Wa̍lta̍ Wānāa̍ Chi̍i̍sūa̍a̍ 19
19
Pɔ̍ɔ̍l di̍mi̍ sūɛ̍i̍ Mɛ̄lɛ̄kɛ̍i̍ Ɛ̍fi̍sīā
1Bōōndi̍i̍ A̍pɔ̍lɔ̄ɔ̄ wa̍ Kɔ̍līŋ nde̍, Pɔ̍ɔ̍l ndu̍ wa̍ bālɔ̄ɔ̍ o̍ lɛ̄ŋnde̍ŋ bā lūāŋ ndo̍. Mbo̍ fūūlūū Ɛ̍fi̍sīā. Mbo̍ kōmāl wānāā lāāla᷄ŋnda̍ ā pūm lo̍ŋ. 2Mbo̍ nyūnā nda̍ āā, “Sīmnɔ᷄ŋ nya̍ sīmnu᷄ŋ wa̍nāā lāāla᷄ŋ ndo̍, Nyi̍na̍ Mɛ̄lɛ̄ka̍a̍ ndu̍ o̍o̍ to᷅l nya̍ kɔ̄ɔ̄lī?”
Ma̍ mūlī āā, “Ŋ̄ tūi̍i̍ yɔ̍ le̍pi᷅lɛ̍ bɛ̍ɛ̍ māā Nyi̍nā Kāsīo̍o̍ chō le̍.”
3Mi̍ Pɔ̍ɔ̍l nyu̍nā āā vɛ̄ɛ̍nɛ̍, “Yīŋɔ̄ɔ̄ māā vɛ̄ɛ̍nɛ̍ nya̍ sɔ̄la̍ yɛ̄ ni᷅ŋ?”
Ma̍ mūlī āā, “Yīŋɔ̄ɔ̍ Chɔ᷄ŋ Wānā Yi̍ŋāa̍ pɛ̍ɛ̍kū wāŋnda̍ wo̍.”
4Mi̍ Pɔ̍ɔ̍l di̍mūl nda̍ āā, “Yīŋɔ̄ɔ̍ Chɔ᷄ŋ ndo̍ ō wa̍ māwāā le̍ wānāa̍ ma̍l yɔ̄ŋndā ndāla̍ wɔ̍ɔ̍ŋnda̍ŋ nda̍. Ndu̍yɛ̍, mi̍ Chɔ᷄ŋ di̍mūl wāŋnda̍ I̍sɔ̄lūɛ̄ī māā ā lāāla̍ŋ a̍ wāna̍ cho̍ hūnɔ̄ɔ̄ ndu̍ kɔ̄ɔ̄lī wo̍. Ko̍ŋ cho̍ ni̍, ā lāāla̍ŋ a̍ Chi̍i̍sū.”
5Mɛ̄ɛ̍ wānāā lāāla᷄ŋnda̍ ha̍ā tūēī nyɛ̄ Pɔ̍ɔ̍l di̍mi̍ wo̍, ma̍ pīāl dīōla̍ Māsānɔ̄ɔ̍ Chi̍i̍sūla̍ŋ ma̍ sɔ̄lā yīŋɔ̄ɔ̍ Mɛ̄lɛ̄ka̍a̍. 6Ndu̍yɛ̍, mɛ̄ɛ̍ Pɔ̍ɔ̍l ha̍ndū nda̍ bāla̍ŋ chōo̍, mī Nyi̍na̍ Mɛ̄lɛ̄ka̍a̍ tūāl nda̍ kɔ̄ɔ̄lī. Ma̍ sūāā o̍ sɔ̄ɔ̍ŋ ma̍ŋgālāŋ chēle̍ŋ ni᷄ŋ. Ndu̍yɛ̍ o̍ ko̍ŋ kɔ̍ɔ̍lī, mi̍ wānāā lāāla᷄ŋnda̍ ha̍ā ā dīmūl wāŋnda̍ yōōŋgu̍ Mɛ̄lɛ̄ka̍a̍. 7Nda̍ a̍a̍ wā fa̍ū fa̍ū, pūa̍a̍ ŋ̄ wāŋ tɔ̍ a̍ wānāā ŋīɔ̍ɔ̍ŋ.
8Le̍ pāŋgo̍ŋ ŋ̄ ŋgāa̍ Pɔ̍ɔ̍l cho̍ kɔ̄la̍ŋ o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ mbō sūāā nāa̍ wāŋnda̍ chūā kpe̍nde̍ke̍le̍. Ndu̍yɛ̍, nda̍ nda̍ā ma̍ sūūki̍āŋ le̍ mī ndu̍ o̍o̍ to̍sa̍ mā la̍a̍la̍ŋ māā nyɛ̄ o̍ wa̍ dīmīo̍o̍ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄ wo̍ chō tōnya̍. 9Kɛ̍, ā pūm ā wa̍ nda̍ tɛ̄ɛ̄ŋ nda̍ a̍a̍ nɔ̍ nīlā kālu̍la̍ŋ. Ā chɛ᷄l mā lāāla̍ŋ te̍. Ma̍ sāā dīōmndā wɔ̄ɔ̍ŋnda̍ŋ dīmīo̍o̍ wāŋnda̍ kpo̍u̍ o̍ hɔ̄l a̍ nɛ̄ī Chi̍i̍sū chɔ̍m wāŋnda̍ le̍ wāa̍ lēchōo̍ wo̍ o̍kɔ̄ɔ̄. Le̍ he̍ī, mi̍ Pɔ̍ɔ̍l fa̍ŋa᷄ŋ nda̍ kɔ̄ɔ̄lī. Mbo̍ chūā wānāā o̍ mu̍li̍ o̍ Mɛ̄lɛ̄ka̍ lo̍ wa̍ ma̍ kūānu᷄ŋ. Mbo̍ hīāū lāchī a̍ kɔ̄la̍ŋ o̍ chīɛ̄ī Tālu̍a̍nɔ̄ɔ̄ pɛ̍ɛ̍kū wāŋnda̍ wo̍ lēpāa̍ o̍ lēpāa̍. Mbo̍ sūūki̍āŋ ā wāŋnda̍ lo̍ŋ. 10Le̍ wɔ̄sīla̍ŋ lā tīɔ̍ɔ̍ŋ ō chō he̍ī tōsāa̍. O̍ ko̍ŋ, mi̍ wāŋnda̍ fa̍ū o̍ būŋgɛ̄ī E̍e̍sīāve̍ ni᷄ŋ a̍ tu̍ɛ̍ī yōōŋgōo̍ a̍ Māsānɔ̄ɔ̍ Mɛ̄lɛ̄ka̍ o̍kɔ̄ɔ̄, Chu̍ūnɔ̄ ni̍, wānāa̍ cho̍ a̍ Chu̍ū le̍ wa̍ ni̍.
Nyɛ̄ pūa̍a̍ Si̍kɛ̍vā wa̍ ā tōsa̍ wo̍
11Mi̍ Mɛ̄lɛ̄ka̍ tōsā mi̍ Pɔ̍ɔ̍l wa᷅ ka̍a̍ma̍ālā bɛ̄ndūla̍ŋ tōsāa̍. 12Yɛ̄ŋgi̍sɛ̄i̍ Pɔ̍ɔ̍l ndu̍ o̍o̍ wɔ̍ɔ̍sūŋ ndo̍ a̍ kōla̍ ndu̍ o̍o̍ yi̍i̍nūŋ o̍ nyɛ̄la̍ŋ chōo̍ le̍ wa̍llo̍ wo̍ bɛ̍ɛ̍, wānāā lānāāwa̍ kɔ̄la̍ŋ hāndɔ̄ɔ̍ chōo̍ mī nāālā ndāla̍ŋ lā sīāŋgū. Ndu̍yɛ̍, mā fāŋā nyi̍nāā wɔ̄ɔ̍ŋnda̍ wāŋnda̍ kɔ̄ɔ̄lī. 13Kɛ̍, Chu̍ūwa̍ ā pūm ā wa̍ ma̍ wā bālɔ̄ɔ̍ nyi̍nāā wɔ̄ɔ̍ŋnda̍ tōūwɔ̄ɔ̍ wāŋnda̍ kɔ̄ɔ̄lī. Ma̍ kīndī le̍ dīōla̍ Māsānɔ̄ɔ̍ Chi̍i̍sūla̍ŋ pīɔ̄lɔ̄ɔ̍ o̍ nyi̍nāā wɔ̄ɔ̍ŋnda̍ tōūwɔ̄ɔ̍ ni᷄ŋ. Ā kūɛ̄ pɛ̍, ā dīmūl nyi̍nā wɔ̄ɔ̍ŋndo̍ āā, “I̍ cho̍ nu̍m dīmūl o̍ dīōla̍ Chi̍i̍sūla̍ŋ ni᷄ŋ, ō Pɔ̍ɔ̍l cho̍ wāŋnda̍ dīmūllo̍ a̍ ndu̍ o̍kɔ̄ɔ̄ wo̍ āā, fa̍ŋa̍ŋ.” 14Po̍ Pi᷅lɛ̍ wa̍, dīōla̍ŋ Si̍kɛ̍vā. Māsa̍ wānāā sōlīāā lāsa̍lāa̍ o̍ wa̍ ni̍. Ndu̍ o̍o̍ nɔ̍ pūa̍a̍ ā ŋɔ᷄mmɛ̍ū. Pūa̍a̍ ndūāā ka̍ŋ bɛ̍ɛ̍, le̍nde̍ nda̍ a̍a̍ to̍sā ni̍.
15Kɛ̍ pāa̍le̍ pi᷅lɛ̍, mi̍ nyi̍nā wɔ̄ɔ̍ŋndo̍ dīmūl nda̍ āā, “I̍ si̍nā wa᷅na̍ Chi̍i̍sū cho̍ wo̍. Ndu̍yɛ̍, I̍ si̍nā a̍ Pɔ̍ɔ̍l o̍kɔ̄ɔ̄. Kɛ̍, o̍ yīya᷄ŋ nyāa̍ ni᷄ŋ, wānāā māā vɛ̄ɛ̍nɛ̍ nya̍ nya̍ chō yɛ̄?”
16Mi̍ po̍ nyi̍nā wɔ̄ɔ̍ŋ kōŋ wa̍ kɔ̄ɔ̄lī wo̍ dēl nda̍ chōo̍ a̍ sɔ̍ŋgɔ̄ɔ̍. Mbo̍ lūāā nda̍ lɔ̄ɔ̍ pi̍la̍. Mbo̍ sɛ̄ɛ̄sīāā nda̍ nyɛ̄la̍ŋ lēkɔ̄ɔ̍. Mbo̍ bōōlūū nda̍. Ma̍ māl chīɛ̄ī ndɔ̄ɔ̍ ma̍ fūūlīāā a̍ kīlta̍ŋ fo̍ndō. 17Mi̍ Chu̍ūwa̍ a̍ wānāa̍ cho̍ a̍ Chu̍ū le̍ wa̍ kpe̍de̍ a̍ wa̍ Ɛ̍fi̍sīā wa̍ ā tūɛ̄ī nyɛ̍ yɔ̍nu̍ŋ ndo̍. Mi̍ sīōōŋnde̍ bīī nda̍ kpo̍u̍. Ndu̍yɛ̍, mi̍ wāŋnda̍ kē dīōla̍ Māsānɔ̄ɔ̍ Chi̍i̍sūla̍ŋ bɛ̄ɛ̄le̍ŋ mbo̍ hīāū māā pāāndū. 18O̍ ko̍ŋ kɔ̍ɔ̍lī, mi̍ wānāā lāāla᷄ŋnda̍ ā ka̍ ka̍ hu᷅ŋ kpe̍nde̍ke̍le̍ ma̍ chɔ̄ɔ̄mūū nyɛ̄ o̍ nyɛ̄ wɔ̍ɔ̍ŋ nda̍ tōsa̍. 19Mi̍ wānāā ka̍ ka̍ ā nda̍ a̍a̍ nɔ̍ kōo̍ma̍ wɔ̍ɔ̍ŋnda̍ŋ nda̍ ma̍ hūŋ a̍ yāu̍la̍ nda̍la̍ŋ nāa̍ pi᷅lɛ̍ ma̍ lūām nda̍ŋ wāŋnda̍ kpe̍de̍ o̍ hɔ̄l. Kāni̍ fo̍ndōle̍, yāu̍la̍ŋ nda᷅ŋ la̍ a̍a̍ chɔ᷅m nda̍ mɛ̄ɛ̍ nda̍ tōōsīāā ko̍o̍ma̍ wɔ̍ɔ̍ŋnda̍ŋ yɛ̍ ni̍. Mɛ̄ɛ̍ nda̍ dɔ̄ū ba̍ā yāu̍la̍ŋ nda᷅ŋ kpo̍u̍ na̍a̍ pi᷅lɛ̍, ndu̍ o̍o̍ wa᷅ le̍ ka̍ni̍ŋ hu̍mbo᷄ŋ wāa̍la̍ŋ be̍le̍-ŋu̍ɛ̍ɛ̍nu̍.#19:19 Ka̍ni̍i̍ hu̍mbūe̍i̍ ī pīlɛ̍ wa̍ le̍ pāāwā wa̍li̍ pāa̍le̍ pi᷅lɛ̍ mɛ̄ɛ̍ wa̍li̍ īchīɔ̍ɔ̍ cho̍ nu̍a̍ā yɛ̍. 20O̍ ko̍ŋ, mi̍ yōōŋgōo̍ a̍ Māsānɔ̄ɔ̍ o̍kɔ̄ɔ̄ o̍ hi̍a̍ū lāchī a̍ pɛ̄ŋgɛ̄la᷄ŋndo̍ bā o̍ bā fe̍e̍. Lɔ̍ɔ̍ lɔ̍ɔ̍ wānāā sɛ̄nɛ̄īya̍ wa̍ lāāla᷄ŋndo̍ a̍ yōōŋgu̍ Māsānɔ̄ɔ̍ wo̍.
Wāŋnda̍ Ɛ̍fi̍sīā a̍ ma̍l sɔ̍ŋgɔ̄ɔ̍
21Mɛ̄ɛ̍ sɔ̄ɔ̍ŋ mu᷅ŋ kpo̍u̍ ŋ̍ yɔ̍nu̍ŋ, o̍ ko̍ŋ kɔ̍ɔ̍lī, mi̍ Pɔ̍ɔ̍l kɛ̍ɛ̍sīāā le̍ kēēkōo̍ o̍ lɛ̄ŋndē Māsīdo̍o̍nīāāle̍ŋ a̍ lɛ̄ŋndē Āke̍yāle̍ŋ tɛ̍ɛ̄ŋ le̍ mbō kūɛ̄ Chūlu̍sɛ̄lɛ̄m. Mbo̍ dīmī āā, “Tē I̍ ku̍ɛ̄ lo̍ŋ pɛ̍, mɛ̄ɛ̍ mī fu̍u̍lu̍u̍ vɛ̄lɛ̄ Lu̍o̍m chi̍e̍e̍.” 22Mbo̍ vīām wānāā ndūāā ma̍lāa̍ ā ŋīɔ̍ɔ̍ŋ, Ti̍mo̍tī nda̍ Ɛ̄lu̍a̍tɔ̄ɔ̄, le̍ mā kūɛ̄ pɔ̄ɔ̄ Māsīdo̍o̍nīāā. Mi̍ ndu̍ Pɔ̍ɔ̍l ndu̍ lo᷅ o̍ būŋgɛ̄ī E̍e̍sīāve̍ ni᷄ŋ le̍ te̍le̍ŋ ti̍ŋ.
23A̍ bōōndi̍i̍ ke̍ŋ wāŋnda̍ ma᷄l sɔ̍ŋgɔ̄ bɛ̄ndōo̍ Ɛ̍fi̍sīā le̍ nɛ̄i̍ Chi̍i̍sū chɔ̍m wāŋnda̍ le̍ wāa̍ lēchōo̍ wo̍ ni̍. 24Po̍ pi᷅lɛ̍ wa̍ lo̍ŋ dīōla̍ŋ āā, Dɛ̄mi̍tu̍lu̍i̍sī. A̍ ka̍ni̍ŋ hu̍mbo᷄ŋ ndu̍ o̍o̍ to̍sā wa̍llo̍ ni̍. Mɛ̄lɛ̄ka̍ wāŋnda̍ Ɛ̍fi̍sīā lo̍ŋ nda̍ a̍a̍ so̍o̍lūū wo̍, dīōla̍ŋ āā, Ātɛ̍mīī chīɛ̄ī ndɔ̍ nda̍ a̍a̍ so̍lī sa̍lāa̍ wo̍, vēla᷅ŋ ndɔ̄ɔ̍ pōo̍ ho̍ō ndu̍ o̍o̍ tu̍u̍lā a̍ ka̍ni̍ŋ hu̍mbo᷄ŋ ni̍. Nyɛ̄ sɔ̄lāa̍ pi̍la̍ wānāā ndūa̍a̍ wa̍lla̍ nda̍ a̍a̍ sɔ̍lā o̍ wa̍li̍ ko̍ŋ ni᷄ŋ ni̍. 25Mbo̍ ve̍e̍lū wānāā ndūa̍a̍ wa̍lla̍, a̍ wānā o̍ wāna̍ to̍sā wa̍li̍ wa̍ā le̍nde̍ na̍a̍ pi᷅lɛ̍. Mɛ̄ɛ̍ o̍ ve̍e̍lu̍ nda̍, mbo̍ dīmūl nda̍ āā, “Pūa̍a̍, lā sīnā māā nyɛ̄ sɔ̄lāa̍ pi̍la̍ na̍a̍ ŋ̄ chō sɔ̄lāa̍ o̍ wa̍llo̍ ho̍ō ni᷄ŋ ni̍. 26Kɛ̍, nya̍ pi̍la̍ lā chō ni᷅ŋ chɔ̄ɔ̍, ndu̍yɛ̍, mi̍ lā wā tūēīyɔ̄ɔ̍ nyɛ̄ lāŋu̍nɔ̄ɔ̍ ho̍ō chō tōsāa̍ wo̍, ndu̍ yɔ̍nūŋ māā Pɔ̍ɔ̍l ni̍. Ō dīmi̍ māā nyɔ̄ɔ̍ŋ ŋ̄ wāŋnda̍ tōōsīāā mā vēēlū mu̍ŋ āā, mɛ̄lɛ̄ka̍ā nda̍ sōōlūū wa̍ wo̍ŋ, ŋ̄ cho̍ a̍ mɛ̍lɛ̄ka̍ kpe̍e̍kpe̍i̍ le̍. Ndu̍yɛ̍, ō tōsa̍ mi̍ wānāā ka̍ ka̍ Ɛ̍fi̍sīā chi̍e̍e̍ na̍nū a̍ wānāā ka̍ ka̍ o̍ būŋgɛ̄ī E̍e̍sīāve̍ ni᷄ŋ kpe̍de̍ ā lāāla᷄ŋ māā nyɛ̄ o̍ di̍mi̍ wo̍ chō tōnya̍. 27He̍ī chō tōsā mī wāŋnda̍ pɛ̄ɛ̄sa̍ wa̍li̍ nāa̍ ho̍ō. Ō cho̍ wɔ̍ bɛ̍ɛ̍ ke̍ŋ te̍ kɛ̍, wāŋnda̍ ā chi᷅ ni̍ŋ bɛ̍ɛ̍ chi̍ɛ̍ī sa̍lāa̍ le̍ mɛ̄lɛ̄ka̍ nāa̍ Ātɛ̍mīī bɛ̍ndōo̍ māā ō chō bɛ̍ɛ̍ nyɛ᷅ kpe̍e̍kpe̍i̍ le̍. Wāŋnda̍ o̍ būŋgɛ̄ī E̍e̍sīāve̍ ni᷄ŋ, a̍ wāŋnda̍ o̍ chi̍e̍ēŋndo̍ ni᷄ŋ kpo̍u̍ ā chō mɛ̄lɛ̄ka̍ nāa̍ Ātɛ̍mīī sōōlūūwo̍. Kɛ̍, ndu̍ pi̍la̍ bɛ̍ɛ̍ wāŋnda̍ chu̍ē lɛ̍ ni̍ŋ bɛ̍ɛ̍ ndu̍ māā ō chō ō bɛ̄ndū le̍.”
28Mɛ̄ɛ̍ fāŋgāa̍ tūēī nyɛ̄ Dɛ̄mi̍tu̍lu̍i̍sī di̍mi̍ wo̍, ma̍ dūāūnu᷄ŋ tu̍mbe̍. Ma̍ kāndū dēŋīo̍o̍ chōo̍ cho̍o̍. Ma̍ dīmī āā, “Mɛ̄lɛ̄ka̍ nāa̍ Ātɛ̍mīī ho̍ō Ɛ̍fi̍sīā ō chō ō bɛ̄ndū bɛ̍ndū. Mɛ̄lɛ̄ka̍ nāa̍ Ātɛ̍mīī ho̍ō Ɛ̍fi̍sīā ō chō ō bɛ̄ndū bɛ̍ndū.” 29O̍ te̍le̍ŋ bi̍ŋgī bɛ̄ŋgu̍, mi̍ wānāā fāŋgā fa̍ŋgā ā sīm nda̍ kɔ̄ɔ̄lī. Mi̍ fāŋgāa̍ bīī Ka̍yɔ̄ɔ̄ a̍ Ālu̍i̍ta̍kɔ̄ɔ̄. Ma̍ kūā a̍ nda̍ o̍ la̍ū bɛ̄ndōo̍ nāa̍ wāŋnda̍ chūūŋgi̍āŋ nda̍. Māsīdo̍o̍nīāā pūa̍a̍ ŋi̍ɔ̍ɔ̍ŋnda̍ ha̍ā nda̍ a̍a̍ fu̍lā ni̍, ma̍ wā bālɔ̄ɔ̍ nda̍ Pɔ̍ɔ̍l wa̍ā. 30Pɔ̍ɔ̍l pi̍la̍ ndu̍ o̍o̍ hɛ̍na̍ŋ mī ndu̍ o̍o̍ ku̍ɛ̄ lo̍ŋ le̍ mī ndu̍ o̍o̍ kɔ̍ so̍ō o̍ fāŋgāa̍ ho̍ō lo̍. Kɛ̍, mi̍ wānāā lāāla᷄ŋnda̍ kūūnā ndu̍. 31Mi̍ wānāā bɛ̄ndūa̍a̍ ā pūm o̍ būŋgɛ̄ī E̍e̍sīāve̍ ni᷄ŋ a̍ wa̍ Ndi̍a̍a̍mɔ̍ɔ̍wa̍a̍ ndūa̍a̍ wa̍ ā vīām wānā a̍ yōōŋgōo̍ nāa̍ ndu̍ chu̍a̍. Ma̍ nyɔ̄ɔ̄lū ndu̍ māā ō ku̍ā o̍ la̍ū wāŋnda̍ chūūŋgi̍āŋ ko̍ŋ ndo̍ le̍. 32Fāŋga̍ wa̍ o̍ bɔ̄ŋa᷅ŋndo̍ ho̍ō ni᷄ŋ ndo̍ wa̍ bɔ̄ɔ̄lūūwo̍ ta̍u̍ ta̍u̍. Ndu̍yɛ̍, wāŋnda̍ ā ka̍ ka̍ nda̍ a̍a̍ si̍nā bɛ̍ɛ̍ le̍ sa̍bū nda̍ a̍a̍ chu̍u̍ŋgi̍āŋ ndo̍ le̍. Le̍ he̍ī, dīōmndā ndāla̍ŋ lā ve̍ nyɛ᷅ pīlɛ̍ le̍. Ha̍ā sōō pɛ̍ he̍ī, ha̍ā sōō he̍ī. 33O̍ ko̍ŋ kɔ̍ɔ̍lī, mi̍ Chu̍ūwa̍ tōsā mi̍ Ālɛ̄kīsa̍ndā hi̍a̍ū fāŋgāa̍ lāchī le̍ sūɛ̍i̍ nāa̍ nda̍ chūā. Le̍ he̍ī, mi̍ wāŋnda̍ ā ti᷄ŋ ā yīya᷄ŋ māā ndu̍ Ālɛ̄kīsa̍ndā māā bālā ndɔ̄la̍ cho̍ o̍ sūɛ̍i̍ he̍ī ni᷄ŋ. O̍ ko̍ŋ kɔ̍ɔ̍lī, mi̍ Ālɛ̄kīsa̍ndā he̍e̍lū bāa̍ le̍ mā ya᷄ŋ ndu̍ nīla̍ŋ. Ndu̍ o̍o̍ hɛ̍na̍ŋ le̍ nda̍ chɔ̄mndo̍ māā ndu̍ a̍ chāāŋāā ndūa̍a̍ māā ā tōsa̍ i̍ wɔ̍ɔ̍ŋ o̍ sūɛ̍i̍ he̍ī ni᷄ŋ te̍. 34Kɛ̍, mɛ̄ɛ̍ nda̍ sāālu̍ŋ māā Chu̍ūnɔ̄ɔ̍ o̍ cho̍ ni̍, ma̍ chɔ̄ɔ̄lū dēŋī a̍ dīōmndā pīlɛ̍lā lāŋ dīmīo̍o̍ le̍ te̍le̍ŋ vi̍lɛ̄ī, le̍ ha̍vɛ̄i̍la̍ŋ lā tīɔ̍ɔ̍ŋ kpu̍lu̍ku̍u̍ āā, “Mɛ̄lɛ̄ka̍ nāa̍ Ātɛ̍mīī ho̍ō Ɛ̍fi̍sīā ō chō ō bɛ̄ndū bɛ̍ndū. Mɛ̄lɛ̄ka̍ nāa̍ Ātɛ̍mīī ho̍ō Ɛ̍fi̍sīā ō chō ō bɛ̄ndū bɛ̍ndū.”
35O̍ mɛ̄ɛ̄lu̍la̍ŋ kpɔ̍ŋ mi̍ wānā bɛ̍ndū pīlɛ̍ kīndī mbo̍ kpāā fāŋgā bɛ̍ndōo̍ ho̍ō. Mbo̍ dīmūl nda̍ āā, “Chāāŋāā nīāā Ɛ̍fi̍sīāŋnda̍, wānā o̍ wānā o̍ si̍nā māā chīo̍o̍ ho̍ō, ndu̍ yɔ̍nūŋ māā Ɛ̍fi̍sīā ni̍, māā ndu̍ cho̍ chīɛ̄ī sōlīāā sa̍lāa̍ le̍ mɛ̄lɛ̄ka̍ nāa̍ Ātɛ̍mīī bɛ̍ndōo̍ māndāa̍ ni̍. Ndu̍ ko̍ cho̍ pōu̍ mɛ̄lɛ̄ka̍a̍ o̍ chɛ̍ŋ o̍ ha̍la̍ mbo̍ dēl lo̍ māndāa̍ ni̍. 36Wānā o̍ wānā nɔ̍lā mbō sɛ̄ɛ̄ŋgi̍a̍a̍ he̍ī le̍. Le̍la̍ŋ, lā pɛ̄ŋgi̍ bɔ̍ɔ̍lūū bɛ̄ndōo̍ ho̍ō. Lā to̍sā sūɛ̍i̍ māā wānāā bāā bāā le̍. 37Lā bīī pūa̍a̍ ha̍ā mi̍ lā hūŋ a̍ nda̍ na̍nu᷄ŋ. Kɛ̍, ā cho̍ wa̍nāa̍ yɔ̍ŋ lē vīī o̍ chīɛ̄ī o̍ chīɛ̄ī sōlīāā sa̍lā ni᷄ŋ te̍. Ndu̍yɛ̍, ā dīmi̍ di̍ōm o̍ dīōm wɔ̄ɔ̍ŋ a̍ mɛ̄lɛ̄ka̍ā nāa̍ le̍. 38Tē wānā to̍sa̍ yɛ̄ pɛ̍ su̍ɛ̍i̍ wɔ̍ɔ̍ŋ a̍ Dɛ̄mi̍tu̍lu̍i̍sī nda̍ wānāā ndūa̍a̍ wa̍lla̍ mā hɛ̄na̍ŋ le̍ se̍ī ndɔ̄ bi̍yɔ̄ɔ̄ pɛ̍, pālɛ̍i̍ kɔ̍ɔ̍sɔ̍la̍ŋ lā bɔ̄ŋā ve̍ chō. Ndu̍yɛ̍, wānāā bɛ̄ndūa̍a̍ chō, ā kūā mā kɔ̍ ti̍mbī. 39Tē lā nɔ̄ dīōm o̍ dīōm chēle̍ŋ le̍ dīmī pɛ̍, ō bɛ̄ndā mī lā dīmi̍ lɔ̍ɔ̍ wānāā bɛ̄ndūāā chi̍e̍e̍ya̍ chō bɔ̄ŋa᷅ŋndo̍ vēēlū wo̍. 40Kāni̍ fo̍ndōle̍, wānāā bɛ̄ndūa̍a̍ nɔ̄lā mā bīī na̍a̍ le̍ nyɛ̍ yɔ̍nu̍ŋ ho̍ō hāū wo̍, mā dīmi̍ māā sɔ̍ŋgɔ̄ɔ̍ na̍a̍ ŋ̄ chō kīōlɔ̄ɔ̍ ni̍. Sa̍bū o̍ sa̍bū kpe̍e̍kpe̍i̍ cho̍ le̍ wo̍o̍lūŋ wo̍o̍lūŋ bɛ̄ndu̍ yɔ̄nu᷄ŋ ho̍ō wo̍ le̍. Ndu̍yɛ̍, tē ā nyūna̍ na̍a̍ pɛ̍, ŋ̄ nɔ̍lā mī ŋ̄ chɔ̄m sa̍bū kpe̍e̍kpe̍i̍ le̍ ndi̍ le̍.” 41Mɛ̄ɛ̍ o̍ chi̍i̍ dīōmnda̍ŋ nda᷅ŋ dīmī, mbo̍ dīmūl wāŋnda̍ māā ā kɔ̍ o̍ chīɛ̄īlā ndāla̍ŋ.
Currently Selected:
Wa̍lta̍ Wānāa̍ Chi̍i̍sūa̍a̍ 19: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
