Lu̍o̍ma᷅ŋnda̍ 1
1
1Ya̍ Pɔ̍ɔ̍l, bu̍ɛ̍i̍ Chi̍i̍sū Ki̍li̍tīo̍o̍, ya̍ cho̍ yāu̍wo̍ ho̍ō pōōnyīa̍a̍ ni̍. Mɛ̄lɛ̄ka̍ ndu̍ hɛ̍li̍ ya̍ ni̍ le̍ wāa̍ wāna̍ Chi̍i̍sū ve᷅m māā hɔ̄ltē ndɔ̄ wo̍. Ndu̍yɛ̍, ndu̍ ke̍ ya̍ wa̍llo̍ ho̍ō ni̍ le̍ wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍.
2Sīndɛ̄ pa̍ Mɛ̄lɛ̄ka̍ yɔ̄ŋgu̍ yōōŋgū ndɔ̄ kɛ̍ndɔ̄ɔ̍ sa̍na̍a̍ a̍ wānāa̍ su̍a̍ā le̍ ndu̍ wa̍ ni̍. Ma̍ pōōnyīāā ndu̍ o̍ Yāu̍ Mɛ̄lɛ̄ka̍a̍ ni᷄ŋ. 3-4Yōōŋgōo̍ ho̍ō chō māchūāā a̍ Po̍ Mɛ̍lɛ̄ka̍a̍ o̍kɔ̄ɔ̄, ndu̍ yɔ̍nūŋ ni̍ māā Māsānɔ̍ nāa̍ Chi̍i̍sū Ki̍li̍tī. Tē ŋ̄ tōfa̍ a̍ wāna̍ chi̍e̍e̍yɛ̍ī ndūɛ̍i̍ o̍kɔ̄ɔ̄ pɛ̍, ŋ̄ sāālu̍ŋ māā o̍ pūlāle̍ Māsāa̍ De̍e̍ve̍le̍ŋ chōo̍ o̍ fu̍la̍ ni̍. Kɛ̍ ndu̍yɛ̍ vɛ̍lɛ̄, tē ŋ̄ tōfa̍ a̍ fūlā ndɔ̄ɔ̍ o̍ Mɛ̄lɛ̄ka̍ lo̍ o̍kɔ̄ɔ̄ pɛ̍, ndu̍yɛ̍ mī ŋ̄ tōfa̍ a̍ mɛ̄ɛ̍ o̍ cho̍ ō yɔ̄ŋga᷄ŋ o̍ Mɛ̄lɛ̄ka̍ lo̍ yɛ̍ pɛ̍, ŋ̄ sāālu̍ŋ māā ndu̍ cho̍ Po̍ Mɛ̄lɛ̄ka̍a̍ ni̍. Kāni̍, Mɛ̄lɛ̄ka̍ chɔ᷄m he̍ī sa̍na̍a̍ a̍ sūɛ̍i̍ bɛ̍ndūī o̍ to̍sa̍ a̍ ndu̍ ve̍, ndi̍ yɔ̍nūŋ māā mīŋgī o̍ mi̍ŋgi̍ ndu̍ yōōmū wo̍ ni̍. 5Ndu̍yɛ̍ ndu̍ Chi̍i̍sū Ki̍li̍tī, o̍ sa̍bū ndɔ̄ɔ̍ ni᷄ŋ sa̍na̍a̍ Mɛ̄lɛ̄ka̍ tōsa̍l la̍ kɛ̄ndɛ̄i̍ ndūɛ̍i̍ ni̍. Ndi̍ yɔ̍nūŋ ni̍ māā mbo̍ sīīŋgūū ya̍ wāna̍ Chi̍i̍sū ve᷅m māā hɔ̄ltē ndɔ̄ wo̍ le̍ mī I̍ to̍sa̍ wa̍llo̍ le̍ ndu̍ mī wāŋnda̍ bā o̍ bā fe̍e̍ a̍ dɔ̍ū tīīnda᷄ŋ ndāa̍ o̍ Mɛ̄lɛ̄ka̍ ni᷄ŋ, ndu̍yɛ̍ mā tōsa̍ nyɛ̄ o̍ di̍mūl nda̍ le̍ tōsāa̍ wo̍. 6Nya̍ wāŋnda̍ Lu̍o̍m, a̍ nya̍ fa̍ū Mɛ̄lɛ̄ka̍ vēēlu̍ le̍ wāa̍ wānāa̍ Chi̍i̍sū Ki̍li̍tīa̍a̍ ni̍.
7I̍ cho̍ yāu̍wo̍ ho̍ō pōōnyīa̍a̍ nāa̍ nya̍ wāŋnda̍ Lu̍o̍m chūā kpo̍u̍, nya̍ Mɛ̄lɛ̄ka̍ kāāla̍ mbo̍ vēēlū nya̍ le̍ wāa̍ wānāā ndɔ̄ wa̍.
I̍ cho̍ pīɛ̄īle̍ŋ māā Mɛ̄lɛ̄ka̍ fi̍nyā nāa̍ a̍ Māsānɔ̄ɔ̍ Chi̍i̍sū Ki̍li̍tī māā ā yīya̍ŋ nya̍ chōo̍, ndu̍yɛ̍ mā ke̍ nya̍ kɔ̄l nyūlōo̍ fɔ̍.
Pɔ̍ɔ̍l me̍l Mɛ̄lɛ̄ka̍ ba̍li̍ka̍
8Ī tāse̍i̍ pe̍ŋ, I̍ me̍l Mɛ̄lɛ̄ka̍ ba̍li̍ka̍ sa̍na̍a̍ a̍ Chi̍i̍sū Ki̍li̍tī le̍ nya̍ kpo̍u̍. Le̍ sa̍bū ya̍ I̍ me̍l Mɛ̄lɛ̄ka̍ ba̍li̍ka̍ wo̍ cho̍ ni̍ māā wāŋndā chīe̍e̍ya̍ kpo̍u̍ ā chō tūēīyɔ̄ɔ̍ a̍ mɛ̄ɛ̍ nya̍ dɔ̄ū tīīnda᷄ŋ nyāa̍ o̍ Chi̍i̍sū ni̍ŋ yɛ̍. 9Mɛ̄lɛ̄ka̍ ō ya̍ I̍ cho̍ wa̍llo̍ le̍ ndu̍ a̍ kɔ̄l nūu̍ kpo̍u̍ wa᷅ŋnda̍ yōōŋgū kɛ̄ndɔ̄ɔ̍ dīmūllo̍ a̍ Po̍ ndɔ̄ɔ̍ o̍kɔ̄ɔ̄ wo̍, ndu̍ tɛ̍ndā se̍īle̍ŋ a̍ ya̍ o̍kɔ̄ɔ̄ ni̍. Mɛ̄lɛ̄ka̍ tɛ̄ndā se̍īle̍ŋ māā te̍le̍ŋ o̍ te̍le̍ŋ ya̍ I̍ wa̍ pi̍ɛ̍īle̍ŋ, mɛ̄ɛ̍ mī I̍ pi̍ɛ̍i̍ le̍ nya̍. 10Kāni̍ ni᷅ŋ I̍ cho̍ Mɛ̄lɛ̄ka̍ pīɛ̄īyo̍ le̍ mī I̍ sɔ̍la̍ fo̍ndāa̍ mī I̍ hu̍ŋ yi᷅l nya̍. Ndu̍yɛ̍ I̍ cho̍ pīɛ̄īle̍ŋ māā ō wa̍ ni᷅ŋ hɛ̄na᷄ŋ ndɔ̄ fɔ̍ le̍ mbō kūmbu̍l la̍ nɛ̄īyo̍ le̍ mī I̍ hi᷅ŋ ni᷅ŋ pɛ̄ŋgo̍o̍ ho̍ō. 11Yēēmɛ̍i̍ chō ya̍ kpe̍e̍kpe̍i̍ le̍ nya̍ chɔ̄ɔ̍ le̍ hāli̍ kpe̍ŋ, mī I̍ to̍sa̍ mī lā sɔ̄la̍ nyɛ̄m Nyi̍na̍ Kāsi̍ Mɛ̄lɛ̄ka̍a̍ ō kē wa̍nā la̍a̍la᷄ŋndo̍ wo̍ŋ, le̍ mī lā sɔ̄la̍ kpāāyāa̍. 12Ō cho̍ yɛ̍ ko̍ nya̍ le̍, kɛ̍ nya̍ ni̍ a̍ ya̍, mī ŋ̄ māāli̍āŋ ve̍llāa̍ vēllē. Tīīnda᷄ŋ nya̍ nɔ̄ o̍ Chi̍i̍sū ni̍ŋ ndo̍, ndu̍ lu̍e̍ī ya̍ kpāāyāa̍ ni̍. Ndu̍yɛ̍ tīīnda᷄ŋ ya̍ bɛ̍ɛ̍ ya̍ I̍ nɔ̍ o̍ Chi̍i̍sū ni̍ŋ ndo̍, ndu̍ lu̍e̍ī nya̍ kpāāyāa̍ ni̍.
13Ndu̍yɛ̍ lā sīna̍ pɛ̍ŋgu̍, chāāŋāā nīāā wa̍nāā lāāla᷄ŋnda̍, māā le̍ te̍le̍ŋnda̍ fa̍ŋgā I̍ cho̍ ni᷅ŋ kɛ̄ɛ̄sīa̍a̍ le̍ nya̍ lākɔ̄ yīlɔ̄ɔ̍, kɛ̍ mī nyɛ̄ kūūnā ya̍, I̍ ti̍ū ba̍ le̍. I̍ hɛ̍na̍ŋ mī I̍ hi᷅ŋ, le̍ mī I̍ to̍sa̍ a̍ sa̍bū mī I̍ mu̍li̍ wāŋnda̍ nya̍ Lu̍o̍ma᷅ŋnda̍ tɛ̄ɛ̄ŋ mā dɔ̄ū tīīnda᷄ŋ ndāa̍ o̍ Chi̍i̍sū ni̍ŋ, mɛ̄ɛ̍ ya̍ I̍ to̍sa̍ mi̍ wānāa̍ cho̍ a̍ Chu̍ū le̍ wa̍ ā pīli̍a̍a̍ ā dūāū tīīnda᷄ŋndo̍ o̍ ndu̍ ni̍ŋ yɛ̍. 14Ya̍ I̍ cho̍ māchūāā mɛ̄ɛ̍ wāŋndo̍ ō wā nu̍a̍ā o̍ kūo̍o̍ bɛ̄ŋgu̍ yɛ̍. I̍ cho̍ o̍ kūo̍o̍ bɛ̄ŋgu̍ le̍ wānā o̍ wānā, wānāā sīnāā yāu̍ wa̍ ni̍, a̍ wānāa̍ si̍nā ya̍u̍ le̍ wa̍, wānāa̍ sīnāā dɛ̍ni̍a̍a̍ ni̍, a̍ wānāa̍ si̍nā dɛ̍nɛ̍ le̍ wa̍. 15Le̍ sa̍bū kōŋ, yēēmɛ̍i̍ chō ya̍ bu̍tē le̍ nya̍ Lu̍o̍ma᷅ŋnda̍ bɛ̍ɛ̍ mī I̍ di̍mu̍l nya̍ Yōōŋgū Kɛ̄ndɛ̍ Mɛ̄lɛ̄ka̍a̍.
Yōōŋgū Kɛ̄ndɛ̍ Mɛ̄lɛ̄ka̍a̍ nɔ̄ kpāāyāa̍
16I̍ nɔ̍ tīīnda᷄ŋndo̍ nyɛ̄ kɛ̄ndɛ̄ kɛ̍ndɛ̍ī o̍ Yōōŋgū Kɛ̄ndɛ̍ Mɛ̄lɛ̄ka̍a̍ ni᷄ŋ. Kāni̍ fo̍ndōle̍, ndu̍ cho̍ kpāāya̍ Mɛ̄lɛ̄ka̍a̍ ni̍. A̍ ndu̍ Mɛ̄lɛ̄ka̍ pīŋī wa̍nāa̍ du̍a̍ū ti̍i̍nda᷄ŋ ndāa̍ o̍ ndu̍ ni̍ŋ nda̍ fa̍ū ni̍. Chu̍ūwa̍ fɛ̍lɛ̍ŋ a̍ tu̍e̍ī, o̍ ko̍ŋ kɔ̍ɔ̍lī mi̍ wānāa̍ cho̍ a̍ Chu̍ū le̍ wa̍ ā tūɛ̄ī. 17Ndu̍yɛ̍ Yōōŋgū Kɛ̄ndɛ̍ Mɛ̄lɛ̄ka̍a̍ ndu̍ chɔ᷅m mɛ̄ɛ̍ Mɛ̄lɛ̄ka̍ tōsā mī wāŋndo̍ ō sīmnu᷄ŋ wa̍nā sa̍kpō Mɛ̄lɛ̄ka̍ pi̍la̍ o̍ hɔ̄l lɛ̍ ni̍. Ndu̍yɛ̍ o̍ tīīnda᷄ŋndo̍ dɔ̄wɔ̄ɔ̍ o̍ Chi̍i̍sū ni̍ŋ Mɛ̄lɛ̄ka̍ tōsā he̍ī ni̍. Bōllē sūɛ̍i̍ he̍ī lē hēēlu̍ lē tūūsu̍ le̍ŋ le̍ cho̍ tīīnda᷄ŋndo̍ dɔ̄wɔ̄ɔ̍ o̍ ndu̍ ni̍ŋ ni̍. Le̍nde̍ i̍ cho̍ ī dīmīa̍ŋ o̍ Yāu̍ Mɛ̄lɛ̄ka̍a̍ ni᷄ŋ ni̍ āā, “Wāna̍ Mɛ̄lɛ̄ka̍ tōsā ho̍ō mbō sīmnu᷄ŋ wa̍nā sa̍kpō Mɛ̄lɛ̄ka̍ o̍ hɔ̄l le̍ mɛ̄ɛ̍ o̍ nɔ̍ tīīnda᷄ŋndo̍ o̍ Mɛ̄lɛ̄ka̍ ni᷄ŋ yɛ̍ wo̍, wānā ko̍ŋ ndu̍ wa᷅ yo̍o̍mū kpe̍e̍kpe̍i̍ ni̍.”
Wānā o̍ wānā cho̍ ō yāālāā
18Mɛ̄lɛ̄ka̍ chɔ᷄m māā ō dɔ̄ūnu᷄ŋ tu̍mbe̍ a̍ ŋ̄wāŋndā chīe̍e̍ mbo̍ tūsī nda̍ dɛ̍nɛ̍ pa̍lāa̍ chōo̍ chɔ̄nɔ᷄ŋndo̍ o̍ fo̍ndāŋ ndɔ̄ɔ̍. Kāni̍ fu̍u̍le̍, le̍ nyɛ̄ o̍ nyɛ̄ wɔ̄ɔ̍ŋ nda̍ tōsa̍l ndu̍ a̍ īsɔ̄ɔ̍ o̍ īsɔ̄ɔ̍ wɔ̍ɔ̍ŋ nda̍ chō chāāŋāā ndāā wa᷅ŋndā chīe̍e̍ya̍ tōsāllo̍. Dɛ̍nɛ̍la̍ wɔ̍ɔ̍ŋndā wāŋnda̍ ha̍ā lā tōsa̍ wāŋnda̍ ā si̍nā to᷅nya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ le̍. 19Le̍ sa̍bū Mɛ̄lɛ̄ka̍ chō a̍ tu̍mbo̍o̍ a̍ nda̍ wo̍ cho̍ ni̍ māā, nyɛ̄ wāŋnda̍ nɔ̄lā mā sīna̍ a̍ Mɛ̄lɛ̄ka̍ o̍kɔ̄ɔ̄ wo̍ chō kpe̍nde̍ke̍le̍. Kāni̍ fo̍ndōle̍, Mɛ̄lɛ̄ka̍ pi̍la̍ chɔ᷄m nda̍ ndi̍ wa̍la̍ŋ. 20Chɔ̍ŋ a̍ bōōndi̍i̍ Mɛ̄lɛ̄ka̍ tōōsi̍a̍a̍ chi̍e̍ēŋndo̍ ve̍ wāŋnda̍ sīnā pɛ̍ŋgu̍ wa̍la̍ŋ māā kpāāya̍ Mɛ̄lɛ̄ka̍a̍ nyɛ̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍. Ndu̍yɛ̍ ā sīnā wa̍la̍ŋ māā Mɛ̄lɛ̄ka̍ lēkɛ̍ndɛ̍ī o̍ cho̍ ni̍. Le̍la̍ŋ mi̍ chē bɛ̍ɛ̍ sɔ̄ɔ̍ŋ cho̍ mu᷅ŋ a̍ Mɛ̄lɛ̄ka̍ o̍kɔ̄ɔ̄ wo̍ŋ ŋ̄ cho̍ sɔ̍ɔ̍ŋ wānā che᷅ le̍ ni̍, kɛ̍ ndu̍yɛ̍ wāŋnda̍ nɔ̄lā mā sīna̍ a̍ mu̍ŋ o̍kɔ̄ɔ̄ wa̍la̍ŋ. Kāni̍ fo̍ndōle̍, nyɛ̄m o̍ to̍sa̍ wo̍ŋ, mu̍ŋ ŋ̍ to̍sā mī wāŋnda̍ sīna̍ sūɛ̍i̍ he̍ī pɛ̄ŋgu̍. Le̍la̍ŋ, mɛ̄ɛ̍ o̍ mɛ̄ɛ̍ cho̍ mī wāna̍ chi̍o̍o̍ kɔ̄ɔ̄sa̍ mbō fūla̍ lēni᷄ŋ te̍. 21Kāni̍ fu̍u̍le̍, ā sīnā a̍ Mɛ̄lɛ̄ka̍ o̍kɔ̄ɔ̄, kɛ̍ ma̍ kɛ̄ɛ̄ le̍ ndu̍ bɛ̄ɛ̄le̍ le̍ŋ kīo̍o̍ māā ndu̍ cho̍ Mɛ̄lɛ̄ka̍ lēkɛ̍ndɛ̍ī ni̍. Ndu̍yɛ̍ ba̍li̍ka̍a̍ bɛ̍ɛ̍ ā di̍mūl ndu̍ le̍. Sɔ̄ɔ̍ŋ ŋ̄dīɔ̄mndo̍ŋ ko̍ni̍ ŋ̍ hu᷅ŋ nda̍ o̍ lēbōl ni̍. Ma̍ sīmnu᷄ŋ a̍ su̍mɛ̍i̍ o̍ yīya᷄ŋnda̍ nda̍la̍ŋ ni᷄ŋ. 22Ā bīī pɛ̍ ā dīmi̍ māā ā kēndū kɔ̄l, mɛ̄ɛ̄māā dīɔ̄māā fo̍ndūa̍a̍ fu̍u̍ nda̍ chō ni̍. 23Yɔ̄ŋi̍ bɛ̍ɛ̍ nda̍ sōōlu̍u̍ Mɛ̍lɛ̄ka̍ o̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍ yɛ̍, ma̍ sāā nyɛ̄m chēle̍ŋndo̍ŋ sōōlūūwo̍. Ma̍ bīī ma̍ tūūlīāā wāŋndā chīe̍e̍ya̍ a̍ cho̍ ha̍ā wu̍ wa̍, ma̍ tūūlīāā yōūwa̍, a̍ vīsīāā yɔ̄ŋāa̍, a̍ vīsīāā lākɛ̄kɛ̍u̍wa̍, le̍ nda̍ sōōlūūwo̍.
24Le̍ he̍ī, mi̍ Mɛ̄lɛ̄ka̍ māl nda̍ ni̍ko̍ o̍ bā ndāa̍ chōo̍ ma̍ sāā sɔ̄ɔ̍ŋ nɔ̍ɔ̍lɛ̍i̍yo̍ŋ tōsāa̍, ŋ̄ yēēma̍ŋ bīī nda̍ le̍ tōsāa̍ wo̍ŋ. Ma̍ sāā sɔ̄ɔ̍ŋ bɛ̄ɛ̄ ta̍mbɛ̍i̍yo̍ŋ tōsa̍la᷅ŋndo̍ vēllāa̍ vēllē. 25Le̍ sa̍bū he̍ī yɔ̄nu̍ŋ ndo̍ cho̍ ni̍ māā, ā ma᷄l lāāla᷄ŋndo̍ a̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ ma̍ lāāla᷄ŋ a̍ sūɛ̍i̍ lāchōōwɛ̄i̍. Ndu̍yɛ̍ ā bīī ma̍ sāā nyɛ̄m Mɛ̄lɛ̄ka̍ tōōsi̍a̍a̍ wo̍ŋ sōōlūūwo̍ mā sāāŋgīāl mu̍ŋ, yɔ̄ŋi̍ nda̍ sōōlu̍u̍ ni̍ko̍ Mɛ̍lɛ̄ka̍ to̍o̍si̍a̍a̍ nyɛ̄m mu᷅ŋ ndo̍ yɛ̍. Ndu̍ bɛ̍nda̍ ni̍ mī ŋ̄wāŋndā chi̍e̍e̍ a̍ li̍sa̍ le̍ fɛ̍ɛ̍ŋ a̍ fɛ̍ɛ̍ŋ. Āmi̍i̍nā.
26Le̍ nyɛ̄ wāŋnda̍ tōsa̍ ko̍ŋ ndo̍, mi̍ Mɛ̄lɛ̄ka̍ māl nda̍ o̍ bā ndāa̍ chōo̍. O̍ ko̍ŋ kɔ̍ɔ̍lī, mi̍ yēēmɛ̍i̍ su̍u̍ndɛ̍i̍ wɔ̍ɔ̍ŋnde̍ bīī mi̍ ī lūɛ̄ī nda̍ o̍ lākɔ̄l. Mi̍ wāŋ lāāndūa̍a̍ māl wāa̍ a̍ wāŋ pīāāndūa̍a̍ mɛ̄ɛ̍ Mɛ̄lɛ̄ka̍ kɛ̄ɛ̄si̍a̍a̍ yɛ̍, ma̍ sāā hīni̍la̍ŋ a̍ chāāŋāā ndāā wa᷅ŋ lāāndūa̍a̍. 27Pūa̍a̍ bɛ̍ɛ̍ ma̍ māl wāa̍ a̍ wāŋ lāāndūa̍a̍ mɛ̄ɛ̍ Mɛ̄lɛ̄ka̍ kɛ̄ɛ̄si̍a̍a̍ yɛ̍, ma̍ dūāū kɔ̄lta̍ŋ kpo̍u̍ o̍ hīni̍la̍ŋ a̍ chāāŋāā ndāā wa᷅ŋ pīāāndūa̍a̍. Nda̍ pūa̍a̍ ma̍ sāā sɔ̄ɔ̍ŋ bɛ̄ɛ̄ ta̍mbɛ̍i̍yo̍ŋ, ma̍ sāā hīni̍la̍ŋ a̍ chāāŋāā ndāā wa᷅ŋ pīāāndūa̍a̍. Le̍ sa̍bū kōŋ mi̍ Mɛ̄lɛ̄ka̍ tūsī nda̍ nyɛ̄ pālāa̍ chōo̍ mɛ̄ɛ̍ nda̍ a̍a̍ bɛ̍nda̍ le̍ sɔ̄lāa̍ le̍ dɛ̍nɛ̍ wɔ̍ɔ̍ŋ wāā le̍ndo̍o̍ yɛ̍.
28Ndu̍yɛ̍ ha̍a̍a̍ ma̍ kɛ̄ɛ̄ le̍ Mɛ̄lɛ̄ka̍ chūa̍a̍ māā ndu̍ cho̍ Mɛ̄lɛ̄ka̍ ni̍ mbo̍ māl nda̍ o̍ bā ndāa̍ chōo̍. O̍ ko̍ŋ, ma̍ sīmnu᷄ŋ wa̍nāā bōlīī tāmbɛ̍i̍. Ma̍ sāā sɔ̄ɔ̍ŋ wāna̍ chi̍e̍e̍ to̍sā le̍ wo̍ŋ tōsāa̍. 29Sɔ̄ɔ̍ŋ wɔ̍ɔ̍ŋndo̍ŋ kpo̍so̍ŋ ko̍ni̍ ŋ̍ cho̍ nda̍ o̍ lākɔ̄l ni̍, sɔ̄ɔ̍ŋ dɛ̍nɛ̍ wɔ̍ɔ̍ŋndo̍ŋ, a̍ hɔ̄lte̍ŋ le̍ nyɛ̄m pi̍la̍ŋ, a̍ yɛ̄lē tūlāāle̍ŋ. O̍ ko̍ŋ kɔ̍ɔ̍lī, kɔ̄ltā ndāla̍ŋ lā pīāā a̍ pāŋa̍li̍āŋndo̍ o̍ nyɔ̄ɔ̍ŋ chōo̍, a̍ wāŋndā chīe̍e̍ya̍ dīūwo̍, a̍ sɔ̍ŋgɔ̄la̍ŋ, a̍ wo̍yāa̍, a̍ yīya᷄ŋ wɔ̍ɔ̍ŋndo̍ a̍ chāāŋnda̍, a̍ chōŋgūla̍ŋ, 30a̍ dīōla̍ŋ wāŋndo̍ tɛ̄ɛ̄mbūūwo̍, a̍ Mɛ̄lɛ̄ka̍ yɛ̄le̍ŋ tūllo̍, a̍ yīōūwa᷅ŋnda̍ŋ, a̍ chūānɔ᷄ŋndo̍ ō bɛ̄ndū, a̍ yōŋgāa̍. Lɔ̍ɔ̍ lɔ̍ɔ̍ nɛ̄īla̍ sɛ̍nɛ̄īla̍ŋ nūūvīa̍a̍ le̍ sɔ̄ɔ̍ŋ wɔ̍ɔ̍ŋndo̍ŋ tōsāa̍, ā tu̍i̍ī wa̍nāa̍ ve̍lū nda̍ wa̍ dīōm te̍, 31ā kīndu̍ kɔ̍l te̍, ā lo᷅ o̍ lēdīōm te̍, ā nɔ̍ i̍kɛ̍ndɛ̄ le̍, ndu̍yɛ̍ ā nɔ̍ īnyīɛ̍ɛ̍ le̍. 32Ā sīnā ndi̍ cha̍la̍ŋ māā sāwāla̍ Mɛ̄lɛ̄ka̍la̍ŋ lā dīmi̍ māā wānāa̍ to̍sā sɔ̍ɔ̍ŋ wɔ̍ɔ̍ŋ wāā nu̍a̍ā wa̍ ā nɔ̄ mā sɔ̄la̍ pīɔ̍mndo̍. Kɛ̍ o̍ ko̍ŋ ni̍ŋ kpo̍u̍ mā tōsā mu̍ŋ kɛ᷅. Ndu̍yɛ̍ ō fūla̍ o̍ ko̍ŋ kɔ̍ɔ̍lī, mā sāŋgālā vɛ̍lɛ̄ wānāa̍ to̍sā mu̍ŋ nda̍.
Currently Selected:
Lu̍o̍ma᷅ŋnda̍ 1: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
