Lu̍o̍ma᷅ŋnda̍ 5
5
Pīɔ̍m Chi̍i̍sōo̍ sīīŋgu̍u̍ na̍a̍ ndi̍a̍a̍mɔ̍ɔ̍wa̍a̍ Mɛ̄lɛ̄ka̍a̍
1Le̍la̍ŋ, mɛ̄ɛ̍ Mɛ̄lɛ̄ka̍ tōsa̍ mi̍ ŋ̄ sīmnu᷄ŋ wa̍nāā sa̍kpō ndu̍ pi̍la̍ Mɛ̍lɛ̄ka̍ o̍ hɔ̄l le̍ tīīnda᷄ŋ na̍a̍ ŋ̄ dɔ̄ū o̍ ndu̍ ni̍ŋ ndo̍ yɛ̍, ndu̍ Mɛ̍lɛ̄ka̍ ō hīni̍ ni᷅ŋ kɔ̄l a̍ na̍a̍ sa̍na̍a̍ o̍ sa̍bu̍ Māsānɔ̍ nāa̍ Chi̍i̍sū Ki̍li̍tīo̍o̍ ni᷄ŋ. 2Ndu̍yɛ̍ o̍ ko̍ŋ kɔ̍ɔ̍lī, le̍ tīīnda᷄ŋ na̍a̍ ŋ̄ dɔ̄ū o̍ Chi̍i̍sū Ki̍li̍tī ni̍ŋ ndo̍, ndu̍ Ki̍li̍tī ō tōsa̍ mi̍ ŋ̄ chā sūɛ̍i̍ kɛ̍ndɛ̄ī Mɛ̄lɛ̄ka̍ tōsa̍l na̍a̍ ve̍. Ndu̍yɛ̍ ŋ̄ chō a̍ kɔ̄l kɛ̄ndɛ̄ le̍ nyɛ̄ na̍a̍ ŋ̄ chō ko̍ŋ le̍hɔ̍l o̍ nɛ̄ī le̍ ndu̍ wo̍, ndu̍ yɔ̍nūŋ ni̍ māā na̍a̍ bɛ̍ɛ̍ ŋ̄ chō hūnɔ̄ɔ̄ wā o̍ nāŋɔ̄ɔ̍ Mɛ̄lɛ̄ka̍a̍ ni᷄ŋ. 3Ndu̍yɛ̍ vɛ̍lɛ̄ ŋ̄ chō a̍ kɔ̄l kɛ̄ndɛ̄ le̍ nyɛ̄ pālāa̍ ke̍e̍kū na̍a̍ chōo̍ wo̍. Kāni̍ fu̍u̍le̍, tē nyɛ̄ pālāa̍ kēēku̍ na̍a̍ chōo̍ pɛ̍, he̍ī tōsā mī ŋ̄ hīōū lāchī a̍ sīsi̍la̍ŋ o̍ lāāla᷄ŋ nāa̍ chōo̍ nyɛ̍ kɛ̄ndɛ̄ yi̍. 4Ndu̍yɛ̍ tē ŋ̄ si᷄m le̍nde̍ yi̍ pɛ̍, he̍ī tōsā mī Mɛ̄lɛ̄ka̍ chu̍a̍ na̍a̍ māā ŋ̄ chō ā bɛ̄ndāā. Tē ō chu̍a̍ yɛ̄ na̍a̍ pɛ̍ māā ŋ̄ chō ā bɛ̄ndāā, mɛ̄ɛ̍ he̍ī tōsā mī ŋ̄ wa̍ lēhɔ̄l o̍ nɛ̄ī le̍ nyɛ̄ Mɛ̄lɛ̄ka̍ nɔ̄ le̍ na̍a̍ wo̍. 5Ndu̍yɛ̍ hɔ̄ltē na̍a̍ ŋ̄ nɔ̄ le̍ŋ o̍ nɛ̄ī le̍ŋ, ŋ̄ hu̍i̍nūŋ le̍ni̍ŋ te̍. Kāni̍ fu̍u̍le̍, Mɛ̄lɛ̄ka̍ tōsa̍ mi̍ ŋ̄ sīnā mɛ̄ɛ̍ kpɛ̍ o̍ ka̍a̍la̍ na̍a̍ yɛ̍. Ō tōsa̍ he̍ī sa̍na̍a̍ a̍ Nyi̍nā ndɔ̍ Kāsi̍ o̍ to̍sa̍ mbo̍ wā na̍a̍ kɔ̄ɔ̄lī wo̍.
6Mi̍ Ki̍li̍tī wu᷅ le̍ na̍a̍ wānāā wɔ̄ɔ̍ŋnda̍. Bōōndi̍i̍ ke̍ŋ na̍a̍ ŋ̍ nɔ̍lā na̍a̍ pi̍la̍ sōlī lēni᷄ŋ te̍. Mbo̍ sɔ̄lā pīɔ̍mndo̍ a̍ te̍le̍ŋ Mɛ̄lɛ̄ka̍ pi̍la̍ kɛ̄ɛ̄si̍a̍a̍ wo̍. 7Ō chō sūɛ̍i̍ ka̍lā kpo᷅ke̍ le̍ mī wāŋndo̍ chɛ᷄l le̍ mbō vī le̍ wāna̍ si᷅m ho̍ō ō kālā ka̍lā o̍ nyɛ̄ sāwāla̍ŋ lā dīmi̍ wo̍ tōsāa̍ ni᷄ŋ ndo̍. Kɛ̍ ndu̍yɛ̍ nāa̍ pu̍m mī wāŋndo̍ chɛ᷄l le̍ mbō vī le̍ wāna̍ nɔ̍ nyīɛ̍ɛ̍yīī wāŋndā chīe̍e̍ya̍ wo̍. 8Kɛ̍ Mɛ̄lɛ̄ka̍ ndu̍ ndu̍, mbo̍ chɔ̄m na̍a̍ kāālā bɛ̄ndū o̍ ka̍a̍la̍ na̍a̍ wo̍. Kāni̍ fo̍ndōle̍, ŋ̄ wa̍ wɔ̄ wānāā wɔ̄ɔ̍ŋ mi̍ Ki̍li̍tī wu᷅ le̍ na̍a̍. 9Pīɔ̍m Ki̍li̍tī sɔ̍la̍ ko̍ŋ ndo̍, ndu̍ to̍sa̍ ni̍ mi̍ Mɛ̄lɛ̄ka̍ sīīŋgūū ni᷅ŋ na̍a̍ wānāā sa̍kpō ndu̍ pi̍la̍ Mɛ̍lɛ̄ka̍ o̍ hɔ̄l. Nāa̍ Mɛ̄lɛ̄ka̍ to̍sa̍ wɔ̄ ke̍ŋ, ō nɔ̄lā kpe̍e̍kpe̍i̍ mbō pīŋi̍ na̍a̍ o̍ sa̍bu̍ Ki̍li̍tīo̍o̍ ni᷄ŋ. O̍ ko̍ŋ, ndu̍ Mɛ̍lɛ̄ka̍ ō do̍u̍nūŋ tu̍mbe̍ mbō tūsi̍ na̍a̍ nyɛ̄ pālāa̍ chōo̍ le̍. 10Bōōndi̍i̍ na̍a̍ ŋ̄ wa̍ wɔ̄ ya̍a̍mɔ̍ɔ̍wa̍a̍ Mɛ̄lɛ̄ka̍ ve̍, bōōndi̍i̍ ke̍ŋ Mɛ̄lɛ̄ka̍ tōsa̍ ni̍ mi̍ po̍ ndɔ̄ɔ̍ sɔ̄lā pīɔ̍mndo̍ le̍ na̍a̍, o̍ ko̍ŋ kɔ̍ɔ̍lī, mi̍ ŋ̄ sīmnu᷄ŋ Ndi̍a̍a̍mɔ̍ɔ̍wa̍a̍ ndɔ̄. Nāa̍ Mɛ̄lɛ̄ka̍ tōsa̍ wɔ̄ ke̍ŋ, ō nɔ̄lā kpe̍e̍kpe̍i̍ mbō pīŋi̍ na̍a̍ bōōndi̍i̍ na̍a̍ ŋ̄ chō ni᷅ŋ he̍ī ndi̍a̍a̍mɔ̍ɔ̍wa̍a̍ ndūa̍a̍ ve̍. He̍ī chō yɔ̄nɔ᷄ŋ le̍ chō Ki̍li̍tī cho̍ yōōmū wo̍. 11Kɛ̍ ndu̍yɛ̍ ō cho̍ ko̍ ke̍ŋ te̍. Ŋ̄ chō a̍ kɔ̄l kɛ̄ndɛ̄ le̍ nyɛ̄ Mɛ̄lɛ̄ka̍ tōsa̍l na̍a̍ sa̍na̍a̍ o̍ Māsānɔ̍ nāa̍ Chi̍i̍sū Ki̍li̍tī ni̍ŋ ndo̍. Kāni̍ fo̍ndōle̍, ndu̍ to̍sa̍ ni̍ mi̍ ŋ̄ sīmnu᷄ŋ ni᷅ŋ ndi̍a̍a̍mɔ̍ɔ̍wa̍a̍ Mɛ̄lɛ̄ka̍.
Yɛ̍ yɔ̍ɔ̍ a̍ A̍dām tɛ̍ɛ̄ŋ nda̍ Chi̍i̍sū Ki̍li̍tī
12Wānā pi᷅lɛ̍ kpe̍ to̍sa̍ ni̍ mi̍ yɔ̄ŋ wɔ̄ɔ̍ŋndo̍ hūŋ o̍ chi̍e̍ēŋndo̍ ni᷄ŋ, ndu̍yɛ̍ mi̍ yɔ̄ŋ wɔ̄ɔ̍ŋndo̍ hūŋ a̍ pīɔ̍mndo̍. O̍ ko̍ŋ, mi̍ pīɔ̍mndo̍ hūŋ le̍ ŋ̄wāŋndā chīe̍e̍ kpo̍u̍, kāni̍ fu̍u̍le̍, ŋ̄wāŋndā chīe̍e̍ kpo̍u̍ ā tōsa̍ yɔ̄ŋ wɔ̄ɔ̍ŋndo̍. 13Lɔ̍ɔ̍ pa̍ bɛ̍ɛ̍ Mɛ̄lɛ̄ka̍ yɔ̄ŋgū sa̍wāla̍ŋ, wāŋnda̍ o̍ chi̍e̍ēŋndo̍ chōo̍ nda̍ a̍a̍ to̍sa̍ ni᷅ŋ yɔ̄ŋ wɔ̄ɔ̍ŋndo̍. Kɛ̍ ndu̍yɛ̍ tē sāwāla̍ ve̍ la̍ du̍a̍u̍wāā le̍, yɔ̄ŋndā wɔ̄ɔ̍ŋndā wāŋnda̍ tōsā la̍ŋ lā ve᷅ la̍ chɔ̍māā nda̍ chōo̍ le̍. 14Kɛ̍ ndu̍yɛ̍ chɔ̍ŋ a̍ te̍le̍ŋ A̍dām wa̍ yōōmū wo̍ mbo̍ kūā a̍ te̍le̍ŋ Mūu̍sē wa̍ yōōmū wo̍, mi̍ pīɔ̍mndo̍ wā ŋ̄wāŋndā chīe̍e̍ o̍ la̍nda᷄ŋ cho̍o̍. Wānāa̍ nda̍ a̍a̍ to̍sa̍ bɛ̍ɛ̍ yɔ̍ŋ wɔ̄ɔ̍ŋ su̍u̍ A̍dām to̍sa̍ mbo̍ sōlī Mɛ̄lɛ̄ka̍ dīōm te̍ wa̍, nda̍ bɛ̍ɛ̍ ā wa̍ pīɔ̍mnda̍ŋ.
O̍ nɛ̄ī pu̍m ni᷄ŋ, A̍dām wa̍ māwāā māā tāāmāsi̍ wāna̍ ndu̍ o̍o̍ nɔ̍ le̍ hūnɔ̄ɔ̍ wo̍. 15Kɛ̍ ndu̍yɛ̍ wānāā ŋīɔ̍ɔ̍ŋnda̍ ha̍ā, yɛ̍ yɔ̍ɔ̍ chō nda̍ tɛ̄ɛ̄ŋ. Kāni̍ fu̍u̍le̍, nɛ̄i̍ Mɛ̄lɛ̄ka̍ tōsa̍ kɛ̄ndɛ̄i̍ o̍ ŋ̄wāŋndā chīe̍e̍ lo̍ wo̍ ō chō te̍ŋge̍ŋ a̍ nɛ̄i̍ A̍dām to̍sa̍ yɔ̄ŋ wɔ̄ɔ̍ŋndo̍ wo̍. Mi̍ wāŋndā chīe̍e̍ya̍ wū ta̍u̍ ta̍u̍ le̍ yɔ̄ŋ wɔ̄ɔ̍ŋ wānā pi᷅lɔ̍ɔ̍ ho̍ō. Kɛ̍ ndu̍yɛ̍ kɛ̄ndɛ̄i̍ Mɛ̄lɛ̄kɛ̍i̍ a̍ kē o̍ yɔ̍ŋgu̍ le̍ wānāā fāŋgā fa̍ŋgā wo̍ ndu̍ hi̍o̍ū po̍lo̍ŋ. Ndu̍yɛ̍ he̍ī yɔ̄nu̍ŋ sa̍na̍a̍ o̍ kɛ̄ndɛ̄i̍ wānā pi᷅lɔ̍ɔ̍ ho̍ō tōsa̍ ve̍ ni᷄ŋ, ndu̍ yɔ̍nūŋ māā Chi̍i̍sū Ki̍li̍tī ni̍. 16Nyɛ̍ yɔ̍nu̍ŋ o̍ kē Mɛ̄lɛ̄ka̍ yɔ̄ŋgu̍ ŋ̄wāŋndā chīe̍e̍ wo̍ kɔ̄ɔ̄lī wo̍ chō te̍ŋge̍ŋ, a̍ nyɛ̍ yɔ̍nu̍ŋ o̍ yɔ̄ŋ wɔ̄ɔ̍ŋ wāŋndo̍ o̍ pīlɔ̍ɔ̍ tōsa̍ wo̍ kɔ̄ɔ̄lī wo̍. Mɛ̄ɛ̍ wāŋndo̍ ho̍ō tōsa̍ yɔ̄ŋ wɔ̄ɔ̍ŋndo̍, mi̍ Mɛ̄lɛ̄ka̍ kīlūl ndu̍ yāmɛ̍i̍ le̍ mbō tūsi̍ ndu̍ nyɛ̄ pālāa̍ chōo̍. Kɛ̍ mi̍ kē Mɛ̄lɛ̄ka̍ yɔ̄ŋgu̍ ho̍ō o̍ yɔ̄ŋndā wɔ̄ɔ̍ŋndā fāŋgālā yɔ̍nu̍ŋ nda̍ŋ kɔ̄ɔ̄lī wo̍ tōsā mi̍ Mɛ̄lɛ̄ka̍ sīīŋgūū ŋ̄wāŋndā chīe̍e̍ wa̍nāā sa̍kpō ndu̍ pi̍la̍ o̍ hɔ̄l. 17Wāŋndo̍ ō pīlɛ̍ to̍sa̍ ni̍ mi̍ pīɔ̍mndo̍ wā ŋ̄wāŋndā chīe̍e̍ o̍ la̍nda᷄ŋ cho̍o̍, kāni̍ fu̍u̍le̍ le̍ yɔ̄ŋ wɔ̄ɔ̍ŋ wānā pi᷅lɛ̍ kōŋ ō tōsa̍ wo̍. Kɛ̍ ndu̍yɛ̍ wāŋndo̍ ō pīlɔ̍ɔ̍ ho̍ō, ndu̍ yɔ̍nūŋ māā Chi̍i̍sū Ki̍li̍tī ni̍, sūɛ̍i̍ kɛ̍ndɛ̄ī ndu̍ ndu̍ to̍sa̍ ve̍ ndi̍ hi̍o̍ū po̍lo̍ŋ. Kāni̍ fo̍ndōle̍, ndu̍ Ki̍li̍tī, wānāā Mɛ̄lɛ̄ka̍ tōsa̍l kɛ̄ndɛ̄i̍ ndūɛ̄ī bɛ̍ndūe̍i̍, ndu̍yɛ̍ mbo̍ yɔ̄ŋgū nda̍ kē ndɔ̄ɔ̍ le̍ sīmnɔ᷄ŋndo̍ wānāā sa̍kpō ndu̍ pi̍la̍ o̍ hɔ̄l la̍, ō tōsa̍ ma̍ wā hūnɔ̄ɔ̄ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sɔ̄lā.
18Le̍la̍ŋ, mɛ̄ɛ̍ yɔ̄ŋ wɔ̄ɔ̍ŋ wānā pi᷅lɔ̍ɔ̍ tōsa̍ mi̍ Mɛ̄lɛ̄ka̍ tūsī ŋ̄wāŋndā chīe̍e̍ kpo̍u̍ nyɛ̍ pālāa̍ chōo̍ yɛ̍, le̍nde̍ ko̍ni̍ le̍ mɛ̄ɛ̍ wāŋndo̍ ō pīlɛ̍ ō tōsa̍ nyɛ̍ cho̍ sa̍kpō wo̍ yɛ̍, mi̍ ŋ̄wāŋndā chīe̍e̍ kpo̍u̍ a̍ sɔ̍lā mālɔ̄ɔ̍. Ndu̍yɛ̍ mi̍ Mɛ̄lɛ̄ka̍ tōsā ma̍ sɔ̄lā yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍. 19Ndu̍yɛ̍, mɛ̄ɛ̍ wānā pi᷅lɛ̍ sōli̍ Mɛ̄lɛ̄ka̍ dīōm mi̍ he̍ī tōsā, mi̍ wānāā fāŋgā ā sīmnu᷄ŋ wa̍nāā yɔ̄ŋ wɔ̄ɔ̍ŋ yɛ̍, le̍nde̍ ko̍ni̍ le̍ mɛ̄ɛ̍ wānā pi᷅lɛ̍ tūēī Mɛ̄lɛ̄ka̍ dīōm yɛ̍, mi̍ he̍ī tōsā mi̍ wānāā fāŋgā ā wā sīmnɔ᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l.
20Hūnɔ̄ɔ̄ sāwāla̍ Mɛ̄lɛ̄ka̍la̍ŋ lā hīŋ ndo̍ ō tōsa̍ mātōsāā mi̍ yɔ̄ŋ wɔ̄ɔ̍ŋndo̍ chɔ̄ɔ̄lū kūīī ta̍u̍. Kɛ̍ ndu̍yɛ̍ mɛ̄ɛ̍ yɔ̄ŋ wɔ̄ɔ̍ŋndo̍ ō kūi̍i̍, mi̍ Mɛ̄lɛ̄ka̍ chɔ̄ɔ̄lū ŋ̄wāŋndā chīe̍e̍ kɛ̍ndɛ̄i̍ ndūɛ̍i̍ tōsāl mi̍ ī hīāū a̍ mɛ̄ɛ̍ yɔ̄ŋ wɔ̄ɔ̍ŋndo̍ kūi̍i̍ yɛ̍ po̍lo̍ŋ po̍lo̍ŋ. 21Le̍la̍ŋ, bōllē sūɛ̍i̍ ka̍lɛ̄i̍ kpo̍u̍ cho̍ ni̍ māā, mɛ̄ɛ̍ ŋ̄wāŋndā chīe̍e̍ a̍ wa̍ yɔ̄ŋ wɔ̄ɔ̍ŋndo̍ o̍ bā bɛ̄ŋgu̍, o̍ ko̍ŋ, mi̍ yɔ̄ŋ wɔ̄ɔ̍ŋndo̍ chūū nda̍ kpo̍u̍ pi̍ɔ̍mndo̍ yɛ̍, le̍nde̍ ko̍ni̍ ŋ̄wāŋndā chīe̍e̍ a̍ cho̍ o̍ kɛ̄ndɛ̄i̍ Mɛ̄lɛ̄kɛ̍i̍ bɛ̄ŋgu̍ ni̍. Kāni̍ fu̍u̍le̍, Mɛ̄lɛ̄ka̍ tōsa̍ ma̍ sīmnu᷄ŋ wa̍nāā sa̍kpō ndu̍ pi̍la̍ Mɛ̍lɛ̄ka̍ o̍ hɔ̄l. Ndu̍yɛ̍ he̍ī ī tōsa̍ mi̍ ŋ̄wāŋndā chīe̍e̍ a̍ sɔ̍lā yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sa̍na̍a̍ o̍ Māsānɔ̍ nāa̍ Chi̍i̍sū Ki̍li̍tī ni̍ŋ.
Currently Selected:
Lu̍o̍ma᷅ŋnda̍ 5: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
