Chɔ᷄ŋ 17
17
Chi̍i̍sū pi̍ɛ̍i̍ Mɛ̄lɛ̄ka̍ le̍ wānāa̍ cho̍ ndu̍ kɔ̄ɔ̄lī wa̍
1Mɛ̄ɛ̍ Chi̍i̍sū chi̍i̍ dīōmnda̍ŋ nda᷅ŋ īsɔ̄ɔ̍, mbo̍ kāndū Mɛ̄lɛ̄ka̍ pīɛ̄īyo̍. Mbo̍ tōfā chōo̍ cho̍o̍ ɛ̄chɛ̍nɛ̄. Mbo̍ dīmī āā, “Kɛ̄kɛ̍, te̍le̍ŋndo̍ fūūlu̍u̍. To̍sa̍ ni̍ko̍ mī wāŋnda̍ chē mɛ̄ɛ̍ Po̍ nu̍mndo̍ chō wāna̍ kɔ̄ndɔ̄fi̍li̍ yɛ̍, mī Po̍ nu̍mndo̍ ō tōsa̍ mī wāŋnda̍ chē mɛ̄ɛ̍ ŋ̄ chō wāna̍ kɔ̄ndɔ̄fi̍li̍ yɛ̍. 2Ā bīī ma̍ kē ndu̍ kpāāyāa̍ ŋ̄wāŋndā chīe̍e̍ cho̍o̍ kpo̍u̍. Mbō tōsa̍ wānāā ŋ̄ ke̍ ndu̍ wa̍ kpo̍u̍, mā sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ le̍ wo̍. 3Yōōmū kpe̍e̍kpe̍i̍yo̍ ho̍ō ndu̍ cho̍ yɛ̄ ni̍, wāŋndo̍ sīnāa̍ māā nu᷄m pīlɛ̍ kpe̍ cho̍ Mɛ̄lɛ̄ka̍ ni̍, ndu̍yɛ̍, mbō sīna̍ vɛ̄lɛ̄ Chi̍i̍sū Ki̍li̍tī, wa᷅na̍ ŋ̄ vēm ndo̍. 4Bōōndi̍i̍ ya̍ I̍ wa̍ o̍ chi̍e̍ēŋndo̍ chōo̍ ve̍, mi̍ I̍ chɔ᷅m wāŋnda̍ mɛ̄ɛ̍ ŋ̄ chō wāna̍ kɔ̄ndɔ̄fi̍li̍ yɛ̍, sa̍na̍a̍ a̍ chīī ya̍ I̍ chi̍i̍ wa̍li̍ ŋ̄ ke̍ ya̍ le̍ tōsāa̍ wo̍ wo̍. 5Le̍la̍ŋ, Kɛ̄kɛ̍ nūu̍, to̍sa̍ mī I̍ wa̍ o̍ nāŋɔ̄ɔ̍ ni᷄ŋ nāa̍ ŋ̄ chō wa̍, nāŋɔ̄ɔ̄ na̍a̍ ŋ̄ wa̍ lēni᷄ŋ na̍a̍ nūm lɔ̍ɔ̍pa̍ bɛ̍ɛ̍ chi̍e̍ēŋndo̍ ō kāndūŋ ndo̍.
6“I̍ to̍sa̍ mi̍ wānāā ŋ̄ ke̍ ya̍ ha̍ā wa̍ sīnā nu̍m. Ā wa̍ le̍ chi̍e̍ēŋndo̍, kɛ̍ ndu̍yɛ̍, ma̍ chūā nda̍ ma̍ kē ya̍ nda̍. Nu᷄m nɔ̍ nda̍ ni̍, kɛ̍, ma̍ kē ya̍ nda̍. Ndu̍yɛ̍, ā tūēī nu̍m dīōm. 7Ā sīna̍ ni᷅ŋ māā nyɛ̄ o̍ nyɛ̄ fe̍e̍ ŋ̄ ke̍ ya̍ māā o̍ nūmndo̍ kpe̍e̍kpe̍i̍ ŋ̄ cho̍ chɔ̄nɔ᷄ŋndo̍ ni̍. 8I̍ di̍mu̍l nda̍ dīōmndā ŋ̄ dīmu̍l la̍ la̍ŋ ndu̍yɛ̍, ma̍ chūā la̍ŋ. Ā sīnā wa̍la̍ŋ māā o̍ nūm ndo̍ ya̍ I̍ fu̍la̍ ni̍. Ndu̍yɛ̍, ā lāāla̍ŋ māā nu᷄m ve᷅m ya̍ ni̍.
9“Le̍ nda̍ ya̍ I̍ cho̍ nu̍m pīɛ̄īyo̍ ni̍. Ō cho̍ le̍ wānāa̍ cho̍ le̍ chi̍e̍ēŋndo̍ wa̍ le̍ ya̍ I̍ cho̍ nu̍m pīɛ̄ī le̍. Wānāā ŋ̄ ke̍ ya̍ wa̍, le̍ nda̍ ya̍ I̍ cho̍ nu̍m pīɛ̄īyo̍ ni̍, kāni̍ fo̍ndōle̍, nu᷄m nɔ̍ nda̍ ni̍. 10Wānā o̍ wānā ya̍ I̍ nɔ̍, nu᷄m nɔ̍ ni̍. Ndu̍yɛ̍, wānā o̍ wānā ŋ̄ nɔ̄, ya̍ nɔ̍ ni̍. Wāŋnda̍ ha̍ā, nda̍ cho̍ tōsāa̍ ni̍ mī wāŋnda̍ ā chā mɛ̄ɛ̍ ya̍ I̍ cho̍ wāna̍ kɔ̄ndɔ̄fi̍li̍ yɛ̍. 11I̍ cho̍ lɛ̍ wā o̍ chi̍e̍ēŋndo̍ chōo̍ le̍ te̍le̍ŋ vi̍lɛ̄ī le̍. Kɛ̍, nda̍ nda̍ chō wā o̍ chi̍e̍ēŋndo̍ chōo̍. Ya̍ I̍ cho̍ hūnɔ̄ɔ̍ nāa̍ nūm chu̍a̍. Fi̍nyā nūu̍, nūm nɔ̍ ho̍ō mā sɔ̍la̍ sāŋgālāa̍ wo̍, ma̍nda̍ wa̍nāā ŋ̄ ke̍ ya̍ ha̍ā wa̍ a̍ kpāāyā nūmndo̍, kpāāya̍ ŋ̄ ke̍ ya̍ wo̍. Ma̍nda̍ nda̍ le̍ mā wa̍ dīōm pīlɛ̍, mɛ̄ɛ̍ na̍a̍ ŋ̄ chō dīōm pīlɛ̍ na̍a̍ nūm yɛ̍. 12Bōōndi̍i̍ ya̍ I̍ wa̍ hɔ̄lāā tūlu̍ a̍ nda̍ ve̍, mi̍ I̍ ma̍ndā nda̍ a̍ kpāāyā nu̍mndo̍, kpāāya̍ ŋ̄ ke̍ ya̍ wo̍. Mi̍ I̍ ma̍ndā nda̍, ndu̍yɛ̍, ō pīlɛ̍ bɛ̍ɛ̍ o̍ la̍a̍si̍a̍ŋ te̍, mɛ̄ɛ̍ wāna̍ wa̍ ō yūlāā le̍ lāāsīa̍ŋndo̍ wo̍ le̍ mī nyɛ̄ Yāu̍ Mɛ̄lɛ̄ka̍a̍ ō dīmi̍ wo̍ yɔ̄nu̍ŋ. 13I̍ cho̍ ni᷅ŋ hūnɔ̄ɔ̍ nāa̍ nūm chu̍a̍. Ndu̍yɛ̍, lɔ̍ɔ̍ ya̍ I̍ cho̍ wɔ̄ o̍ chi̍e̍ēŋndo̍ chōo̍ wo̍, I̍ cho̍ sɔ̄ɔ̍ŋ mu᷅ŋ dīmī le̍ mā sɔ̄la̍ kɔ̄l kɛ̄ndɛ̍ cho̍ ya̍ ni᷅ŋ ndo̍, ndu̍yɛ̍, mā sɔ̄la̍ ndu̍ ō fūūlāā mɛ̍ɛ̄. 14I̍ di̍mu̍l nda̍ dīōmndā nūmnda̍ŋ. Ndu̍yɛ̍, mi̍ wāŋnda̍ o̍ chi̍e̍ēŋndo̍ ni᷄ŋ a̍ tu᷅l nda̍ lēyɛ̄ le̍ mɛ̄ɛ̍ nda̍ cho̍ wa̍nāā wāā chi̍e̍ēŋ na̍ŋ mɛ̄ɛ̍ ya̍ bɛ̍ɛ̍ ya̍ I̍ cho̍ wa̍nā wa̍ā chi̍e̍ēŋ na̍ŋ te̍ yɛ̍. 15I̍ cho̍ nu̍m pīɛ̄ī le̍ mā fa̍ŋa̍ nda̍ o̍ chi̍e̍ēŋndo̍ chōo̍ le̍. I̍ cho̍ māchūāā nu̍m pīɛ̄īyo̍ māā bā nūmndo̍ ō wa̍ nda̍ chōo̍, yɔ̄ŋi̍ ō nda̍ vēēlū āā, Wāna̍ Dɛ̍nɛ̍ Wɔ̍ɔ̍ŋndo̍ wo̍ ō yɔ᷄ŋ nda̍ nyɛ̄. 16Nda̍ nda̍, ā cho̍ le̍ chi̍e̍ēŋndo̍ ho̍ō le̍, mɛ̄ɛ̍ ya̍ I̍ cho̍ le̍ chi̍e̍ēŋndo̍ ho̍ō le̍ yɛ̍. 17To̍sa̍ mā wa̍ ā yɔ̄ŋga᷄ŋ o̍ nūm ndo̍ sa̍na̍a̍ a̍ tōnya̍ cho̍ a̍ nūm o̍kɔ̄ɔ̄ wo̍. Dīōm nūmndo̍, ndu̍ cho̍ tōnya̍a̍ ni̍. 18I̍ ve᷅m nda̍ o̍ ŋ̄wāŋndā chīe̍e̍ lo̍ o̍ chi̍e̍ēŋndo̍ ni᷄ŋ mɛ̄ɛ̍ ŋ̄ vēm ya̍ o̍ ŋ̄wāŋndā chīe̍e̍ lo̍ o̍ chi̍e̍ēŋndo̍ ni᷄ŋ yɛ̍. 19I̍ yɔ̍ŋgu̍ŋ ya̍ pi̍la̍ nāa̍ nūm chu̍a̍ le̍ nda̍ le̍ mī nda̍ bɛ̍ɛ̍ mā yɔ̄ŋgu̍ŋ nda̍ pi̍la̍ nyɛ̄ kɛ̄ndɛ̄ kɛ̍ndɛ̄ nāa̍ nūm chu̍a̍.
20“Ō cho̍ ko̍ le̍ wānāa̍ cho̍ ha̍ā na̍ŋ nda̍ le̍ ya̍ I̍ cho̍ nu̍m pīɛ̄īyo̍ le̍. I̍ cho̍ vɛ̄lɛ̄ nu̍m pīɛ̄īyo̍ le̍ wānāā nda̍ chō hūnɔ̄ɔ̄ dīōmndā nūmnda̍ŋ dīmūl, o̍ ko̍ŋ kɔ̍ɔ̍lī, mā dɔ̄ū tīīnda᷄ŋ ndāa̍ o̍ ya̍ ni̍ŋ nda̍. 21I̍ cho̍ nu̍m pīɛ̄ī māā to̍sa̍ mī nda̍ kpo̍u̍, mā wa̍ dīōmndo̍ ō pīlɛ̍. Fi̍nyā nūu̍, to̍sa̍ a̍ sa̍bū mā wa̍ ā mɔ̄ɔ̄sa᷅ŋ a̍ na̍a̍, mɛ̄ɛ̍ ya̍ I̍ cho̍ ō mɔ̄ɔ̄sa᷅ŋ a̍ nūm, mi̍ nūm bɛ̍ɛ̍ ma̍ wā ō mɔ̄ɔ̄sa᷅ŋ a̍ ya̍ yɛ̍. Ho̍ō to̍sā ni̍ mī wāŋnda̍ o̍ chi̍e̍ēŋndo̍ ni᷄ŋ a̍ la̍a̍la̍ŋ māā nu᷄m ve᷅m ya̍ ni̍. 22I̍ ke̍ nda̍ nāŋɔ̄ɔ̄ kɔ̄ndɔ̄fi̍li̍ ŋ̄ ke̍ ya̍ wo̍. I̍ to̍sa̍ he̍ī le̍ mā wa̍ o̍ dīōm pīlɛ̍ ni᷄ŋ, mɛ̄ɛ̍ na̍a̍ ŋ̄ chō o̍ dīōm pīlɔ̄ɔ̍ ni᷄ŋ na̍a̍ nūm yɛ̍. 23Ko̍ŋ cho̍ ni̍ na̍a̍ na̍a̍ nda̍ā mī ŋ̄ wa̍ ā mɔ̄ɔ̄sa᷅ŋ mɛ̄ɛ̍ na̍a̍ nūm na̍a̍ ŋ̄ chō ā mɔ̄ɔ̄sa᷅ŋ yɛ̍. To̍sa̍ mā wa̍ dīōm pīlɛ̍ le̍ mī ŋ̄wāŋndā chīe̍e̍ a̍ sīna̍ māā nu᷄m ve᷅m ya̍ ni̍. Ndu̍yɛ̍, mā sīna̍ māā mɛ̄ɛ̍ ŋ̄ kāāla̍ ya̍ yɛ̍ māā nda̍ bɛ̍ɛ̍ le̍nde̍ ko̍ni̍ ŋ̄ kāāla̍ nda̍ ni̍.
24“Kɛ̄kɛ̍, I̍ hɛ̍na̍ŋ nāa̍ ya̍ I̍ cho̍ wa̍ mī ŋ̄ wa̍ lo̍ŋ na̍a̍ wānāā ŋ̄ ke̍ ya̍ wa̍ le̍ mā chē nāŋɔ̄ɔ̄ nūu̍, ndu̍ yɔ̍nūŋ māā nāŋɔ̄ɔ̄ ŋ̄ ke̍ ya̍ le̍ kāālā ŋ̄ kāāla̍ ya̍ lɔ̍ɔ̍pa̍ chi̍e̍ēŋndo̍ ō kāndūŋ ndo̍ ni̍. 25Kɛ̄kɛ̍, nūm wānā sa̍kpōo̍, wāŋnda̍ o̍ chi̍e̍ēŋndo̍ ni᷄ŋ ā si̍nā nu̍m te̍. Kɛ̍, ya̍ ya̍, I̍ si̍nā nu̍m. Ha̍ā nda̍ nda̍ sīnā māā nu᷄m ve᷅m ya̍ ni̍. 26I̍ to̍sa̍ ma̍ sīnā wāna̍ ŋ̄ chō wo̍. Ndu̍yɛ̍, I̍ cho̍ hīōūwɔ̄ɔ̄ lāchī a̍ nda̍ chɔ̄mndo̍ wāna̍ ŋ̄ chō wo̍ le̍ mā ka̍a̍la̍ nda̍ mɛ̄ɛ̍ ŋ̄ kāāla̍ ya̍ yɛ̍, ndu̍yɛ̍ vɛ̍lɛ̄ māā ya̍ bɛ̍ɛ̍ mī I̍ wa̍ ō mɔ̄ɔ̄sa᷅ŋ a̍ nda̍.”
Currently Selected:
Chɔ᷄ŋ 17: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
