Matayo 27

Yesu imbere ye ci:na ca Pilato

(Mk. 15:1-5; Lk. 23:1-5; Yo. 18:28-40; 19:1-15)

1Nawe wejire bwaca, abagabisi abakuru bo:ne na bakaruka ba ba:nu nibarwajira aamwi ebya Yesu, korereki bamwite. 2Nibamuboya nibamugega nibamusira ku Pilato omusi:ba.

Okufwa kwa Yuda Iskariota

3Mbe Yuda, unu amuromee iniku, wejire arora ati eci:na cae cabutuka, ne:garura, nasubisya abagabisi abakuru na bakaruka jimpirya jiriya amakumi agasatu, 4Na:ika ati, Namanyamura okuromera iniku amanyinga ganu gatana cikayo. Nawe abene nibamubwira ati, ?Ago eswe gacija:mo:ki? Awe na:we uragabona. 5Jimpirya naje:sa mu yekaru, nauruka nagenda nenyiga. 6Nawe abagabisi abakuru nibagega jimpirya ejo, niba:ika ati, kuganyisye okujitu:ra mwibikiro rya mu yekaru, okuba ni bugusi bwa manyinga. 7Nibarwaja nibaguramo risambu ryo mumogi eryo kusi:kagamo abagenyi. 8Risambu eryo nikwo ryakorere niritogwa, risambu rya manyinga, na ka ori. 9Mbe niwo nicikumira cinu ca:ikirwe no muragi Yeremia ati,

Nibagega jimpirya makumi gasatu,

Nibwo obugusi bwa unu baromee obugusi,

Unu baromee obugusi mu ba:na ba Israeli.

10Nibajiguramo risambu ryo mumogi, rwa kutyo Ratabugenyi andagiriye.

Yesu imbere ya Pilato

11Mbe Yesu nemereguru imbere yo musi:ba. Omusi:ba namubu:sya ati, ?Na:we Omukama wa Bayaudi? Yesu na:ika ati, Awe wa:ikire. 12Abagabisi abakuru na bakaruka be:jire bamubu:ra, atainduye na katyari. 13Mbe Pilato namubu:sya ati, ?Utakungwa emisango myafu jinu abakubu:ra kutyo jiri? 14Omwene atamuinduye nakabee guri musango gumwi, omusi:ba ndijei narugu:ra muno. 15Nawe ku siku ja marya omusi:ba ariga ana ntungwa yo kubasurumurira aba:nu omuboywa umwi unu bendaga. 16Mbe bariga no muboywa omukumu:ke mu siku ijo, natogwa Baraba. 17Be:jire be:kofyanya, Pilato nababu:sya ati, ?Omwenda nibasurumurire wuya? ?Baraba, tere Yesu unu katogwa Kristo? 18Okuba ariga amenyere ati bamugwatiye rwiso. 19Nawe e:jire enyanja ku citebe co kuramurira, omugasi wae namutumira intumwa na:ika ati, Utaja kuba nage musango omu:nu oyo omurenge:resi, okuba nanya:sibwa muno mu ciro:to kubwae. 20Nawe abagabisi abakuru na bakaruka nibakongya ebise korereki basabwe Baraba, bamusimagisye Yesu. 21Omusi:ba naindura nababu:sya ati, ?Ku babiri banu omwenda nibasurumurire:ga? Niba:ika ati, Baraba. 22Pilato nababu:sya ati, ?Kambe Yesu unu katogwa Kristo, nije nimukore kutiki? Bo:ne niba:ika ati, Abambwe ku musaraba. 23Omwene nabu:sya ati, ?Kubaki, cikayo ki cinu akorere? Nawe nibeyongesya okuyombayomba, niba:ika ati, Abambwe ku musaraba.

24Nawe Pilato e:jire arora ati, atakutura musango, na ka nibagumo:kuyomba, nagega amanji, ne:sa:ba imbere ye cise, na:ika ati, Anye nitana cikayo ku manyinga go mu:nu unu omurenge:resi. Mubirore emwe abene. 25Aba:nu bo:ne nibaindura ati, Amanyinga gae gabe kwiswe na ku ba:na beswe. 26Mbe nabasurumurira Baraba, nawe nasanya Yesu jisanyu, namuso:sya korereki abambwe ku musaraba.

Abasirikare nibajimya Yesu no kumunya:sya

(Mk. 15:16-20; Yo. 19:1-3)

27Mbe abasirikare bo musi:ba nibasira Yesu mu nigo rwo musi:ba, mbamwikofyanyisya:ko ese:mu:ta ryone. 28Nibamufu:ra ebifwaro, nibamufwafya omwenda omutukurasi. 29Nibaruka orutenga orwa mawa, nibamufwafya ku mutwe, nibata risaru mu kuboko kwae okwe buryo, nibafukama imbere yae mbamujimya niba:ika ati, Kasinge, Omukama wa Bayaudi! 30Nibamufuburira amafwefu, nibagega risaru rirya, nibamu-bumira mu mutwe. 31Be:jire bamara okumujimya, nifamufu:ra omwenda nibamufwafya ebifwaro byae, nibamusira okumubamba ku musaraba.

Yesu nabambwa ku musaraba

(Mk. 15:21-32; Lk. 23:26-43; Yo. 19:16-27)

32Anu bariga bacauruka, nibabonana no mu:nu Omukurene, risi:na ryae Simoni. Oyo nibamusinyirisya okwitwika omusaraba gwae. 33Be:jire bakinga anu atogwaga Gologoat, obugajuro bwaco ati, Aweciyanga, 34Nibamuyana okunywa isiki#isiki ni manji ga matwasyo gakorerwe busangʼarare. isasisyemo induru, nawe e:jire arabako naremo:kunywa. 35Be:jire bamara okumubamba ku musaraba, nibagabana ebifwaro byae, nibe:tongya korereki cikumire cinu ca:ikirwe no muragi ati,

Bagabene ebifwaro byani na ku kanju yani nibe:tongya.

36Nibenyanja ao nibamurore:rera. 37Nibatu:ra inguru yo mutwe gwae intambara yae inu yandikirwe ati, unu niwe Yesu omukama wa Bayaudi. 38Mbe abasa:kusi babiri nibabambirwa aamwi nage, oumwi ku kuboko kwe buryo, no undi ku kwe bumosi. 39Na banu baitiŋanaga nibamufuma, nibasingisya emitwe jebwe, 40Niba:ika ati, Awe rufumya yekaru, unu kayumbakira mu siku isatu, iwonya. Araba uri Mwana wa Nyamuanga, yika okuso:ka ku musaraba. 41Abagabisi abakuru na bakaruka na bandiki one nyaburiko nibamugomberera niba:ika ati, 42Aonyaga abandi, atakutura kwionya omwene. Akaba niwe Omukama wa Israeli, ne:ke woryanu aso:ke ku musaraba, neswe jecimwikirisye. 43Eikanyisye Nyamuanga, na:mukisye wori araba kamwenda, okuba aikire ati, Anye ndi Mwana wa Nyamuanga. 44Abasa:kusi banu babambiywe aamwi nage abene one nibamufuma kutyo.

Okufwa kwa Yesu

(Mk. 15:33-41; Lk. 23:44-49; Yo. 19:28-37)

45Nawe okuso:ka mu saa eta:nu na imwi, cabee cisu:te ku ca:ro co:ne kukinga ku saa ya kata:nu na kana. 46Omwanya wejire gweya uti saa eta:nu ne:na, Yesu na:ikirira inguru na buraka bunene, na:ika ati, Eli, Eli, rama sabakatani? Obugajuro bwagwo ati, Nyamuanga wani, Nyamuanga wani, ?wansigira ki? 47Nawe abandi banu bariga bemereguyu awo, niba:ika ati, Unu kabirikira Eliya. 48Aonao owe:ja:bo oumwi nabirima, nagega rifwo, nari:jusya isiki, naritu:ra kwisa:ru, namunywesya. 49Ka bandi niba:ika ati, Siga cirore araba Eliya kajo:ku:ja okumukisya. 50Mbe Yesu e:jire amara okuragirisisya inguru rindi, naso:sya omwoyo gwae. 51Mbe rora, risaenge rya mu yekaru niritemukamo maba:ra gabiri, kuso:kerera inguru kukinga emwaro. I:si ni:yarara na jitare nija:tika. 52Ji:fwa niji:guka. Nijisu:ka emibiri myafu eja be ru banu bariga bama:mire, 53Nibaso:ka mu fwa e:jire amara okusu:ka, nibengira mu musi omweru, nibabonekera ba:fu. 54Nawe uriya Omukuru wa basirikare na bariya bariga nage nibamurinda Yesu, be:jire barora eciyararo ca i:si, na binu byabeeo, nibo:baya muno, niba:ika ati, Unu ariri Mwana wa Nyamuanga cimari.

55Barigao na bagasi ba:fu banu bemereguyu kura nibarore:rera, banu baru:baga Yesu kuso:ka Galilaya, banu bamufurubenderaga. 56Mwabo arigamo Maryamu Magadalene, na Maryamu nyira Yakobo na Yose, na nyiramwene na nyiramwene aba:na ba Jebedayo.

Okusi:kwa kwa Yesu

(Mk. 15:42-47; Lk. 23:50-56; Yo. 19:38-42)

57Kwejire kwaba kegoro, na:ja omu:nu omuni:bi unu aso:kere Arimataya, risi:na ryae Yusufu, one ariga:ri mwiigisibwa wa Yesu. 58Oyo nagenda ku Pilato, nasabwa ecitundu ca Yesu. Pilato naragirira okumuciyana. 59Yusufu nagega ecitundu, nacisinga mu mwenda gwa ibafuta inyeru kobokobo. 60Nacita mu:fwa yae inyaya, inu ariga asimbire ku rutare. Nasiringisya ribui enene, naritu:ra ku muryango gwa i:fwa nagenda. 61Ariga:rio Maryamu Magadalene na Maryamu oundi, benyanjire basomekene na i:fwa.

Okurindwa kwa i:fwa

62Nawe mwejo, nirwo orusiku runu oruru:bira orwo kwira:ba, abagabisi abakuru na Bafarisayo nibe:kofyanyisya ewa Pilato. 63Niba:ika ati, Mukaruka, ce:cuka omubei uyo a:ikire acari muanga ati, Ariba jaturao siku isatu ndisu:ka. 64Mbe ragirira barinde kata i:fwa kukinga ku rusiku rwa kasatu, korereki abe:igisibwa bae basiga kwifura nibamwiba, mbabwira aba:nu ati, Asu:kire mu bafu:ye no kubeya kwa ku bute:ro oku-jo:kira okwo kwamba. 65Pilato nababwira ati, Muri na bari:si, mugende muirinde katakata rwa kutyo omutura. 66Nibagenda nibarinda Kata i:fwa. Ribui nibaritu:rako ecibarikisyo na bari:si one bario.

Currently Selected:

Matayo 27: KIJ1960

Highlight

Copy