Chɔ᷄ŋ 21

Chi̍i̍sū chɔ̍mnu̍ŋ bu̍ɛ̍i̍ya̍ o̍ yɔ̄ɔ̄yā nda̍ wa̍ wo̍

1Mɛ̄ɛ̍ pālɛ̍i̍ ti᷄ŋ ī hīōū, mi̍ Chi̍i̍sū chɔ̍mnu᷄ŋ vɛ̍lɛ̄ bu̍ɛ̍i̍yāā ndūa̍a̍ nāa̍ nda̍ wa̍ yɔ̄ɔ̄yāa̍ o̍ mɛ̄ŋmā ībūŋga᷄ŋ Tābi̍līāā wa̍. Mɛ̄ɛ̍ i̍ yɔ̍nu̍ŋ yɛ̍ cho̍ nu̍a̍ā ni̍. 2Bōōndi̍i̍ pi᷅lɛ̍, Sa̍i̍mɔ̄ŋ Pītɛ̍ nda̍ bu̍ɛ̍īya̍ ā pīli̍a̍a̍ ā wa̍ ku̍ndā. Nda̍ wa̍ lo̍ŋ nda̍ cho̍ ha̍ā ni̍, Tɔ̄mɔ̍si̍, ō nda̍ a̍a̍ ve̍e̍lū āā pɛ̄ndūnɔ̍ɔ̍ wo̍ ni̍, a̍ Nāta̍nīɛ̄l, wānā wa̍ā Ke̍nā chi̍e̍e̍ o̍ lɛ̄ŋndē Kāli̍lī le̍ŋ, a̍ pūa̍a̍ Sɛ̍bɛ̍dīī, a̍ bu̍ɛ̍i̍yāā ŋi̍ɔ̍ɔ̍ŋāā chēle̍ŋ. 3Mi̍ Pītɛ̍ lo᷅ o̍ ko̍ŋ mbo̍ dīmūl chāāŋāā ndūa̍a̍ āā, “I̍ cho̍ lākɔ̄ yɔ̄ɔ̄yāa̍.”

Mi̍ bu̍ɛ̍īya̍ ā pīli̍a̍a̍ bɛ̍ɛ̍ a̍ di̍mī āā, “Na̍a̍ bɛ̍ɛ̍, ŋ̄ chō lākɔ̄.” Ma̍ cha᷄ŋ ma̍ kūā. Ma̍ kɔ̍ lu̍ɛ̍ī o̍ dɛ̄ndɔ̄ɔ̍ ni᷄ŋ. Ma̍ lɔ̄ɔ̄lū yɔ̄ɔ̄yāa̍ pi̍i̍ pi̍i̍, kɛ̍ nyɛ̄ bɛ̍ɛ̍, ā chu̍e̍ le̍. 4Mɛ̄ɛ̍ pāa̍le̍ŋ lē sɛ̄ īdīi̍yo̍, mi̍ Chi̍i̍sū chɔ̍mnu᷄ŋ nda̍. Ō wa̍ īsīsi̍ o̍ mɛ̄ŋmā ībūŋga᷄ŋ kɔ̄ŋgɔ̍, kɛ̍ ā sīna̍ māā ndu̍ le̍. 5Mi̍ Chi̍i̍sū nyu̍nā nda̍ āā, “Pūa̍a̍, lā chu̍a̍ pa̍?”

Ma̍ mūlī āā, “Ɛ̄ ɛ̍.”

6Mbo̍ dīmūl nda̍ āā, “Lā wūu̍ wɔ̍ ya̍lāa̍ o̍ bā nyā kɛ̍ndɔ̄ɔ̍ chōo̍. Lā chō sūūwa̍ chūā.” Ma̍ wūū yālāa̍ ō bā kɛ̄ndɔ̄ɔ̍ chōo̍. Mbɔ̄ kɛ̍ nūm. Sūūwāā pīlɛ̍ kpe̍ nda̍ a̍a̍ lu̍ɛ̍ī lēni᷄ŋ ni̍. Ma̍ būmbā nda̍ nānɔ̄ɔ̄ o̍ dɛ̄ndɔ̄ɔ̍ ni᷄ŋ.

7O̍ ko̍ŋ, mi̍ bu̍ɛ̍ī Chi̍i̍sū ka̍a̍la̍ wo̍ dīmūl Pītɛ̍ āā, “Māsānɔ̄ɔ̍ Chi̍i̍su̍ cho̍ ko̍ŋ ni̍.” Mɛ̄ɛ̍ Pītɛ̍ tu̍e̍ī le̍nde̍ māā Māsānɔ̄ɔ̍ ni̍, mbo̍ chūā dōmāa̍, mbo̍ wōūnu᷄ŋ. Kāni̍, yɔ̄ɔ̄yā nda̍ wa̍ wo̍, mi̍ ndu̍ o̍o̍ so̍o̍lu᷄ŋ. Mɛ̄ɛ̍ o̍ wo̍u̍nu̍ŋ do᷅māa̍, mbo̍ tūāl o̍ mɛ̄ŋnda̍ŋ ni᷄ŋ, mbo̍ tāŋ. 8Bu̍ɛ̍īya̍ ā pīli̍a̍a̍, nda̍ nda̍ wa̍ hūnɔ̄ɔ̍ o̍ dɛ̄ndɔ̄ɔ̍ ni᷄ŋ. Dɛ̄ndɔ̄ɔ̍ wa̍ hūnɔ̄ɔ̍ a̍ yālāa̍ nānɔ̄ɔ̍ a̍ sūūwa̍ lēni᷄ŋ. Ā lo̍ hūnɔ̄ɔ̍ le̍nde̍ ma̍ fūūlūū o̍ kɔ̄ŋgɔ̍ɔ̍ bɛ̄ŋgu̍. Chɔ̍ŋ o̍ fo̍ndāŋ nda̍ wa̍ ko̍ŋ o̍ mɛ̄ŋnda̍ŋ chōo̍ wo̍ hu̍ŋ o̍ kɔ̄ŋgɔ̍, ō ve̍ le̍vi̍l te̍. Ō wa̍ kɔ̄lā wāā o̍ kɔ̄ŋgɔ̍ pɛ̍, ndu̍ o̍o̍ wa᷅ nɛ̍īyo̍ kɛ̄mɛ̄. 9Mɛ̄ɛ̍ nda̍ fūūlu̍u̍ o̍ kɔ̄ŋgɔ̍ɔ̍ bɛ̄ŋgu̍, ma̍ fūlā o̍ dɛ̄ndɔ̄ɔ̍ ni᷄ŋ. Mɛ̄ɛ̍ nda̍ he᷄l o̍ kɔ̄ŋgɔ̍, ma̍ chā yīŋnde̍ŋ lē kīīsāā a̍ sūɛ̍ɛ̍ŋnde̍. Ma̍ chā bēe̍dīi̍yo̍ a̍ sūūwo̍. Sūūwo̍ wa̍ o̍ dɛ̄ŋgūlta̍ŋ chōo̍. 10Mi̍ Chi̍i̍sū di̍mūl nda̍ āā, “Lā hu᷄ŋ a̍ sūūwāā nya̍ lāŋga̍ bi̍ī wa̍ ā ti᷄ŋ.”

11Mi̍ Sa̍i̍mɔ̄ŋ Pītɛ̍ mi̍i̍ŋgū o̍ dɛ̄ndɔ̄ɔ̍, mbo̍ kɔ̍ ti̍mbī yālāa̍, mbo̍ hūŋ a̍ ndu̍ nānɔ̄ɔ̍. Ō wa̍ ō pīāā a̍ sūūwāā bɛ̄ndūa̍a̍. Sūūwāa̍ wa̍ lēni᷄ŋ nda̍, ā wa̍ kɛ̄mɛ̄ a̍ sūūwa̍ be̍le̍-ŋu̍ɛ̍ɛ̍nu̍ a̍ ā yāa̍. Kɛ̍, a̍ sūūwāā kāāku̍u̍wāa̍ wa̍ ka̍ŋ le̍ni̍ŋ nda̍ fa̍ū, kīōlī bɛ̍ɛ̍ yālāa̍ kīōli̍ le̍. 12Mi̍ Chi̍i̍sū di̍mūl nda̍ āā, “Lā hu᷄ŋ di̍ō nyɛ̄ dīa̍a̍.” Bu̍ɛ̍īya̍ ha̍ā ki̍nɛ̍i̍ ō pīlɛ̍ bɛ̍ɛ̍ bi̍i̍ kɔ᷅llo̍ mbō nyūna̍ ndu̍ āā, “Nūm nɛ̄ɛ̍nɛ̍,” le̍, kāni̍ fo̍ndōle̍, nda̍ a̍a̍ si̍nā māā Māsānɔ̄ɔ̍ ni̍. 13Mi̍ Chi̍i̍sū cha̍ŋ mbo̍ kɔ̍ chu̍ā bēe̍dīi̍yo̍ mbo̍ kē nda̍. Sūūwo̍ bɛ̄ɛ̄ le̍nde̍ ko̍ni̍, mbo̍ chūā mbo̍ kē nda̍.

14Chɔ̍ŋ a̍ mīīŋgū Chi̍i̍sū mi̍i̍ŋgu̍ yōōmū wo̍, mɛ̄ɛ̍ yāa̍ ndɔ̄ɔ̍ wa̍ ni᷅ŋ ho̍ō le̍ bu̍ɛ̍i̍yāā ndūa̍a̍ chɔ̄mnɔ᷄ŋndo̍ ni̍.

Mɛ̄ɛ̍ Chi̍i̍sū nda̍ Pītɛ̍ a̍ su̍u̍ki̍āŋ yɛ̍

15Mɛ̄ɛ̍ nda̍ chīi̍ nyɛ̄ dīa̍a̍ di̍o̍, mi̍ Chi̍i̍sū nyu̍nā Sa̍i̍mɔ̄ŋ Pītɛ̍ āā, “Sa̍i̍mɔ̄ŋ, po̍ Chɔ᷄ŋ ndo̍, a̍ ka̍a̍la̍ ya̍ mbo̍ hīāū mɛ̄ɛ̍ ha̍ā ā kāāla̍ ya̍ yɛ̍?”

Mi̍ Pītɛ̍ chɛ᷅l āā, “E̍ī, Māsānɔ̄ɔ̍, ā sīnā māā I̍ ka̍a̍la̍ nu̍m.”

Mi̍ Chi̍i̍sū di̍mūl ndu̍ āā, “Mɛ̄ɛ̍ ke̍ sa̍a̍ nīāā pɔ̍mbūa̍a̍ nyɛ̄ dīa̍a̍.” 16Mbo̍ nyūnā ndu̍ vɛ̄lɛ̄ dīi̍ŋ ndɔ̄ɔ̍ āā, “Sa̍i̍mɔ̄ŋ, po̍ Chɔ᷄ŋ ndo̍, a̍ ka̍a̍la̍ ya̍?”

Mi̍ Pītɛ̍ mu̍lī āā, “E̍ī, Māsānɔ̄ɔ̍. Ā sīnā māā I̍ ka̍a̍la̍ nu̍m.”

Mi̍ Chi̍i̍sū di̍mūl ndu̍ vɛ̄lɛ̄ āā, “Mɛ̄ɛ̍ ma̍nda̍ sa̍a̍ nīa̍a̍.” 17O̍ ko̍ŋ kɔ̍ɔ̍lī, mi̍ Chi̍i̍sū nyu̍nā ndu̍ yāa̍ ndɔ̄ɔ̍ āā, “Sa̍i̍mɔ̄ŋ, po̍ Chɔ᷄ŋ ndo̍, a̍ ka̍a̍la̍ ya̍?”

O̍ ko̍ŋ, mi̍ kɔ̄llo̍ tāmbū Pītɛ̍, kāni̍ fu̍u̍le̍ le̍ nyūnā kōŋ lēyāa̍ māā tē Pītɛ̍ ka̍a̍la̍ ndu̍ pɛ̍. Mbo̍ dīmūl Chi̍i̍su̍ āā, “Māsānɔ̄ɔ̍, ā sīnā nyɛ᷅ o̍ nyɛ̄ fe̍e̍. Ā sīnā māā I̍ ka̍a̍la̍ nu̍m.”

Mi̍ Chi̍i̍sū di̍mūl ndu̍ āā, “Mɛ̄ɛ̍ ke̍ sa̍a̍ nīa̍a̍ nyɛ̄ dīa̍a̍.” 18Mi̍ Chi̍i̍sū di̍mūl Pītɛ̍ āā, “Mī di̍mu̍l nu̍m tōnya̍a̍ wa̍la̍ŋ, te̍le̍ŋ ŋ̄ wa̍ chūā pīāāndū wo̍, nūm o̍o̍ do̍vi̍ŋ pɛ̍ ā kūɛ̄nu᷄ŋ ba᷅ o̍ bā ŋ̄ yēēma̍. Kɛ̍ ndu̍yɛ̍, bōōndi̍i̍ ŋ̄ yūwā ni̍ŋ nde̍, ā yɔ̄ŋgū ni̍ŋ ba᷅la̍ŋ mī wānā che᷅le̍ŋndo̍ ō sāāli̍a̍a̍ nu̍m la̍ŋ mbō yīi̍ nu̍m po᷅ŋ, mbō kūɛ̄ a̍ nūm nāa̍ ŋ̄ hɛ̍nāŋ bɛ̍ɛ̍ le̍ lākɔ̄ le̍ wa̍.” 19Dīōmndā Chi̍i̍sū so̍ō la᷅ŋ nāa̍ Pītɛ̍ chu̍a̍ la̍ŋ ō dīmi̍ mādīmīāā la̍ŋ le̍ chɔ̄mndo̍ mɛ̄ɛ̍ Pītɛ̍ o̍ wa̍ hūnɔ̄ɔ̄ wu̍ le̍ hāli̍ kpe̍ŋ māā mī wāŋnda̍ ā ke̍ Mɛ̄lɛ̄ka̍ bɛ̄ɛ̄le̍ŋ yɛ̍. Mbo̍ dīmūl Pītɛ̍ āā, “To̍l la̍ kɔ̄ɔ̄lī.”

Nyɛ̄ Chi̍i̍sū di̍mi̍ a̍ bu̍ɛ̍īyo̍ ō pīlɔ̍ɔ̄ o̍kɔ̄ɔ̄ wo̍

20O̍ ko̍ŋ kɔ̍ɔ̍lī, mi̍ Pītɛ̍ mu̍li᷄ŋ mbo̍ chā bu̍ɛ̍ī Chi̍i̍sū ndu̍ o̍o̍ ka̍a̍la̍ wo̍, ō wa̍ nda̍ tōlɔ̄ɔ̍ kɔ̄ɔ̄lī. Bōōndi̍i̍ nda̍ a̍a̍ wa̍ nyɛ̄ dīa̍a̍ dīo̍o̍ nda̍ Chi̍i̍sū wa̍ā ve̍, bu̍ɛ̍īyo̍ ho̍ō, ndu̍ ndu̍ o̍o̍ sɔ̍ɔ̍ŋgu̍u̍ Chi̍i̍su̍ īkɛ̄i̍ ni̍. Ndu̍ ko̍ni̍ ndu̍ o̍o̍ nyu̍na̍ Chi̍i̍sū ni̍ āā, “Māsānɔ̄ɔ̍, ō nɛ̄ɛ̍nɛ̍ cho̍ yɛ̄ nu̍m pīsī?” 21Mɛ̄ɛ̍ Pītɛ̍ che᷅ mi̍ bu̍ɛ̍ī kōŋ ō wā nda̍ tōlɔ̄ɔ̍ kɔ̄ɔ̄lī, mi̍ Pītɛ̍ nyu̍nā Chi̍i̍sū āā, “Māsānɔ̄ɔ̍, pōo̍ ho̍ō, ndu̍ ndu̍ yɛ̍?”

22Mi̍ Chi̍i̍sū lo᷅ o̍ ko̍ŋ mbo̍ dīmūl Pītɛ̍ āā, “I̍ ye̍e̍ma̍ bɛ̍ɛ̍ māā mbō lo̍ yōōmū ha̍a̍a̍ mbō lo̍ o̍ ko̍ŋ mī I̍ mi̍i̍ŋgu̍ na̍ŋ, ɔ̍ɔ̄ būūla᷄ŋ nu̍mndo̍ o̍ ko̍ŋ ni̍ŋ? Nūm to̍l la̍ kɔ̄ɔ̄lī su̍e̍e̍.”

23O̍ ko̍ŋ, mi̍ tɔ̍ɔ̍ ō tīū wānāā lāāla᷄ŋnda̍ tɛ̄ɛ̄ŋ māā bu̍ɛ̍īyo̍ ho̍ō ndu̍ vi᷅ ni̍ŋ te̍. Kɛ̍, ō cho̍ mī Chi̍i̍sū di̍mi̍ māā ō cho̍ wu̍ le̍ le̍. Ō dīmi̍ mādīmīāā āā, “I̍ ye̍e̍ma̍ bɛ̍ɛ̍ mbō lo̍ yōōmū ha̍a̍a̍ mbō lo̍ o̍ ko̍ŋ mī I̍ mi̍i̍ŋgu̍ na̍ŋ ɔ̍ɔ̄ būūla᷄ŋ nu̍mndo̍ o̍ ko̍ŋ ni̍ŋ?”

24Bu̍ɛ̍īyo̍ ho̍ō, ndu̍ cho̍ nya̍ ho̍ō sɔ̄ɔ̍ŋ mu᷅ŋ chɔ̄mndo̍ ni̍. Ndu̍ ko̍ po̍o̍nyi̍a̍a̍ vɛ̄lɛ̄ sɔ̄ɔ̍ŋ ka̍la᷄ŋ ni̍. Ndu̍yɛ̍, ŋ̄ sīnā māā sɔ̄ɔ̍ŋ o̍ chɔ̍m mu᷅ŋ ndo̍ŋ ŋ̄ chō tōnya̍.

25Sɔ̄ɔ̍ŋ fa̍ŋgā fa̍ŋgā ŋ̄ chēle̍ŋ chō mi̍ Chi̍i̍sū to̍sā mu̍ŋ. Nyɛ̄ o̍ nyɛ̄ Chi̍i̍sū to̍sa̍ tē ndu̍ o̍o̍ wa̍ nyɛ̍ chu̍ū pōōnyīāā o̍ lāyāu̍ ni̍ŋ pɛ̍, I̍ nɔ̍ o̍ kɔ̄l māā ō wa̍ bɛ̍ɛ̍ chi̍e̍ēŋndo̍ ho̍ō kpo̍u̍, yāu̍la̍ la̍ŋ la̍a̍ su᷅l le̍ni̍ŋ te̍.

Currently Selected:

Chɔ᷄ŋ 21: YM

Highlight

Copy