Mariko 1

Okusimura kwa Yoana Omubatija

(Mt. 3:1-12; Lk. 3:1-18; Yo. 1:15-28)

1Obwambiro bwe Misango jo bwana eja Yesu Kristo Omwana wa Nyamuanga. 2Rwa kutyo jandikirwe no muragi Isaya ati,

Rora entituma intumwa yani imbere yao,

3Riraka rya unu ka:ikirira inguru mwibara ati,

Nimucume injira ya Ratabugenyi, mwimye jinjira jae.

4Yoana naja nabatija mwibara, nasimura ebyo kubatija kwo kuta okwo kwiswaririrwa ebibi:bi.

5Eca:ro co:ne eca Buyaudi, na bende Yerusalemi bo:ne nibe:muka, nibaja anu ariga:ri, nababatija mu musima gwa Yorodani, nibe:gamba ebibi:bi byebwe. 6Yoana afwaraga obwose bwa ingamira, no rukoba rwo rwai mu cibunu cae, naryaga jinsige no bu:ki bwa mwibara. 7Nasimura na:ika ati, Ariwo Unu ka:ja inyuma yani, unu ankirire amanaga. Oyo anye nite:ire kwinama okugesya orukoba rwe bikwirya byae. 8Anye enibabatija mu manji, nawe Oyo aribabatija mu Mwoyo Mweru.

Okubatijibwa no kusakwa kwa Yesu

(Mt. 3:13-17; 4:1-11; Lk. 3:21-22; 4:1-13)

9Mu siku ijo Yesu naso:ka Najareti ya Galilaya, naja okubatijibwa na Yoana mu Yorodani. 10Ejire asyoka mu manji, aonao narora orwire niruba:ruka, no Mwoyo Mweru namwikira mu rususo rwa injiba, 11Oburaka nibuso:ka mu rwire nibwaika ati, Na:we Omwana wani omwendwa, unu ounkondisya muno. 12Aonao Omwoyo namusira mwibara. 13Nabe:yo mwibara siku makumi gana, nasakwa na Syetani. Naba aamwi na matyanyi amaruru. Bamaraika mbamufurubendera.

Yesu nabirikira abe:igisibwa

(Mt. 4:12-25; Lk. 4:14-15; Lk. 5:1-11)

14Yoana wejire amara okutu:rwa mwiboero, Yesu naja Galilaya, nasimura Emisango jo bwana eja Nyamuanga, 15na:ika ati, Omwanya gweya. Obukama bwa Nyamuanga bwafugee. Nimute, mwikirisye Ebigambo byo bwana.

16Nabarama ku nyanja ya Galilaya, narora Simoni na Andereya omumura wabo nibe:sa rigo:be mu nyanja, okuba bariga bategi. 17Yesu nababwira ati, Muje mundu:be, anye ndibakora kuba bategi ba ba:nu. 18Aonao nibasiga rigo:be ryebwe nibamuru:ba. 19Wejire afugerayo imbere kuto:to narora Yakobo mwana wa Jebedayo, na Yoana owabo, bari mu bwato niba-sobo:ra rigo:be ryebwe. 20Aonao nababirikira. Nibasigao Jebedayo esemwene mu bwato aamwi na bakosi bo muye:ro, nibamuru:ba.

Yesu naosya ba:fu

(Mt. 8:14-17; Lk. 4:31-41)

21Nibengira Kaperinaumu. Aonao nengira mu rikofyanyisyo ku rusiku rwa isabato, ne:igisya. 22Niba-taŋaŋara kurwo kwiigisya kwae, okuba abe:igisyaga rwo niu:nu unu amenyere kata, tari rwa bandiki. 23Ari-ga:rimo mu:nu ano musambwa mujabi mu rikofyanyisyo, nakunga, 24na:ika ati, ?Ecifuno niki eswe na:we, Yesu wende Najareti? ?Wejire okusimagisya? Nikumenyere awe, uri Mweru wa Nyamuanga. 25Yesu nagugonya na:ika ati, Jibira, umuso:kemo. 26Omusambwa omujabi nigumugaragasya, nigukungira inguru, nigumuso:kamo. 27Nibataŋaŋara bo:ne, nibabu:syanya niba:ika ati, ?Niki cinu? Ni kwiigisya kuya:ya. Naragirira emisambwa emijabi na managa nijimungwa. 28Aonao orukuma rwae niruswira eca:ro eco co:ne ca Galilaya.

29Wejire bauruka mu rikofyanyisyo, nibengira aonao mu nyumba ya Simoni na Anderea aamwi na Yakobo na Yoana. 30Mbe nyabuko Simoni ariga ama:mire arwae ebiri. Aonao nibamubwira kutyo ari. 31Naja namugwata okuboko namwimusya. Ribiri ndimuso:kako nabafurubendera.

32Wejire kwaba ke:goro, risu:ba ryaguye, nibamure:tera abarwae na banu bariga baungirwe emisambwa. 33No musi gwone nigwikofyanyisya ku muryango. 34Nabaosya ba:fu banu bariga barwae jindwara jindi na jindi, nairisya emisambwa myafu. Najiingirira okwaika okuba jariga jimumenyere.

35Namweja katondo curicuri, nagenda mwibara, nasabirwa eyo. 36Simoni na be:ja:bo nibamuru:ba. 37Nibamubona nibamubwira ati, Bo:ne abakuyenja. 38Nababwira ati, Cigende na andi mu misi jinu jiri yei, korereki nisimure eyo one, okuba eco nico cande:tere. 39Nasimura mu mekofyanyisyo gebwe mu Galilaya yo:ne, nairisya emisambwa.

Yesu naosya omugenge

(Mt. 8:1-4; Lk. 5:12-14)

40Omugenge namu:jako, namuremberesya namufukamira, na:ika ati, Ukenda, outura okumosya. 41Yesu namufwira ecigongo, nagorora okuboko kwae, namukuniako, namubwira ati, Enenda. Uore. 42Aonao ebigenge nibimuso:kako, naora. 43Yesu namukomeresya muno, aonao namuku:ra, 44namubwira ati, Wikenge utabwirako mu:nu, nawe genda wiyeresye ku mugabisi, ugwate ebyo kwerera kwao, binu Musa aragiriye, rube rusingiro ku bene. 45Nawe nauruka, namba okusimura no kukumusya omusango ogwo, ndijei Yesu natamibwa okusuba okwingira mu musi ogwo abweru, nawe ariga:ri emwira mwibara. Nibamutako kuso:kerera mbara jo:ne.

Currently Selected:

Mariko 1: KIJ1960

Highlight

Copy