ÉXODO 1

Egiptopi israelitaspa ñak'ariynin

1-4Kaykuna kanku Israelpa wawasnimpa sutisnin, pikunachus Jacobwan khuska sapa uj aylluntin Egiptoman yaykojkunajta: Rubén, Simeón, Leví, Judá, Isacar, Zabulón, Benjamín, Dan, Neftalí, Gad, Aser ima. 5Jacobpa miraynin tukuynimpi karqanku qanchis chunka. Chaypacha Joseqa Egiptopiña karqa.

6Josewan wauqesninwan wañuraporqanku, jinallataj paykunaj mitasninkupis. 7Israelitasqa ashkha kasqankuman jina ashkhata mirarqanku, may atiyniyojtaj karqanku; jinamanta paykunaqa Egiptoman junt'aykorqanku. 8-9Chay qhepata waj reyñataj Egiptoman yaykorqa, payqa Joseta mana rejserqachu. Chayrayku payqa runasninman nerqa: Qhawariychej, israelitasqa noqanchejmanta aswan ashkha, aswan atiyniyojtaj. 10Chayrayku kunan noqanchejqa sumajta qhawakuspa imatapis ruwananchejpuni tiyan, paykuna ama astawan miranankupaj. Manachayqa mayk'aj guerra kajtin, enemigosninchejman kutikuspa maqawasunchej, jinaspataj riponqanku.

11Chaymanta Egiptomanta kajkunaqa capatazkunata churarqanku, israelitasta jasut'ispalla mayta llank'achinankupaj. Paykunata iskay llajtasta ruwacherqanku Pitonta, Ramasestawan. Chay llajtasqa karqa rey faraón mikhukunasta waqaychachinampaj. 12Jinata astawan jasut'ispa llank'achishajtinkupis, israelitasqa astawan miraykuspa ashkhayarqanku. Chayrayku egipciosqa astawan manchachikorqanku israelitasmanta.

13Egipciosqa israelitasta maytapuni ñak'aricherqanku wata runasta jina llank'achispa. 14Ajinata maytapuni llakichispa israelitasta llank'acherqanku, t'uruta sarucherqanku, ladrillosta ruwacherqanku, wakintaqa campospi llank'acherqanku, wakintataj mayta jasut'ispa waj llank'aykunaman churarqanku. 15Chantapis Egiptomanta reyqa hebreospa onqochejkunasninman parlarqa, Siframan, Fuamanwan, nispa: 16Hebreas wawata nacechikushajtinku yanapankichej chayqa, allinta qhawankichej, qhari kajtenqa wañuchinkichej; warmi kajtintaj saqellankichej kausajta.

17Onqochej warmistaj Diosta manchachikuspa Egipto reypa nisqanta mana kasorqankuchu, saqellarqanku qhari wawas kausajta. 18Reytaj payta mana kasusqankuta yachaspa onqochejkunata wajyachispa nerqa: Imaraykutaj qankuna kamachisqayta mana ruwankichejchu, qhari wawasta kausajta saqellankichejri? 19Paykunataj faraonman kuticherqanku: Hebrea warmisqa mana egipcia warmis jinachu kanku; imarayuchus paykunaqa may sinch'i warmis kanku, manaraj onqochejkuna chayashajtin ñapis onqonkuña.

20Dios yanaparqa chay onqochejkunata. Chayrayku israelitasqa ashkhayaspa astawan mirarqanku, astawantaj kallpachakorqanku. 21Onqochejkuna Diosta manchachikusqankurayku Diosqa mayta paykunata yanaparqa israelitas astawan miranankupaj.

22Chaymanta faraonqa tukuy llajtata wajyachispa nerqa: Kunanqa tukuy qhari wawas nacejkunata mayuman wijch'umuychej, warmi wawastataj saqellaychej kausajta.

Currently Selected:

ÉXODO 1: QCHSB

Highlight

Copy