Chɛ̄nɛ̍se̍ē 12
12
Mɛ̄lɛ̄ka̍ vēēlu̍ E̍bīlām
1Bōōndi̍i̍ pi᷅lɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl E̍bīlām āā, “E̍bīlām, ma̍l lɛ̄ŋndē nyāle̍ŋ, mā mɛ̍i̍ wānāya᷅ŋ nūmndo̍ŋ, a̍ yūŋgu̍ fi̍nyā nūmndo̍, mā kūɛ̄ o̍ lɛ̄ŋndē ya̍ I̍ cho̍ nu̍m chɔ̄m nde̍ŋ ni᷄ŋ. 2O̍ ko̍ŋ kɔ̍ɔ̍lī, I̍ cho̍ tōsā mī pūlālē nūmnde̍ŋ lē kūi̍ mī lē sīmnu᷄ŋ ka̍a̍le̍ bɛ̍ndū. I̍ cho̍ nu̍m sa̍lā dɔ̄wɔ̄ɔ̄, ndu̍yɛ̍, mī I̍ to̍sa̍ mā sīmnu᷄ŋ wa᷅na̍ tɔ̍ɔ̍. Ndu̍yɛ̍, I̍ cho̍ tōsā mī wāŋnda̍ sɔ̄la̍ sa̍lāa̍, sa̍na̍a̍ o̍ nu̍m ni̍ŋ.
3Wānāa̍ dɔ̍ū nu̍m sa̍lā pɛ̍, I̍ dɔ̍ū nda̍ sa̍lā.
Wānāa̍ mɛ̍na̍ nu̍m pɛ̍, I̍ mɛ̍na̍ nda̍.
Wāŋnda̍ chi̍e̍ēŋndo̍ kpo̍u̍, ā chō sa̍lāa̍ sɔ̄lā o̍ sa̍bū nūmndo̍ ni᷄ŋ.”
4O̍ ko̍ŋ kɔ̍ɔ̍lī, mi̍ E̍bīlām to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. Mbo̍ fāŋa᷄ŋ Ha̍lūāŋ chi̍e̍e̍ nda̍ Lɔ̍tū. A̍ bōōndi̍i̍ ke̍ŋ, E̍bīlām wa̍ wɔ̄sīla̍ŋ be̍le̍-ŋɔ̍mmɛ̍ū a̍ lā ŋūɛ̍ɛ̍nu̍ (75). 5Mi̍ E̍bīlām chu̍ā Se̍lūāī la̍a̍ ndɔ̄, a̍ Lɔ̍tū, po̍ pɔ̄mbɔ̄ ndɔ̄ wo̍, a̍ nyɛ̄ o̍ nyɛ̄ ndā, a̍a̍ nɔ̍, a̍ wāŋndā chīe̍e̍ya̍a̍ nda̍ sɔ̄la̍ Ha̍lūāŋ nda̍. Ma̍ bīī kɔ̄la̍ŋ o̍ lɛ̄ŋndē Ke̍nāŋnde̍ŋ ni᷄ŋ.
Mɛ̄ɛ̍ nda̍ fūūlu̍u̍ o̍ lɛ̄ŋndē Ke̍nāŋnde̍ŋ ni᷄ŋ, 6mi̍ E̍bīlām ki̍a̍lū le̍ŋ tɛ̄ɛ̄ŋ mbo̍ hūŋ o̍ yɔ̄m tɔ̍ɔ̍ bɛ̍ndōo̍ o̍ fo̍ndāŋndo̍ dīōla̍ŋ āā, Mo̍lūɛ̄ɛ̄, Si̍ɛ̍kɛ̄m chi̍e̍e̍ i̍kɛ̍i̍. Bōōndi̍i̍ ke̍ŋ, Ke̍na̍na̍i̍tīi̍ya̍ a̍ wa̍ īchāli̍ lo̍ŋ ni̍. 7O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu᷄ŋ E̍bīlām. Mbo̍ dīmūl ndu̍ āā, “Lɛ̄ŋnde̍ŋ nde᷅ŋ ya̍ cho̍ chūāūwāā nūm a̍ ma̍māa̍ kē ni̍.” Mi̍ E̍bīlām ta̍ŋgūl ma̍āŋndo̍ lo̍ŋ le̍ Mɛ̄lɛ̄ka̍ Ya̍a̍wɛ̄ɛ̄, o̍ chɔ̍mnu̍ŋ ndu̍ wo̍ sōōlūūwo̍. 8O̍ ko̍ŋ kɔ̍ɔ̍lī, mi̍ E̍bīlām fa̍ŋa᷄ŋ Si̍ɛ̍kɛ̄m. Mbo̍ kūā o̍ lɛ̄ŋndē īpēmbūle̍ŋ kūmbū Bɛ̍tɛ̄ɛ̄l wō, bā pāa̍le̍ŋ lē chāŋ ndo̍. Mbo̍ tūāndū tɛ̍ndɛ̄i̍la̍ ndɔ̄la̍ŋ Bɛ̍tɛ̄ɛ̄l tɛ̍ɛ̄ŋ a̍ E̍yāī. E̍yāī wa̍ kūmbū pāa̍le̍ŋ lē chāŋ ndo̍, mi̍ Bɛ̍tɛ̄ɛ̄l wa᷅ kūmbū pāa̍le̍ŋ lē dēl lo̍. Mbo̍ tāŋgūl vɛ̄lɛ̄ ma̍āŋndo̍ lo̍ŋ mbo̍ sōōlūū Mɛ̄lɛ̄ka̍ Ya̍a̍wɛ̄ɛ̄. 9O̍ ko̍ŋ kɔ̍ɔ̍lī, mi̍ E̍bīlām ma᷅l vɛ̄lɛ̄ lo̍ŋ, mbo̍ bīī kɔ̄la̍ŋ o̍ lɛ̄ŋndē Ke̍nāŋnde̍ŋ bā tōūwo̍.
E̍bīlām ku̍ɛ̄ I̍chi̍pī
10Mi̍ ī yɔ̄nu᷄ŋ mi̍ yīa̍a̍ŋ mā dēl o̍ lɛ̄ŋndē lēŋ ni᷄ŋ. O̍ ko̍ŋ, mi̍ E̍bīlām ku̍ā lɛ̄ŋndē I̍chi̍pīle̍ŋ le̍ te̍le̍ŋnda̍ ti̍ŋ, kāni̍, nyɛ̄ o̍ nyɛ̄ dīāā ndu̍ o̍o̍ sɔ̍lāŋ nāa̍ nda̍ wa̍ Ke̍nāŋ nda̍ le̍. 11Kɛ̍ mɛ̄ɛ̍ nda̍ wa̍ le̍ tāŋɔ̄ɔ̍ o̍ lɛ̄ŋndē I̍chi̍pīle̍ŋ ni᷄ŋ, mi̍ E̍bīlām si̍lā Se̍lūāī la̍a̍ ndɔ̄ āā, “A̍ nāŋɔ̄ɔ̄ ŋ̄ na᷄ŋ ho̍ō wo̍, 12tē ŋ̄ fūūlu̍u̍ pɛ̍ mī wāŋnda̍ I̍chi̍pī a̍ che᷅ nu̍m, ā chō sīnā māā la̍a̍ nūu̍ ŋ̄ chō ni̍. Tē ā sīna̍ yɛ̄ le̍nde̍ pɛ̍, ā chō ya̍ dīyɔ̄ɔ̄, kɛ̍ nūm nūm ā yɔ̄ŋ nu̍m nyɛ̄ o̍ nyɛ̄ le̍. 13Le̍la̍ŋ tē ŋ̄ fūūlu̍u̍ pɛ̍, di̍mi̍ māā yēma̍ nūu̍ ŋ̄ chō ni̍. Ko̍ŋ to̍sā mā bīī ya̍ bīyɔ̄ɔ̄ kɛ̄ndɔ̄ɔ̍ le̍ sa̍bū nūmndo̍, ā di̍ī lɛ̍ ya̍ le̍.” 14Mɛ̄ɛ̍ E̍bīlām fu̍u̍lu̍u̍ I̍chi̍pī, mi̍ wāŋnda̍ sāā Se̍lūāī kpīŋgāa̍ le̍ nāŋɔ̄ɔ̍. 15Mi̍ māsā bɛ̄ndōo̍ le̍ lɛ̄ŋndē I̍chi̍pīle̍ŋ, wānāa̍ to̍sā wa̍llo̍ o̍ chīɛ̄ī ndɔ̍ lēmāsāa̍ ni᷄ŋ nda̍ ā chā Se̍lūāī, ma̍ kɔ̍ di̍mūl māsā bɛ̍ndōo̍ a̍ ndu̍ o̍kɔ̄ɔ̄ a̍ mɛ̄ɛ̍ o̍ na̍ŋ yɛ̍. O̍ ko̍ŋ, ma̍ kūā a̍ ndu̍ o̍ māsā bɛ̍ndōo̍ ho̍ō lo̍ chīɛ̄īyo̍. 16O̍ ko̍ŋ kɔ̍ɔ̍lī, mi̍ māsāa̍ ho̍ō bīī E̍bīlām ō kɛ̄ndɛ̄ kɛ̍ndɛ̄ le̍ sa̍bu̍ Se̍lūāī wo̍. Mbo̍ kē E̍bīlām chɔ̄lūa̍a̍ ta̍u̍, sāa̍, a̍ nāūwa̍, a̍ sōfɛ̍li̍a̍a̍, ā pīāāndūa̍a̍ a̍ ā lāāndūa̍a̍, a̍ nyɔ̍mi̍a̍a̍. Mbo̍ kē vɛ̄lɛ̄ ndu̍ chīa̍a̍, wāŋ pīāāndūa̍a̍ a̍ wāŋ lāāndūa̍a̍.
17Kɛ̍ le̍ chūā māsāa̍ ho̍ō ō chu̍a̍ Se̍lūāī, la̍nɔ̍ɔ̍ E̍bīlām ndo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍ū Māsāa̍ ho̍ō nāālā wɔ̄ɔ̍ŋndā bɛ̄ndūla̍ŋ chōo̍ a̍ chīɛ̄ī ndɔ̄ɔ̍ kpo̍u̍. 18O̍ ko̍ŋ kɔ̍ɔ̍lī, mi̍ māsāa̍ ho̍ō vīām le̍ E̍bīlām, mbo̍ nyūnā ndu̍ āā, “Vɛ̄ ya̍ tōsāllo̍ nu̍a̍ā? Vɛ̄ a̍ di̍mu̍l la̍ māā la̍a̍ nu̍m te̍ Se̍lūāī cho̍ le̍? 19Ma̍ bīī ma̍ dīmūl la̍ māā yēmā nu̍m o̍ cho̍ ni̍, mi̍ chu̍ā ni᷅ŋ ndu̍ māā la̍a̍ ni̍. Ā chē la̍a̍ nu̍m. Chu̍a̍ ndu̍ lā fāŋa̍ŋ na̍ŋ.” 20Mi̍ māsā bɛ̍ndōo̍ ho̍ō dīmūl pūa̍a̍ so̍vɛ̄i̍ya̍a̍ ndūa̍a̍ chɔ̄ūwa̍ le̍ mā līīla̍ E̍bīlām mbō ma᷅l I̍chi̍pī. Mi̍ E̍bīlām chu̍ā la̍a̍ ndɔ̄ a̍ nyɛ̄ o̍ nyɛ̄ nda̍ nɔ̄ ma̍ fāŋa᷄ŋ I̍chi̍pī.
Currently Selected:
Chɛ̄nɛ̍se̍ē 12: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
