ÉXODO 3

Dios wajyan Moisesta

1Moisesqa Jetro suegrompa ovejasninta michimoj. Jetroqa Madiampi sacerdote karqa. Uj p'unchayqa ovejasta qhatisqa ch'in pampasnejta Diospa jatun orqon Horeb nisqaman chayanankama. 2Chaypitaj Señorpa angelnin rikhurerqa uj zarza nisqa sach'api nina lauraj ukhupi. Moisesqa chay zarzapi nina larwashajta allinta qhawarerqa, nitaj chay zarzataqa q'olasharqachu. 3Chanta Moisesqa nerqa: Imataj kunan jaqayri! Mosqoychu sut'ichu? Rispa qhawarimusaj, jaqay sach'apis mana q'olanchuri!, nispa.

4Señorqa, Moisés chayta qhawaj qayllaykushajtaña rikuspa sutinmanta nimorqa chay nina larwaj ukhumanta: Moisés!, Moisés!, nispa. Paytaj kuticherqa kaypi kashani Señor, nispa.

5Chantá Señorqa nerqa: Ama qayllamuychu. Ujut'asniykita chakisniykimanta lluch'ukuy. Maymanchus qan sayashanki, chay jallp'aqa noqapaj t'aqasqamin. 6Chantá nillarqataj: Noqa ñaupa tatasniykej Diosnin kani, Abrahampata, Isaacpata, Jacobpatawan. Moisestaj chay kikimpacha uyanta pakaykukorqa, imaraykuchus manchachikorqa Diosta qhawariyta. 7Señortaj nillarqapuni: Cheqamanta noqa rikuni imaynatachus aylluy Egiptopi ñak'arisqanta. Uyarini mayta qhaparikusqankuta capatazkuna jasut'isqankurayku; allinta yachani ñak'arisqankuta. 8Chayrayku uraykamuni egipciospa makinmanta, atiyninmanta ima orqhonaypaj; chay jallp'ankumanta orqhospa sumaj jatun jallp'aman pusanaypaj, mayqempichus lechewan misk'iwan yaku jina corrishan chayman. Chay jallp'apeqa tiyakushanku kay runas: Cananeos, heteos, amorreos, ferezeos, heveos, hebuseos ima. 9Noqa uyarini Israelpa wawasnin maytapuni mañakusqankuta, chantá rikullanitaj egipcios paykunata maytapuni ñak'arichisqankuta. 10Chayrayku kunanqa jamuy, qanta kachasqayki faraonman, aylluy israelitasta Egiptomanta orqhomunaykipaj.

11Chantá Moisesqa Diosman nerqa: Pitaj noqa kani faraonman rispa israelitasta Egiptomanta orqhomunaypajri?

12Diostaj kuticherqa: Noqamin qanwan kasaj, kay señalta qosqayki, noqa qanta kachasusqayta yachanaykipaj. Maypachachus aylluyta Egiptomanta orqhomunki chaypacha, tukuyniykichej kay orqopi yupaychawankichej.

13Chanta Moisesqa nillarqataj: Sichus noqa rispa israelitasman nisaj: Ñaupa tatasniykichejpa Diosnin kachamuwan qankunaman, nispa; paykunataj tapuwanqanku: Imataj sutin kasqari?, niwanqanku chayqa, ima nisajtaj noqari?, nispa.

14Chaypacha Dios nerqa: NOQA KANI PICHUS KANI CHAY. Chantá nillankitaj israelitasman: NOQA KANI nej Dios qankunaman kachamuwan, nispa.

15Chantapis Diosqa nillarqataj Moisesman: Ajinata ninki israelitasman: Señor, ñaupa tatasniykichejpa Diosnin, Abrahampata, Isaacpata, Jacobpata ima qankunaman kachamuwan. Kay suteyqa wiñaypajmin kanqa; kay suteyqa wiñaypa wiñaynintimpaj mirayniykichejnejta yuyarisqa kanqa, nispa. 16Chayaspataj tukuy israelitaspa kurajkunasninta tantachinki, paykunamantaj ninki: Ñaupa tatasniykichejpa Diosnin, Abrahampata, Isaacpata, Jacobpata ima rikhuriwaspa kay jinata niwan: Noqa qankunata qhawarimushaspa rikuykichej, imaynatachus qankunata egipcios ruwasqasuykichejta. 17Chantaqa nillawantaj, Egiptopi may llakiyta ñak'arinaykichejmanta kacharichinasuykichejta; pusasunaykichejtataj lechewan misk'iwan yaku jina corrishan chay jallp'aman, maypichus tiyakushanku, cananeos, hiteos, amorreos, ferezeos, heveos, jebuseos ima, chayman. 18Jinata nejtiykitaj kasusonqanku; chaymantataj paykunawan khuska rinki Egipto reyman, chayaspataj ninkichej: Señor, hebreospa Diosnin taripawayku; chayrayku kunan risqayku kinsa día puriyta ch'in pampanejta, uj rikuchikuta Señor Diosniykuman jaywamunaykupaj, nispa. 19Chaywampis noqa yachani allinta, Egipto reyqa mana munanqachu rinaykichejta, Diospa atiyninta rikunankama. 20Chayrayku noqaqa atiyniyta rikuchisaj, tukuy egipciosta nanachisaj, ashkha jasut'iykunata señalesta ima rikuchisaj, chaymantaraj saqesonqachaj llojsinaykichejta. 21Noqa nisaj egipcios israelitaspaj k'achas kanankuta. Qankunaqa ripushaspa mana makisniykichej ch'usajllachu ripunkichej. 22Sapa uj warmi mañanqa qayllampi kaj warmismanta, chayri piwanchus tiyakun chaymanta, imaschus qolqemanta, qorimanta, ruwasqasta, p'achasta ima. Chaykunata qhari wawasniykichejman qonkichej, jinallataj warmi wawasniykichejmampis, paykuna churakunankupaj. Ajinamanta Egiptota ch'usajta saqenkichej tukuy kapuyninkumanta.

Currently Selected:

ÉXODO 3: QCHSB

Highlight

Copy