Kuyamba 43
43
Akulu wa Jozefi am'bwelela ku Ijipiti na Bhenjemani
1Njala idakula mudziko la Kenani. 2Paadadya chakudya chaadabwela nacho kuchoka ku Ijipiti, apayi wawo adati, “Yendani pomwe mukagule chakudya ching'ono-ng'ono.”
3Koma Judha adati kwaapayi wake, “Mwamunayo adatichenjezelatu, adati, ‘Mun'zawona lini nkhope yangu, kunja kwakuti mwabwela namung'ono wanu.’ 4Koma mukatituma pabodzi namung'ono wathu, tiniyenda kakugulilani chakudya; 5koma mukalamba kuti tiyende naye, nayisembo pomwe tiniyenda lini, pakuti mwamunayo adati, ‘Mun'zawona lini nkhope yangu, kunja kwakuti mwabwela namung'ono wanu.’ ”
6Izraeli adati, “Mudachitilanyi bzakuyipa tenepo? Thangwe lanyi mudawuza munthuyo kuti muna mung'ono wanu munango?” 7Iwo adati, “Mwamuna umweyo adatibvunzisisa, adazabvunza nabzaabale wathu, adazatibvunzambo pomwe nabzayimwe adati, ‘Ko apayi wanu achali wamoyo? Ko muna munango mung'ono wanu?’ Nakutenepo tikhandodayila bzaakhatibvunza, tilibe kudziwa kuti iye achati bwelani namung'ono wanu.”
8Judha adati kwaapayi wake Izraeli, “Tipaseni Bhenjemani tiyende naye, kuti imwe nayise nawana wathu tileke kufa nanjala. 9Ine chadidi-chadidi ndichawona kuti ali bwino. Ndikaleka kubwela naye, mulandu uzakhale payine. Ndikaleka kubwelela naye kwayimwe, mulandu umwewo uzakhale kwayine kufika lini nalini. 10Pakuti ninga tilibe kutaya nthawe, tikhadatobwelela kawili kentse.”
11Pamwepo apayi wawo Izraeli adati, “Peno ntenepo mungachite tenepo, nkuluyo mumutakulilembo michelo yabwino yamudziko m'masakha yanu, muyendesele munthuyo mpfupo, tubhalumu, natuwuchi, nagumu, namula, namanduwi yapisitachiyo namaalimondi. 12Izraeli adawuza wana wake kuti atakule masheleni yakukagula nayo chakudya namasheleni yaadawona m'masakha yawo. Pakuti bzidachitikabzo panango kukhali kuphonya kwaanyakugulisa. 13Takulani mung'ono wanuyo muyende pomwe kwamwamuna umweyo. 14Mulungu Nyam'phamvu zentse, achite kuti mwamunayo akakuchitileni chifundo, akakubvumileni kukabwelela na Bhenjemani na Simiyoni. Ndikatayikidwa nawana wangu, ndatayikidwa.”
15Nakutenepo amunawo adatakula mpfupo zaakhadapasiwa namasheleni yakukagula nayo chakudya nayakukabweza. Adasumuka nkuyenda ku Ijipiti pabodzi namung'ono wawo Bhenjemani, adafika achiwonana na Jozefi. 16Tsapano Jozefi paadaawona kuti akhana mung'ono wawo Bhenjemani, iye adati kwamulanda akhanyanganila munyumba mwake, “Yenda nawanthu awa kunyumba kwangu, ukaphe chifuwo uphike chakudya, pakuti lelo masikati achadya nayine kunyumba kwangu.” 17Mwamunayo adachita bzaadawuziwa na Jozefi, adayenda nawo wentse kunyumba kwa Jozefi.
18Amunawo paadayendesewa kunyumba kwa Jozefi adagopa kwene-kwene, iwo adati, “Kuno tabweleselewa masheleni yadayikhiwa mumasakha yathu pawulendo watidabwela pakuyamba. Watibwelesa kuno kuti atimange atichite alanda wake, achititolela madhonki yathu.” 19Nakutenepo adazayenda kwawakuyanganila munyumba mwa Jozefi nkulewa-lewa naye ali pansuwo wanyumba. 20Iwo adati, “Mbuye wathu, nkakuyamba lini kubwela kuzagula chakudya, 21koma patidayima kuti tigone, tidatsudzula mitolo yathu nkuwona masheleni yamunthu yekha-yekha musakha lamuthu yekha-yekha, yentse yakukwana. Lelo tabwela nayo masheleni yamweyo. 22Tabwela namasheleni yakugula nayo chakudya. Koma tilibe kudziwa kuti masheleni yatidawona mumasakha yathu yadayikhiwa nayani.”
23Mwamunayo adati, “Lekani kugopa, Mulungu wanu, Mulungu waapayi wanu, ndiye adakuyikhilani masheleni yamweyo mumasakha yanu. Ndine ndidayatambila masheleni yanu.” Pamwepo adabwelesa Simiyoni kwayiwo. 24Mulanda umweyo adayenda nawo kunyumba kwa Jozefi. Adaapasa madzi achisamba minyendo yawo. Adapasa madhonki yawo chakudya. 25Amunawo adakonzeka mpfupo zawo zakuzapasa Jozefi, pakuti adabva kuti achabwela masikati achizadya nawo pabodzi. 26Jozefi paadapita munyumba, amunawo adamutambila achimpasa mpfupo zawo. Adakotama pantsi patsogolo pake. 27Jozefi adaabvunza utano, adati kwayiwo, “Ko apayi wanu wamudati akalamba ali tani? Ko achana moyo?”
28Iwo adati, “Mulanda wanu, apayi wathu ali bwino, achana moyo.” Adamukotamila achimulemekeza. 29Jozefi adanyangana nkuwona mung'ono wake Bhenjemani, mwana waamayi wake, iye adati, “Ko uyu ndiye mung'ono wanu wakumalizila wamudandiwuza? Mulungu ngaakubvele ntsisi mwanangu.” 30Pamwepo Jozefi mwakukulumiza, adapsaga mbuto yakulilila, pakuti ntima wake ukhadasuwa mung'ono wake. Adapita muchipinda chankati achikalila m'mwemo. 31Adasamba kumaso nkubula. Pamwepo iye adabzilimbisa, adati, “Pakulani chakudya.” 32Jozefi adampakulila payekha, iwombo pawokha, wanthu wachi Ijipiti waakhadya nawo, pawokhambo, thangwe lakuti wanthu wachi Ijipiti akhadya lini chakudya naa Hebheru, pakuti nichinthu chinyantsa kwaa Ijipiti. 33Abale wake adakhala adanyanganana na Jozefi, kuteyeza kubadwa kwawo kuchoka kwawakuyamba kufika kwawakumalizila, paadawona kuti ndiko kukhala kwaakhadachita adakankhamuka. 34Chakudya chikhapakuliwa chichichoka pathebulu ya Jozefi. Koma chakudya cha Bhenjemani chikhali chizinji kupita chawo kampetewa kashanu. Nakutenepo adamwa, nkuledzela nkukondwa pabodzi na Jozefi.
Currently Selected:
Kuyamba 43: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
