaika ati, Unu niwe Omwana wani unu nendere, unu nikondereywe muno, nimumungwe. 6Abe:igisibwa bae bejire bongwa nibagwa bwifumbike, mbo:baya muno. 7Yesu na:ja nabagwatako na:ika ati, Mwimuke, musige ku:baya. 8Bejire be:namusya ame:so gebwe, batarorere mu:nu, tari Yesu enyere:ra.
9Anu bariga bace:ka ku ci:ma, Yesu nabakomeresya ati, Mutaja kubwirako mu:nu wo:ne binu mwarora, kukinga Omwana wa mu:nu runu arimara okusu:ka mu bafu:ye. 10Abe:igisibwa bae nibamubu:sya niba:ika ati, Kambe niki cinu nasorere niba:ika ati, Eliya ni busi busi atangate oku:ja? 11Yesu naindura nababwira ati, Ni Cimari Eliya aritangata oku:ja, aricuma byone. 12Nawe enibabwira ati, Eliya aramarire oku:ja, nawe batamumenyere, bamukoree kutyo bendaga. Nikwo kutyo one Omwana wo mu:nu barimunyasya. 13Niwo abe:igisibwa nibasombo:kerwa ati, Agwekwaika nabo ebya Yoana Omubatija.
Yesu nakisya akamura ake citwe
(Mk. 9:14-29; Lk. 9:37-43)
14Bejire bakinga ku cise, omu:nu namu:jako namufukamira, na:ika ati, 15Ratabugenyi, Mufwire cigongo Omwana wani, okuba kagwa ecitwe, ecimunya:sya muno. Kwiya ka:fu kagwa mu muriro na mu manji one kwiya ka:fu. 16Namure:tera abe:igisibwa bao, nawe batamibwa okumuosya. 17Yesu naindura na:ika ati, Emwe aba riimbo rinyate:kirisya ne ri:ki:ke! ?Ndikingya:ri okuba nemwe? ?Ndigumirisya nemwe kukingya a:ki? Mumunde:tere anu. 18Yesu nagonya omusambwa, nigumuso:kamo, omumura oyo naora mu mwanya ogwo. 19Mbe abe:igisibwa niba:ja ku Yesu mu bwitebe, niba:ika ati, ?Niki cinu cacibusya eswe okuguirisya? 20Nababwira ati, Kurwo kugerukirwa okwikirisya kwemwe. Okuba ni cimari enibabwira ati, Mwakabee no kwikirisya rwa inje ya karadari, mwakabwiriye eci:ma cinu ati, So:ka anu uje eriya, mbe cakagendere. Kumba citario ci:nu cinu ecibatamya. 21(Nawe ogwejabo gunu gutakuso:kamo tari kurwo kusabwa no kusara:rira.)
Yesu na:ika okufwa no kusu:ka kwae
(Mk. 9:30-32; Lk. 9:44-45)
22Anu bariga bace:kae mu Galilaya, nababwira ati, Omwana wo mu:nu kajo:tu:rwa mu maboko ga ba:nu. 23Barimwita, na ku rusiku rwa kasatu arisururwa. Nibasurumbara muno.
Yesu natoba rigoti
24Be:jire bakinga Kaperinaumu banu basorosyaga rigoti rya mu yekaru niba:ja ku Petero niba:ika ati, ?Omwiigisya wemwe atakuso:sya rigoti rya mu yekaru? 25Na:ika ati, Kaso:sya. Ejire engira mu nyumba Yesu namwamba namubu:sya ati, ?Owiganirisya atiki, Simoni? ?Abakama ba i:si abao:sya amwi abasorosya ku ba:nu ki? ?Ku ba:na bebwe, tere ku bamaanga agandi? 26Na:ika ati, ku bamaanga. Yesu namubwira ati, Mbe aba:na bebwe ni be:bure. 27Nawe cisige kube:ku:jusya, genda ku mwaro we:se rirobo, jeugege iswi inu iratangata okwikoma. Uka:samya omunwa gwayo, oujo:bonamo syekeri#uti siringi 5. ujo:igege ubayane icimare anye na:we.
Currently Selected:
Matayo 17: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
