Wa̍lta̍ Wānāa̍ Chi̍i̍sūa̍a̍ 26
26
Pɔ̍ɔ̍l kɔ̍ɔ̍sa̍ Āki̍li̍pā o̍ hɔ̄l
1Mi̍ Āki̍li̍pā di̍mūl Pɔ̍ɔ̍l āā, “So̍o̍ nīko̍ nyɛ᷅ ŋ̄ yēēma̍ mā sōō wo̍.” Mi̍ Pɔ̍ɔ̍l he̍e̍lū bāa̍ mbo̍ kāndū kɔ̍ɔ̍sɔ̍ɔ̍ le̍ ndu̍ pi̍la̍.
2Mbo̍ dīmī āā, “Māsāa̍ Āki̍li̍pā, I̍ na̍ŋ kɔ̄l mi̍ sɔ̍lā fo̍ndāa̍ hāū le̍ sīsi̍la̍ŋ nu̍m o̍ hɔ̄l mī kɔ̍ɔ̍sa̍ le̍ ya̍ pi̍la̍ a̍ sɔ̄ɔ̍ŋ Chu̍ūwa̍ chɔ᷄m a̍ ya̍ o̍kɔ̄ɔ̄ wo̍ŋ. 3Nyɛ̍ to̍sa̍ mi̍ na᷅ŋ kɔ̄l ta̍u̍ wo̍ cho̍ ni̍ māā nūm ā sīnā ta̍u̍ a̍ ka̍ālā Chu̍ūwa̍ o̍kɔ̄ɔ̄ a̍ yɛ̍ yɛ̍la̍ cho̍ nda̍ tɛ̄ɛ̄ŋ nda̍ŋ. Le̍la̍ŋ, a̍ yāndi̍i̍, bi̍u̍ŋ mā ya̍ŋ ya̍ lānī nyɛ̄ kɛ̄ndɛ̍ī.
4“Chu̍ūwa̍ kpe̍de̍ ā sīnā ka̍ā nūu̍, chɔ̍ŋ a̍ chūāāmbɔ̄yɛ̍ī nīi̍ ha̍a̍a̍ mbo̍ fūūlūū a̍ te̍le̍ŋndo̍ ho̍ō. Ā sīnā i̍sɔ̍ɔ̍ o̍ īsɔ̄ɔ̍ a̍ ya̍ o̍kɔ̄ɔ̄, chɔ̍ŋ a̍ bōōndi̍i̍ ya̍ I̍ wa̍ o̍ na̍a̍ lo̍ ve̍, a̍ lɔ̍ɔ̍ ya̍ I̍ wa̍ Chūlu̍sɛ̄lɛ̄m ndo̍. 5Ā sīnā ya̍ le̍ te̍le̍ŋ vi̍lɛ̄ī. Ndu̍yɛ̍, nda̍ pi̍la̍ nɔ̄lā mā dīmi̍ tōnya̍a̍ māā o̍ ku̍ndā Fālīsi̍īya̍ chōo̍ yā fu̍la̍ ni̍, ku̍nda̍ cho̍ īsīsi̍ o̍ ka̍lā kpo᷅ke̍ o̍ Mɛ̄lɛ̄ka̍ nāa̍ pīɛ̄īyo̍ ni᷄ŋ mbo̍ hīāū ku̍ndā o̍ ku̍ndā chēle̍ŋ ndo̍. 6Ndu̍yɛ̍, le̍ mɛ̄ɛ̍ ya̍ cho̍ lēhɔ̄l o̍ nɛ̄ī le̍ būŋgɛ̄ī Mɛ̄lɛ̄ka̍ chūe̍l fi̍nyāā nāā ma̍māa̍ ve̍ yɛ̍ nda̍ chō hāū kɔ̍ɔ̍sɔ̍ɔ̍ a̍ ya̍ ni̍. 7Wānāā nāa̍, kāa̍la̍ŋ tɔ̍ a̍ lā tīɔ̍ɔ̍ŋ ā chō Mɛ̄lɛ̄ka̍ pīɛ̄īyo̍ īdīi̍ a̍ īchɔ̄l. Ndu̍yɛ̍, ma̍ wā lēhɔ̄l o̍ nɛ̄ī le̍ nyɛ̄ Mɛ̄lɛ̄ka̍ chu̍a̍ ko̍ŋ bu̍ŋgɛ̄i̍ yo̍ sɔ̄lāa̍. Māsā bɛ̍ndōo̍, le̍ sūɛ̍i̍ pi᷅lɛ̍i̍ kēŋ nda̍ Chu̍ūwa̍ chō ya̍ kɔ̄ɔ̄lī ni̍. 8Vɛ᷅ mi̍ ī wā nya̍ Chu̍ūwa̍ o̍ bā ī kālā le̍ lāāla᷄ŋndo̍ māā Mɛ̄lɛ̄ka̍ ō mīŋgī wa̍nāa̍ vi᷅ wa̍ vɛ̄lɛ̄ yōōmū?
9“Ya̍ si̍m ho̍ō wo̍ kpe̍e̍kpe̍i̍, mi̍ ya̍ i̍i̍ kɛ̍ɛ̍sīāā le̍ kīndīo̍o̍ o̍ nɛ̄ī o̍ nɛ̄ī ni᷄ŋ le̍ mī nyu̍mi̍ dīōla̍ Chi̍i̍sūla̍ŋ o̍ fu̍la̍ ho̍ō Na̍a̍sa̍lūɛ̄ī chi̍e̍e̍ wo̍. 10Ndu̍yɛ̍, mi̍ to̍sā le̍nde̍ Chūlu̍sɛ̄lɛ̄m chi̍e̍e̍. Mi̍ wānāā bɛ̄ndūāā sōlīāā lāsa̍lāa̍ ā kē ya̍ yāu̍la̍ di̍la̍ŋ. O̍ ko̍ŋ kɔ̍ɔ̍lī, mi̍ du̍a̍ū wānāā lāāla᷄ŋnda̍ ā ka̍ ka̍ o̍ chīɛ̄īlā mānyūmnda̍ŋ ni᷄ŋ. Ndu̍yɛ̍, tē nda̍ a̍a̍ di̍mi̍ le̍ ō pīlɛ̍ dīyɔ̄ɔ̍ pɛ̍, ya̍ i̍i̍ wa᷅ wa̍nā pi᷅lɛ̍ le̍ chɛ̄lɔ̄ɔ̍ māā ā dīi̍ ndu̍. 11Le̍ te̍le̍ŋnda̍ fa̍ŋgā, I̍ wa̍ bālɔ̄ɔ̍ o̍ chīɛ̄īlā na̍a̍ ŋ̄ pīɛ̄ī Mɛ̍lɛ̄ka̍la̍ŋ, mī to̍sā mā tūsī nda̍ nyɛ̄ pālāa̍ chōo̍. Ndu̍yɛ̍, mi̍ ki̍ndī le̍ tōsāa̍ mā ma᷄l lāāla᷄ŋ nda̍ nɔ̄ wo̍. Mɛ̄ɛ̍ sūɛ̍i̍ ndɛ̍i̍ ī nɛ̄i̍ ya̍ te̍i̍, mi̍ ka̍ndū kɔ̄la̍ŋ o̍ lɛ̄ŋīī chēle̍ŋnde̍ ni᷄ŋ mī tu̍sī nda̍ nyɛ̄ pālāa̍ chōo̍.”
Pɔ̍ɔ̍l chɔ̍m a̍ mɛ̄ɛ̍ o̍ lo̍o̍ku̍ sīmnɔ᷄ŋ wa̍nā la̍a̍la᷄ŋ yɛ̍
(Wa̍lta̍ Wānāa̍ Chi̍i̍sūa̍a̍ 9:1-19; 22:6-16)
12Mi̍ Pɔ̍ɔ̍l hi̍a̍ū lāchī a̍ sūɛ̍i̍. Mbo̍ dīmī āā, “Kɔ̄lā wāā le̍nde̍ la̍ŋ ya̍ I̍ wa̍ Dāma̍si̍kɔ̄ɔ̄ chi̍e̍e̍ ni̍, mi̍ wānāā bɛ̄ndūāā sōlīāā lāsa̍lāa̍ kē ya̍ yāu̍la̍ di̍la̍ŋ, ma̍ vīām ya̍ ni̍. 13O̍ kɔ̄lā nīla̍ŋ ni᷄ŋ māsāa̍, a̍ te̍le̍ŋ pāa̍le̍ŋ lē sīm o̍ bōlle̍ŋ chōo̍ wo̍ ki̍nɛ̍i̍, mi̍ cha᷅ mi̍ pa̍ŋgēlo̍o̍ cha᷄ŋ o̍ ha̍la̍a̍ ni᷄ŋ. Ndu̍ o̍o̍ hi̍o̍ū pāa̍le̍ŋ dīōndɔ̄ɔ̍ po̍lo̍ŋ. Mi̍ pa̍ŋgēlo̍o̍ ho̍ō bɔ̄ŋā na̍a̍ si̍lɔ̍ na̍a̍ wānāā na̍a̍ ŋ̄ wa̍ kɔ̄la̍ŋ nda̍. 14Na̍a̍ kpo̍u̍ mi̍ ŋ̄ dēlī lɛ̄ŋ. Ndu̍yɛ̍, mi̍ tu̍ɛ̍ī mi̍ dīōmndo̍ dīmī o̍ Hi̍būlūi̍ye̍ ni᷄ŋ āā, ‘Sɔ̍ɔ̄, Sɔ̍ɔ̄, vɛ᷅ ma̍ wā ya̍ nyɛ̄ pālāa̍ tūsīo̍o̍ chōo̍?’ Mbo̍ dīmī āā, ‘Tē wānā lɔ̍ɔ̄ pēlēi̍ o̍ yɔ̄m sɛ̄ɛ̄mbīa̍a̍ pɛ̍, a̍ yɔ̍ŋu̍l nūm pi̍la̍.’ 15Mi̍ lo᷅ lo̍ŋ mi̍ nyu̍nā, a̍a̍, ‘Nūm nɛ̄ɛ̍nɛ̍, Māsānɔ̄ɔ̍?’ Mbo̍ dīmī āā, ‘Ya̍ Chi̍i̍sū ni̍. Wāna̍ ŋ̄ chō nyɛ̄ pālāa̍ tūsīo̍o̍ chōo̍ wo̍. 16Chɔ̍ŋ ni̍ko̍ mā si̍m. I̍ chɔ̍mnu̍ŋ nu̍m le̍ sa̍bū, le̍ mī Ī chu̍a̍ nu̍m mā wa̍ wāna̍ ni̍ wa̍li̍. Ndu̍yɛ̍, mā di̍mu̍l wāŋnda̍ nyɛ̄ ŋ̄ chē hāū wo̍, a̍ nyɛ̄ ya̍ I̍ cho̍ nu̍m hūnɔ̄ɔ̄ chɔ̄m lāchī wo̍. 17I̍ cho̍ tōsā wāŋnda̍ I̍sɔ̄lūɛ̄ī a̍ wānāa̍ cho̍ a̍ Chu̍ū le̍ wa̍ ā yɔ᷅ŋ nu̍m nyɛ̄ le̍. Ndu̍yɛ̍, I̍ cho̍ nu̍m vīōmɔ̄ɔ̄ nāa̍ wānāa̍ cho̍ a̍ Chu̍ū le̍ wa̍ chūā. 18Nyɛ̄ ŋ̄ nɔ̄ le̍ tōsāa̍ wo̍ cho̍ ho̍ō ni̍. Mā tōsāa̍ mī hɔ̄ltā ndāla̍ŋ lā kūmbi̍ŋ. Ndu̍yɛ̍, mā sōli̍ nda̍ o̍ nyūmnda̍ŋ ni᷄ŋ, mā hīŋ a̍ nda̍ o̍ nyɛ̄ wa̍wo̍ŋndo̍ ni᷄ŋ. Mā so̍li̍ nda̍ o̍ kpāāya̍ Sēta̍nā bɛ̄ŋgu̍, mā lūɛ̄ī o̍ kpāāya̍ nūu̍ bɛ̄ŋgu̍. Le̍ he̍ī, ya̍ Mɛ̄lɛ̄ka̍ mī māl nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ. Ndu̍yɛ̍ o̍ ko̍ŋ kɔ̍ɔ̍lī, mī ke̍ nda̍ fo̍ndāa̍ wāŋnda̍ ha̍ā tɛ̍ɛ̄ŋ ā ya̍ sīīŋgu̍u̍ wānāā ni̍ le̍ mɛ̄ɛ̍ nda̍ lāāla̍ŋ a̍ ya̍ yɛ̍ wa̍.’ ”
Pɔ̍ɔ̍l chɔ̍m a̍ mɛ̄ɛ̍ o̍ di̍mi̍ sūɛ̍i̍ Mɛ̄lɛ̄kɛ̍i̍ yɛ̍
19Mi̍ Pɔ̍ɔ̍l hi̍a̍ū lāchī a̍ sūɛ̍i̍. Mbo̍ dīmī āā, “Ndu̍yɛ̍, Māsāa̍ Āki̍li̍pā, dīo̍m chɛ̍ŋ o̍ fo̍nda᷄ŋ Mɛ̄lɛ̄ka̍a̍ mbo̍ sūāānu᷄ŋ nāa̍ ya̍ chu̍a̍ o̍ yi̍lāŋndo̍ ni᷄ŋ ndo̍ I̍ so̍li̍ di̍ōm kōŋ te̍. 20Mi̍ ka̍ndū sūɛ̍i̍ Mɛ̄lɛ̄kɛ̍i̍ dīmīo̍o̍ Dāma̍si̍kɔ̄ɔ̄ fɛ̍lɛ̍ŋ, mālāŋ ya̍ I̍ ku̍ā Chūlu̍sɛ̄lɛ̄m. Mi̍ ba̍lū ni᷅ŋ o̍ lɛ̄ŋndē Chūdi̍a̍āle̍ŋ ni᷄ŋ kpo̍u̍. Ndu̍yɛ̍, mi̍ ba̍lū vɛ̄lɛ̄ wānāa̍ cho̍ a̍ Chu̍ū le̍ wa̍ tɛ̄ɛ̄ŋ. Mi̍ di̍mī māā wāŋnda̍ ma᷄l yɔ᷅ŋndā ndāla̍ wɔ̍ɔ̍ŋnda̍ŋ, mā mūli̍ŋ o̍ Mɛ̄lɛ̄ka̍ lo̍. Ndu̍yɛ̍, mā tōsa̍ ka̍ālā chɔ̍m māā ā ma᷄l yɔ̄ŋndā ndāla̍ wɔ̍ɔ̍ŋnda̍ŋ nda̍ŋ. 21Le̍ sa̍bōo̍ ho̍ō, Chu̍ūwa̍ de᷄l la̍ chōo̍ o̍ chīɛ̍i̍ Mɛ̄lɛ̄ka̍a̍ ni᷄ŋ, ma̍ kīndī le̍ ya̍ dīyɔ̄ɔ̍ ni̍. 22Chɔ̍ŋ a̍ pāa̍le̍ Mɛ̄lɛ̄ka̍ vēm ya̍ le̍ŋ mbo̍ fūūlūū a̍ pāa̍le̍ hāū le᷅ŋ, Mɛ̄lɛ̄ka̍ chō ya̍ mālāa̍. Le̍ sa̍bōo̍ ho̍ō ya̍ cho̍ īsīsi̍ na̍nū ni̍ mi̍ wa᷅ wāŋnda̍ kpe̍de̍ su̍ɛ̍i̍ pi᷅lɛ̍i̍ kēŋ dīmūllo̍ ni̍, wānā bɛ̍ndū ni̍, wānā pɔ̍mbɔ̄ ni̍. Ndu̍yɛ̍, wānāa̍ su̍a̍ā le̍ Mɛ̄lɛ̄ka̍ wa̍ a̍ Mūu̍sē, nyɛ̄ o̍ nyɛ̄ nda̍ dīmi̍ māā ō chō yɔ̄nɔ᷄ŋ, ndu̍ ko̍ni̍ ya̍ I̍ cho̍ dīmīo̍o̍ ni̍, māā ō chō yɔ̄nɔ᷄ŋ. 23Ma̍ dīmī māā Ki̍li̍tī wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ō chō mɔ̍nɛ̍i̍ bīyɔ̄ɔ̄. Ndu̍yɛ̍, ma̍ dīmī māā ndu̍ cho̍ wā wāna̍ tāso̍o̍ le̍ mīīŋgōo̍ yōōmū ni̍. Ndu̍yɛ̍, māā wāna̍ Mɛ̄lɛ̄ka̍ hɛ̄li̍ le̍ wāŋnda̍ pīŋīo̍o̍ wo̍ chō yōndā nāa̍ Chu̍ūwa̍ chūā, a̍ wānāa̍ cho̍ a̍ Chu̍ū le̍ wa̍ fa̍ū, māā ā nɔ̄lā mā sɔ̄la̍ pīōŋɔ̄ɔ̍, māā he̍ī wā māā nyɛ̄ wa̍wo̍ŋ le̍ nda̍.”
24Mɛ̄ɛ̍ Pɔ̍ɔ̍l wa̍ dīōmnda̍ŋ nda᷅ŋ dīmīo̍o̍, mi̍ Fɛ̍si̍tɔ̄ɔ̄ ki̍a̍lū ndu̍ lāchī. Mbo̍ dīmī chōo̍ cho̍o̍ āā, “Pɔ̍ɔ̍l, bāā sēēmāa̍ ŋ̄ chō ni̍? Yāu̍ bɛ̍ndū ŋ̄ sīna̍ ho̍ō wo̍ ō cha᷄l le̍ nu̍m bōlle̍ŋ hīŋ.”
25Mi̍ Pɔ̍ɔ̍l di̍mī āā, “Ō cho̍ se̍e̍mā le̍ ya̍ se̍e̍mā le̍, wānā bɛ̍ndōo̍ Fɛ̍si̍tɔ̄ɔ̄. Sɔ̄ɔ̍ŋ tōnya̍ŋ a̍ sɔ̄ɔ̍ŋ kɔ̄l kālo̍ŋ ya̍ cho̍ dīmīo̍o̍ ni̍. 26Māsāa̍ Āki̍li̍pā, nūm bɛ̍ɛ̍ ā sīnā a̍ sɔ̄ɔ̍ŋ mu᷅ŋ o̍kɔ̄ɔ̄. Le̍la̍ŋ, I̍ nɔ̍ ki̍i̍sa᷄ŋ le̍ sūɛ̍i̍ nāa̍ nūm chu̍a̍ a̍ mu̍ŋ o̍kɔ̄ɔ̄ le̍. I̍ si̍nā māā sɔ̄ɔ̍ŋ yɔ̍nu̍ŋ mu᷅ŋ ki̍nɛ̍i̍ yo̍ŋ, ī pīlɛ̍ bɛ̍ɛ̍ yɔ̍nu̍ŋ mā kɛ̍ɛ̍ sīnā le̍. Kāni̍, ō cho̍ sɔ̍ɔ̍ŋ yɔ̍nu̍ŋ o̍ lēsɔ̍ŋgi̍ le̍. 27Māsāa̍ Āki̍li̍pā, I̍ si̍nā māā a̍ la̍a̍la̍ŋ a̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā dīmi̍ wo̍.”
28Mi̍ Āki̍li̍pā di̍mūl Pɔ̍ɔ̍l āā, “Bāā mā si̍i̍ŋgu̍u̍ ya̍ bɛ̍ɛ̍ Ki̍li̍sīɔ̄ŋnɔ̄ o̍ te̍le̍ŋ bi̍ŋgīo̍o̍ ho̍ō bɛ̄ŋgu̍?”
29Mi̍ Pɔ̍ɔ̍l mu̍lī āā, “Ō wa̍ o̍ te̍le̍ŋ bi̍ŋgī bɛ̄ŋgu̍, kɛ̄lɛ̄ŋgāā, ō wa̍ o̍ te̍le̍ŋ vi̍lɛ̄ī bɛ̄ŋgu̍, I̍ cho̍ Mɛ̄lɛ̄ka̍ pīɛ̄īyo̍ māā nūm ni̍ a̍ wānā o̍ wāna̍ cho̍ hāū ya̍ nīla̍ŋ yāŋɔ̄ɔ̍ māā lā sīmnu̍ŋ Ki̍li̍sīɔ̄ŋnda̍ mɛ̄ɛ̍ ya̍ cho̍ nu̍a̍ā yɛ̍. Kɛ̍ ndu̍yɛ̍, ō cho̍ ma̍chu̍a̍ā māā lā wa̍ o̍ yɔ̄lɔ᷄ŋ mɛ̄ɛ̍ ya̍ cho̍ nu̍a̍ā yɛ̍ le̍.”
30O̍ ko̍ŋ kɔ̍ɔ̍lī, mi̍ Māsāa̍ Āki̍li̍pā, a̍ Fɛ̍si̍tɔ̄ɔ̄, a̍ Bɛ̄lūīni̍sī, a̍ wānā o̍ wāna̍ nda̍ wa̍ īchāli̍, ma̍ cha᷄ŋ, 31ma̍ fūlā. Ma̍ wā kɔ̄la̍ŋ a̍ dīmīo̍o̍ āā, “Pōo̍ ho̍ō tōsa̍ su̍ɛ̍i̍ wānā dɔ̍ū bɛ̍ɛ̍ wānā chi̍ɛ̍ī ni̍ŋ le̍ ndi̍ le̍, kɛ̄lɛ̄ŋgāā ni᷅ŋ te̍ sūɛ̍i̍ wānā di̍ī wānā le̍ ndi̍.” 32Mi̍ Āki̍li̍pā di̍mūl Fɛ̍si̍tɔ̄ɔ̄ āā, “Tē pōo̍ ho̍ō ndu̍ o̍o̍ di̍mi̍ le̍ sūɛ̍i̍ ndūɛ̍i̍ yɔ̄ŋndo̍ nāa̍ māsā bɛ̍ndōo̍ chūā le̍, wānā a̍a̍ ma᷅l ndu̍.”
Currently Selected:
Wa̍lta̍ Wānāa̍ Chi̍i̍sūa̍a̍ 26: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
