GÉNESIS 11
11
Babel torre
1Chay tiempopi tukuy runas uj parlayllata parlaj kanku. 2Inti llojsimuynejmanta llojsimuspa tarerqanku uj pampata Sinarpi, chaypitaj qhepakorqanku unayta tiyakunankupaj. 3Uj pachataj ninakorqanku ujkuna ujkunawan: Ladrillosta ruwanachej chayachinataj ninapi. Chayta ruwarqanku rumej cuentanmanta mach'ata chhajwatawan chajruykuspa. 4Chaymantataj ninakorqanku: Kunanqa ruwanachej uj llajtata, uj torretawan, chay janaj pachaman chayanampaj. Ajinamanta noqanchej sumaj atiyniyoj nisqas kananchejpaj, amataj tukuynejman ch'eqerananchejpaj.
5Señortaj uraykamorqa chay llajtata qhawarej, chay torretawan runas ruwasqankuta. 6Señortaj nerqa: Runaqa kunan sumaj ujchasqa kashan, uj parlayllatataj parlanku, jinamanta kaytaqa ruwanku. Manataj kunanqa pipis saqenqachu kay ruwasqankuta.
7Kunanqa jaku uraykunachej parlayninkuta chajroj, parlasqankuta ama entiendenakunankupaj.
8Ajinata Señorqa tukuynejman ch'eqeracherqa. Paykunataj chay llajtata ruwayta saqeporqanku. 9Chay cheqapi Dios chajrurparerqa runaspa parlayninkuta tukuynin jallp'a patapi; chaynejmantataj tukuynejman ch'eqeraporqanku. Chayrayku chay llajtajta sutin karqa Babel.
Sempa miraynin
10Kaykuna karqanku Sempa miraynin. Jatun musphay paramanta iskay watanman Semqa pachaj watasniyoj karqa, Arfaxad wawan naceshajtin. 11Chay qhepata Semqa phishqa pachaj watastawanraj kausarqa, wawasnintaj karqanku qharis chanta warmis ima. 12Arfaxadqa karqa kinsa chunka phishqayoj watasniyoj wawan Sala naceshajtin. 13Chaymanta qhepaman Arfaxadqa tawa pachaj kinsayoj watastawanraj kausarqa, wawasnimpis karqankuraj qharis, chanta warmis.
14Salaqa kinsa chunka watasniyoj karqa Heber wawan naceshajtin. 15Chay qhepata Salaqa tawa pachaj kinsayoj watastawanraj kausarqa, wawasnintaj karqankuraj qharis, chanta warmis.
16Heberqa kinsa chunka tawayoj watasniyoj karqa wawan Peleg naceshajtin. 17Chay qhepata Heberqa tawa pachaj kinsa chunkayoj watastawanraj kausarqa; wawasnimpis karqankuraj qharis chanta warmis.
18Pelegqa karqa kinsa chunka watasniyoj Reu wawan naceshajtin. 19Chay qhepata Pelegqa iskay pachaj isq'onniyoj watastawanraj kausarqa; wawasnimpis karqankuraj qharis, chanta warmis.
20Reuqa kinsa chunka iskayniyoj watasniyoj karqa wawan Serug naceshajtin. 21Chay qhepata Reuqa iskay pachaj qanchisniyoj watastawanraj kausarqa; wawasnimpis karqankuraj qharis, chanta warmis.
22Serugqa karqa kinsa chunka watasniyoj Nacor wawan naceshajtin. 23Chay qhepata Serugqa iskay pachaj watastawanraj kausarqa; wawasnimpis karqankuraj qharis, chanta warmis.
24Nacorqa karqa iskay chunka isq'onniyoj watasniyoj Taré wawan naceshajtin. 25Chay qhepata Nacorqa pachaj chunka isq'onniyoj watastawanraj kausarqa; wawasnintaj karqankuraj qharis, chanta warmis.
26Tareqa kinsa wawasniyojña karqa qanchis chunka watasniyoj kashaspa. Chay wawasnintaj karqanku Abram, Nacor, Harán ima.
Tarejpa miraynin
27Kaykuna kanku Tarejpa miraynin. Pay karqa kinsa wawasniyoj, chaykunataj kanku Abram, Nacor, Harán ima. Haranqa Lotpa tatan karqa. 28Pay wañuporqa tatan Taremanta ñaupajta Caldea Urpi, maypichus nacerqa chay kikin jallp'api.
29Abram casarakorqa Saraiwan, Nacortaj Milcawan. Chay Milcaqa karqa Harampa wawan, ñañantaj karqa Isca. 30Saraipataqa mana wawasnin karqachu, payqa manapuni wijsallikuyta atejchu.
31Tareqa caldeospa jallp'an Urmanta llojsiporqa, Canaán jallp'aman rinampaj, pusariykukuspa Abram wawanta, allchhin Lotta, ñojch'an Saraitawan. Rispataj Harán jallp'aman chayarqanku, chantaqa kikimpitaj tiyakorqanku. 32Tareqa Harán jallp'api wañuporqa iskay pachaj phishqayoj watasniyoj.
Currently Selected:
GÉNESIS 11: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
