GÉNESIS 14
14
Abram kacharichin Lotta
1Chay tiempopi Amrafel rey karqa Sinarpi, Arioctaj Elasarpi, Quedorlaomertaj Elampi, Tidaltaj Goimpi. 2Paykuna guerrata ruwarqanku Sodoma rey Beraj contranta, Gomorra rey Birsaj contranta, Adma rey Sinabpa contranta, Zeboim rey Semeberpa contranta, Zoar reypa Belaj contranta ima. 3Chay phishqa reyes soldadosninkuta tantaykorqanku Sidin vallepi, maypichus kunan kashan mar k'ara qocha chaypi. 4Quedorlaomer reyqa chunka iskayniyoj watasta paykunata kamacherqa, chunka kinsayoj wataspitaj kinsantin reyes nerqanku maqanakunankuta paypa contranta. 5-6Qhepan watataj rey Quedorlaomer, pi reyeschus paywan karqanku chaykunawan rerqanku Astarot Karnaimman, chaypi atiparqanku refaitasta. Chaymantataj zuzitasta Hampi atiparqanku. Savequiriataimpitaj emitasta, Seir lomaspitaj atiparqanku horeosta, qhatiykorqankutaj Parán pampakama, chaytaj kashan ch'in pampa qayllapi. 7Quedorlaomerqa pischus paywan kasharqanku chaykunawan kutimushaspa chayarqanku En-mispatman, uj sutintaj Cades karqa. Chaypacha tukuyninta tukucherqanku risqankupi imawanchá tinkukorqanku chaykunata, amalecitaspa jallp'annejpi. Jinallataj amorreostapis wañuracherqanku, paykuna tiyakorqanku Hazezon-tamarpi. 8-9Phishqa reyes ujchakuspa ujllapi maqanakoj llojserqanku: Sodoma rey, Gomorra rey, Adma rey, Zeboim rey, Zoarmanta rey Belawan ima; paykuna maqanakorqanku Sidim vallepi, tawa reyespa contranta: Quedorlaomerpa contranta, Tidalpa contranta, Amrafelpa contranta, Ariocba contranta ima; paykuna karqanku reyes Elammanta, Goinmanta, Sinarmanta, chanta Elasarmantawan. 10Sidim vallepi ashkha t'oqos karqa mach'awan ruwasqas. Sodomamanta rey, Gomorramanta reypiwan ayqeshaspa urmaykurarqanku chay t'oqosman. Wakin reyestaj orqosman ayqekorqanku.
11Atipajkunaqa tukuy kaj chhikata sakeyaspa apakaposqanku Sodomamanta Gomorramantawan, jinallataj mikhuykunasninkutapis. 12Abrampa sobrinon Lotpis Sodomapi tiyakushaspa jap'ichikullarqataj, payta presota aparqanku, jinallataj imanchá tiyaporqa chaytawan. 13Uj runataj ch'ajwamanta ayqemuspa hebreo Abramman willarqa imaynachus kasqanta. Pay tiyakorqa amorreo Mamrej encinas sach'arara jallp'ampi. Mamreqa Escolpata, Anerpatawan wauqenku karqa; paykunaqa karqanku Abramman sayasqas.
14Abramtaj sobrinon preso kasqanta yachaytawan, wasimpi nacekoj kamachisninta tantarqa; tukuynimpi karqanku kinsa pachaj chunka pusajniyoj qharis. Chaykuna sumajta wakichikuytawan qhatiykorqanku Dan llajtakama. 15Uj ch'isitaj Abramqa, tukuy kamachisninwan reyesta muyuykuspa ujllata maqarqanku. Chaymantataj qhatiykorqanku Hobakama, chaytaj kashan Damasco llajtamanta patanejpi. 16Qhechorqankutaj imastachá aparqanku chayta. Ajinata Abramqa Lot sobrinonta qhechukamporqa, imasninchá tiyaporqa chaytawan. Jinallataj qhechorqa, warmista preso kaj runastawan.
Melquisedecqa Abramta bendicin
17Abram maqanakusqanmanta, Quedorlaomerta, jinallataj paywan khuska reyestapis atipaspa kutimushajtin, Sodoma rey taripaj rerqa Save valleman, mayqenchus reypa vallen, nisqa chayman. 18Salemmanta rey, patapi kaj Diospa sacerdoten Melquisedecpis orqhorqa t'antata, vinotawan. 19Bendicerqataj Abramta kay jinata nispa: Patapi kaj Dios bendicisuchun, pichus janaj pachata, kay pachatawan ruwaj; 20yupaychasqa kachun patapi kaj Dios, pichus enemigosniykita atipachisorqa chay. Abramtaj qorqa tukuy imasta qhechusqasninmanta, sapa chunkamanta ujta. 21Chaymantataj Sodomamanta kaj reyqa Abramman nerqa: Kunanqa runasllata qopuway, tukuy imas kajkunatataj jap'ikapuy.
22-23Abramtaj kuticherqa: Señorman juraspa niniña, patapi kaj Diosman, pichus janaj pachata kay pachatawan ruwajman, qampata kajta ni imata jap'ikapunayta, ni ima q'aytullatapis zapatoyta wataykunallaypajpis, ama ni jayk'aj ninawaykipaj, noqaj imasniywan qhapajyashan, nispa. 24Manapuni imasniykitapis munanichu, qanmantaqa jap'isaj kamachis imastachus mikhorqankuña chayllata. Pikunachus noqawan rerqanku chaykuna, Aner, Escol, Mamre imaqa, paykunachá jap'ikaponqankupis imaschus paykunaman chayajta.
Currently Selected:
GÉNESIS 14: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
